2014
Census tawh kisai U Khin Ye in a genna ah (youtube sung ah na en ing),
tulaitak Kawl gam sung aa om Taiyintaa (ethnic groups)minam 135 lak pan
minam khat ciat khat ciat sung ah mimal bangzah om cih man tak aa
report piak diing cih thu hi. Legal recognition nei nailo (gentehna iin:
Zomi minam cih bang omlo) te'n zong a ut uh leh minam min "Zomi" ci
thei uh hi.
Ahih hang, "Zomi" cih pen legally recognized minam
135 te sung ah pa lo /kihel lo/om lo ahihman iin "Adang" (Others)
acihna mun ah kigelh thei hi(ahih hang "Zo" cih pen legally iin minam
khat iin a om sa cih ih theih diing kisam). Tua "adang" (Others) cihna
ah "Zomi" cih mi bangzah hiam khat in hong gelh diing uh hi. Tua te
kisim (count) diing aa mimal a tawm a tam hong ki et khit cieng iin a
tawm a tam tungtawn iin "ethnic" (minam) iin legal recognition hong
kingaihsut sak pan diing ahihi. Hong ki recognize leh Kawl gam minam
(ethnic groups) 136 hong pha diing cihnopna hi. Mimal ih tawm mahmah leh
(minimum requirement ih cin kei leh) minam 135 ban ah a 136 na minam
diing iin hong kibelap sak khol lo thei lai diing hi. "Zomi
minam" cih pen a sawt nai lo aa ih phuahtawm minam min ahih teh ih
hahkat mahmah kei leh legal recognition ngah zo lo kha diing hi hang. Ih
vekpi iin "Zo minam" kici nuam ziau leng bel tu aa ih buaibuaina
(legal, political, and social conflicts) te the betkhiat hong bang ziau
lel diing hi. Ih politician te'n a Zo a Sim kikhenkhenna diing iin na
hong semsem kei uh hen la ih kigawm, kithutuah theina diing na hong sem
uh leh ut huai mahmah sa ing.
Dec.1, 2013 ni Aung San Suu Kyi
Melbourne, Australia hong pai lai iin " ih minam min pen ei ut bangbang
iin kizangh thei lo diing hiam?" cih dotna om hi. ASSK in, " ei leh ei
ih ut bangbang aa kisaptheina pen democracy lampi hi. Kuamah hong
khaktan theih thu zong hi lo hi. Ahih hang, mi dang te a sukkhak diing
leh zat loh diing hi," ci'n dawng hi.
Gentehna iin, 2014
Census ciang Kawl kumpi te'n "Zomi minam" (Zomi people, Zomi National,
etc.) iin legal recognition hong pia uh hi leh "Zo minam" leh "Zomi
minam" nih iin hong kikhen pah diing hi. Ih tawm ban ah kikhen tohtohna
hong suak diing iin ka mu hi. Tangtawng pek aa kipan "Zo" min a manlohna
diing a na kemkem Zo te'n phuahtawm Zomi minam sung ah hong lut nuam
khol lo kha diing uh hi. Hih bang himawk leh adiakdiak iin Tedim leh
Tonzang township sung aa om Zo leh Sim te unity neihna diing hong haksa
semsem kha diing hi. Bang hang iin Zo minam sung ah kigawm lel lo ih hi
hiam? "Zo" cih diing lah ut lo. "Zomi" lah kici nuam veve. Pu Zo pan aa
piang hi kei hang kici napi'n "Zomi" kici nuam veve. Mual sang a vot
gam aa teng te bek "Zo" kici hi cinapi'n, mual sang a vot gam "zo" lak
ah lah ten tuon lo in "Zomi" mah kici nuam veve.
"Zo mi" "Zo
minam" ci'n ih lai at dan khel ziau leng ngeina (culture) lah a kibang,
pau zong translate kul lo aa kithei teng kithutuahna hong piang diing
iin ka um hi.
Tua ahih kei aa leh bel...........................
No comments:
Post a Comment
ကျွန်တော်သည် ပညာရှင်တစ်ယောက် မဟုတ်ပါ ၊ ပညာသင်ယူနေသော လူတစ်ယောက် ဖြစ်သည်/
ပြောချင်တဲ့ စကားလေးတွေ ပြောနိုင်တယ်နော်