Dear ZO vannuoi,
Census vai tawh kisai in Kawl kumpi ei cieptena ahi, Code-421 "ZO" vai tawh kisai mipi tung ah telgen nading in, Yangon pan GZO Secretary Sie Leet Suon Khai leh Pu ZO news Chief Editor Rev Kam Khen Dal te 19.2.2014 in Yangon dingto gel aa, Zo Minam Ni(Zo National Day) pen Sie Leet Suon Khai in Nangkateih khuo ah siim in, Rev Kam Khen Dal in UZO(Kalay) te vaihawmna ah kihal in mipi mai ah, March30-April10,2014 ciengin Kawlgam mi kisimna ah Code-421 "ZO" beh lienma ih at ding a hibo hi, a tuomtuom ih at khah leh Mi Sumsop, Mi Lahlaw, Mi Langkhe ih suoh ding hi" ci thu ciengenna nei thei hi.
21.2.2014 in, USA pan ang haw Tg Thang Do Lien leh Rev Kam Khen Dal'ten Kalay University ah Zo Sangnaupang te tawh kimutuana nei in, mi-60 val om lah ah dintan vaihawmna ahiman in mi-36 beh kihal thei in, holimna leh thunget piehna zong va nei thei hi aa, ZUSF makaite in zong a ma'u kitasapna te vuh thusunna nei vuh hi.
Tonzang Myonee sung na sepna ah Zo Khangno Kipawlna(Zo Youth Organization) te tawh kithua in, Zo khuo cin teng ah motor cycle tawh zin kawikawi in, India gamgi Khuoivum, Vanglai, Khuoivum Vengtha, Chikha dong ZKK makaite sung pan group-2 in kikhen vuh aa, pawlkhat Lomzang, Taazang, Salzang, Phuntong lam zin hi. Senam, Thuombuol, Lennakot, Anlun, Gelmuol, Khienglam, Nahzang lam zong group masa te zin kia hi. 2.3.2014(Sunday) zingmawng 7:00-9:00AM dong GZO, UZO, ZKK makaite in Phaitu khuo ah Hausate vaihawm siemna tawh Census vai hoitah leh limtah in kigen thei aa, nitah 2:00-4:00PM dong, Tonzang, Zo Tuiphum Pawlpi biehinn ah Mipi-270 bang kaikhawm in Code-421 "ZO" ma zah ding vai kigen hi.
Khuolzin kawikawina inn cin baangkam ah Census vai tawh khuolzinte mu tehteh dingin "421-ZO" cin ki at vangiam hi. tua ban ah Census Form zong in cin ah ki sieng sut aa, Vynl zong a khuokhuo ah kisuong kawikawi hi.Tuami Vynl tung ah lai ki-at pen "Kawlgam Mi Kisimna, March30-April10,2014, Kawl Kumpi Ei Cieptena, CODE-421 "ZO" beh lienma at bo in, a tuomtuom na at leh MI SUMSOP, MI LAHLAW, MI LANGKHE na suoh ding hi. "Koima'n Kisolsah sih Vun"(2 Thes2:3)" tam teng laimal golpi in ki at a hihi. Tedim myonee pen tu laitah mi kim theilo ding a himan in March hlatawp lam cieng ang pei vun ei kici zieh in, Gamngai kuol a dingin a hausa te tawh kimu tua in a khuokhuo a dingin Form teng leh Vinyl te kang pia ta vuh aa, a mau zong koima a pelem lo ding ma in a kigingsa ka hi vuh hi ei ci vuh aa, Niengtui awm in thugenna pen a sawtlo in ZKK pan nasem ding vuh hi.
Tamu myonee sung ah a thupi penpen ahi Tungkyaw-Yuatha lam pen KUKI ten 914 ah ih at ciet ding hi cin kamciem na la vuh aa, koiman sang ngam nailo in, Tungkyaw-Tuatha pen a khuo tuolpieng thugen a kiva mama Zo gam Bawi Nieng upa Pa Khai Bem mawpuohna kang pia ta vuh hi. a koikoi tawh ka kiho ciengin Khai Bem val in Tungkyaw-Yuatha a zo omlo ding ei kici hi. Tamu UZO te tawh meeting ka nei cieng vun Tamu leh a kiim a teng ah na zin kawikawi va vung cin UZO(Tamu) le ZYO(Tamu) kipawl ding a semton ding a hihi. tuami kiim a dingin 200000/- pen UZO President pa khut sung ah committee te mai ah GZO in apna kinei hi.
Khampat pen UZO in khatvei a peisa ahima bangin a sawtlo in ang peikia ding vuh ahiman in lung himaw ding om sih Go Suum ki khawl sah langkalsia ang hoi mama ta hi. Be le phung makai lam te ma kaikhawm a na sepna ahiman in, UZO ma in na sem leh hoi zaw ding hi ei ci zieh vun Hausa te tawh ki thuza kia in a kisap na bangbang a sep thei dingin, Upa pawlkhat tawh kihona kang nei vuh hi.(23.3.14 in Khampat a kihopi ciengin, Yangon pan zinto kia ding liengin kisam nawnlo ci vuh hi-lungdam huoi).
Tuikhal ah Sie Leet Suon Khai(Secretary), Pa Thang Lam Khup(Assistant Secretary) Kawlpi pan Pa Hau Lam Mung, Tamu pan Pa Kham Khen Thang leh Rev Kam Khen Dal te 18.3.14 in va zinto vuh aa, Hausa pa in, "Tulaitah pen mipi kaikhop ding bailo ding hi, kaikhawm lei mi-20 kann ang kihallo ding hi, Sie Thangno(Yangon) vaihawm siemna tawh Tui pipe nasep ka kin mama laitah vuh a himan in, Census vai pen na Vinyl te vu khuo sung ah mun-5 bang beh ah kisuong a himan in mun-20 ah suong vai, Niengtui awm a thugen ding sangin ko ma le koma Tui nasepna ah sun ka tawlngah laitah vun tuisa awm in na gen vu leng lemtang zaw ding hi a ci man in koteng zong thukim in Hausa pa vai zosie GZO in apna nei ta hi.
GZO kalsuon na nuasang teng pen UZO in zong na sem lai ding ahiman in lungdam huoi hi, Sie Lienbawi te pawl in septon ding ma leh nivei sem lei zong pi cing zaw ding hi ci vuh aa, ZBA Khawmpi ah zong 8.3.14 zan lam Hunpi sung in, mipi 1000 val mai ah, Rev Kam Khen Dal in Chairman sem kawm a himan in, Census vai minute 10 sung genna neithei aa, hunpi manzaw in UZO pan Sie Lienbawi in zong genna nei lai hi.
GZO in March30,14 masang teitei in, a kisapna bangbang in a khuokhuo a hausa te tawh ki thuza in na zinto kia pai ding vuh a hihi. Vinyl pen 100 bang bawlbe dingin ki ngaisun hi.
"Sepna omlo hi leh khielna omlo ding hi" sepkhiel leh kicinla nate a hun lap in kivan paipai ding hi. Census vai khuolzinna Maan(Photo) te pen "zo.dalpu" Facebook ah ki en thei hi.
Mipi deina dungzui in Pu ZO news a manlang penpen in Census masang in khatvei kihawm kia ding hi.
Khris le Zo minam a dingin;
GZO Patong te
Yangon.
No comments:
Post a Comment
ကျွန်တော်သည် ပညာရှင်တစ်ယောက် မဟုတ်ပါ ၊ ပညာသင်ယူနေသော လူတစ်ယောက် ဖြစ်သည်/
ပြောချင်တဲ့ စကားလေးတွေ ပြောနိုင်တယ်နော်