2014 Census vai lai ki gelh te tampi ih sim khin ciat a, tu in ngaihsut zia ding ki tel siang sin sen ta hi. Ka ngaih sut sut teh ei code ih neih sa a hi Tedim Code 424 mah zat ding thupi pen sa ing. Peemta a hih keei loh pi....Bang hang Code 914 zangh lai zang ding ih hia...Ngaih sut phat mah mah ding hi. Hun tawm cik om lai hi.Ki puah pha lai ni.
Tun Code ki cian a neisa Sanggam Zo te in Code 421, Sihzang te'n Code 415 zat ding 100% lung kim khin uh hi. Tu lai tak Khuano sang gam ten zong a mau Code 407 zat sawm in Sozang,Suang Pi, Phunom, Thaang nuai, Lai bung .....etc....cih Khuano khua tengah campaign a ki bawl san lai tak hi ci in ki gen hi.Ka cih nop na ah Code Nambat nei sa te in eima Code nambat ciat zat hamtang ding pen a thupi pen hi.
Ei Tedim Tonzang gam ah Pasian thu hong tunh zawh kum 100 val, Lai ( Litterature) hong tun zawh kum 100 val ta hi na pi'n Pasian mai leh mipi te maiah a man lo zuo thu ki gen ngam lai mawk hi. Zomi a ki ci minam kawlgam minam list 135 ah ki hel lo hi ci pong mawk. Zomi cih minam a tuam (seperate) in om ngei lo hi. Tu dong zong om nai kei lai lai ei. Zomi minam pen a tuam in a om hi lo a, mite hong theih na ah
Zomi = Laimi = Chin cih a vek pi in a khiat na khat bek hi. Ei Tedim kampau teng in Zomi cih min aituam in neih theih nang' thu om hio lo hi. Tua hi in Tedim kampau a zangh teng Code ki cian nei ih ki sak kei leh Tedim Code 424 zat luat ding hi.
Ih theih sa Peemta Code No 914 ih zat leh bel ki naak sup mah mah ding hi cih hong thei sak nuam ingh. Hun khat teh ki siik mah mah nu teh. Pawl khat in Code No 914 a deih lote Anti Zomi ki ci hi. Anti Zomi pen tua hong gawh te hi zaw hi. 1953 kum in Sia Hau Go in ZBC ( Zomi Baptist Convention) min tawh a hamsa tampi phul in hong pan tah hi ta mah leh Zomi min a deih phadiakei teng mah in Ankuang ( Pakan) tutphah khat khawng deih na lel tawh ki tai san ngam mawk hi. Tua te pen ke'n Anti Zomi a ci hi pah ingh. Tonzang District ih ngah zawh loh na zongh Zomi a deih pha diak ei Tedim kampau Zomi te mah in ZBC ih nuut siat man in Pasian khalna (dan) tawh ngah ding ki lawm napi'n ki ngah lo hi a ci nuam hi ingh. Mailam ah pil vang ta ni. Pil hun mah mah ta hi.
Ei Tedim kampau te pen CHIN te khut nuai ah ki om zen zen ngei lo hi. Pasian in ki itna hi ( God is Love ) ci ngak ngak na pi hangin ih sang gam Zomi pih ( Chin) dang te ih it zawh kei le zongh a mawkna hi lel hi. Na gal te na ngawn it in ci hi ven..tua te ih sang gam te vi ve hi lo maw...It sawm beek lo ih hia.?..A mau ih gal ( enemy) te ih hih zen zen lo pi ma taw...CHIN = ZOMI = LAIMI equal level hi lel hang. Kawl gam ah ih om lai siah Chin min tawh ki pelh zawh nang om tuan kei. Chin te khut nuai mi ki hi tuan lo a hih teh ei zong inn teek hi lel hang.
A nunung pen kong gen nop in nah kei belh Census ah ke hel zo lo ding ka hih hang ka mel theih tanau teng leh ka theih pih teng kheempeuh tungah ka vai khak thu in tu tung mi ki simhna 2014 Census ah Tedim Code 424 mah zat ding hi ka na ci khin zo hi. Eima Code ciat ah hang san tak in zat ciat ding hi. Peemta ( Rohinja ) te tawh level ih hih loh lam ki thak phawk ni cih hong thei sak nuam ingh.
Eima ngaih sut bang ciat in democracy zia tawh ih kikup theih lung dam hi.
Deih sakna lianpi tawh
Deng Do Thang
Note: 2014 Census ah Tedim pan Pu Sing Kho Mang lai at article pen hoih sa pen ingh.
No comments:
Post a Comment
ကျွန်တော်သည် ပညာရှင်တစ်ယောက် မဟုတ်ပါ ၊ ပညာသင်ယူနေသော လူတစ်ယောက် ဖြစ်သည်/
ပြောချင်တဲ့ စကားလေးတွေ ပြောနိုင်တယ်နော်