ZO TATZIA By Pu Kham Khan Mang

Thu Makai

Nidang lai in Zogam sungah, i pute i pate kumpi nasem leh sum zon paai zonna a nei kua mah na om loin, lokhawh singpuak leh sa bet zunun bek kidemna-in na nei uh hi. Mi buppi pen, dawi bia bekbek na hi uh hi. Ngeina zong a khangkhangin a kilamdanna om loin na kizui toto-in, kibang paisuak hi. Tua mah bangin "Tatzia" zong na kilamdang loin, na kibang paisuak hi. A diakdiakin, kiten zia, si kivui zia, sa sem zia, sa piak zia, mo man neih ziate a kipan na kibang mang hi.
Ahih hangin, 1896 Mangkangte hong tuna kipan, a kikhel tampi na om a tua pen a tam penah biakna hang na hipen hi. Khua khat leh khua khat kigal neiha kisim cihte na om nawn loin, Pasian'thu zong na tungin Pasian bia zong hong omta hi. Pute pate in biakna dang na thei loin, nidang lai a Pasian biate Tapidaw na kici-in, Tapidaw a suak khat om leh, mi mangin na ngaihsun uh hi. Lawki ngeina nusia ahih manin, U leh naute in za nuam loin, Lawki a suah nadingin kho uh hi. Tua banga a kikho zo lote u sung nau sungah lang bawlin, pua koih uh hi. Natna satna leh gilkial dangtakna ah huh lo uh hi. Beh sung mi in sim nawn lo hi.

Tua bangin Tapidaw suak khat a om ciangin kipua paih ahih manin, u leh nau nei lo hong suakta hi. Tua ahih manin, khua sung leh khua kiim khua paam a Tapidaw a suak khempeuh ki-it sakin, kipumkhatsak zawsop hi. Tapidaw teng asi amang zongin, ana asa zongin kikom lo phamawhin na omta hi. Amau teng kikom kidon bek tham loin, u khat nau khat in kibawlin, a neihsa uh u leh nau, beh leh phung, tu leh ta sungh leh pu cihte kol loh nawn loin Tapidaw teng kipawl khatin hong omin kituam pawlta ahih manin, si leh sa ahi u sung nau sung, tu leh ta sung, sungh leh pu sung, a gamtat zia teng na khelmangin, Tapidawte in tatzia thak hong nei uh a, a dang tawh kisu nawn loin hong om uh ciangin, mo man hong phiat uh hi. Misi ni thum sung bek koih uh hi. Pawl khat bangin, Zo ngeina pen biakna sa kha zawzen kikin Khuado pawi, Sialsawm kicite phiatin Tapidawte pawi pen, kumthak, thawhkik, Lungdambawl bek hi na cita uh hi. Tatzia lui khempeuh na phiat ta uh hi. Hih pen Zokam paute sungah nakpi-in uang diak hi.

Tuhun khang ciang leuleu-in, mi khempeuh Tapidaw kihiphialta ahih manin, khuate khatkhatah Lawki beita-a, Tapidaw bekbek kihikhin ahih manin, khua zang bupin ah kipawlin, khua kido thei lo, a kiteng peuh Tapidaw leh Tapidaw mah hita ahih manin, Khua kido leh beh teng kipawl, sial kisawm leh beh teng kipawl cih bangin hong om to leuleu hi. Sa kigawh leh Tapidaw leh Tapidaw sa kigawh ahih manin, a kitawm hun lai bang nawn loin, sa hawm mah na kulta hi. Kiteng ahi-a, sa kigawh ahi zongin, sa hawmnate ah ngeina leh Tatzia tawh kituak a bawl hong kul kik leuleu hi. Tua bang ahih manin, i ngeina leh i tatziate kithei nawn loiin, a vanglak khatin ki-omta ahih manin, i nusiatsa ahi, Zo tatzia ahi biakna kisa-a, a kinusiate i zatna ah aman-a, a kizat theih nading mahmahin kikan kik nahi hi.
Tua ahih manin Tedim gam sungah a kibang lo ngeina leh tatzia pawl khat na om a, tuate in Dim tatzia, Teizang tatzia, Saizang tatzia, Zo tatzia cihte na om a, tu-a i-at pen Zo kampaute tatzia ahi hi. A kim ahi zo kei zongin, a kisam pha diak teng kikan a ki-at ahi hi.



Thu kaikhawm -

Kham Khan Mang
Sa/27,40
Sakollam, Tedim

Thu Masa

Tuhun ciangin leitung khantohna tawh kizui-in, ih minam leh ih gam a it a, a laamto nuam ih minam akip akho sak nuam, minam a it ih mipil pawl khatte bawlsa laibu tuamtuamte sung panin Zomi hihna bulpite ahi ih Zo ngeina, zuthawl kipiakna, kiteen kipina, zuhawm sahawm daan a kipan, pu zu kholh, meelmuh, moman piakdaan, mo sagawh, tonna haanna zu nunna tuamtuam leh ih Zo ngeina tuamtuamte thei thei, sim thei zel ihih manin lungdam huai hi. Tua mah bangin tua banga a kigelh hih Zo ngeinate sung panin a bulpite a kipelh sam loh hangin, ih teen ih giahna mun zui-a, a kilamdanna a kipelhnate zong atawm atamin ih mu thei hi.
Tua banga a kipelh theihna thute ih kan ciangin ih laak masaknate, ih teen ih omna ciatah, ih zatdaan pawl khat ngeina a suak zong om a, tua mah bangin ih khua ih veng in ih zat nawn loh ih ngeina abei pawlkhat na om lai hi. Zomi ih hih manin ih ngeina a kibang khin ding kimlai damdama, a sawt cianga ong kilamdan theihna tua bang teng hang hizaw hi. Tu bang hun ciangin Pasian thu zui na ah ton leh taang aih, sa-aih zu nunnate ong om theih nawn loh ciangin khang thakte bangin tua banga ih ngeina hoihpite thei nawnlo uh hi. Minam a it a khual ih mipil neih sun teng beekin tua banga ih Zo ngeina zaatdaan, la a kipan ih Zomi hihna a keem vante laibu sungah a kisim thei den dinga ih koih ih gelh tek ding kisam mahmah hi.
Tua ahih manin hih banga ih Zo hihna akeem, ih Zo ngeinate eite khangin a kizang nawn takei zongin, Zomi kici peuh in, tua Zo ngeinate keem lo, thei loin om lehang ih Zo hihna zong ong sukha thei, beisak thei ding ahih manin taang lai ih pu ih pate hun lai-a, a kizangh bangbang ih Zo ngeinate hih ZO TATZIA sungah a maan thei pen dingin ong kipulaak hi. Zo tatzia, Zo ngeina cihte pen Zo kampaute zaat bangbang amaan thei pen dingin kingaihsun ahih manin tulai taka Zo kampau te in nidang pu leh pa hun lai-a, sihna nopna, Ton leh haan, taang aih sa-aih, gualnop, zununnate a a zat bang teekteek uh in hih ZO TATZIA sungah ong kigelh, ong kipulaak thei suak ahih manin Zomi kici khempeuh in theih huai hi. A diakdiakin Tedim mi khangno, khangthak lam peuh mah in, ih theih tek dingin thupi kasa hi.
A diakdiakin hih ZO TATZIA laibu sunga a kigelh, tuni dong cianga ih zat den ahi, mo sagawh mo sapiak, zu tang tun cihte leh zu hawm, sa hawm- sa zeek, sa-at ziate taangtawng a kipan tuni dong them zong kikheel thei lo, phuak tawm a a vaal a kibawl thei lo ahih manin ngeina maan leh hawm daan zeek daan a maan pen a, a zangh a zui nuamte a dingin theih huai lua sa kahih manin deihsakna leh lametna lianpi tawh hih thute kong pulaak hi. Ih Zo ngeina ahi, kipi kiteenna, ahi zongin, zu hawmna sa hawmna ahi zongin, pu zukholh, melmuh, mo manpiak, mo kilak leh mo sagawh leh ton le haan cihte a tuamtuamin a ki-at kawikawi pen a kibawlsa lai tuamtuamte ah i sim thei zeel hi. Tuate sungah ngeina a tuamtuam ahih man i ton i haante zong ki-at in, a man tawh a man lo tawh i mu thei hi.
Dr. Monsignor Felix Lien Khen Thang
B.A. (Psy.), M.C.L.,D.C.L.
Nonciature Apostolique
Au Moroe
B.P. 1303 R.P.
Rabat. Morocco

Khawk - 1
Minam
Minam kici a bangci teng minam khat kici hiam, ci-in kidong lehang i dawnna kibang kim lo kha thei ding hi. Pawl khat in gam khat sunga teeng teng, pawl khat in kampau kibang teng, pawl khat in mel kibang teng, pawl khat in tatzia kibang teng cih leh pawl khat in sii kinai teng hi cih bangin kidawng kha thei ding uh hi.
Minam cih thu tel et lehang, a masa-in Pasian in vantung minam leh leitungminam ci-in, nam kici nih bek na piangsak hi. Vantung minam pen bangzah pha cih i theih loh hangin sim zawh lo-a, a tampi khat nahi hi. Leitung minam pen a cilin innkuan khat nahi phota, Adan leh azi Eva bek nahi hi. Tua panin khangtoto minam tampi na piang hi. Tua a khangtoto minamte eite in i lawh ciangin, a gam mina i lawh leh a lian pen a Pu uh min a nam min i lawh hong piang hi. Gentehna in: Gam minin, America mi, Sen mi, Japan mi, India mi, Kawl mi cih bangin a gam zui-in i lo-a, tua gam khat sung panin nam tuamtuam na teng lai-in, gentehna in, America gam sungah, Mangkang mi, mi vom mi, Sen mi, Kala mi, Kawl mi na teeng lai sawnsawn hi. Gam khempeuhah minam khat bek teenna na om loin, Kawl gam sungah zong, Kawl mi, Zomi, Kachin mi, Karen mi, Kaja mi, Mon mi, Zakhai mi, Shan mi banah Kala mi, Sen mi, Japan mi cih bang zong na om lai hi.
Tua panin ineu seek leuleu-in, Zomi a kicite sungah Tedim mi, Falam mi, Haka mi, Mindat mi, Khami, Matu mi, Kanpalet mi, ki-omta-a, tua nam khatte sung panin kineu seek kik leuleu-a, Tedim bangah Tedim mi a kici veve Zo, Sihzang, Saizang, Teizang, Khuano, Vangteh cih bang kikhen suksuk nahi hi. Hibanga kineu seekte i et pak ciangin kampau a kikhen tawh kibang na pi-in, na hi khin taktak lo zel hi. Gentehnan: Zo nam sungah a pu apa a kithei veve Zo mah ahi pawl khat pen Saizang pau, Teizang pau, Sihzang pau peuh a zang na om zel hi. Tua banah, mundang a om Zopau a thei nawn lo, Kala pau, Mang pau, Kawl pau na omin, kikan leeng Zo nahi hi. A tua banah tu-a namte banah kum tampi leitung a om lai leh mi kikhangin tam semsem ding ahih manin, tu-a namte sangin a tamzaw kibehlapin nam khang lai ding hi.
Nam a na kante in, Tedim mi bek hi lo Zo a kici mi khempeuh Pa khat, Nu khat hihang ci-in, la-in na phuak uh a, "Tun sung khata piang hi ngeingei" na ci uh hi. Tua ahih leh kitel kan lehang nam i cih pen kampau pen a pua lam etna hi a, a taktak pen sii leh sa kinai na hipen ding hi, cileng kikhial lo pen ding hi. A bang hang hiam cih leh pau kibang lo Kachin sanggamte pen si kinai ihih manin i behte i ci thei hi. Man hi. I sanggama, atuat i hi hi. Tun zong nam i kan leh sii kinai i kanding pen aman pen hiding hi, kici thei hi.
Khat veivei Zo kampau sungah, Zo ham lo teng midang hita hi kici thei hi. Tua pen kikhial hi. Zo kampau veve Yangon khawnga teengte'n Kawlkam bekbek zang uha Zo kam malkhat zong thei lo hi. Ahih hangin, anu leh apa pen i sanggam taktak nahi lai lel hi. Kampau tawh khen kei zaw ni.

Zomi Pianna Bul
Zomite pianna bul akan tampi na oma, a masa-in Sen gamah kiteengin, Mongolia minam hihang cih nahi hi. Sen gam laizang panin lalin Tibet gamah teeng uh hi. Tua panin Kawl gam kilut a, Tibeto-Burman min tawh na om uh hi. Tua panin Kawl gam laizangah teengin, tua pan saklam manawhin kikhin to-in, Chindwin gun zui-in pawl khat pai-in Khamtung mi nasuak uh hi. Pawl khat pen zang lei tengah na thaam uh a, Khang lam Zomi kici uh hi, cih thu kithu khat ciatin ki-om hi.
Zomite pen Mongolia minam pana piang i hih nak leh, Kawl gamah a tung masa pen minam i hi hi. Bang a kithei hiam cih leh Kawl gam taangthu kante in zong a genna uh a, Mongolia te Kawl gam atun hun pen AD 9th Century kiim hiding hi, na ci-a, Peithano khuapi zong a na phut hikha ding hi, ci uh hi. (ta]c]y? ]refrmódkifiHa\:ordkif: yxrwJG) Kawl gam taang hun cih thu khawk-1 laimai 174 ah kimu thei hi. Hih laibu sung mah ahi Khenpi-3 khawk-1 Pagan hun kici laimai 233 na sungah zong, Tibet-Burman suante Pagan kisiat khit Kawl gam laizanga, ateeng khinsa Pyu, Tet, Mon leh Palong suan leh khakte leh hong nungtung Tibet-Burman suante teeng khawm uh hi naci hi. Tet a kici mite pen Zomi a kisim ahih manin zong, Kawl gam laizangah taang pekin kiteeng khin ahihna kilang hi. Tua pana kithehthaanga a lalmang Khamtung Zomite i hihna kilang hi.
Tet a kici mite, Chin kici Zo minamte ahi cih Sukte beh leh Tedim gam Taangthu bu sung laimai nihna kilak hi. Mogolia nam pan Tet mi kihi-in, Kawl gam a laizang mun panin Kawl gam saklam a lal toto, Khamtung gam leh Kabaw kuam teng leh Pakokku gamsung tenga teeng i hihna kilang hi.
S.P. Kham Do Nang B.A., B.L., M.R.E. in ZO SUAN KHANG TAANG THU a atna sungah Zomite pianna hi bangin na-at hi. B.C. kum 2027 lai-in, Tibet gam a uk a min Jou kici om-a, a ukna pen Zo Dynasty na kici. B.C. 1000 ciangin tua kumpi Jou suan leh khakte Sen gamah saklam Kan Cho kicihna ah na lal uh hi. Tua minamte khang thak kumpite in na do-in athahmang ding alau manun, a min Jou pen Jen in na laih uh hi. Jen minamte gal tai uha, Pecking na tung uh hi. A galte atheih loh nadingin, Jen kici min pen Chin ci-in a min na laih leuleu uh hi. Amau in kumpi hong ngah uh ciangin Chin Dynasy kici Zo kumpi ali na, Chinkumpi in leitungah na lamdang a minthang mahmah sagih lakah khat ahi, kulhpi lian asau na tai 150 apha khat na lam hi. A lam kum pen B.C. 246 kum na hi hi. Tua kumpi pa min pen, a mite in Ni Nuai Mang na ci uh hi. Nau khat na nei-in tuapa min pen Song Thu Pi na ci uh hi.
Ni Nuai Mang in ta khat nei-in kum sagih pha khin napi'n, khang thei loin na om a, amah dahsak mahmah hi. A dahna dang khatah a annek sim a ameh lim pena, aneih a huansung singluang tunga po Pateh po nawn lo sawnsawn ahih manin a lung na sak mahmaha, aphat theih nadinga uliante adot ciangin, ni sagih sung "Tong" in zu leh sa tawh pawi bawl ding hileh hoih pah ding hi, na ci uh hi. Amah in zong na-um ahih manin ni sagih sung na "Tong" hi. Hih pen Zomite "Ton" kipatna hi. Thupi takin Tong ahih manin mi tam mahmah laam ahih manin lamgui duap kua-in kilaam hi. Pawi ni nunung pen ni-in, mipi in Pu Song Thu Pi laam ka mu nuam uh hi, cih ngen uh hi. Pu Song Thu Pi in kei hong laam leng, mi tampi si lua ding hi, ci-in na nial hi.
Mipi in a nget teitei uh ciangin, Pu Song Thu Pi in zong a zaangsan naam tawh na laam hi. A namsau vei vik leh avei lama teng, tak vik leh atak lama teng sikhin hi. Zangsan namsau cih minin, Kulhpi sungah hong sim lutte a om ciangin kimana, kumpipa kiang kituna, thah ding a cihte Pu Song Thu Pi kiang kitunin, amah in tua a namsau tawh na that ahih manin a namsau deeksi tawh kidim denin san hi. Tua ahih manin a min Zangsan Naam na kici hi. Pu Song Thu Pi lamna hanga mi tampi a sihna thu kumpipa Ni Nuai Mang kiangah va kiko a, a va-et ciangin mi tampi a si gaalmuh hi. Tua ciangin kumpipa in a sanggampa phunsanin, "Vanah na man nop leh mang in, lei-ah na man nop leh mang in," a cih ciangin Song Thu Pi zong khasia mahmah ahih manin, mundangah pai khiat ding na sawm pah hi.
Tua hun laitakin, kumpipa khua tawh kigamla a teeng kulhpi sung mahah nupi khat teenga baal leh kawlkai na ciing hi. Sakuh in a ante na nek saka, a lo a van ciangin Sakuh ling khat a kia mu hi. Hih pen ganhing gol mahmah khat i mul hiding hi, Pu Song Thu Pi bekin a man zo ding hi, ci-in tua Sakuh ling Pu Song Thu Pi a va lak hi. Amah in zong lamdang sa a, Sai, Zangsial, Humpi a kipan sa lian kamat loh om lo-a, hih zaha, amul gol ka man nai kei hi, ci-in a beng dingin a uital tawh na kuan khia pah hi. A khekhap pai na teng a zuihzuih uh ciangin, kulh taw a vang suak guam khat tuak uh a, tua panin kulhpua a tung thei uh hi. Tua kulh pua atun uh ciangin gam leh lei, singkung lopa nopci mahmah mu uha, lal khiat nopna lungsim na nei pah uh hi.
A nungteng zui kikin, Song Thu Pi inn atun ciangin mi pawl khat zawnin, Ni Nuai Mang theih lo-a, taai sim ding na geel uh hi. Ni khat mi 100 val ding tawh na tai sim uh a, tuate lakah Karen, Shan, Kachin, Naga, Meitei te in zong na zui uh hi. Kulhpua atun uh ciangin khua khat na sat uha, a min "Tungkhua" na ci uh hi. Kulhpi pan ataikhiatna uh kua vang pen suang tumpi gol mahmah tawh kihu hi-a, tua suang pen pasal mi 30 bang bekin hong zo hi na ci uh hi. Tua pen "KHULPI" kici leinuai khua pan leitung khua pai na ci uh hi. Tua ahih manin, Ni Nuai Mang suan leh khaak teng tudongin Sen gamah om suakin, Song Thu Pite Tung khua-ah AD kum 200 dong teeng hi, kici hi.
AD 200 khit ciangin Tung khua na nusia uh a, Sen leh Kawl gam kikal Hong Ho, Yang Tes, Me Khong leh Tanluan (Saldwen) te kantanin na pai uh hi. A pai na uh ah, Tanluan gun lailipi a kici munah kantan uh hi. Tua hunin Pu Song Thu Pi in amahmah i kaih Sialkili nei pen dawi-in na matsak hi. Sialkili nei mang ahih manin gundung zui-in a zong suk uh hi. Tamlipi a kicihna mun a mu kik pan uh hi. Sialkili nei pen dawite ahi-a, dawite leh mihingte a kiho thei lai huna, mite'n phuisam siamna bek tawh a kingah thei ahi hi. Pu Song Thu Pi pen AD 600 pawlin Pun Te khua a ten lai un na si hi. Tua mun aten sung un , Shante leh Karente Saldwen gundung zui-in na pai-in gam na sat uh hi. Song Thu Pi suante in zong Pun Te khua nusia -in hong pai khia uha, Song Thu Pi tapa Za Hing makai-in, Kachin leh Nagate in Hu Kawng gam tawnin Shweli gun neu zui-in Irrawadi gunpi zui uh hi. AD 650-700 kikal sungin Zaa Hing si-a, Siing Mang leh Siing Pawte unau in makaih uh hi. Pun Te panin a tunna uh khua khua Be khua nusia kikin, Sing Meng masa-in gamlak tulak nawkin na pai uha, nahtang po na mun atun uh ciangin nahtang phuk gawp uh hi. A pai lai tak uha, Sing Meng nau Siing Paw pen ektha a zekai kha pen a u te pha zo loin, a nung delhdelhna ah, nahtang kisatte tuaka, tuate a lawndawn na sauta ahih manin pha zo nawn lo ding ci-in lungkia-in delh nawn loin tua munah khawl suak ta hi. A u a phawk mahmah a kimuh kik ding lamen ahih manin, a kimuh kik mateng a phawkna in a tempaai alang bek bawlin langsam sak se hi. U kisam ta cihna a lak ahi a, kituah zo nawn lo ahih manin, tuni dongin tempaai pen tua ci hih suak uh hi.
Tua pan, Zomite pen AD 1200 pawlin Kawlpi na tung uh hi. Kawlpi ah kum tampi mah na teeng uha, gamuk Mangte thuak lahna hanga, na lal khia uha, Zomite Kawlpi nusia, Khamtung gam tengah na kitheh thang uh hi. A thu pianzia pen Mangkangte a nuai-a bangin ciamtehna na nei uh hi.

APRACTICAL HAND BOOK OF THE CHIN LANGAUE- ASSISTANT SUPERINTENDENT BURMA FRONTIER, SERVICE 1925
(By L.B. NAYLOR, TEDIM CHIN HILL 14-12-1923)
Informer times only the Shans lived in the Kalemyo valley. While they were living there Manipur attacked Kalemyo. The Kalemyo people killed Hrang Ko the chief of Manipuries. Because they killed the chief the Kalemyo people won. The Manipur chief's grave still called "Hrang Ko's grave", to the present day after that the Manipuries again attacked Kalemyo, Then Kalemyo people were defeated, because cholera brokeout in the town. Therefore the Manipuries won but they did'nt administer or role the country. At that time a Burmese prince came from below Burma and governed the town and after wards built a wall all round the town. That was called the Kale' Palace.
In 1368 SAO SAWKE (1368-1401) a Shan Sawbwa (Chief) or prince became the King of the new Dynasty founded at AVA. He took the adventage of the quarrel between Kale and Mohnyin and annexed both State and replaced the Sawbwa (chief) with his relativen Kyitaungnyo his very ambitions nephew, became the Sawbwa of Kale, who even attacked Ava in 1425, circling the city for seventh months but failed to dethrone the King. In 1374 he built the "PALACE OF KALE.
It had a double moat, measuring 30 yards (30 m) wide and massive walls a kilometre square, enclosing an area of 234 acres. The remains of the massive walls of Kale city still stand to day two miles South of the present Kalemyo. During this time the people of the Kalemyo valley were fored to work very hard indeed. It is said that the fingers of the workers which were accidentally cutoff filled a basket. Therefore the people of Kalemyo, because they suffered too heavily migrated.
One group entered the Chin Hills by way of Yassagyo. They crosed the Manipur river and are now the Lushais. Later a group went up from the Kalemyo vacinity. These people camped on Kenedy peak. Up to the present time their cooking stone are still there. From the mountain they searched for a good place to settle. From Kennedy peak one party descended via Nawmkai Spur and settled at Ciimnuai near Saiyan. Another group followed down the Htung Spur from Kennedy peak and founded the village of Zangpitam. The people who lived at Zangpitam reunited with the people of Ciimnuai. There were many clans living in that village. Therefore that village is given as the historical birth place of the Chins. From that they separated again. One clan miggrated from Ciim Nuai to the mouth of the Natan lui from its mouth and founded Tuentak village. The founders of Tuentak village were the five son's of Pu Tuenthak called Ngengu, Nei Lut, Dai Tawng, Vang Lua and Non Zong.
Part of the Khuasak and Lophei are descended from Ngengu, Thuklai, Buanman and Liimkhai people are from Vang Lua and Tau Kon people are from Non Zong, Hin Nung and Hau Nung are the descendants of Dai Tawng. Nei Lut has a son called Nei Zo and Nei Zo has two sons called Vang Lawk and Gen Zo. Vang Lawk has a son called Dop Mul (Muanmul) and Dop Mul has five sons called Mulpi, Guuizo, Hanthual, Hawlhang and Kunhen. Gen Zo has two sons called Suan Te and Suan Khup.
The five sons of Ngengu are Lamtam, Khuakuan, Tungnung, Nantal, (a ta Tung Dim) and Phiam Phu, hi, ci-in lai mai 6 panin 15 dongah na at hi.
Rev. Za Cin in, 1972-73 ZBA kumcin thu ko kici laibu sungah laimai 49 pan a-atna-ah, Pu Zo pen Kawlpi khua-ah na teeng hi. Kawlpi kicia khiatna pen, i pute in, mualsang kitung viuveu pen 'Kawll na ci uh a, a tenna pan Thangmual kitung pen tamin, Kawllpi a cihna in tu-in Kawlpi a ci i hi hi, ci hi. (Tong Lawn kawll) i cih bang hi, ci hi. Kawlpi panin Pu Song Thu makai-in, Thangmual hong kah uha, Thuamvum hong tun uh ciangin, tenna ding gam hong galet uh hi. Pawl khatte Thuklai lam zuanin pai uha, pawl khatte Saizang ngalzangpi mun zuan uh hi. Saizangah khanggiat na teng uha, tua panin Ciimnuai ah khangguk na teng uh hi. Ciim Nuai panin Zomi nam thumin kikhen uha, pawl khat Tualzang khua nasat uh hi. Tuate pen tu-a Zo i cih leh Tedim mi i cihte hi-a, khang kua sung na teng uh hi. Pawl khatte Thuklai lam zuanin na pai uha, Sihzang mi na kici uh hi. Tuate sungah Suantak naupa a monu in Sialdawi a kithoihna hangin lungkim lo ahih manin, nuaktai-a Phaiza khua nasat hi. Zote pen Tualzangah khangkua a ten khit ciangin, Geelzang khua nasatin tua sungah khangli na teng uh hi. Tua khit ciangin Bumzang nasat uh hi. Bumzang khua kisat zawh 1972 kum ciangin khang 14 na phata hi. Pu Zo pan tuciang khang 52 pha-in, Geelzang sat zawh khang 18 pha hi, ci-in na at hi.
Minam Min.
Health Assitant Sia. J Gin Za Twang in abawl laibu "Zomi Innkuan" sungah laimai nihna sung pan a gelhna ah hibang na ci hi. Kawl gam sunga teng Zomite min pen Chin, Jo, Sho, Cho, Yaw, Shan cih bangin na kilo kawikawi thei hi. Nidang lai-in ah Sen gamah "Chin" Kumpi leh "Zo" kumpi kici kumpi nih na om ngei hi.
(1) Jo (zo) dynasty B.C. 1027-256 leh
(2) Chin Empire B.C. 221-207 sung na hi hi.
Tua panin mi pawl khat na lal uha, Mongolia minam na kici hi. Tua minamte mah na paisuak uha, Tibet tawnin Kawl gam khang lamah na busa uh hi. Tua panin pai in Kawl gam laizang dong tungin na teeng uh hi. A minam uh "Chin" ahi-a, "Zo" ahi zongin na kici hi.
Chin kici kammal pen Sente kammal hi-a, Mang kamin "Man" a cihna hi. Ei Zo kamin pasal khat "Mi" cihna ahi hi. Zo kici kammal leh Mi kici kammal i gawm ciangin, "Zomi" hong suak hi. Zomi leh Chin i gawm toh ciangin "Zomi Chin" cih a kicing kammal hong suak hi. Chin cih kammal pen Kawl kam hi loin Mangkam hia, tua kammal Kawl lai-in a ki-at ciangin (csif:) hi-a, Kawl lai-in bawmpi a cihna laimal tawh kibawl hi. Pawl khatte in Zomite in bawmpi i puak manin, Kawlte in bawm puatecihna a (csif:) hong ci hi, ci deksuai-a man lo hi. Chin pen (csif:) a ki-at hi zaw hi.
"Zo" cih kammal pen Mindatte leh Kanpalette in "Cho" na ci-a, Zang lai Zomite in "Jaw" ahih kei leh "Sho" na ci uh hi. Zo ahi kei leh Chincihna mah hi veve hi. I pute i pate in, Mangkangte Khamtung gam hong lak ciangin, na minam uh leh na pute uh min bang hiam? ci-a, ana dot uh ciangin, "Zomi" hi ung, ka pu uh Ciin Hil hi na ci uh hi.
Chin Hills news 1924 na-ah, Dr. J. H. Cope in History of Chin Hills go back about twenty ganerations to a person called "Chin Hill" their first anoestor which name bears his decendents as "Chin Hills" and after the annexation, the Bristish called the Country "Chin Hills" and people "Chin" na ci hi, ci-in na at hi.
S.T. Hau Go, M.A.; M.R.E. in, 1972 kum Zo minam ni pawipi Yangon a, a genna ah hi bangin a tomin laksak lehang, midangte in Chin hong cih hangin ei i kici ngei kei hi.
(1) Sak lamte (India gam a te) ei mite in amau leh amau "Yo" na kici uh hi.
(2) Tedim, Lusahi Hills, Falam leh Hakha te in amau leh amau Zo tangin Zomi, Mizo, Zotung, Zophei, Laizo, Zokha na kici uh hi.
(3) Mindatte amau leh amau "Cho" na kici uh hi.
(4) Paletwa leh Matupi in amau leh amau "Kho" e.g. Kh'mi, Khomi na kici hi.
(5) Arakan i mite in amau leh amau pen Miro or M'ro na kici uha, Mizo tawh kibang hi. Arakan ten 'y' or 'z' tangin 'r' aw zang uh hi. Gentehna, Yakhine pen Rakhine ci uh hi.
(6) Khanglamte leh Irawadi kiim tengin Asho na kici uh hi.
(7) Pakokku gama omte in, amau leh amau pen Zau na kici uha, Kawl mite in Zaw na ci uh hi, ci-in na at leuleu hi.
Tua ahih manin, Zo i hihna pen kuamah nial thei loin, i min, i minam min hi, cih kiteltakin hong lak hi. Mi dangdang zong a at omin tuate pen kibang pian lel ahih manin i at nawn kei hi.
Minam min tawh kisai-in Zo Suan Khang Tang Thu at pa S.P. Kham Do Nang B.A, B.L, M.R.E. in a na zonna-ah a nuai bangin mite na ciaptehna na at hi. Mite in Chin hong cih hangin i min pen en "Zo" mah a kici hihang cih na lak hi.
1. Roman Catholic Father Sangermano laibu laimai 35 (Father Sangetmano. A description of Burmese Empire) reprint Yangon; The Government Press, MDCL.
Kawlgam saklam nitum na lam Lattitut 20° 30° leh 21° 30° kikalah 'Jo' kici gam neuno khat a om hi. Amaute mite in Chin ci uha, ahih hangin amau kampau leh ngeinate uh tawh kiptakin om uh hi.
2. U Thein Pe Mint bawl Khamtung taangthu laibu laimai 172, (Thein Pe Mint, History of Chin Special Division; Yangon The Government Press 1967)
Chin kici minamte in, amau min pen anial tengtong loh uh hangin, a minammin bulpi taktak uh pen 'Jo' ahi hi, na ci hi.
3. U.S. Illinois sang minthang a kisin F.K. Lehman pa laibu bawl laimai 179 na-ah (Illinois studies in Anthropology No. 3; The University of Illinois Press Urbans 1863)
India gam leh Kawl gam kikalah kam pau atuam leh ngeina uh tawh kiptaka, ateeng minam khat oma, amau leh amau Jou kici uh hi. Amaute pen uk hak mahmah minam khat hi uha, Sha (Jiin) kici dawi bia uh hi. (B.C. 2000 pawlin, Jou kici kumpipa min piang na hi hi.
4. G.A. Grierson kici bawl laimai 2,3, na ah (G.A. Grierson Linguistic Study of India. (Yangon; The Government Printing Press 1904) P. 3-2.
The name Chin is not used by the tribes themselves, who used title such as Zo or Yo and Sho. Chin kici minam pen tua minamte in zang vet lo uh hi. Zo ahih kei le Yo leh Sho cih bek zang uh hi, ci-in na lak hi.
Tuate banah, Khamtung lai hong bawl sak Sangmang Dr. J. H. Cope, K.I.H., B.Sc., B.D., D.D. in, sang a zat ding Gam thu (Geography of Burma, Chin Hills (In Tedim) 1927 a kici sungah Zomite khamtung atun zawh uh kum 400, 500 val sawt lo ding hi, cih chin taang' Zo kammal na zang hi.

Khawk - 2
Pau bul
Nidang lai-in ei Zomite in lai kinei ngei hi, cih mipil misiam khempeuh in gen kim uh hi. Tua lai pen ui-in na tuahmangsak ahih manin, lai kinei nawn lo suak hi cikim uh hi. Tua ahih leh i kidot dingin, tua lai pen a bangci pau tawh ki-at ahi tam kidot huai mahmah thu khat na hi hi. Tua lai sunga kammalte pen tu laitaka Khamtung mi a kici leh Zanggam Zomi a kicite sunga kampau kigawmna hi dingin a up huai hipah hi. A vekpi ahi kei zongin kuate in a tam zaw bek a zang lai na ding uh hiam? Tua lai a kan zo om zenin, Zomite lai hi cileng, Zomi khempeuh tu-a i ki-it sangin ki-itna lian zaw taktak ding hi, cih kimu thei hi.
Tuhun ciangin, Zomi a kicite sungah, khamtung a teeng pawl leh Zang gam a teeng pawlin i kikhena khat leh khat pau i kitel zo nawn kei hi. Pau kitel lopi-in khat leh khat kiho thei loin, ki-it nading thu om thei lo mawk hi. Tua bek tham loin, Khamtung a teeng veve Tedim, Falam, Hakha, Matupi, Mindat, Kanpalet, Khu'mi, Lusei leh Hualngo in i kikhen to sawnsawn hi. Tuate sungah zong' kam neu nono-in i pau lai-a, tua te nangawn khat leh khat a kitel zolo pawl i om lai hi. Gentehna in; Tedim sung bangah, Zo pau, Thahdo pau, Sihzang pau, Teizang pau, Saizang pau, Khuano pau, Dim pau leh Vangteh pau cih na om a, tuate sungah a tuam a kilo Zo pau, Thahdo pau, Sihzang paute tuam kai-in tua lo teng sim kici-in, atawp khakna-ah Tedim pau suakin, Tedim mite kamtaang hong suak hi.
Hih Tedim pau pen, mipil misiamte in a gen bang mahin, a pianna sawt nai lo ding hi. American Mission J. H. Cope in 1933 kuma a Zolai a bawlna sanga zat ding leh sin ding laibu ahi Geography (gamthu bu) sungah khamtung gam a kisat zawh kum in 400 leh 500 val sawt lo ding hi, na ci hi. Tua mah bangin, i mipil i laithei a minthang masate in, Tedim mite pen Kawl zang panin Khamtung Ciimnuai ah kitung masa hi. Tua panin, nuntakna haksatna, lo gam kicinlohna hangin kilal khia kika, Pawl khatte, sih lakah teeng ahih manin Sihzang mi, Pawl khatte, Sai lakah teeng ahih manin Saizang mi, Pawl katte tei lakah teeng ahih manin Teizang mi, Pawl khatte zo gamah teeng ahih manin Zomi kici hi, ci-in at uh hi.
Hih thu-ah gen nop i nei hi. Ciimnuai panin kilal a, i tenna mun zui-in paunam piang hi, cih thu ah, tua paute kigawm to-in Tedim pau hong piang hi kici tek ahih manin Tedim pau pen Zomite pau nunung pen hi, cih ding hiding hi. Ahi zongin ah mipil gamte ahi Englandte mahmah zong a tuungin pau nam tuam tekin pau uh hi napi, a nunung pen pau Mang pau (English) a zat uh bang hiding hi. Ahi zongin, tua pau kigawmnate sungah Thahdo pau leh Zo pau pen kihelo-a, tua a kigawm teng i pau pen 'SIM' pau kici bek na hi hi.
Zokam Zopau Kam Bul Ahi Tam
Kiman nading lian lua om kei na in, Khang taangthu leh i pute i pate thu i theih khop i kan ciangin, hih Zo kici kammal pen, ei Zomite khempeuh i kicihna hi mah hi. Ahi zongin tua Zomi cih miaimuai pen a bul khat, ahih kei leh u zaw khat om leh kilawm a, bek tham loin tua pen ahi lo phamawh thu khat na hi hi. Midangte bang loin, Zokam paute sungah, pute pate in, i pupi pen Song Thu hi, cih kigenna kihilhna pen a thupi khat in kingaihsun pen hi. Song Thu pen tu-a, Zokam i zat kampau a pau hi kici hi. Tua pen thu naupang ci lai ni.
Zokam pen paubul hi kha thei hi, i cihna tawh kisai-in, Zomite pen Tibet pan Kawl gam laizang tengah kiteeng sukin tua panin kahtoto-a, khamtung gam kitung hi, cih pen mi khempeuh in i san thu khat na hi hi. Tua Kawl gam laizang panin zong thakhat in Khamtung kitung pah hi loin, a kivial toto i hihna mipil tampi inlai-in a na at tek banah, 1998 kum Tedim No.1 BEHS Golden Jubilee Magazine sungah, Sia Ngulh Khaw Suan in a atna ah ei Chinte Pagan Popa pan nitumna sak lamah tungin, Ava leh Sagaing khua sak lamah sawt khop i khawl hi. Leng Tong Hoih taangthu bang tua mun apiang hi, na ci hi. Tua pen Zomite Kalemyo ahi-a, khamtung i tun ma hun na hi a, sawt khia mahmah hun na hi hi.
Siapa cih banga man leh, Leng Tong Hoih pen kua mi hiam, kua namte hiam cih i theih nadingin a kam zatte uh ah kimu thei hi. A u anaute pen sanga sin laibute ah pasal sagih pha-a, anau tum pen uh Mu Nei Thang Dal hi ci-in, ahi zongin Zokam paute sungah Ma Nei Thang Dal kici zaw hi. A kamzatte in tuhun a Zokam paute kam zat ahihna a kampau kikhumnate ah kilang hi.
(1) Zo kampaute in "kot" a cih ciangin kong cihna hi.
(2) Inn dan acih ciangin inn dei a cih nopna mah hi.
Sik in dankua kot hon aw, cih pen a man in, simkam hi loin Zokam na hi hi. "Sia in dankua kot ei hon aw" a ci na hi hi. Tua hun lai pek a te in Zokam pau a nazat hi-a, tua sangin kambul zaw om khol lo dingin upmawh huai hi.
Tua bek tawh hi lo-a, Neino tangthu sungah zong, Zokam pau zatna na om zel hi. A gelh te'n Tedim kam in a at hangin, a mite Zokam pau na hi cih kimu thei hi. Nei No tangthu i sim ciangin Tawpi cih mah, khekhap ci loin ketot cih mah, hong kihta niteh ci loin, ei giing vateh cih mah, sahangte khua kici loin Tawmi khua cih mah, kiteeng sak ni hi loin, kinung sah vaang cih mah, lim si ci loin tui na bo cih mah, bak bang zah na gai ta a ci loin, ba i za na khawngtai, ci bangin tampi tah Zokam pau na om hi. Tua hun lai pekin Zokam na kizang cileng kambul mahmah kha ding hi.
Tua banah, Gal Ngam leh Hang Sai hunin zong Zokam pau mah na kizang hi. Man Dawng tangthu sungah zong Zokam mah na kizang hi. Tua banah Zokam pau te'n, Nu, pa, ni, gang, u, naute a lawh ciangin, 'ka' tawh thuah se hi. Tua mah bangin Khamtung mite sungah tua bang a zang tampi i om lai hi. Tua in kambul khat ahihna hong lak hi.
Tuate khit banah, Ngeina zatna ah, taangtawng pek a kizang tudong a kizang zom paisuak pawl khat na om hi.
(1) Zutang tun. Hih pen sih ni-a, ahun cianga kizang hi-a, hih lo a phamawh thu khat na hi hi. Ahi zongin, Zokam paute lo a zang om a, a zang lo zong om hi. A zangte zong tawh kibang lo lai. A zang sunsunte'n, zutang tun ci loin, Pu zulup peuh, ahih kei leh Melmuh gen peuh kici lel hi. Zo sungah tua bang hi loin, pu te in tute khakna zulup hi zaw hi. Tute'n melmuh pia kik hi zaw hi.
(2) Nau aitah cih pen Zokam paute sim loh a zang omlo hi. Pute in a tanu in ta a neih ciangin thupha piakna ci-in sa go-in aitahna na nei hi.
(3) Sial khup: Hih pen midangte in, mo man piakni pen Sialkhup ci-in mosa pen sial khupsa peuh ci thei uh hi. Zokam paute sungah tua bang hi deksuai loin pu zawng khat a thawh zawh nadingin sial takpi khuma, sial pen a nu hi teek hi.
Tua ban lai-ah, lai kigelh pawl khatah, Zo pen zo dawna, a ten man a zo nawl min pua-a, zo lakah teengte Zote kici hi, cih ki-at mawkmawk hi. Tua ahih leh en leng, Tedim gamah Ciimnuai khua sanga zo zaw om lo ding hi. Tedim khua mahmah zong zo dawn mahmah khat hi. Zo dawna tenna hang hi leh Ciimnuai piangte Zote kici khin ding hita hi. Omna mun hangin zo kihi lo zaw-in, Zote zo dawnah teeng hi zaw ding hi. Gam min pen a pua-a om mah bangin a pua lo zong na om zel hi. Gentehna in, Thahdo bang a pu a pa uh Thahdo ahih hang hi. Tua mah bangin Lusei cihte, Hualngo cihte, Vangteh cihte, Guite cihte a kipan en leng omna mun min hi khol lo zaw hi.
Omna min tawh minam i kilawh pen nai mahmah lai ding hi. Sihzangte bang Sihzang kama, apau khitin Zokam paute tawh gal na sim khawm uh hi. Leng Tong Hoih pan a kam kizom Zote in, tai sih un, a cih ciangin, Sihzang kam pau in tai suh un, sa-in tai suh uh a, Sihzang kam paute in tai hek un, a cih ciangin Zote in tai kek un a ci sa-in tai mang uh hi, cih tangthu na om hi. Hih hun pen Ciimnuai pana, Sihzangte sih omna a ten zawh uh hi pan ding hi. Ava leh Sagaing i ten lai-in i vekpi in Zokam paute kihi-in, Sihzang, Saizang, Teizang, Khuano cihte pen Ciimnuai sat khit a piang leh kam thak na hi ahih manin, Zokam pen kam bul hi kha thei ding hi, i ci thei hi.
Tua banah, ganhingmin lawhnate ah Zokam a kibang suaka, a dangte a kileh bulh leh a kibang loin kilo om thei hi. Gentehna in, Sai, sial, Bawng, Vok, Ak, Ui cihte i kibang khina, Vasa ci tawh sava a ci tawh i om a Zo kamin, 'va' hi lel hi. Tua mah bangin Sanga a ci omin, Ngasa cih a ci zong om hi. Zokamin 'nga' hi ziau lel hi. Ahi zongin sa tawh a kipan ganhingpawl khat kibang tek hi. Gentehna in Sazuk, Sakhi, Sakol, Sangai,Saza cihte i kibang khin hi. Sa kici kammal tawh a kitawp leh a hing nawn lo nek dingtesa kici na hi hi. Zokam hita leh kua kam kua pau hita leh nidang lai-a, i zat tuni donga i zat kamin, Saisa, Sialsa, Bawngsa, Voksa, Aksa, Vasa, Ngasa, Uisa i cih nak leh nek ding hita hi. Vasa-sa, Ngasa-sa kici lo mawk ahih manin, hih ah zong kambul hihna khat kimu thei hi.
Tua ciangin, mi khempeuh in, keitui nekha nupinu pen Tawmi suak i ci hi. Taw i cih pen Zokam hi a, Sahang cihna hi lel hi. Sahang-mi kici loin tawmi kici in kambul leh tanglai pau hong lak hi gige hi. Tua tham loin, tem pen Zokamin nam hi-a, tua pen a neute hi-a, a saute i vekpi in namsau i ci tek hi. Temsau kici lo zaw hi. Tua zong a khiatna nei mah hi veve hi. Tua banah thu neu khatah mihingte in zu i dawn thei-a, tua mah bangin vasate in zong singpak pawl khat a dawn pen Zokamin 'vazu' pak, vazu kung kici in a dang ten phihtu pak, phihtu kung kici-in kilamdang hi. Tua bang pen a tampi om hi.
Tu hunin, Tedim kam pen i theih i zat lo phamawh pen ahi ding hita hi. Ahi zongin, apil asiam loh leh a hauh a phat zolo hangin, Zote pen zo gam a teeng hi mawk loin, Zo bul a kipan Pu Song Thu pan kizom suakin, ngeina, tatzia leh kampau kizom suak hi a, Zomite taangkam pen "Zopau" hi leh kilawm hi. Tua manin i lai neih hun in zong Zokam mah tawh ki-at hidingin up huai hi. Bang hang hiam cih leh Pu Zo pen Zokam mah na zang hikha ding hi. Tua huna, ngeina sial dawi thoihna, pusa thoihna a omte leh tuhun a Zo kampaute zat kibang siksek hi. Ngeina leh kampau kizui ahihna hangin, i ci ngam hi.
Zo khang kizopna lahna1. Zo
¯
2. Kip Mang Ciin Hil
¯ ¯
3. Naw Phut Lei Mang Eng Neng, Khoi Thang
¯ ¯ ¯
4. Naw Song Phut Song, Suang Kop Lam Lei Lian Zaw
¯ ¯ ¯ ¯
5. Song Thu, Ngai Te Song Phut, Kop Sian Ngai Te
¯
6. Sung Mang
¯
7. Song Kip Song Za, Za Khai, Za Hong
¯ ¯ ¯
8. Ngawng Tom Za Mang To Hin, Sek Tak, Suan Tak
¯ ¯ ¯ ¯
9. Ak Gal, Ta Vai Mang Go Tha Do, Tha Lun, Nge Ngu
¯ ¯ ¯
10. Zaang That Lep Hung Mang Te
¯ ¯ ¯
11. Mang Vuh Hang Ngul Hlun Te
¯ ¯ ¯ ¯
12. Vai Thang, Vai Mang, Hang Hil Ma Te

8. Suan Tak
¯
9. Nge Ngu Ngei Lut, Dai Tawng, Vang Lok
¯ ¯
10. Lam Tam, Khua Kuan, Tung Nung, Phut Zil, Nan Tal, Phiam Phu Gen Zo
¯ ¯
11. Bat Kai Nei Zang Suan Te
¯ ¯
12. Kim Lai, Siam Mang That Mun, That Laang
¯
Hih khang kizopna i et ciangin, khang 8 na ciang Zokam zang hi lai ding hi, kici thei-a, bang hun ciangin Tedim gamsunga pau dangte hong piang hiam pen kigen thei lo hi.

Zo kampaute pianna pupite
1. Zo ta Kip Mang ta Naw Phut ta Naw Song ta Song Thu ta Sung Mang ta Song Kip ta Ngawng Tom, a ta Ah Gal leh Ta Vai pan Hang Hil suan dong na hi hi.
2. Zo ta Ciin Hil ta Eng Neng ta Lian Zaw te na hi leuleu hi.
3. Zo pan khang sagi-na Song Za suan Mang Tee ciang na hi hi.
4. Zo pan khang sagi-na mah Za Hong ta Suan Tah ta Nge Ngu ta Phiamphute unau teng hi.
5. Song Za Suan Ma Tee ta Tee Thang ta Laang Sun ta Laang Gen ta Tai Thul suante hi.
6. Suan Tah ta Nei Lut ta Gen Zo ta Suan Te ta Dop Mul ta Mul Pi, Han Thual, Gui Zo, Hawl Hang leh Kun Hen-te na hi uh hi.
7. Lian Zaw suan teng, Taw Tah suan teng leh Tung Dim suan teng zong na hi hi.

Tu Laitah Zote tenna teng:
Hih pen Kawl gamsung teng bek lahna hi-a, India gamah khua tampi ah na om lai uh hi.
Aisi khua Khamzang khua Muizang khua Sialthawzang khua
Anlun khua Khianglam khua Myothit khua Singpial khua
Bizang khua Khuadai khua Nangkateih khua Tahzang khua
Buangmual khua Khuaivum khua Ngasenga mai Tamu khua
Bumzang khua Khuamun khua Phaidim khua Tedim khua
Gamngai khua Kuanglian khua Phailian khua Thauthe khua
Geelmual khua Lamthang khua Phaitu khua Thuambual khua
Geelzang khua Likhan khua Phultuan khua Tonzang khua
Haipi khua Lomzang khua Phuntong khua Tualmu khua
Kahgen khua Lungtah khua Salzang khua Tuigial khua
Kalemyo khua Mandalay Sehsih khua Tuikhal khua
Kan-o khua Maulawn khua Senam khua Vanglai khua
Kehseh khua Mawngken khua Sialmei khua Yangon khua
Khampat khua Mimbil khua Sialthaw khua Zozang khua


Zokam pau bek a teenna khua leh asat kum leh a sat pa
No. Khua min A sat kum A satpa min
1. Anlun khua Seel Gen
2. Bizang khua 1896 Khan Suan
3. Bualkuang khua 1904 Son Hen
4. Buangmual khua 1895 Thuam Khup
5. Bualtal khua 1895 Sing Za Lun
6. Bualzang 1944 Ngul Za Awn
7. Bumzang khua 1912 Khual Go
8. Gamngai khua 1970 Tawng Ngam
9. Geelmual khua 1889 Thang Seel
10. Geelzang khua 1890 Suum Thang
11. Haipi khua 1907 Thah Lian
12. Kahgen khua 1887 Suak Thang
13. Khamzang khua 1950
14. Khiangkan khua 1906 Son Hen
15. Khianglam khua 1889 Ngul Za Thang
16. Khiangzang khua 1918 Thang Cin
17. Khuadai khua 1912 Kam Hang
18. Khuamun khua 1889 Suan Pau
19. Lamthang khua 1902 En Do
20. Langphun khua 1912 Hau Khaw Kham
21. Lennakotta khua 1840 Hau Khaw Suan
22. Likhan khua 1899 Neh Za Khup
23. Lomzang khua 1889 Thang Lian
24. Lungtah khua 1889 Vum Tuan
25. Maulawn khua 1947 Thang Za Go
26. Mimbil khua 1834
27. Muizang khua 1930 Am Za Thang
28. Nahzang khua 1945 Tum Za Laang
29. Phaidim khua 1889
30. Phaisat khua 1897
31. Phaitu khua 1830 Man Tuang
32. Phuntong khua 1840 Suum Let

33. Salzang khua 1850 Zang Khua Lian
34. Senam khua 1800 That Lian
35. Siallup khua 1925 Kap Ngam
36. Sialmawng khua 1889 Khua Mang
37. Sialmei khua 1919 Khat Za Lian
38. Sialthaw khua 1917 Set Ki Thang
39. Sialthawzang khua 1978 Lian Khan Hang
40. Singgial khua 1912
41. Tahzang khua 1889
42. Thauthe khua 1889 Paih Thang
43. Thuambual khua 1935 Sian Pau
44. Tualmu khua 1871 Aih Pi
45. Vanglai khua 1896 Langh Pum
46. Zozang khua Lian Do Thang

Khawk - 3
Kipi Kiten Ziate
Leitungah mihing a i pian nak leh, pianpih thu khat hang leh biakna a Pasian'thu khat hang sim lohin, kum cingsa pasal numei in zi nei ding pasal nei ding pen mihingte ngeina lah hi-a, Pasian deihna khat lah ahi hi. Mi siangtho Paul in, Pasian min hanga numei pasal in kiten loh ding pen hoih pena, ahi zongin tua lote pen kiten ding hoih hi na ci hi.
Hih leitung minam tuamtuam ki-om a, kipi kiten ziate zong atuam tek na om hi. Pasal mothak peuh na oma, numei mothak a tam zaw na hi thei hi. Pawl khatte a zi lei-in, pawl khat te leuleu a pasal a zi in a lei zong na om hi. Zo mite pen pasal mothak cih thadah in, a sunghte kianga azi beel/omte kizawngsaka, kiko na-in 'mawn beelpa' kici zanzan hi.
Taang lai in zi a kizon ciangin, neita kaita cih mah na kithupi sakin, tua mah na kizong masa pen hi. Thupi zong na sa pen uh hi. Ahi zongin mi khempeuh tua bang na hikim thei sam lo hi. Kiteenna ah, neita, mi mawkmawk, seeng leh, sanggam tawh kiteeng ci-in na kikhen hi.
Neita Zonna:
Neita i cih in, a nu nunglamte, ahih kei leh a nu' sanggamte sung zonna na hi hi. Nute pate in, a tapa dingin a nu nung lamah a hithei ding numei a om leh enpah gige a, kilawm a sak hunin, taangzuha bunglang a ta ding umpi khat sungah guangin, a nunga apa hiam a u hiam a ta nei pen kiangah, i tate gawm ni ci-in khamkholhna zu-um va tung thei hi. A khamkhol dang omlo-a a thu kim uh leh zu um na kisangin, a kum hong cin ciangin kiteenna na bawl thei uh hi. Ahi zongin a kidongsa a awng nawn lo leh, awi lohna a om leh zu umna kinolh pah thei hi. A neu tuung a zu-um kitungte pen a gol sim pian ciangin lungkim lohna leh zu-um kinung nolh thei lai hi.
A pasal in ahi a, a numei in ahi zongin lungsim tuam nei thei, ahi zongin a nu leh a pa tuakun lungsim kikhelna a neih kei leh, numei pawl khat kum cing nai lopi-in a ni-in la kholin a inn ah giahpih hi. Tua pen na om thei ahih manin, numei note a khan a kigen ciangin, kum cing nai ta kei leh "ni kiang a om cingta" na kici thei-a, tua te cihna na hi hi. Numei no a kum acin ciangin, a lawmpa ding tawh na om khawm sak hi. Tua pen neita ahih na hang ahi hi. Neita i cih pen kamdang khat in 'ni' nungzui zong kici thei hi. A ni tunna innah va tung ahih manin ni nungzui a kici na hi hi. Neita kaita a kici pen leh ni nungzui a kici pen, a nu i nung lam teekteek ahi kei zongin, tua te beh sung hi leh zong neita mahin kisim lai hi.

midang zonna'Tangval pawl khatte in, a zi dingin neita kaita sawk theih ding om khol lo ahi zongin, om ta mah leh ngai thei vet loh cih ahi zongin na om thei hi. Ngaitamah leh zong a nungak te'n na ngai khol lo cih ahi zongin na om thei hi. Tua bangte in, khuasung a nungak a ngaih khat peuh tawh kiteeng thei hi. Tua bangte a kiten theih nadingin, zu thawl tunna nei masa-in, tua tawh a langtuak nu leh pa thukimpihna tawh kiteng thei uh hi. Hih bang kite'nnate pen siahi cihna a om loh hangin i pu i pate in sungh thak pu thak zonna hi cina bek nahi pian zaw hi. I pute i pate in kitheih nasate pen thupi sak mahmaha, thu khat peuhpeuh ah khat leh khat thu a kigen ciangin, "gongsan dangsan kitheisa" cih na bulphuh uh na hi hi. Tuate zong a tu a ta khangah neita mah suak kik thei veve hi.
Sanggam kiteenna'Taanglai hita leh tuhun hita leh, tangval pawl khat in, neita kaita leh midang tawh kikholh nuamsa loin ama behte bek tawh kikholh nuamsa ahih manin, a kikholhpih abeh nungak khat peuh nasia takin ngai in teenpih thei hi. Tua kiteenna pen nu leh pa tuak thukim na hi masa loin ki-it kingai uh hi cih muhna tawh a vai kisam teng kivaihawm sakin kiteeng thei uh hi. Tua banga kiteenna pen sia-in ci-a zeksak nading omlo sam hi. A kideih lohna a thupi penin, sanggam tawmte in sakuang khen cih ahi zongin beh kuang khen cih ahi zongin ci uha kihawm thawhna thu hipi pen hi. Bang hang hiam cih leh, tua banga sanggam beh leh beh a kiten ciangin, pa ding nu ding pen pu leh pi in kilo ta-a, ni leh gangin kilo ta ahih hang hi. Tua banah taanglai in sagawhna a om ciangin beh sa kuang na om a, tute sa kuang na om hi. Beh sa kuang a um ding kimlai tu sa kuangah um ta ahih manin, sa kuang khen, beh kuang khen a ci uh na hi hi. Sa hawmna bangah beh sa a sang ding kimlai tusa kisang sak ta mawk hi. Tua ahih manin na deih masa lo uh hi.
Seeng leh kiteenna:Tangval pawl khat in, nungak dangte sangin, a ninu tanu hiam, ahih kei leh a sanggamnu tanu hiam, atu a ahih atheihpi mah zi ding ta dingin nakpi-in ngai thei hi. Tua a ngaihnu in zong sihpih ngam zah dongin na ngaih thuk thei sawnsawn hi. Khen zawh dingin om lo ahih manin a nunung pen ah kiteenna na nei thei uh hi. Hi bang kiteenna pen i pute i pate in, luangin sawng thei ci-a, a natan uh ahi hi. Tua tham loin amau kiteenna hangin, tua inn nihah khat zaw sangin sawng tuahna ngah thei ci uh hi. Suan leh khakte mittaw thei, khel bai thei, pum zaw thei leh beng ngong thei ci-a zeksak uh na hi hi.
Seeng leh a khiatna pen, ama ni hiam, a sanggam nu hiam a na kipi lai-in, ama innsung pan sa kigawhin, sengte, tu leh heite, saseng sinte na kipia a, tua a tunna inn pan tua bang teng mah hong kipuasak leuleu ding ahih manin tuate hong kileh kikta cihna in "seeng leh" na kici ahi hi. Tuate pen a thupi na-ah phungmin tanna ni hi-a, thupi a sakna uh in, beh min ahih kei leh phung min a tangsa i tanu ei-ii beh ahih kei leh phung hong tangkik ding hoih lo hi ci-a, upna na nei uh hi. Tua ahih manin seeng leh kiteenna pen tudongin na kideih lo hi.
Minamdang tawh kiteenna
Taanglai i pute i pate in minam dang tawh kiten ding pen mi mangthang na ci uha, na deih lo uh hi. Amau pen neita kaita bek a thupi sak lai leh gunkhawm tuitaw binga ngaihsun ahih manin a cih theiding mah hilel hi. Pu thak sungh thak, mak thak a deih loh laitakin theih lopi khat mak a sungh a neih ding pen nakpi-in hamsa a sa ding mah uh theihsa hi. Midangte tawh kiten ciangin, zia leh tong i kitheih loh banah pau leh ham kithei loin ngeina kibang lo ahih manin, hamsa na sa mah ding uh hi. Tua banah, taang a te pen nupa thak a kiteengte a lupna tungah kiho khuan kipia lo hi. Kiho om leh kiza dah mahmah hi. Ahi zongin, tuhunin minam dang tawh kitengte i cih in, a pil ahau lo ngal kiteng zo lo na hi zaw hi. Nuntakna lamin enleng eenhuai mawh lo hi. Ahi zongin, khang sawnsawnte a dingin leh suan leh khakte dingin a mi mah a tenpih kik kei leh mimang mah kici thei veve hi. Bang hang hiam cih leh a mipih a sapihte tawh zia kibang lo,kiho thei lo, thu kikum thei lo ahih na hang hi. Taanglaite ngaihsutna beh leh phung mang a cihte mah hi veve hi.

Kipi kiteen zia:
Kiteen na pen, a tuamtuamin na piang thei hi. A nu leh a pa i deihna tawh tangval leh nungak kingai a kiteenna oma, tangval leh nungak kingai masa-a, nu leh pa in a thukim pih kiteenna cih bangin na om hi. Amau leh amau kingai-a, tangval pa in nitak khat a inn ah tonpih ziau cih kiteenna zong na om thei hi. Kingai mahmahin, a lang tuak nu leh pate in thukimpih lo-a, kitai pih a kiteng zong om hi. I gensa bangin neita kaita ci a kikham khol a kitennna leh kila khol a kiteenna zong na om thei hi.
Bangbangin kiteng leh anung ciangin nupa hi veve hi. Ahi zongin, ki-it kingai-a nu leh pa tuakin a thu kimpih kiteennate kipi kiteenna zia pen hibang na hi hi. A masa penin, pasal lamte in numei lamte tungah zuthawl tunna nei masa hi. Tua khit ciangin kipi kiteen ni ding, hun sehna nei kik uha, tua tawh kizui-in, pasal lamte in, a tanupi (hai tawi) leh zawpa leh sasempa zawnin, zu beeltung khat tawh khua mial zipzep lianin numeite inn va tung uh hi. A tun phetun, tanu nu in zu beel tui leihin, dawn khat zu beel zaangah phei sial ziau hi. Tua khit ciangin, a om sungah a ham penin, zu phut masa hi. Zu phutpa leh zu bawl pen in zu atep khit uh ciangin innteekpipa kitep sak hi. Kuan lamte in tua hun thusun panpaha, tuni-in i naunu ka mo dingin hong tonpihsak thei leucin nuam ungh. Aman leh amual ding zong bangzah kiging ding cih hong vaikhak pahun, ci-in zawpa ahih kei leh a sasem pa in thu sung phot hi.
Innteekte zong unauteng kikumin, numei tawh a tonphot ding uh leh man leh mual ding teng vai khak in, zu ngau khat ahih kei leh zu beel khat guanin a tanu uh na kha khia uh hi. Tua hun pen luphun kici tu hunin nitak nai 10:00 hun pawl na hi hi. Tua hun pen taang a te in mo pai hun ahih ciapteh na-in, tua hun pawlin ak khuang om leh "mokawk" hi kici thei hi. Tua hun a ak a khuan leh mothak baih omta ding hi, kici khol zawzen hi. Mo pai hun pen hun na ki-omsak se hi. Pai baih lah kideih loin pai hak lua lah kideih lo se hi. Pai hak leh zusia vasia ham khat kituak thei ci-in, hun na seh uh hi. Tua bangin a sia ham khat za leh kideih lo hi.
Nungaknu zong anik apuan leh abulh khite khutbuhte tawh kithawi in, a moliah nu ding tawh mopite zui pah hi. Mo late hong tun' ciangin, mite in na ngakin ki om hi. Tua sungah mo zu puak kulup paha, mi a tam leh innteek te'n zong lup lai thei hi. Mo nu in, a khi-ok sung pan ahi zongin a khutbuhte sung pan ahi zongin a tunna mun a, a kisai teng ahi thei bangin hawma, taanglai in tua pen mo van sut ci-in kithupi sak mahmah hi. Veng leh paamte in amuh ngeisa hita se leh tua ni-in mo en ding ci-in kihawh a mo pen ki-en tangtang hi. Bang puan hong silha bang khi-oh hiam, bang khutbuh bun hiam cih ki-en tangtang hi. A ci thei innkuan pana mothak ahih leh nik leh puan hoih nono, khibah leh khisan, bilbah leh khutbuh (tau) tampi bulhin kilawm mahmah hi. Nik lehpuan zong ama zat ding leh ahawm ding a kicingin pua thuah thei lai hi. Tua pen mikim hisam loin, a ci theite bek hi sam hi. Ahi zongin taanglai in, khi mah kithupi sakin a nei lo pen in a tunna a teek nu ding, a pasal ding i sanggam numeite ading cih kiging hamtang thei hi. Mo en a hong hawh nupi leh papi tengin, mo zulup ne-in zanhak thei uh hi. A mo liahnu pen tua zan leh tua sun ompih uha, tua nitakin, letsong no khat tawh ciah sak pah uh hi. Ahi zongin khual moliah ahih leh, a hun enin kiciah sak hi.
Man leh mual (sik) tawn zia:
Molak ni-in, pute in mo man dingin, sialpi nuta, sial zabo khat na kiging un cih bangin kivaikhak khol ngiat uh hi. Tua banga kivaikhak khol lo-a, kinung nget zong na om sam hi. Tua banga vaikhak ciangin, manpi ding tua zah, mankaang ding tua zah leh tua ding tua ding cih bangin kigin theih nadingin mopi ni-in kivaikhak khol thei uh hi.
Tuhun khangthak hunah, mo pen pi leh manpiak (mo lei) kithuah pah thei-a, mopite in a ke'n ding teng kengin, mo khate in zong a ken dingteng leh sagawh ding teng siahsiah ken in mansak pah thei hi. Pi leh lei thuah in numei kungtung kicite zong a vekin kisiangsak pah thei hi. Ahi zongin taanglai in tua bang hi dek lo hi. Numei pen man nei lo cih bang na om khol lo hi. Man piak ni dinga apiak zawh kei leh a ba-in kiciam teh hi. Tua manin taanglai-a te in, tate tate nasep hat uo, na nu uh zong lei nai loh hi e, a ci na oma, a tate tawh lokuan khawm theita cileng a tate golta ngel ding hi. Tua dong a kiba thei, amai lo cih hong kilang hi.
Tedim mite sungah man pen sialkhup a ci zong na om thei-a, ahi zongin Zo kampaute sungah, man pen manmah in kisimin sialkhup i cih pen a tuam mahmah na hi lai hi. Sialkhup kici pen pu zawng khat tute in a lapsang nop man a sial mahmah kai ngiata a khup pen sialkhup na kici ahi hi. Mo mante tawh kisai peuhmah lo hi. "Mual" cih pen, man leh mual kici ahihna ah, mual pen, manpi sunga kihel lo, kan man, mual khup, mo liah leh saseng puate kipiate a genna ahi hi. Tuate man nete ngah hi loin, a 'mual' bek hi a, midangte ngah na hi hi. Tua manin "man leh "mual" cih in na kilo ahi hi. Nidang hita leh tuni hunin hita leh, manpi pen kibathei zawsop a, "mual" a kici a dangte pen kiba cih om thei loin, tua ni mah in kiphual siansak pah hi.
Nidanglai-in, man leh mual kimawk tawn lo hi. Numei khat pasal nei-a, a mothak khitin a nunglam thakhat in kawm kik thei lo hi. Na tang uh hi. A tawm pen kha thum ma-in kawm thei lo hi. Tuhun tua pen om nawn lo ta mai hi. Taanglai in kha thum khit a numei in a nunglam a va kawm ciangin, a nunglamte in a ciah ciangin, mawk ciahsak loin, sulleh an ci-in, voktuk thum khat hiam, a nei zote in tukli khat hiam gawh in a siang teng leh an puasak in "sulleh an" na ci hi. Sulleh i cih in, numei in pasal a nei zawh a tunna ah ni khat pen gamtang kici-in kipusuak sak lo hi. Kha thum sung inn lam tang kici-in a nung inn lamah pai thei lo kawm thei lo phot hi. Kha thum a cina akawm ciangin, apai-a, a lampi a sul teng va nawkkik ahih mana sulleh kik ci-in, tua min puasak in sulleh an na kici ahi hi. Tua an leh a neu penin zu ngaukhat kipuasak hamtang hi. Tua numei sulleh an tawh a teekte kiang a tun ciangin, a baangkua phamawh teng kisamin huanin ne thei uh hi. Tu hun ciangin thukhualna beita-a, a zuak peuh, thacialna a nei peuh ki-omta mawk hi. Thu khual lohna khat leh zawnna khat hang zong hi thei kha ding hi. Ahi zongin kilawm kisa lo mahmah hi. Tua ni huna, apuak "sulleh an" pen pasalte in zu min nei, sa min nei na ci se-in thupisak mahmah uh hi. Tua banah a ci theite pawl khat in inn lam suisa piak ni ma-in tua bangin zu leh sa puasak thei uh a, tua pen ki-itna leh kithupi simna hi beka, zu min nei sa min nei na kici nawn khol lo hi. Ahi zongin tu leh ta, u leh nau a kilawm teng tawh na kine khawm veve hi.
Sulleh an pua khina, numei ahi a mo nu uh zong nau gil peuh nei- ahi zongin, ahun hong sawt simta ahi zongin, om dan khawldan enin, sunghte in makpate nupa samin, hong hawh dih un ci-in sam thei uh hi. Tua banga a hawh hun ciangin, mawk ciahsak lo zelin,"Inn lam suisa" ci leuleu in, voktukli khat gawhin, a siang teng leh zu leh an puasak leuleu hi. Tua in man hong tawng nuam ta ungh, cih lahna hita hi. Makte in zong na thei pah a sunghte pute in mo man hong ngen nuam ta e, cihna thei pah lian ahih manin, a kivaikhaksa uh teng a ngah nadingin kiging pah uh hi. Mo khate in zong, ahiang asan teng kiangah man ngen nuamta i hih manin, ci-in zu a kigingpih dingin zasak pah uh hi. Inntekte in zong "Tunsa" gawh ding vok gol simsim nih kiging pah lian hi. Vok nih ahih kei leh sapi kici bawng ahi a, sial khat ahi zongin kiginsa-in na nei pah uh hi.
Tunsa Thu:
Numei mothak khat man kipia nai lo-a, 'tunsa' a kigawh mateng a pasalte beh tang thei nai loin, a pate beh mah in om lai suak na hi hi. Tua ahih manin, man kipia a tunsa a kigawh ciangin, numei tungah a 'tunsa' i salap pen a tungah a pasalte beh Tulpipa in khusakin a puak zungau tui dawnin phiha, abeh min tangsak uh hi. Beh hai na pia in na dawn sak hi. Tua ni a kipan a pasalte beh suak na hipan hi. Tua ahih manin, tanglaite i, man kipia nai lo, 'tunsa' kigawh nai loin numei in sihna manna a neih leh, a pasalte beh mina a kivui theih nadingin, a luangtungah manpiakna leh 'tunsa' gawhna kinei-in, "Tulpi" pa in beh tangsak masa-in, tua khit ciangin tuate beh minin kivui thei pan hi. Nidangin, "Tunsa" piak ni pen, numei kungtung siansakna ahi zongin, numei vuina cih ahi zongin na ci uh hi. Numei pasal neisa khat i "Tunsa" a thupi na in tua bang ahi hi.
Mual cih thu
Numei man thu a kigen ciangin aman bek kici loin man leh mual kici khawm se hi. Tua ahih leh mual bang ahi tam, cih gen dih ni. Man i cih sungah mankaang cih khat na om a, tua pen manpi sungah kihel pah hi. Bang hangin mankaang kici hiam cih leh tanu mo khak khat gina zo loin, a tunsa ding vok luangnih zong ngah zo kei leh tunsa luangnih lo hi thei lo ahih manin, baangkua sunga u pa hiam khat in huh kul hi. Tua banga ahuh ciangin, mankaang kipiasak na hi hi. Tua tham loin mo khapa in hih zo mah ta leh, baangkuapipa inzong a sanggampa tanu kha nuamin, ken khat tawi khat neih sawm ahih manin mankaang ngenin, vok khat mah gawh lai veve hi. Tua mankaang ne ding pen a baihtuan lo khat na hi hi. Mankaang a ne ding a om ciangin pasal nei nu mo nu pen a ding leh mo late a dingin angtan huai khat na hi zawsop hi. Mual i cih kammal pen, mo manpi sungah a kihel lo a tuamtuamte teng pen "mual" na kici ahi hi. Gentehna in, kan man cih na oma, tua pen a kikan nu bekin tanga, a man sangte tawh kisai peuhmah lo hi. Moliah man cih zong, mansangte tawh kisai loin, moliahte mah kipia pah lel hi. Sasengpua cihte zong, mo man sangte tawh kisai loin, tua saseng pua-a molate inn ah a va puakte i tan na hipah hi. Taanga te kam zatah man a cih uh pen, inntekte a hi-a, mual acih pen midang a kisaite a na genna uh ahih mana, man leh mual na ci khawm uh hi.
Numei mawhna hangin kikhenna om leh man leh mual sungah manpi teng kileh kika, tua mual a kici teng pen kileh kik nawn lo hi. Tua mualte pen, numei ciah khat a om a leh kikan nawn lo-a, ahi hangin, manpi teng pen kikan ciltel na hi hi. Tua mah bangin pasal mawhna hanga kikhenna apian leh, numei van ken, hei, sengzing leh sengvang, a puanbute kikala, a kigawh tunsate leh mankaang sanggampa gawh sapumte kisik kik lo na hi hi.
Zo kampaute sungah man pen nidangin sialpi khat, sialpi nuta ahi kei leh sial zabo khat in mo na kilei thei hi. A nunung lam ciangin, sialte hong hamsa-in a kimuh nawn loh hun hong tun ciangin sialpi khat taangin, dangka Ks. 30/- na kingen hi. Tua pen ki-ukna lamte in sialpi khat Ks. 30/- a, atan hang na hi hi. Tua sawm thum aneih kei leh man khiat ni-in, a um a beel leh a kuangte sawm thum man cing ding u leh nau tuakin sehin, sum taangin na kipia hi. Tua bang ding zong om lo-a, a sunghte in lah "tunsa" gawh keeita ahih manin, mangta luang cih bangin (advance) sum Ks. 5/-, Ks. 10/- kipia in a dangteng nung piak dingin kikhensat hi. Maisak cihte om ngei lo hi.
Tanglai in neita kici a kisawkte man a kipiak ni-in, man kidekna na om thei hi. Man a kikhiat ding ciangin, unau teng kikumin, bangzah hong ngen hiam, i cin zo ding hiam cih kikup kholhna kinei masa thei hi. Tua hun ciangin, cin zo taktak loa, lah man kingen pen tampian a kisak ciangin, mo manpia ding pa ii zawpa hiam, sa sempa hiam in, ke'n thu hong sung ning in, hong khep nadingin hong gen ning. A ut kei uh leh atu ata midang hong sa hiam, ni nungzui, neita kaita i hihna bang a kimangta ding hiam. Ama thu sungpa tawh kei hong kibuan nung in, tua ciangin no a dangte zong khat ciat tawh na kisi un, ci-in kivaikhak masa zawzen in, sunghte kiangah atun uh ciangin, sa kigo nai loin zu kileih nai loin om phingphenga, tua laitakin kuanlamte'n thu panin, no hong vaikhak zah hong cin lo ka hih manun tu-a kong ken tenguh tawh hong sang un, ci-in kidekin, kilaina om thei lianga, kimudah tuan lo kilamdang ngaihsut tuanloin a kilaina uh innka peek bang kinil kha zawzen thei mawk tuak hi. Tua thu in, ki-it lua, kimaingap lua a kihangsak (kipausak) cihna lahna nahi zawsop hih tuak hi. Tua pen a mo lei ding pa leh mo man ne ding pa bangmah ah kihel vet loin, om hithiat zawzen ci uh hi.
Tua banga, a kidek uh ciangin, kuamah peuh in ngaihsun kikin, ahih leh ko lah tua zah hong niamnung in, no lah tua zah hong khan un cih bangin kithutuahna bawl kik thei zel uh hi. Tua aman ciangin sa kigo-in zu kileih in kine pan na hi hi. Tua hun pen ahi lo dingin ngaihsun kei in, tua Ks. 30/- lel ci kha ding hi hang. Tua hun lai-in piangsiah Ks. 2/- kingah zo lo a kilei tawi na hi hi. Tua banah, tua hun lai-a, sialpi Ks. 30/- man khat pen golpi a gol sial hi-a, tuhun hi leh, Ks. 200,000/- man sialte na hi hi. Tu mahmahin zong sialpi khat man, mo man in, Ks. 200,000/- sum tanglian in i sunghte hong ngen ding hi leh kitom keei mah a om ding hi veve hi.
Mankhiatni
Man khiat ni-in, innteek mo man sang dingte in mi akhoh khempeuh asem agim ding hi peuh mah loin, tu hithiat a innteekte zin do pih dingin a kisam na hi hi. Kuan lamte i sap peuhmah pen, tawi neih kulse loin mo leipa in mo man aken nungsang adang keng thuah loin, mo lei na phualah sa a kigawh hangin sa hawmna om vet loin, sa khempeuh mo late kipua mangsak na hi hi. Tua sasempakhut sungah a kimin ki-ap teek na hi hi. Bang hang hiam cih leh tua sate pen, a kihawm kik ding hi-a, kisam leh kihawm thei nawn lo ding leh a ngahna ding mun a omsa pen ngah thei nawn lo ding ahih manin a kimin kipia-in, a kim hiam cih kisang teekteek na hi hi. A pai zia khatah a piate in pia khia zo-a, tua apia khiapa innteekpa in theihpih nawn loin, a sasempa leh zawpa tavuan na hita ahih manin, kisit a kisang teek na hi hi.
Nidang lai-in, mo sa pen tanute in a kihawm ma-in, gu thei uh hi. Tua pen a kisung teeksak tanupi pen in gu thei-a, sa min nei ahi lote mun bek gu thei hi. Tua banga, a gukte pen, amah bekin ngah sam loin, tanusa a kihawm khit ciangin a lawmte teng tawh a kilawm bangin atin hawm kik uh hi. Ahi zongin, tanupi a thei lo zong na om veve a, sa min nei a paina ding kiciansa peuh na gu thei uh hi. Tua bang ciangin, sa hawm dingte sasempa in ngen kikin sa dang tawh laih sak thei uh hi. Tua in na guk ding mah uh hi, cih lahna hi kik bilbel hi. Sasem a dikte pawl khat in, sa hawm main tanute in sasawk un ci-in gen masa thei uh hi.
Tua 'tunsa' a kihawm ni-in, tanute leh sanggam teng sa kihawm hi-a, tanute in mosa simna gual khat ahi Ks. 1/- na tawi uh hi. Tua pen i simmawh leh tuhunin vokno atei pan khat Ks. 15000/- manta ahih manin, gual khatin tua zah aman hipah mawk hi. Tun pen sasimna ah Ks. 15000/- tawi ding cileh, kua mah pai lo mai thei ding hi. Tua hunin zong tulsawm zah mahin hamsa-a, ahi zongin na kitawi-in sa na kisim hamtang hi.
numei moken:
Numei mokending zawn leh ngau tawh kisai loin, a ken loh a phamawh pawl khat na om hi. Tuate in, tu khat, hei khat, seng a zing khat leh a vang khat tuak (beng leh seu) sa sengsin puanza khat, puanbu khat, ahih thei kei leh khephiau, ahih kei leh puandum khat keng hamtang hi. Tua banah a neite in a neihna tawh kizui-in tui um, beel suan, kuang leh keu, khibah, tau, nikten puansilh leh vangil tuamtuam ken thei uh hi. Tua banah manpiak ni ciangin "tunsa" vok tuk li nih kigawha,a siangteng ( a puasateng) a lute geel, a phei li, a liang li, alap lang khat, a sikual khat, a gilpi seh thum suah seh khat, a sin a utok teng, anak siang bitnih leh dawi sa mawk kici nak nih, kipuasak hi. Hih numei moken vante pen a thupi na nunglamah i at lai ding hi.
Kikhenna Thu
Nupasa khat pen, numei deih lohna ahi-a, pasal i deih lohna hang ahi zongin kikhenna napiang thei hi. Tua banga kikhenna a om ciangin, pasal i deih lohna hanga kikhen ahih leh numei kikhul kici-in, numei a nung inn ah ciah kik hi. Numei deih loh ahih leh, a man teng kipia kikin, a vanken teng zong kileh kik nawn lo hi. Sa kigawh tawh kisai-in, taang a te in zu minsa sa minsa ci-in, bangmah in na gen nawn lo uh hi. Tua ahih manin, numei man a tham leh pasal deih loh hi-a, man a kileh kik leh numei deihloh ci-in na kikhen hi. Tua ahih manin, taang lai-in tua man leh mokente hangin ama zaw ding, akhul zaw ding na ki-ut loin, ama hong deih lo hi, ama hong mak hi cih na kituh uh hi. Tua banga, ama zaw a kitheih lohna ah hausa zum thukhen zum na kitunin tua ah na kikhen bang na om kei hi.
Buah tanna thu
Nidang lai-in numei pasal neisa khat peuhmah, a nunglam behte inn simlohah a pasal a om kei nak leh sa kici peuhmah ne thei lo hi. Tua pen 'buah tang' na kici hi. A pasal om lo kala sagawhna khat a kineih ciangin, ne teitei heh a kicih leh a nunglam behte inn khat peuhah kihuansakin kine sak thei hi. Tua hi kei leh ne thei lo banah, amau zong nek ding lungsim neukha zong nei vet lo uh hi. Bang hang hiam cih leh tua 'buah' pen tang zo kei leh luangin sawng thei hi, ci-in kilipkhap mahmah hi. Numei in zong tan zawh sawmin, a dangte in zong zehphi sak lo uh hi.
Hih buahtatna thu, Zo kampaute sung leh Sihzang sung bekah kimu hi. A kitanna thu zong Sihzang sunga kigenna leh Zo sunga kigenna pen kibang loin kilamdang hi. Zo kampaute ciinna ah, nidang lai-in khua khatah kiteenga, gal nasia lua ahih manin khua sunga pasal kici khempeuh galsim ding pai khia khin uh hi. Tua kalin kial na sia lua in annek ding omlo ahih manin, khuazang kithukimin sial khat kigo a, midangte in a pasalte siah uha, Zo nupite in na gai mang uh hi. A pasalte uh galsung pan hong tun uh ciangin, midangte in sa ne uha, Zo papite in ne lo uh hi. Bang lak sa ne na hi uh hiam, ci-a a dot ciangun, sial kigo a pasalte uh asiah uh ahihna thu a theih uh ciangin, Zo pasal teng khasia-in, a zite tungah thuciam pia-in, tuni a kipan pasalte om loh a sa ka nek leh kaluang in sawng hen ci-in kiciamsak ahih manin, tua ni-a kipan Zo nupite in pasal om loh hun peuhmah sa nek ding tangin, tua pen 'buah tang' kici na hi hi.
Khawk - 4
Inn Suan Zia
Zote peuhmah midangte tawh kilamdangna khat nei-a, inn suang khat ahih nak leh tua inn sungah vaihawm dingin, sehsa khat kinei a, tuate in sihna leh nopnate ah sawl kul loin, ama panmun ciat sem diamdiam na hi hi. Tua ahih manin pasal zi leh ta nei-a inn tuan khat ahih leh tua bang pan mun pen a masa pen a a geela aseh kholh ding a thupi pen ahi hi.
Tua panmunte anuai-a bangin, kigel khol hi. Nau zaw inntuan tawmte ahih leh inntuansa go-in, tua ni-in, a inntuanna innpi pan, sa khat gawhin panmun zonna ahih kei leh panmun sehna ci-in sa hawm tektek uh hi.
Panmunte:
(1) Sasem khat
(2) Zawpa khat
(3) Sacing nih
(4) Sadathop nih
(5) Tanu a kilawm zah khat
(6) Nuphal ding
(7) A neihsa Tulpipa, Pu, Sungh cih bang leh sanggam kigualhsak hi.
Inn luahpa
Innluah a kici peuhmah unau sungah ta pasal a u pen in inn aluah ahi hi. U zaw taleh numei peuhmah in inn kiluahsak ngei lo hi. Ahi zongin, unau sungah u zaw pen a sih loh hangin dam lohna leh picin lohna hangin zi leh ta nei loin a om a leh anuai-a pa in, inn kiluah sak thei hi. Taanglai Israelte mah bangin, u zaw inn luah ahih manin, unau bangzah bangzah om taleh, a u pen in innluah paha, tua a u pen ahih theih kei leh, a zomin luaha, a zom ahih theih kei lai leh, a zom kik in cih bangin kizom sukin kiluahsak na hi hi.
Innluahpa tavuan
Innluahpa ahih nak leh, a nu leh a apa leh a naute teng annek tuidawn, nikten puansilh leh thu leh la tungah thu na nei hi. Tua manin a zi man leh mual ding tavuan laksak hi. A sanggamte in inn tuansa agawh masiah tavuan nei hi. Tua mah bangin, a sanggamte inn atuan masiah sum nu sum pa a lam zongin, a innluahpa ap khin uh hi. A lo khawhna agah leh teh a lakte zong a vekin ama a hipah hi. Tua ahih manin, innluahpa in zong, leiba thangba a neih leh loh sakin, thu khat la khat a neih leh zong ama taangin kikham hi.
Gamh luah zia
Innluah i cih leh gamluah i cih kibang lo hi. Gamh luah i cih pen, sanggam pasal khat zi leh ta nei na pi-in, ta pasal khat zong a neih kei leh innluah thei ding om lo ahih manin tua unau sunga, a u penin tavuan la-in, a sanggampa sih khit a nungta lai a zi leh a ta numeite en in van hi. Pasal a neih uh leh zong gamhluah pa in, mo kha hi. Tua a zi leh a tanute om nawn loh ciangin, gamluahpa in, a inn a lo leh a neihsa teng luah hi. Bang hang hiam cih leh a luah thei ding pasal om lo ahih manin ama tavuan ahi hi. Innluahna in, a pu apa neihsa luah hi a, gamh luahte in, meigong sanggam pasal nei lote vanteng luah hi.
Inn suan zia'
Pasal khat zi leh ta nei-a, inn leh lo tawh a om ciangin, inn tuana, tua ciangin "Inn suangpa" kici thei pan hi. Tua bangin inn suangpa khat in, atung a kigen sa bangin sihna nopna aneih ciangin innsung vaihawm dingin, panmun a tuamtuam nei hi. Tua panmun tawh kizui-in sihna nopnate ah vaiawm gamtatna kinei ahih manin, tua teng tawh pasalte in 'kisi zo-a, kinuam zo" hi na ci hi. Tua banga, panmun a kisehnate in, ama mun ciat sawl kul lo leh gen kul lo-a, asep thei nadingin anuai-a bangin tavuan nei ciat hi.
Tulpi tavuan
Nidang lai-in baangkua khat sungah, ak sim loh kheli nei khat peuhpeuh a gawh ding ciangin "Tulpi" pa om loin kigo thei lo hi. Amah a om theih kei leh, ama kiang pan tuisiang kila-in, tua tui sa tungah buakin sa kigo thei pan hi. Tulpi kici min pen a diakdiakin, vok a kigawh ciangin tul khat tawh kidawt a, tua tul pen tulpipa in a phuisam mateng kigo thei lo ahih manin, tul tawipa, tulpipa na kici na hi hi. Beh khat in tulpi khatta kinei-a, inn simah amah loin kigo thei lo na hi hi. Tua banah, sih ciangin tanupi leh Tulpipa hai buah loin, si kivui thei lo hi. Innkuan vai khat peuhpeuh ah Tulpipa loin vaihawm thei lo hi. Bang hang hiam cih leh Beh khat sungah Tulpipa pen aci thei pen, lo gam ahau pen, ankhing beelsuan ahau pen, beh sung thu athei pen ahih man hang ahi hi. Nau zaw khat beh sungah "tong" nuam leh Tulpipa thukimpihna om loin tong thei lo hi. Gal man sa man khat a om ciangin Tulpipa inn tunin ki-ai thei hipan hi. Tulpipa min tawh si kivui-in, sa-ai khat om leh tulpipa min tawh ki-ai thei bek ahih manin thupi penin beh khat simin kingaihsun na hi hi. Sa gawhna ah ama hih theih lohnate ah phuisama kibuak ding tui pen zong tui mawkmawk hi thei loin Tulpipa in zuha hul tawm no khat pia-a, tua pen tui tawh kipawi in, sa go ding sunga numei khat in tua zutui kitawisakin, pasal kilawm pen khat in phuisamin, kigo na hipan hi. Mihing gui-awk a om leh amah bekin a khau sattat thei bek hi. Ahi zongin,amah a om kei leh sasempa in tavuan teng la hi.
Sasempa tavuan
Sasem a kici pen, tua baangkua sungah sa kigo khempeuh amah in tavuan la-a sem hipah hi. Ahi zongin amah in a sem thei kei leh a taang ding mi cialin, tua pen sa mah tawh na guai hi. Tua a sasemsate a kizeek nading tengah zeeksak lai hi. Sihna manna ah khual gamah sihkoh ding a om leh, zawpa tawh tavuan na la lai hi. Deih loh penin tua baangkua sungah, gui-awk khat a om a Tulpipa a om kei leh sasempa in sut thei na hi hi. Tua ahih manin, baangkua khat sungah sasem pen a thupi pen panmun khat na hi hi.
Zawpa tavuanInnsuang khat in, sanggam sung ahi zongin, khua sung tui sung ahi zongin, a it pen amuan khat pen, ama innsung a dingin vaihawm dingin na koih a, tua pen "zawpa" ahi hi. Tua baangkua sungah sihna manna leh nopna dahnate ah, sasempa tawh kithuahin, innteekte taangin thu khempeuh vanin tavuan na la uh hi. Sih ni ciangin, sanggamte zulup peuhmah si vui dingte tanu teng vakna kici-in "vakzu" hawmna ah tavuan la hi. Si a kivui ma-in tanu sivui ding tengin zu hai khat ciat angah nadingin vahzu hawm tavuan la hi. Sih koh ding khual kal nading a om leh sasempa tawh tavuan la khawm uh hi.
sanggam tavuan
Baangkua kici khat sungah, sanggam a kicite pen ama suahpih sanggam pasal teng leh a beh sunga inn suang pasal teng pen a vekin sanggam kici na hi hi. Tua banah a zi unau numeite i pasal teng khempeuh zong nuphal kici-a sanggam sungah kihel hi. Sanggam kici peuhmah pen, sihna leh nopnate ah, zubeelpi khat in na pang hamtang hi. Tua banah, sihnate ah antawi pen neihna zui-in na gamtaang uh hi. Thu leh la a neih leh zong panpih hi. Liau leh paan atuah leh zong ahih na zahin huhin panpih hi. Tua ahih manin, mite sanggam haute pen na kisa thei-in, lungmuanna lian nanei thei uh hi. Sanggam ahih nak leh, nopna dahna leh thu leh la ah tai thei loin, innteekpa mah bangin tavuan nei hi.
Tute tavuanMidangte kibang loin Zo kampau sungah "tu" kici pen a phazah kiciangtan thei lo hi. Sanggam numei haute in leh ta numei haute in tanu hau-in, ahau lote in tanu hau lopah hi. Tanu sungah namnih kinei-in "tuampi" leh "gautaang" cih na nei uh hi. Tuampi sungah khat pen "hai tawi" a ci omin, "takzaw" a ci omin, "puanphah" a ci oma, tua pen a khatna pen na hi hi. Tua in sihna manna midangte tanu dangte tawh kibang loin, sih tuam banah puanza khat na kena tua pen "puanphah" na kici hi. Vai khempeuh tanu tavuan teng la pha diakin, sa hawmnate ah zong a dangte tawh kibang loin gol pha diak hi. Tuampi tanu dangte in sih tuamin Ks. 3/- in na tuam hi. Gau taang ahih leh Ks. 1/- in na tuam hi.
Innteekpa in tanu pen a inntuan a kipan a masa ding a nunung ding gualkhol paha, tua khit a tanu -a, amat thakte pen a banbanin gualsuksuk hi. Khat leh khat a masa pan kikhengsak lo hi. Kikhengsak lehkikhasia ding ahih man hi. Tanu a kimat ciangin, saphei, saliang tawh na kiman hi. Gautaang ahih leh a sihni a Ks. 1/- tawh hong gaal teng, gautang hipahpah hi. Tua te pen, tu ci-in kinaihna om lo zaw deuha, ahi zongin dam lohna hangin, baangtung a salu kheuh a gau paihna na kinei thei hi. Tua banga gau la thei dingte ciang pen gautaang na kici ahi hi. Tanute tavuan in, sih ciangin, misi hal keu, meilah puak, misi zep leh misi vui ding tavuan lian pen ahi hi. Laangtung laangphei bawl ding tanu tavuan na hi hi. Ahi zongin, kuang a kibawl leh tua kuang tawh kisai sanggamte tavuan hi-a, tanute in kuang a koih ding leh kuang zep ding tavuan la-a, kuang a kikawm leh a kuang sawpin piakkik ding tavuan na nei uh hi. Tua banah sih vui ni a zubeel a leih ding tui khempeuh tanute tavuan na hi hi. Tui haksatnate ah tua in a thupi mahmah nasep lian khat na hi hi. Khua hun ahoih kei leh hamphengh lam ding zong tanute tavuan hilai hi.
Tanute in zununna, galaih sa-aihna te leh ton leh hante ah zong tua pawi sung zu leihna ding tui khempeuh tavuan la uh hi. Tanute tavuan in, tua innsungah a kisem ding nasep khempeuh semin, nek ding a omte khempeuh nek ding a tavuan uh na hi hi.
Sacingte tavuanBaangkua khat sungah "sacing" kici nih kinei-a, sacing u zaw leh nau zaw in kikhen hi. Amaute pen tua baangkua ah dahna nopnate ah, sanggam bulin kibawla, nopna ahi "ton" leh "taang aihna" "galaih sa-aihna" kici "tho" kici bawlnate ah sanggam bul lamin kingaihsunin, zu beel lupnate ah beel khat bek hi loin beel nih beel thumah na taang uh hi. Sagawh sahawmna ah, sialci tung ci-in sehsa a om sa cing nih pen khat tuakin na hawm pah uh hi. Sanggam bul lam tavuan nei hi.
sadathop tavuan
I theih dingin, Zo kampau sung lo buangah, sacing cihte sadathop cihte a nei om lo hi. Sadathop pen sacing mah bangin, baangkua khat in nih nei a, a u zaw leh a nau zaw in kikhen hi. Sacingte bang mahin, tua baangkua sungah sanggam bul pawl mah hi, dahna leh nopna ah zubeelpi apang pawl mah na hi hi. Sapi gawh hawmna ah, sadathop nih na oma khat tuakin kihawm sak hi. Zo kampau sungah atheih huai khat in, sial citung ci-in, sial hing laipi mah ki-en hi, kigo in kihawm leh a ngah nading mun pen kigaal seh thei mawk hi. Tulpipa ngah ding, sasempa ngah ding, zawpa ngah ding, sacingte ngah ding leh sadathopte ngah ding cih kithei hi. Tua pen sanggam lam pana i et ahi hi. Tanu leh sunghte pute ngah nading zong kithei khol pah lian hi. Tua manin sadathopte geel ii tavuan in, sacingte bang mahin tavuan na nei hi.
Pu tavuan
Pu a kici tampi om a, i pate khang bangin, Tonzang i pu Sukte in numei mo kha khat a om ciangin Ks. 2/- na la-in ama ta numei khak zahin na tuata, asuan akhakte in pu na ci hi. Tua banah i pute sanggam beh leh phung teng zong pu i ci hi. Ahi zongin tu-a i gen ding "PU" pen i pianna nu i pa pen ahi hi. Innkuan baangkua sung khatah, pu i cih a kibang tampi om mah taleh, i pa in a nu pianna
"pu" a ta in a nu pianna "pa" a tu in a nu pianna "pa" pente bek bulphuha "pu" thu a gen ihi hi.
Sihna manna i neih ciangin, tua asi amangte baangkua lutang pen ii pu pen pu a kici pha diak na hi hi. A pa om lai-a innkuan lutang ahih leh ama pianna a nu i pate pen pu hi phadiak a, zoinnte bikhalap a hansuang topai ah pu zute kigual-a, pupi zu pen masa penin, zong golpen thei hi. A zom pen ah sunghpa zu in zom hi. Tua lo pudangte a kigualto hi. Tua manin i sih i man ciangin pu zu a masak loh phamawh ahih manin zawmtat thei loin, a picing a tat kul na hi hi. Pu in ama tanu suan leh khakte a diakdiakin pasal note khat apian simin, na na ai-tah hi. Ai-tah na in sa voksa tukli tukthum cih bang na go-in, thupha a piakna ci-in a siangteng na pia-in zungau tawh na pia hi. Pu zawng khat ahih a leh vokte nei zo lo ahihna leh ai-tah lo phamawh ahih manin, akpum leh taangman taksih bepi tang kikha a kingan huan tawh na ai-tah veve hi. Tua ahih manin, tute tungah pute a khasiat uh ciangin, ka tu, ka bepi tang a kong ai-tah sa hi, ci-in hamsiat thei hi. Tua pen kisawng thei ahih manin pute bangbang a ci zongin kidawng ngam lo leh a thu a kawi a mamin kimang tawntung na hi hi. Paunak in ah "Pu leh lamsak kineh zo lo" na kici ahi hi.
Pute in, a tute pen khual mahmahin, zu leh sa pia den tawntung hi. Kumsimin, a tute a itna in "phuaibuh" ci-in aknel a ngawngah ok sakin, thupha pia tawntung hi. Pute in, amau tawh kizopna bei-a, pu dang tua baangkua sungah hong din ciangin khakna ci-in, zutang tung thei hi. Tua hun pen tua a "pupi" uh tawh kizopna bei kahlei kia kici-in, tute in zong melmuh na pia kik thei uh hi. Tute khanto zawa, pute a khantom zawk leh, a tute a beibei ni-in, a tate, a tute in 'zutang' na tung hamtang uh hi. Bang hang hiam cih leh, tua baangkua ah mai lam a dingin amau kizopna bei ta-a, "pupi" dang omta a, ngawng sang ding a tuam hong hita ahih manin, zutang tun loh phamawh na hita hi.
Baangkua khat sungah, pa, ta, tu ki-om a, tuate sungah "pupi" thum a kinei pah na hi hi. I pa zi nu tek pen pupi hi pahpaha, pute in zong zutang atun dinguh ciangin tua tawh kizui a hong tun ding uh ahi hi.
sungh tavuan

Khawk - 5
Sih leh Man Zia
Taangtawng a kipan tuni dongin, sihna leh manna ci-in sihna tawh kipawl nam thum bangin na kikhen hi. Khatna pen, inn phualzang lupna tunga sihna pen pute pate in sih ngei na na ci hi. A nihna ah, mundang gamdang asi ahi, tuikia, kenkia, singtunga kia, mawtaw tunga kia, galthah, sathah leh gui-awk sihna na oma tua pen pute pate in sihsia na ci-in lipkhap pha diakin, "saa-si" na ci uh hi. Tua banga site gamsung a si veve aluang kipua thei omin, a luang na leeng kimu lo leh atun abaanna kithei lo zong na om hi. A thumna ah, atun a baanna kithei lo-a, inn na tung nawn lo a si kiciamteh pawl khat na om hi. Tua pen pute pate in "manna" na ci uh hi. Tua ahih manin sihna thu a kigen ciangin si cih bek tawh khawl khol loin sihna manna na ci teek hi.
Kivui ziate:
Misi a kineih ciangin, ngeina banga ni deihzah kikoiha, kivuina cih leh a sih pheta vuipah "phakpaih" vui cih khat na om hi. Phakpaih ahi lo sih ngeinate pen ni a ut tan vei koih uha, khatkhatte bangin sa betsatin, asa matte aih kawm na leh si vuina na thuah thei ahih manin, taang a te in la na phuak uha, tua a phuah la in:
(a) Ka tonkhuang bawl thang zaw maw e, ka hankuang bawl thang zaw maw e;
(b) Tonkhuang leh hankuang thua tang nge, mual i hem a thang aw e,
na ci uh hi.

Hih hunin, sihna leh "tonna" na thuah thei-in sa-aih tawh zong na thuah thei na hi hi.
Ngeina kivui lo, aman alup akap pipi asih ding ciangin, meima nei a si ahi-a, aphak a lol khat ahih leh tua pen a sih phetin, na kivuipah na hi hi. Taang-ate in, "na vaphual mei phual nite" ci-in na kici thei hi. Tuate pen sih ngeina kivui hileh kawsah hangtang tampi nei-in, khangtung zu kilupin, aluang pen kisailiap dingte na hi thei hi. Ahi zongin pute pate in, tua pen na lipkhapin, dawi thu-in ngaihsun ahih manin, asih phetin, anik apuan zat khempeuh, azat baang na khempeuh, a nek val an leh tui khempeuh leh a lupna teng inn phaitam kong lamah ama ii luang tawh kipua khia pah lianin, hanah zong kivui loin han dang khatah kivui se hi. Sih ngeina site pen a kivui zaw ni thumni in hanhawh kici-in, kua kivil hi. Tua banga kivuite pen kipai nuam nawn lo hi. I ngaihsut ciangin amau in dawi thu-a, a cih uh hi napi-in, tua sangin a thupi zaw ah, tua banga aphak a lolte leh meima neite pen lungno hang hi-a, a ci a khin ciangin, anik apuan leh nektheih taktheih tungah tukik thei ahih manin, tua pen asih phetin kivui pah leh tua ama natna lungnote kizeel man loin, ama tungah om lai-a tua tawh kivui khawm leh kuamah lawh nawn lo ding na hizaw ngimna khat hizaw gige hi. Dawi upna pianin apai hangin a kipha zolo sianthona, cidamna lama kikepna lianpi khat na hi hi. Ahi zongin, taanglai hita leh tuhun hita leh i sih ciangin, a misi nei innteek sungah, a lawmpa maw a lawmnu, a tate maw in it phadiak ahih manin, tua asih pheta paihkhiat pah ding pen hamsa sa mahmah uh hi. Cidamna lamin ki-enin sianthona lamin ki-en leh kiphal peuhmahlo dinga, adawi a kici teh dawi pen kikihta mahmah ahih manin, it pen ngaih pen ahih hangin, ki-it ngam loin, kivui khiapah na hizaw hi. Tu lai pau leh "Psychology" pi khat na himawk hi.
si a kivui bawlziaInnsungkhatah mundang gamdangah asi amang a om ciangin, inn ah kivui bawl teekteek pen i ngeina khat na hi hi. Ama luang om lo ahih manin, a lungtaang ding in biphuah (bi-lom) a luang dingin kibawlin, alu dingin um khat kibawl hi. Tua pen i paunakah, "Bingtawng zong um tawhkipeh ahih kei leh kizom" na kici te ahi hi. Bi hamsatna munte ah aluang dingin nahtang luang peuh kibawl hi. Tua pen mite in siluang zah mahin kingaihsunin, kikahin, a vui ni ciangin pusuah hunin pusuaha, lapi sak ding teng zong sa-in, innka ah lap zah mahin kilaam hi. Ngeina teng mah bangin kibawlin, aluang om mah kibang sak hi. A ci thei anei a lamte ahih leh kawsah hangtaang mah ken uh hi. A vui hun mahin tanute in han mahah va vui teek uh hi.
Gam sunga site kivui zia
Saa-si kici gamsunga a site aluang a kipuak ciangin, inn sungah tha khatin kilutpih pah thei loin inntuallutna tunkot ahih kei leh inntual kongpi kici munah kinga photin, innteek tanupi nu in vokkuang tui hai khat tawi-in, tulpipa in phuisamin aman ciangin tua vokkuangtui tulh phot masa a tua ciangin innsung lut thei pan hi. Tua banga deihna in, hih innsung hita leh, khuasung tuisung hita leh hibang sihsia hong tun loh nading deihna tawh phui kisam hi ci hi.
Gui-awkte
Sihsia laka kihel khat ahi gui-awk leh amah leh amah kisuamlum zong na om hi. Tu hunin, ama innsung peuha gui-awk bang om thei-a, ahi zongin ni dangin gamsung bekah gui-awk kimu thei hi. Gui-awk khat a om ciangin, mi khat peuh in tua gui-awk nu/pa pen sut thei pah loin, Tulpipa ahih kei leh sasempa bek in na sut thei se hi. Inn sungah kilutpih thei pah loin, i gensa gamsung misi khat bangmahin 'tunkot' ahih kei leh inntual lutna kongpi ah kinga-in, tulpipa phuisamna leh tanupi nu in vokkuangtui dawnsakna aneih khit ciangin kilutsak pan na hi hi.
sih phawnna:
Taanglai in misi khat a om ciangin, sih phawnna ci-in Zam kitumin, tuhunin thau kilawn hi. Thau lotna zong samual suah thaulot bangte hi loin, mi khempeuh in sih phawnna hi ci-a, atheih dingin kilawn se hi. Gentehna in, sih thau lot zia pen, thau khat a kilot khit ciangin, avui guang kika lot kihal danin kilawn leh sihthau lot hi cihna kithei pah na hi hi. Tua bangin thaute a om ma-in, zam na kinei-a zam kitum hi. Zam tum dangte bang lo-a sih phawnna zamtum hi cih a kithei dingin ngeina khat na nei hi. Inn khat ah, cina asi ahi-a, gamsunga si ahi zongin, sih phawnna pen thau lot tawh na kiphawng thei pen hi. Tua thau ging pen kingai in, sih thau hiam, samual suah hiam cih kingai paha, sih thau lot hi ei a kicih nak leh thau vui khutna ki-enin a kimuhna munah khuazangpi in ahi thei tengin delh ngeingai in, numeite kapin kiku ngeingai tanghial hi. Tuhun bang loin, kitai tang hial hi. Tua manin si delh kici na hi hi. Bang hangin dam pai lel lo a, kidelh hiam cih leh, si delhte numei nupi ahih nak a leh kah loh phamawh hi. Pasal ten zong "kah zong kihuh" a cih mah bangin innteekte dahna khuazangpi in nupi teng in va kah pih uh hi. Tua kahna pen a sawt loin kitawp ding amah a nunun leh amah bek kah ding ut lo-a, mi kah laitak delh a tai na hi hi.
Sih vui hun ding seh zia
Misi khat a om ciangin, pasalte in innteek bek misi nei hi loin, khua zangpi a misi nei i hi, acih uh bangmah in, laitah ni ahih kei leh asih a kiphawn ni in misi nei i hi, acih uh bang mahin, laitah ni ahih kei leh asih a kiphawn ni-in unau zaw deuhte in sih vui niding khen tat pah uh hi. Gamsung si ahih leh, avui ni ding leh apuak zia dingte zong kikumin khensat pah uh hi. Tua hun ciangin kimawk khensat thei loin, innteek baangkua sung phamawh kicite pen a thupi pen hi-a, zu minsa bang ci neih kikum masa uh hi. Zu minsa anei atam kei leh zu sa leh abang hun ciangin kilup thei ding cih tawh enin, sih vui ni ding na seh uh hi. Tua banah khual si koh ding bangci om, bang hun ciangin hong tung kik thei ding uh cih nagel uh hi. Si vui niding atom asau ani sehna tua ni mahin kigen khiapaha, khuazangpi in thei pah hi. Si koihna pen, tua hun lai in anai pen ni sagih nahi thei in kha nih kha thum zong a na kikoih om thei hi. Pawl khat bang, hankuang khat bawlin a vui ni hun kithei lo ci-in, sumtawngah kikoih lel mawk zong na om hi. Ni khat teitei ciangin hankhia ci-in han a vui hun khat nung neih sam hi. Tuate in atam pen inn mangta dingte na hizaw deuh hi.
Si luang koih zia:Taanglai in misi pen nitam a kikoih dinga leh, tanute in misi pen, gawpi tang tang sagih phanin misi luang tusakin singai mun kici ah koih uh hi. Tua muna, a nitam a kikoih ding ahih leh, tanute in meilah tawh emin siluang a keu dongin hal uh hi. Tanu te in, aluang om sung a nitak avak dig leha ciahte i det ding meilah pua-a, tuate mah tawh siluang em uh hi. Khat vei a a kicin kei leh nihvei thumvei pua uh hi. Tuhun lai banga, meitui, lalcin, meipi cih leh invator, bettery, meiset cihte om vet loin, tanute puak meilah mah asuk ato ah kizang na hi hi.
Siluang tawh kisai-in, tuhun ciangin, kuang kibawl in kikoiha, misi luang zong nithum sung bek kikoiha, a himawh zekte pen ninga bang asawt pen kikoih bek ta hi. Tanu te meilah puak cih zong om nawn loin, tua taangin meitui man ci-in, tanupi in tanu dangte kiangah a kilawm zah sumtang in dongin, mei kivak hi.
Si ngai mun:
Tualai khang thakte in si ngai mun koi tak hiam cileng thei lo mai ding uh hi. Taanglai a innte leh tuhuna innte zong kibang nawn lo ahih manin lah tel theih nadingin taang inn mah kul ta mawk hi. Taang lai-in misi khat a kineih ciangin, i Zo innte a kilam zia khenpi thum in na kikhena, khen khatna "sungpi" hi-a, khen nihna pen innsung kici taptung teng, lupna pi teng, tuang dung teng leh innsung dawhdan teng pen "inn sung" na kici ahi hi. A khen thumah inn lim teng, sumtawng teng leh inn mai dawhdan teng na hi hi. (hlimpha teng, vai phung teng, khu-no teng) na hi hi. "Si ngai mun" kici pen, sungpi kongpi lutna innkun lam teng na hi hi. Tua mun a misi kingaih nading kibawlin, tua-ah a kivui mateng kikoih hi. Tuhun ciangin kuang kizanga tua mun mahah kuang kikoih hi.
Sungpi kici pen Zo kampaute in "tap kuang" na ci uh hi. Bang hang hiam cih leh nidangin pusa pasa biak hunin, sa kigo khempeuh pusa pasa piak dingteng tua munah kipaipihin, va kitap hi. Tua manin tapkuang kici hi. Vokkhawng a kigawh ding leh tua munah kigo-a, ak khawng ahih leh tua munah hai kibuak masa hi. Israelte biakbuk a siangtho pen mun ci-a, siampite bek apai theih na banga kizang mun khat na hi hi. Tua mun pen kumsimin vok gangalawh khat teitei kigo hamtang hi. Si ngai mun pen kamdangin Pangli ngatna mun zong kici thei lai hi.
Si luang zep zia
Misi luang pen si ngai mun kici munah pangli kici tungh kikoih a, tanute in nazem thei uh hi. A luang tungah hih ding teng na kiman khit ciangin, a vui ni dong a et lawm theithei ding siluang na zem uh hi. Pasal ahih leh, dialpak khat khimsak uh hi. Tua ciangin akgia kitotsak hi. Vaphual mei kitotsak hi. Sawnkai kitotsak hi. Puan laisan hiam taang ciin hiam tawh kituam leuleu hi. Numei ahih leh puan dum ahih kei leh khephiau tawh kituam hi. Naupang ahih leh akgiakuh khat tawh, gun khau kici gun kan nading ci-in khaugui khat tawha luangah kikoihhi.
Tuhun ciangin, misi luang pen bangmah kicih lo zaw-in a hankuang kilim zep zaw hi. Tua hankuang zepna ah puankang tawh tuama lungkim om a, tua puan kang tungah pak tuamtuam tawh zema lungkim om lai hi. Hankuang na leeng pen sing mawkmawk peuh a deih lo a, dol kuang mah adeih tektek om se lai hi. Khat veivei taangate sangin misi zep theih nading om leh ki-uang zaw leh kilawm na mun om thei mawk ta hi. Neihna tawh kisai pawl khat omin, tua sangin upna leh deihluatna in kai thei zaw hi.
Misi Khawl zia:
Misi khat a om ciangin asih phet a pen si delhna ahih kei leh laitah delhna kici hi. A sih leh a zanhah ni kikal a khawlna peuhmah "si khawl" kici se hi. Zanhah ni pen nidangin, "kawsah gawh ni" ahih kei leh "laang khet ni" na kici hi. Tua ni-in a kawsah ding teng kigo in, tanu te in alaang ding bawl uh hi. Tua manin a kici thei kawikawi na hi hi. Ahi zongin tuhun leuleu ciangin, kawsah gawhna na om nawn loin laangkhet cihte zong om nawn lo ahih manin, khangnote in, bangmah thei nawn lo ahih manin, a vui niding a zanni pen zanhah om thei ahih mana, a theih pen uh ahi "zan hah ni" a ci na hi hi. Nidang teh zanhah om nawn kei leh banga kici tam cih zong kithei nawn lo hi. Sih vui ni pen banghun banghunin sihvui ni mah kici-a, tua ni phakna khempeuh a pha khempeuh si gaal kici na hi hi. Sih vui ni-a misi a pai khit a kipan innteekte a khawlpihte pen "gen-uap" kici leuleu hi. Tua ni a zing ciangin a khawlpihte "handal" kici leuleu hi. Tua ni-a zing ciang pen, kaw vilni, a ci omin hansak ni a ci om hi. Bang hangin kua vil ni handal ni kici hiam cih leh, si vuini a zing ciang pen han lam pai ding ki deih lo kidal a handal kici na hi hi. Tua ni a zing ciang pen nupite han hawh uha tua ni misi vuina kua va kivil cihna in "kua vil ni" na ci uh hi. Israelte in zong na zang hiding hi ven, Topa Zeisu a kivui zawh nithum ni-in kua na vil uh hi. Tua kua vilna ah numeite mah na makai uh hi. Ahi zongin, ei a te pen, taanglai-in, sa peuh, an peuh, tuibuk peuh, zatep peuh va kipuakin, lei sunga kiphum ahih leh a kua mun khat vutin pia uh hi. Han kinei a han inn a kivuite ahih leh han sungah tumin a uih a than ci loin, a kente va pia hi. Lungkimna bek mah hi-a, kimanna om lo hi. Tua ahih manin tua ni pen "kua vil ni" a ci na hi uh hi. Tua ahih manin, misi khawl zia pen, si delh ahih kei leh laitah delhna, si khawlna, si gaalna leh handalna cih pen khen nih khen liana, "si khawl" leh "gen uap" cihna hiziau hi.
Tua ahih manin misi luanga kivui khiat ni matengin sunin tu leh ta leh khuasung nupi papi ahi thei in khawl piha, nitak leuleu ciangin, khuasung leh kiim leh paam nungak tangval in khawlpih leuleu hi. Sau vei sim kikoihte pen suna khawl dingin tu leh ta te leh sanggamte kikhen bawlin kilaihlaih uh hi. Nitak pen a ngeina bangin kikhawlpih den hi. "Si khawl" cih pen misi luang tutpih khawlpih cihna na hi hi. Nitak simin khuasung nungak tangval tengin innteekte innsung inn liim dimin kikhawla, numeite misi luang kiang tengah khawlin, tangval lam ahih leh innliim dimin kikhawl hi. Innliim pen a kiimkot tengah tuttheih bangin kitu ciata, innliim laizang teng ki-awngsak hi. Tua hun sungin, a tute in sialki, khuang, zam leh dak tum uha, a lai a awnna tengah tangval khat ta lamin, a siamte bang lum sui uh hi. A lam peuh mah in a khut tak lamah namsau khat tawi-in, a veilam khutah akgia tawi in na lam hi. A lam a tawp kuan ciangin, lumsui kici ding lah hi lo tu lah hi lo-a lama, mai lam pai zeelin, nung lam pai in lam zeel hi. A khe tul tawh a tuamtuam lakin lam thei hi. Tua banah a namsau lekin lam thei lai hi. Tua pen siamna leh hatna kidemna khat ahih manin, mikim lam ngam lo uh hi.
Tangval khat a lam laitakin, tum theih tumte in a lampa dan en uh a, a gimtuak hun ciangin a tum theihte uh nawh semsemin khawlsak zeel uh hi. Tua-a lampa akhawl ciangin, a nungah amah zoma lam ding a deih tangvalpa khat mai-ah a akgia leh a namsau nga hiatin, na tu hi. A koihna penpa alam kul na hita hi. A koihna pa lam ngap lo ahih leh taimang cih om thei loin, nidangin tangvalte tua banga sigaalna ahi a, zawl leenna ahi zongin, puanlaisan khat silh thei uh hi. Tua banga alamngap kei leh tua lamna mun tengah a puanza aphah kul hi. Tua-a, apuan aphah ciangin tua puanza tungah tangval khat ama tangin lama, amah pen peng hi. A lampa khat in, ama zoma lam ding atheih pak khol kei leh, alam aman ciangin a tawi a namsau leh, a akgia pen lamna laizangah nga-in koih hi. Tua khit ciangin kikhen ahun nai kei leh, tumtheih tumte in panin, atum ciangin tangval khat na kipanin lam hi.
Nitak si khawl hun a lamna te-ah, khua khat leh khua khat ahi zongin, sawm khat leh sawm khat ahi zongin veng khat leh veng khat ahi zongin kilaihin kisehin na lam uh hi. Tua hun ciangin lamna bek hi loin siamna apawlpawlte zong kilak thei-a, tua in hatna zong lahna na hi thei lai hi. Lumsuihna tawh lamna pen a thupi khat a kigen ahih zah khat in, mai pai zela, nungkik zel a lamsa a vial tampi atunte mi hat hi, ci a kithei na hipah hi. Lumsuihna ah akhe tawh a tuamtuam a lahna banah, namsau a tuamtuam a lek akan cihte abawl theite ahat mahmahte na hi hi. Nidang in, Tonzang, innpite inn a tuangdung pen khamtung gamah asau pen hi-a, a mundangah tua zah a sau tuangdung na om khol lo hi. A sih ni khat un, mi tampi in na pha uh a, khua kim phialin kigaal na hun khat na om ngei hi. Tua i cih mah bangin nitak in, tuangdungah lama lumsuihna na oma, tua munah Gamngaite Pu Nang Za Hau a kici tangval thahat khat in, na lama, a lam tawpna in lum na sui-in, a sau mahmah tuangdungah, mai pai zel leh nung kik zelin vial kua na tung zo-a, ama nungah a lam ding kingah nawn lo zahin na minthang hi kici ngei hi. Innteek te'n zong paakta lua ahih manin zu na na pia uh hi. Zu anghawh na ngah hi. Tua pen tuhuna, kimawlna siamte agih domna, kitup hatna, kanteh sangpi kan zawhna, bawlung suih ahi a, sat ahi zongin siamna, volley boll bet siamna nei a minthangte zahin na minthanga tudongin kimang ngilh lo hi. Pu Nang Za Hau pen, sialtal tailai pha pa hi-in, hai kung sang mahmah dawn panin a bungbulet a tuak ngampa khat na hi sawnsawn hi. Si gal bek na hi loin, sikhawlna hunah hatna na lakthei in na minthang hi.
Sihvui ni
Sih vuini-in khuasung buppi in kuamah lo kuan na om lo pah hi. Khua kiim khua paam pan ahi thei zahzah in si na gaal hi. Tanute in, a kisap leh hampheng lamin, tua banah, tua ni zu leihna ding tui kicing takin tawi khol, khol khol uh hi. Sanggamte in, a zulup teng a hunlap in tunin, zanni a kigo kawsah khempeuh tua ni-in, si a kipuah ma-in hawm khiat kul pah hi. Si a kivui ma-in, tanu sivui ding teng peuhmah zuhai tan
kimsak na kul mahmah hi. Khuamial lo-a, a si kivui lo ding ahih manin, tanu te in, mei det ding meilah a cingin tenkhol uh hi. Zawpa in zuhawm nading teng atut nading akhawl nading geel khol a, sasempa leuleu in, kawsah hawm nading a kisam teng van kholh sa-in koih uh hi. Zawpa in, "vak zu" a hawmpih ding mi leh taangzu ahawm dingte mi kician seh khol masa hi. Misite a tong a ai te ahih leh khangtung kici munah zulup nading geel kholin a kisap leh phekbuk lamsak khol uh hi.
Hih ni-in, zu kilupte a Zawpa in hong tung masa a banabanin na gual pahpah hi. A thupi pen a tua ni a kilup lakah "Vak zu" kici sanggamte zu pen, inntual phungneh lamah gual hi. Pu zu ahih leh hansuang topai dung tengah kigual hi. Thaulot zu ahih leh, kong lutna phung tung tengah kilup hi. Taang zu kici in khuapih tuipihte i a galna zulup khempeuh innka mong suangcial dungah bikhalap pan kipanin kiguala atam leh sial kong dongah a phakna tanah kigual hi. Khangtung zu a om leh khangtung mahah kilup hi. Tua ciangin, inn limah sanggam zu pan a kikhen khia, papi leh nupi lasate dingin beelnih beel thum kilupa, tua pen lapi sate in a nek ding na hi hi. Mindang khat in tua zu min pen "si kaihtuah zu" zong na kici se hi. Tua banah tua ni in pute "zutang" tung a om leh kong mai phung tungah na kitang tun hi. Tua banah nitak sivuite hong ciah ciang a ding ahoih simsim khat hiam, sasempa zu hiam "sian zu" kici in kisit a tua pen sivui tanu khempeuh a inn uh ah ciah thei loin, tua munah hong tungin, khatkhat in Tulpipa in zuphih in siansuah teek hi.
Zu hawmdan
Zo kampau sungah zu hawm zia pen, nopna dahna a, apai ziapi khat na kibang hi. Tua pen, zuluppa oma, zu bawl zu pua omin, innteekte leh zu phutpa cih om loin, zu na kihawm thei lo na hi hi. Zu khat a kilupnak leh zu bawl khat na omin, tua pa in zu a kidawn theih nadingin, zu leih ahi zongin, a dawn nading dawn ahih zongin na van masa hi. Tua teng aman ciangin, zu beel a om zah zui-in zuphut ding a ham avuai pen teng kitengin kiphutsak na hi hi. Zuphutpa in aphut khit ciangin, "zulep" ci-in a it a ngaih a tu ata khat hai khat pia masa thei hi. Tua khit ciangin ama phuhhai kici aman dawn masa leuleu hi. Tua teng aman ciangin zu bawlpa in zu bawl man hai nih ngah phot leuleu hi. Tua aman khit ciangin, "melteh" ci-in, zuluppa in innteekte hai khat thei sak leuleu hi. Tua aman ciangin innteekpa in zong nong zulup thei khining cihna in, "Inn lo leh" zuluppa pia kik leuleu hi. Tua teng beel simah aman khit ciangin zu hawmte in ahawm nading bangin a cin dongin hawm khia thei na hi hi. Hih pen zuhawm theih nading a kisam teng i genna hi-a, ahi zong tu-a i gen ding sivui ni-a zu thu ahih manin, tua pen mundang zulupte tawh kibang loin pian dang khat na om hi. Tua pen in, zu kilup khempeuh zu tui-a kileih khit ciangin, tua baangkua a tanupinu (haitawi) in, zu akiphuh ma-in, dawn khat la-in, zubeel kim dawn in, ngau sung khatah khol hi. Tua zu ngau sung a zute pen misi khakna kinei ding zutui na hi hi. Tua loin zu kiphut thei, kihawm thei lo na hi hi.
Sihvui ni-in zu hawm peuhmah a thupi penin sanggam sung pan hipha diak hi. Vakzu a thupipen ahih manin, Zawpa leh Sasempa in na hawm hi. Pute leh taangzute pen sanggam sungah muante in kihawm sak hi. Thaulot zu pen thauneite sungah muan khat in kihawmsak thei hi. Khangtung zu pen amau a tong ngei a hang ngeiteng mahin, hawm lel uh hi. Zutang zu a om leh tua pen sanggam kician khat mahin kihawmsak hi. Tua ni-a zukilup teng lakah "vakzu" kici pen tanu sivui ding teng ngah khit mateng si kivui thei lo ding ahih manin, Zawpa leh Sasempa pen zu ciam ngam lo liangin hanciamin hawmuh hi. Tuhun banga lai om cih hi lo ahih manin, apiak khialh ding leh a mangngilh khak ding kidawm mahmah takin na hawm hi. Sa hawm mah tawh kibangin amun kikan kha leh tanute zong khasia thei ahih manin limtaka a hawmna kul ahi hi.
Sun thapai-in, innliim a papi teng in, beh lapi teng sasa-in, zu hawm sahawm aman khit tuhun a seh nai 3:00pm pawlin innsung panin si kipusuah thei hi. Tua pen taanglai in ni kai hun pawl pen si pusuah hun ci-in na ciamtehuh hi. Tua manin taang a te khua hun a kidot uh ciangin ni kai lam pianpen, a hunin "si pusuah hun" na ci thei uh hi. Si pusuah laitak pen, a kiminsial a kitomtom tawh, akap amau tawh kihi ngeingai hi. Thauneite in si pusuahna thau na lawn ciat uh hi. Mite kihi hithiat loin kihi ngeingai-in kibuai mahmah hi. A minsial tawh akap tawh thaulawn tawh kibuai kei ahih manin, tuhun paunak ah buaina lian khat a om ciangin, "si bawh kuan" bang keei e, na kici vawt na hi hi. Tua misi pen innka tung atun ciangin a laam thei khempeuh in umin lampih uh hi. La kisa-in, sai man ngeingeite ahih leh sailiap kici tu lah hi lo, ding lah hi loin ki-om a kilampih hi. Tua banga sailiap ciangin hamsa kisa ahih manin innteekte in, sailiap zu ci-in zu beelpi khat tuam luup liang hi. Tua pen sai mante bek hi-a, a dangte in sai man lopi-in sailiapna bawl leh thu kibawl thei na hi hi. Si vui ding hong naih ciangin sala kici na sa uh a, sai la panin sakuh la dongin na sa uh hi. Sa la a kisak ciangin a sa min in kiloa a, "sai e, sial e, za e, za e," cih bangin sa min teng a banbanin kiloa in kisa hi. Ahi zongin sa pawl khat pen a sa min kiloa lo-a, vom bang ahih leh vom e, kici loin, muai e, kici-a, sakuh bang ahih leh kuh e kici lo leuleu in, nguai e, nguai e, kici se hi.
Sala teng a kisak khit ciangin, misi kihei in sial kongah kinga hi. Tulpipa in tu zingsang a tanupi nu i zuleep ngau pen tawi-in, phuisamin phita, sasin tawi piak nei-in, satui keupi khat in tanunu in tawi-in kipia hi. Innteek sung panin misi khakna ci-in vantung atun cianga ahawm ding ci-in leh, mihing khat in sabak thumta ken uh hi. Misi vaikhak uha, tuate innkuan, tuate innkuan hong khakna ci-in gen uh hi. Tua keupi khat a satui kitawi pen a zangah buaksuk a, tua manin, misi a kivui leh zang buah loh phamawh ahih manin, kawsah nei lote zangbuak ding vokno khat a kigawh teiteina pen, "zangbuah" a kulna hang na hi hi. Misi in tua sa kikhak teng vantung atun cianga hawm ding leh kawsah a kisah teng, vantungah a ken suak ding ci-a upna na nei uh hi.
Tua teng aman ciangin, misi pen innsung pan a kipusuah lai-in, akhe lam nunun-a kipusuah hi a, a lulam masa na hi hi. Si a kihei ciangin apai ding hita ci-in a khe lam kimasak sakin, a lulam inn lam kinga saka, innka tung mah kizawng kik hi. Tua ciangin, samin loa dingin, tulpipa hiam, sanggam sungah khat hiam dingin, a sisa pute pate min loa in, tanu pa in a gingin, tua a kiloa pa min loa in "ii tu" ii tu, ii tu, ci-in awng viuveu a kuamah pau loin dai in ngai hi.
Tua samin lawh aman ciangin siluang tawm kilaamin, pupa la dawngkhat dawngnih bang kisa-in, aman phetin, tanute in siluang vui dingin paipih pah lian hi. Tua hun laitakin thau kilawnin, kikapin kisa kheukho leuleu hi. Pasalte min sialin misi vaikhakna aw zang uh hi. Tanute in a kivui nading munah paipihin vuita uh hi. Han a kici pen a behbeh a han inn kinei a tua sungah, misisa dangte kivui khawm na hi hi. Han pen sivuite hong ciah ciangin, misite inn mah hong tung kikin, behte antawi teng leh amau u a ding kiluup zu ne uh hi. Tua teng anek ma-un, tulpipa in siansuahna bawl masa hi.
sivui nitak innteekah
I gensa bangmahin, sivui ni-in zingtung phiala kipan khuang kitumin lapi kisa a, si kipusuaha, kilaama, la mah khuang kitumin kisa hi. Ahi zongin misi vui ding a kipai khiat khit phetin, tua inn ah la kisa in singtawng khawng kitat thei tase leh khuang leh zamte kitum thei nawn lo hi. Tua huna la kisate zong lapi peuh, behla peuh hi nawn loin hehnepna la bekbek kisa ta hi. Si vui khit a innteek tutpihna pen sigaal kici nawn loin "gen tutpih" kici ta hi.
Han dalni
Misi a kivui khit a zing ni ciang pen, kua mah han lam pai thei loin, han kitang hi. A pai lo nadingin han lampi sawl tawh na dal uh hi. Tua manin tua ni pen "han dalni" na ci uh ahi hi. Tua ni-in, innteek nuphal lamte leh tanute in zuluup uh hi. Antawi tawh kisai-in, pute lam ahi zongin, sanggam lam ahi zongin, nuphal lam ahi zongin a limci nono kitawi hi. Voksa aksa leh taaksih nganhuan bepi kikha a minsa in hai khatkhat ding kitawi thei uh hi.
An tawi zia
Midangte in misi khat a om ciangin, sa gawh leh antawi ci thei uh hi. Ahi zongin Zo kampaute sungah, kawsah asah leh "sa lutot" ci-in, antawi a tuamin kipaisak lai hi. Antawi cih pen, Zo pau in, "an thak" na kici-a, misite asih a kipan ni bangzah kikoih dinga, tanute in cikni tengin meilah pua dinga, innka khawng cikni in kipuah ding thei khol phot masa-in, tua nite tawh kituak ding leh, sivui ni, handal ni leh kuavil ni a anthak ding kiseh khol uh hi. Tua kisehna ah adiakdiakin, sanggam kici teng tai thei lo hi. Tua lo veng leh paam leh adang athak nuam (an tawi pia nuam) te in Zawpa kiangah gen kholin, hawm bawlin kiseh na hi hi. Tua antawi zong sa teekteek cih hi sam loin, anhul khat huanin, meh alim theithei khat peuh huan a kitawi kithak na hi hi.
Kawsah neihzia
Nidangin, tuhun bang loin, misi a om nak leh kawsah loh phamawh hi. Bang hang hiam cih leh sasin tawi piak kula zangbuak khat kibawl hamtang na hi hi. Kawsah pen a neite in sialpi sialtal, bawng leh lawi cihte banah vokpi voktal tampi kigo thei hi. Amau in a gawh zawh kei leh zong beh leh phung sung leh u leh nau sung pen in kisah thei hi. A tawpna ah ui na leeng na kisah ahi hi.
Misite zawng mahmahin, kawsah nei zo lo-a, ahuh ding lah a om kei leh, kawsah lo tawh si kivui thei lo ding ahih manin, tanute in sih tuam a tuamna uh mi khat Ks. 3/- dangka pek thum akhiat ding tenguh gawm tuahin, vokno khat zong uha, zangbuak leh sasintawi ading vaihawm teitei uh hi. Tua zahin kihah bawl na hi hi. Kawsah a kigawh ciangin, sa pen a hawmna ah tanute satan atam pen a kipia na hi hi. Sa a kihawm ciangin, tanu takzaw (hai tawi) in a phei bup leh kawsah sa dangte tawh kipia tanu dangte a pheitong a liang tong leh sa kigo dangte sung pan a kilawm bangin tanu a khatna pan a tawpna dongin, sa kigul mei sakin kihawm na hi hi. Cih nopna ah sa hawmna ah kikim loin, a masate tawmtawmin tamzaw deuhin, a kikhiatna pen thakhat in kikhia loin kigul mei khiat cihna hi. Tuampi a kici lo, tanu veve "gautang" kicite a pen kikim takin na kihawm hi. Kawsah sung panin sanggamsa zong kihawm tei na pi-in, tua zahin sa gol lua lo hi. Ahi zongin nidang a om ngei to saliang pen a kipiak nawn loh ciangin, sanggam sa-in kihawm ahih manin, sanggamsa hong zeek cing zaw deuh kik hi.
Nidangin kawsah pen kawsah gawh ni-in, a vekpi in kigo a, sivui ni-in, kihawm hi. Tuhunin, kawsah cih mel om loin, siluang na om sung kigote pen, kul tawhsa peuh kuang bawlsa cih peuh min kinei sak pong mawk hi. Tua lo pen, handal ni peuhin a go om thei-a, kawsah min lah hi lo, sa min nei cihna mun ding om loin, ane mai nuam in ne mai-in, a hawm nuamte in hawma, ngeina mel om loin, piang thei hi.
kaw vil ni (Hansak ni)
Hih ni pen nupitehanah hawh thei uh hi. Tua ahih manin, "kua vilni" na kici hi. Tua han pan hong tun' uh ciangin tanupi nu in, zu beelno khat lupa, gawpiteh khat la-in, inn teng zutui thehin innsian suahna bawl hi. Tua bang ahih ciangin, zutui kibuak gawteh tawh khuam teng zapin, siansuahna na bawl thei hi. Tua ni pen, a khawlteng in zu a om peuh luupin, min nei zuluup hi nawn lo hi.
Ta khat sihzia:
Zo kampaute sungah tate lakah a si masa pen ta khatsi ci-in, naupang lai ahih leh kisel bawl (kiphual) in kivui pah hi. Ahi zongin a golsapi ahih leh sih phawn cih thau loh cihte kizang loin, a phawk peuh va pai hilel hi. Nisau zong kikoih thei lo hi. A kivui ciangin zong misi dangte bangin kilaam cihte omsak lo hi. A vui hun ding ciangin aneu lai ahih leh tanu khat in, kanthawp khau kileem tawh akkuahin, tanu dangte in zui-in hanah vui dingin paipih uh hi. Innsung pan apai khiat uh a sialkong uh atun ciangin, dinsa in simin kilo a, khat minsialin, kipai khia hi. Ahi ta zongin, hih misi pasal hi-in, zi leh ta neisa ahih leh, nupi papi hita a tu leh ta nei zo ta ahih a leh, a sih ma-in, "tho" kici tonna khat aneih khit leh vui ngeina bang mahin kivui thei na hi hi. Tua bangin ta khat si nai lo zi nei ta nei a omte in asih cianga ding ngaihsun in, tulpipa kiangah ngenin, "ton" nading nangena, kisapna hangin tulpipa in na pia thei a tua pen nau zaw "ton" na kici na hi hi. Nidangin nau zawte aton uh ciangin, Tulpite ton hun ma kha khat ma lepin kitong sak se hi. November kha pen, nau zaw ton kha kici-in, December pen ton kha na kici hi. U zawte nungah om thei lo ding cih upna na nei uh hi.
Nidangin naungek si peuhmah na kun vui pah lian uh hi. A suah tuunga si pahte bang amin ding tuah khat peuh kici paka, a tawpna ah a om thei kei leh, "zusa ek" cih min peuh na pia pakin na kivui pah hi. Kuunvui ahih nak leh mundangah ahi a han cihte ah kipai pih loin huang sungah na kivui pah hi. Tua banga kivuite peuhmah "kuunvui" cih min na puasak uha, sivui khit in a nuam a ut in khawl theilai uh hi.
Tuhun lai mah bangin, misi pen bangbang ahi zongin baih nasa tuan lo uh hi. A sih khit teh a kha vantung tung dinga, a sisate tawh kimu ding cih lametna nei uh hi. Tua ahih manin, sih khit ciangin, a kivui ni-in vantung lam manawhin pai hi cih upna na nei uh hi. Tua ahih manin, misi khat asih ciangin, vantung lam a paina ah gunpi kan loh phamawh hi, cih upna na nei uh ahih manin, gun kaan nading ci-in, guapi naang lemin, na hualkip uha, tua pen gunkaan nadingin kengsak uh hi.
Suan leh Khak nei lote sihzia:
Pasal khat in zi leh ta nei na pi ahi zongin ahing om loin sikhin ahi zongin, aneih tate khempeuh numei bekbek hi kha ahi zongin ta mahmah nei vet lo ahi zongin mi na om thei-a, tuate pen asih a man leh, tua a kivui ni-in, a zi pen suan leh khak nei lo ci-in a pasal a kivui ni-in innphaitam lamah a nung lamte in, kaipahin ciahsak uh hi. Tua banga a inn atun kik khit ciangin, tua numei in pasal kik na nei thei lai hi. Ahi zongin, ciah lo pi-in, a pasalte innah a tanute ahi zongin amah kia bek ahi zongin om leh, tua sung panin pasal nei kik thei lo hi. Aneih kikna aneih leh, tua apasal masate in, a kitenpih kikpa tungah thu bawl thei in, lawi giat ne thei uh hi. Tua banga lawi giat anek penuh, numei manin kisim tuan lo hi.
Tuhun Misi Neihzia:
Nidang lai 1910 ma leh tua zawh hunte nakpi in kilamdang mahmah hi. Misi pen tua zawh em keei, hal keei cih om nawn lo hi. Ni tampi kikoih nawn lo hi. Kawsah zong nasia takin kigo nawn lo hi. 1948 zawh a kipanin han zong buk sung hi nawn loin, kua na kito in na kiphum ta hi. Misi khat a om nak leh kuang na kibawlin na kikoih pah lianlian hi. Mi a tampen in misi pen, ni thum sung na taamsaka, ni thum ni-in a vui na tam pen hi. Tedim gam nitumna gungal lamte bangin, asih ni-in, kulto ding leh kuang bawl ding a om nak leh a sih ni mahin na vui thei ta hi. Hih pen ki-it lohna hi peuhmah loin nuntakna kikhelna khat na hizaw hi.
Ahi zongin, mun khatkhatah, khuasung ahi lo, mun tuamtuam a om te ko-in, ni nga cih peuh a koih thei khat leh nih om thei lai hi. Tua banah sa kigawh cihte a uang lai pawl khat na om thei a, a mi tamzaw pen tua tawh kibual nawn lo hi. Tu ciangciang i gam i lei khangto nai lo ahihna khat leh i nuntakna niam lai ahih manin, misi i neih ciangin a luang pen innsungah kikoihin, kitutpih kikhawlpih lai hi. Kahna leh dahna ahih zenzen hangin, khangto mahmah leh i sih phetin, misi luang pen a votna khan khawngah kikoih lel dinga, tua a kikoihna mun maha kivui suak lel ding hi zaw hi. Tua hun pen ei khangin a tung kei zongin atun loh phamawh hun hong tung hamtang ding hi. Tun zong khuapi Yangon Mandalayte ah tua bang hita hi. Mun dang gamdangte hita kei leh, ei gam ei lei mah ahi Kawl gam sung khuapite a kizangsa hita hi. Tua hun hong tun mateng a khangto nai lo hiding hanga, tua hun hong tun' ciangin, mi a ban pan, a khangto ta hiding i hihna phawk khol ni.
Zutang tunna tawhna kisai kitel zo kim lo ahih manin tel genna khat nei dih ni. Zutang tunna i cih in, "ngawng" beina ahih manin,a kitel thei dingin innkuan omsa khat tawh gentehna pia ding hihang. A masa pen in "ngawng" bei a kizopna kahlei kia kici pen, inn khat leh khat kizopna hi-a, innkuan beh leh phung dang tawh kisai peuhmah lo hi cih telsiam masa phot ni.
Gentehna in: Pu Ngam kici pa khat in, Pu Phung kicipa tanu tenpih hi. Pu Ngam in a zi tawh ta pasal, Pa Thang, Pa Pau leh Pa Lian nei hi. Tua sungah, Pa Thang pen u zaw ahih manin, inn luah hi-a, Pa Pau leh Pa Lian pen zi nei a, inn tuan hi. Pa Thang in a nu pianna bangkua sung mah sawkin zi nei-a, ta Tu Mung nei hi. Pa Pau leh Pa Liante'n zongtapa nei tuak uh hi. Ahi zongin amaute in midang sung tuak sawkin, a nu pianna baangkua sung na sawk lo hi.
Hih sungah, Pu Phung pen Pu Ngam a dingin, a sunghpa hi-a, Pu Ngamtate Pa Thang, Pa Pau leh Pa Liante a dingin pupi na hi hi. A thu in cileng, Pa Thang te unau Pa Pau leh Pa Liante asih ciangin Pu Phung in zutang atung ding na hi hi. Bang hang hiam cih leh, Pu Phung i tu dang om loin a tua a beina na hi hi.
Ahi zongin, Pu Phung in, Pa Pau leh Pa Lian inntuansa pen asih ciangin, zutang atun thei ding hangin, Pa Thang innah tung thei nai lo hi. Bang hang hiam i cih leh Pa Thang in a nu pianna baangkua na sawk lai-a, tapa khat nei in Tu Mung na hi ahih manin, amah asih hangin Pu Phungte baangkua leh Pu Ngam tapa Pa Thang hi-a, Pa Thang ta Tu Mung hi lai ahih manin, Tu Mung bei mateng Pu Phung in zutang a tung thei nai lo na hi hi. Bang hang hiam cih leh, Tu Mung in, sa man leh a sa ngawng a pu Pu Phungte inn mahah tung ding ahih manin, tung thei nai lo ahi hi.
Tu Mung ii zi pen Pu Phung ii tunu khawng hikha pek ta leh tua baangkuate tawh kizopna paisuak lai ahih manin, kahlei kia nai lo, kizopna bei nai lo ahih manin "ngawng" zong kizom lai in, "zutang" kitung thei nai lo ahi hi. Ahi zongin Pa Thang leh Pa Lian leh Pa Pau unau khat ahih hangin, inn tuam ahih banah, a zi nute uh Pu Phungte baangkua hi nawn lo ahih manin, Pu Phung bek a pu hi-a, a tate pu pen a nu pa hita ahih manin Pa Pau leh Pa Liante asih ciangin, Pu Phungte in, zutang tung ding na hi hi.
Thu khatah, Tu Mung abei ciangin, Pu Phungte in, zutang tung ding i cih hangin Tu Mung tate i, Pu Phungte baangkua mah a tute khat mah tenpih lai leh, Tu Mung asih hangin zutang kitung thei nai lo lai-a, Tu Mung tapa a sih ciang bekin zutang tung thei ding na hi pan hi.
Pa Thangte innsungah a kizomin, zutang kitung lo-a, Pa Pau leh Pa Lian innah asih ciangin Pu Phung in zutang tung hiam? Bangci kilamdang a, a pu mah hi veve a kici kha ding hi. I gensa bangin pute in pen sangawng a sang ding hi a, Pa Thangte baangkua panin, Pu Phungte baangkua tawh kizom toto-in sangawngpen a banbanin Pu Phungte baangkua sungah lut zom to hi. Ahi zongin Pa Pau leh Pa Liante in Pu Phungte baangkua ahi lo ah zi lata ahih manin, a tate dingin, pu hong kikhelta hi. Ama tate ngawng pen, Pu Phungte in sang nawn lo dinga, Pa Pau leh Pa Lian zite pa in pu hita ahih manin ngawngsang ta ding ahih manin, amaute pu Pu Phung in Pa Pau leh Pa Lian Sih cianga, zutang tung na hi hi. Pa Paute leh Pa Liante tute asih ciangin, a zite pate in zutang atung ding hita hi. Sa ngawng na tuan ta na hi hi.
Zutang Tunzia:
Tedim gam sungah sih ciangin, zutang tun' anei leh a nei lo ki-om hi. A nei vevete sung panin zong tun' dan kibang lo lai hi. Mi pawl khatte in, sih ciangin, a misite handal ni-in, pute zuluup ci-n a pute kho in, "melmuh" na pia thei a, tua pen mi khat asih simin na bawl thei uh hi. Melmuhpia pen a tute hi-a, a zuluup lah a tute na hi hi.
Ahi zongin, Zo kampaute sungah zutang tun' pen a thupi hun khat a kingaihsun na hi hi. Kizopna beina, kahlei kia ci-a kithupi sak na hi hi. Sih sim a kitung hi loin, kizopna bei cianga, pute in tute a mangpha kakna, thupha a piakna, amau inn ah amau pu hi nawn loh theihsakna a, pute in zu beelpi khat na luupa, puzu dangte tawh kigual khawm nawn loin, a thu nei cihna in, mun khatah kitang tun' ta ahih manin, "zu tangtun" kici na hi hi. Bang hang hiam cih leh pu i cih in i si a i mang zongin, kawsah i neih leh a ngawng pen pute a na hi hi. Gamsa i mat leh zong, tua a manpa pu in ngawng a sang ding ahi hi. Tu a zutang tun hun ciangin, pute in, tua zutang a tunna inn ah, amah pupi hi nawn loin, pupi dang khat hong omta ahih mana kikhenna zutang atun loh phamawh na hi hi. Nidanga, sa ngawng a ngah pen tua innsung pan sa ngawng sang ding khat hong om ta ahihna hang ahi hi.
Nidangin, sih vuini-in pu zutang tun pen phungbem kici tungah kituam tun pah hi. Tuhun ciangin, handal ni-in na tung zaw thei hi. Tua banga handal ni a zu a tung ding ahih nak leh sih vuini-in, pute in ama zu pen puzu dangte tawh luup nawn lo hi.
Tua bangin zutang a kitun ciangin, pute in a tangthu teng genin, tute in zong' pute hong it hong kepna teng genin zu hawmna na kinei hi. Zu a kihawm ciangin, zutang tung pute leh zutang tun ngah tute sunga sanggam phamawh kici sial ci tung teng leh, Tulpipa tuak leh tanu haitawi tuak in kihel kimin khat leh khat kituah ngelhngelhin ne uh hi. Thu kigen in, tute in pute aitna teng a gen khit uh ciangin, i kikhen hangin nong mangngilh loh nading uh, ci-in "melmuh" na pia uh hi. Tua melmuh zong na mawkmawk kipia loin, tua a sipa ii vanzat sung pana kilawm pen, a tuibuk thei ahi zongin, a sakhau ahi zongin, sakhau temta ahi zongin, a teipa ahi zongin, a kilawm ding tu khat hei khat cih bangin na kipia uh hi. Tua banga van piak ding na nei lo zong na om thei a, tuate in melmuh dingin, sumtang Ks. 2/- cih na pia thei uh hi. Tua sum pek nih pen nidangin gual nihna ci uh hi. Tua ciangin, tute pen, van ahi zongin, sum peknih ahi zongin aneih zawh kei leh, kima ho khol uh a, pute in a zulup ding pen a tute bel la in tua sungah guangin luup hi. Tua a lup zu pen a tute innsung pana zubel tawh a zutee pua khawma, tua beel pen melmuh in kisim sak zong na om hi. Tua pen a cimawh pente na zat hi bek hi.
Tuhun khang thak hunah, zutang tun a om thu kithei-in, Zo kampau sungah, mite pawl khat in midangte a peuh enin sih sim atun ding a sa zong na om thei hi. Melmuh a kipiak ciangin zong, vanzatsa cih bang kipia khol loin, beelkang a gol khap kuakua leh sum tang za nih za thum, za nga dong peuh a pia ekek na om leuleu hi. Hi bangin zutang kitung a melmuh a kipiak ciangin, khat leh khat kinehno in khitui nap tui luanna zong na piang thei hi. Ahi zongin bawl loh a phamawh thu khat ahih manin, kizopna abei simin, pu dingte kizasak in, melmuh piakna kinei ahi hi.
Zutang tun atom a lahna:
Zutang tun pen (1) Kahlei kia leh (2) Ngawng beina kici hi.
(1) Kahlei kia bangin kici hiam cih leh i theihsa bangin kahlei i cih pen mun ni a pha khat kikawma kizopna pen kahlei kici-a, kizopna bei cihna hi. Ama ngawng pute a ne den pen amah a sih nini-in, tua ni ama luang tunga ngawng sim loh pen, a kipiasa pute tung kipia thei nawn lo hi. Amah tawh kizopna beita cihna in kahlei kia na kici ahi hi.
(2) Ngawng bei cihna tawh kisai-in, amah a sih khit ciangin, tua baangkua sungah ngawng pua ding adang hong hita ahih manin ngawng bei na kici hi. Ngawng bei cihna tawh kisai-in, pute a dingin tua inn pan ngawng bei cihna hi-a, tua innteek ngawng piate a dingin ngawng bei cihna hi lo hi.
Zutang kici kammal pen a patna lamah zong tawm i gen khin hi. A kitel zaw in gen ni cileng, zo kampau sung ahih nak leh, taanglai in, zulupna a diakdiakin sihna mannate ah pute zu peuhmah kuama a tawh kigawm loin, atuam vilvel in, inn liim mong hansuang to pai-ah pute a innkun lam manawhin kigual to hi. A patna ah pute ngawngpua dingte zubel tawh kipanin, tua zomah ngum pua dingte zubel in zom hi. Tua banah pute alup zo teng a kigual to diudeu hi. Zutang tung i cih kammal pen in, pute zu kigualna-ah kigual khawm nawn loin, mundang khatah kiluup cihna hi. Sih vui ni-in a luup leh zong kituam koihin kiluup hi. Handal ni'n a kiluup leh zong zubel dangte tawh kigual loin, a tuam mahin kitang luup se hi. Tua ahih manin kitang tun ahih mana zutang tunna kici ahi hi.
Zutang tun i cih pen, khangsimna hi lo hi. Beh bup tawh zong kisai lo hi. Ni nung zui kitengte bei hak zaw deuha, tua lote bei baih zaw deuh hi. Inn suan tawh kisai hi zaw hi. Innsuanna zui-a zutang kitung hizaw hi. Tua thu mah zong a telhuai khatah, a kamsiate zi nih leh thum a sihsuah a zi nei kik leh ta nei kik om hi. Tua bek tham loin, a zipi tawh a tate hin loin a zi no tawh tate innluah peuh na om thei-a, tua bangte, baangkua khat ahih hangin, ngawng pen a pa a khat mah na hi-a, ngum pen a nunung pen a nute nungte peuh in na piang ahih manin ngawng thu-ah kibuai thei hi. Buai nading om peuhmah loin, a pa ngawng kipelh thei loin ama ngawng pua ding tua innluahpa ii pute mah hipah lel hi.
Pawl khatte buaina ah, taangval inntuan nai lote ngawng thu in kibuai thei hi. Den a i gen bang mahin, khangsimna hi lo ahih manin, inntuan nai lopi ahih nak leh tua inn a ngawng pua dingpa bekin ngawng pua thei dinga, ama pute in ngah thei nai lo ding hi. Pawl khat in, amah sa va bengin Vompi ngaltang khat man leh tua a sa mat a ngawng a pute in ngah lo ding hiam ci thei hi. Tua sungah en pak leeng lungap theih nading khat hong bang hi. Tua a samat pen ama mat ahih manin, a ngawng pen a pianna pu in a ngah ding mah aman hi. A sih ciangin, ama kawsah pen ama gawh hi lo-a, apa gawh ahih manin, apa pu in ngawng a san ding mah hi lel hi. Ngaihsun khol kei leeng lungap nading hi-a, ahi zongin ngaihsun thei leng a hamsatna om lo hi.

Khawk - 6
Pawi Bawlzia
Nidang lai-in, pute pate sungah, khuazangpi bupa pawi bawlna pen na tam lo hi. Pawi kici khua buppi a kihel theihna pen, Tonna, Gal-aih sa aihna, Taang za aihna cih loh na om ngei loin, a pelmawhin kumsim in Khuado pawi leh Losial piak pawi cih mipawl khat in na nei thei hi. Ton leh gal-aih sa-aih cihte leh taangza aih cihte lah kumsim om thei khol lo hi. Tuate lo pawi hamsa ahih manin, khuasungah nungak tangval in bawl tawmin liau kham ci-in zu kidong hiam thu khat peuh kikham hiam bawl tawmin pawi na kham thei uh hi. Khuado pawi leh Losial piak pawi a neite in zong a mual biakna khat khua bupin kizang beka, tua lo a pawipi pen beh sim ahi zongin a kipawl tuam teng cih bangin kituam bawl ciat hi-a, khuazang pawi cih theih taktak hi lo hi. Ahi zongin, khua khat sung ahih leh a behbeh, a phungphung a kipawl a kibawl ahih hangin, a ni kibang tek hi. Beh khat sungah, mi bawl hun a hong om thei lo khualzin gamvak a om leh kingak a mi bawl nung a bawl cih loh pen khuazang a bawl ni kibangin kibawl na hi hi.
Khua sungah mi na "tong" thei sama, tua pen a kum a kha kiginga, a zu a sa a kicin pikpek cianga kitong thei hipan hi. A zu a sa kicing i cih ciangin, a tong dingpa bek hi loin, akiim apaama, a panpih dingte zongin a ngimna zah a cin ciang a thu kizaksak a kitong thei hipan hi. Kum sim ahi-a, kumnih sim ahi zongin kitong zolo hi. Tua ahih manin paunak in, "Tong kinim hang kinim" bang e, kici kilim ginna peuhmah tua tawh na kigenteh hi. Kigin mahmah kul hi. Sial gol, vok gol nih leh thum leh, zu beel khauvawh kici beelpi 10 bang kigin masak kul hi. Tua bek tham loin ankhing tuibuk kici kisapna dangte zong kigin phitphet kul lai hi. Nidangin vok nam pen tu-a te bangin a khang a kum khat a tuknga tukgukte kikhawi nai loin, Zo vok mah na kikhawi-a, a gol pian tuknga tukguk aphak nadingin kumnih mah hun ngak kul na hi lai hi.
Tua tham loin "Ton kha" kici pen tuhun a calendar in December kha tawh kituak na hi hi. December pen bang hangin na teel uh hiam cih, mi khempeuh a man laitak hun ahih banah khua hun hoih laitak na hi sese hi. Tua December kha zong a ni na mawk seh lo uh in, khaliik ni tawh kituak dingin na teel lai uh hi. Manlaitak ahih manin, pute pate in, December kha pen "tha man kha" zong na ci-in, "Seu gawl kha" zong na ci thei uh hi. Na kisem lo, vanpuak ding om lo, seu neih teng kitawl ngasak kikoih lel ahih manin "seu gawl kha" a ci na hi uh hi. Thaman a cihna pen uh zong a tam zawnasepna kiman laitak ahih manin, zin nopna len nopna ah kilen theih hun, cihna in "tha man kha" a ci uh na hi hi. A tong ding pa khat tua December kha in, hih theih lohna dam lohna khat hiam thu khat peuhpeuh hangin a kipelh leh a kha kik cih bangin kikhin loin, kum kik ciangin na kikhin to pek na hi hi. Nau zaw a "tong" ding a om leh pen November kha in na kitong sak ahih manin, pute pate in, November kha pen "nau zaw ton kha" na ci pah uh hi.
Ahi zongin, tonna ahi lo "tho" kici, taangza aihna, sa-aihna leh gal aihnate ahih leh ama hun tawh kituakin, na kibawl lel hi. Lo sial piak pen kumsimin, April kha leh May kha sungin na kibawl thei hi. Khuado pawi ahih leh, mite an lakkhit ahi September kha leh October kha sungin kibawl thei hi. Khuado pen, khuazangpi a an lak zawh, anteng inn ah kinawna a kikhum khit ciangin, hausa upate in vaihawmin Khuado niding ahi zongin Losial piak hun ding ahi zongin hong tun sima ni seh kholin khuazangpi zak dingin, taangko sak uh hi. Tua ni a khuado theih nading ahi zongin, Losial piak theih nading ahi zongin, kigin kholhna nei ciat uh hi. Khualzin gamvak a om loh nading azin avak a om leh zong tua hun lapa, atun theih nading ci-in, nipi nih atawm penin gel kholin taang na ko uh hi. Khuado leh losial piak bawl hun pen Zogam sungah abawl hun kituak thei lo hi. An khumbaihte in do baihin, an khumhak khuate in do hak uh hi.

Ton zia:Tonna pen mikim kitong thei lo hi. Tulpite bek a tong thei na hi hi. Beh khat sungah, Tulpipa zong aton ding ciangin ama thabek tawh tong zo sam loin, u leh nau in a panpih ciangin tong zo pan na hi hi. Beh khempeuhah Tulpi khat ciat kinei a, tua Tulpi khempeuh zong a tong kim zo kihi lo hi. Beh leh phungpha pian leh u leh nau haute in, a Tulpi hantawh zo-in, a kisan leh a tong zo hipan hi. Tua na leeng zong mawk ton thei lo lai-a, a ton theih nadingin, "tho" kici zu nunna dang a tawm pen thum vei bang tua Tulpipa in abawl zawh leh kitong thei hipan hi. Bangmah "tho" bawl loin, kiton theih loh banah atawm pen thumvei bang abawl leh a tong thei na hipan hi.
Tulpipa khat tong nuama, a u a nau in zong a thukimpih a leh, sa kikhawi-in, zu kisa khol tek hi. Tua kiginna teng tonpi niding a naih khalang bang asap ciangin, atong ding Tulpipa in sabat sep ci-in, zuluupin u leh nau teng khawm masa hi. Tua akhopna ah, unau sungah kua teng in sa pum kum dinga, kua tengin zu bel bangzah kum zo ding cih kidotna na nei masa hi. Inntekte kiginna zong sa pum bangzahcih leh zu beel bangzah nei zo cih tua ni-in thei khin uh hi. Tua sa gawh ding sung panin innteekte'n, sialkop go zo ding go zolo ding cih tel masa-in, tua lo unaute in, sial bangzah go zo ding cih a theihna uh tawh kizui-in, "song lai" ding kisui khol hi. "Song lai" pen sial khat ciangin song mung khat ahih manin, tua sial zah ding atheih uh ciangin, sanggam teng song lai ding sing gil zong dingin, gamsungah kuan khia pah uh hi. Tua banah, tua songlaite sanga sangzaw khat "ton sawl" kici a kong lutna a phuh ding zong kisui pah hi. Tua banah, "ton sawl" kici tonsawl tawh kiphut ding gawpi abawk tawh a tom khol lo zong kizong khol pahin, tua "panpi ni" kici lapin tua teng innah kitun khinin, kiphut khol masa hi. Tua nite in, innteekte in zu lim nono tawh na vak masa uh hi.
Tonpi kigin ni ahih kei leh vaitun ni pen khalik ding ni khat sapin kipanin, Tonpi nipen khaliikni na hisak uh hi. Khekleh ni dong a tawmpen ni thum sung na tong thei uh hi. Zu beel tama, a kigaih zawh nai kei leh, nitak simin nungak tangvalte kilaam lai-a ni sagih sung bang zong a sawt om thei sam hi. Tonsial leh sagual kigo atam nate ah, tanute in sa lukheuh pen ninih nithum bang buaipih thei uh hi. Tanute in Tonna salu khempeuh ton huna bei khit ciangin, a luteng kheuh uha, a lu hawm pen innteekte baang tungah hoihtakin, naang tawh kanin suang uh hi.
Nauzaw Tonna'
Nidang lai-in, nau zaw peuhmah, sa a ai a, gal a ai zongin, ama inn ah ai thei loin Tulpipa inn ah tunin ai se uh hi. Nau zaw khat in, sa man thei-in, gal man thei in hi leh, a aih nop leh Tulpipa inn tunin ama min tawh aihna kibawl thei hi. Tua banga sa lah ai a, gal lah ai zo mipa khat in, taangza a aih nop leh ama inn ah na ai thei hi.
Nau zaw khat, a nu sung panin amah bek na hi-in, zi leh ta aneih khit ciangin, si leh a ngeina ah ta khat si-in kiciamteh veve ding ahih manin a sihni a kikuun vui ding hitang hial hi. Zi leh ta nei khina, si leh kikuun vui ding pen a ut kei leh a ton kul sese hi. Tua bang mite, gal lah ai ngei a, sa lah ai ngei pa khat in, ama inn ah taangza ai khin ahih nak leh, a ton nop leh Tulpipa phalna tawh ama innah na tong thei hi. Tua bangin tong in hileh, asih ciangin kikuun vui nawn lo ding ahih manin, Tulpipa in zong phalna pia-in, a innah na tongsak thei hi. A ton hun pen November khasunga a tong ding hise hi.
Tulpite aton ciangin, gualpau demna kici-a, ahi zongin, nau zawte aton ciangin sihni ding khualna ahih manin aton la ding hibangin na sut uh hi.
(a) Ka sum tualah phuigua ka suan, gual ka demna hi lo e,
(b) Gual ka demna hi lo e, kawi tawh laukha ka hualna hi ee.
Nauzaw aton hangin, Tulpite ton bang loin inntual song phut thei loin, khuam khat kiphutin tua tawh gawpi bawkpha khat kiphut hi. Tua pen asih ciangin a zite tunna tung thei ding cihna hi a, tong kei leh kikuun vui-in mundang tung ding cih upna hang ahi hi. A ton manin, a nupa un asih khit teh vantungah kimu ding ci uh hi.
Ton Sagawh
A tongte sungah sial kop go kici a sial gol nih a gote a minthang pen hi. Sialkop agawh zo kei leh zong, sial kisiang khat, ahih kei leh a neupen tongsu khat teitei a gawh lo phamawh hi. Tua banah, sungsa ding leh maisa ahih kei leh saikhensa kici vok tuknga sanga neuzawlo nih agawh kul lai hi. A gawhte vok sung panin a gol zaw pen maisa ahih kei leh saikhensa kici-in, a neu zaw pen sungsa kici hi. Tua vokte pen sungsa ahih leh panpi ni-in, kigo-a, atong ngei ahang ngei teng a khual a tualin minsa zian kidongin, tua tengin ne-in, asa hawm thei uh hi. Saikhen sa kici maisa pen, panpini a zing ciangin kigo-a, atong ahang ngei teng mahin ne-in a sa hawm uh hi.
Innteek a tongte sial gawh leh, u leh nau in a kum uh sial leh vokte pen kihawm hi. A kihawmna ah, innteekte gawh makai-in adang tenga pen sagual kici-in sa behlapna in kihawm hi. U leh nau sa kumte in, sial leh bawng hi-a, vok ahi zongin, amau inn ciatah sagual gawhni in go ciat uha a sa ho (a siang teng) hong puak uh a, a gote gawh bangbang tungah a liang khatta kikhai kik hi.
Song:Tulpi atong ahih nak leh, song lai phut thei hi. Tua song lai pen sing gil mahmah kisui-a, asial gawh zahzah uh phut thei uh hi. Tua song laite sungah pawl khat pen keeng kineisaka, tua pen, innka lam nga in kiphut hi. Ton pen khang khat in, khat vei tong ding hamsa-a, ahi zongin khang kithuapte pawl khat tong thuap thei uha, tua bangte inn ah song pen phungpha mahmah hi. Tua lo tong napi-in sial tam go zo leh a khang kikte tong zo nawn lo ahih manin song pen tawm bek kiphut hi. Tua song pen, tulai-in inn sungah degree mann cih bang, officer mann cih banga kitam suan dan bangin kithupi muh mahmah hi.
Ton Sawl:
A tong khempeuhin "ton sawl" phut thei uh hi. Ton sawl kici pen songte sangin a sang zaw leh a pumpi a kizem singgil mahmah kisui-a, kiphut na hi hi. Tua ton sawl tawh guapi bawk nei pawl khat kihen khawmin kiphut hi. Ton sawl pen, a tongte ii inn lutna kong (tunkot) ah kiphut hi. A kiphuh nadingin, a tong innteekte kong lutna innka lam peuhpeuhah kiphut hi.
Ton la:(a) Ka tonkhuang bawl thang zaw maw e, ka hankuang bawl thang zaw maw e,
(b) Tonkhuang leh hankuang thua tang e, mual i hem a thang aw e.
(a) Zua gaw tangsial mang aw e, Ngai tui vanglai khua aw e,
(b) Ngaitui lai vang khua thawng e, tangsial mang aw zaata a lamna hi e.
(a) Sum tual ka ton sawl aw e, zang huikhin'na sem lo aw;
(b) Zang huikhin' na sem lo aw e, a paallai na heu lo aw.
(a) Sawmsial ka gaw a kisiang sing seng, taangtam gualin pakbang tawi ve uo:
(b) Taangtam gualin pakbang tawi ve uo, lia lungtup in kopa ka hen aw.
(a) Ka ciin sum tual dildialah, simsing ka dei tuu bang suang ing e,
(b) Theisen sanggah gual si bang nui, ka kiangtawi inka patangah sial leh taang min loa ing e.
(a) Sumtual tonmung a liimah e, vangla laizom ngai ing e;
(b) Vangla laizom ngai ing e, tuaitum lia nu ngai ing e.
(a) Sawmsial ka gaw thang zaw maw e, vonmang khakiah thang zaw maw;
(b) Sawmsial kagaw leh vonmang khakiah, mual i hem a thang aw e.
(a) Ka sumtualah phuigua ka suan, gual ka demna hi lo e;
(b) Gual ka demna hi lo e, kawi tawh laukha ka hualna hi e.
Ton Sial Gawh Zia:A tong innteekte gawh sial khat ahi zongin, nih ahi zongin, inn nuai panin, sial kongah kikai-in inntual song kiangah khuam khat kiphutin kikhih masa hi. Tua sial pen mawk gawh ziau loin, khuasung tangval hatte in buan uh hi. Sial pen gol lah golin, le lah le mahmah hi. Tua pi mah tangvalte in lai uha, akii alen tawh amei aman tawh akhe aman tawh tangh lai uh hi. A kii in manin, a ngawng hek gawp uha tuksa uh hi. Atuk masiah a lai uh hi. Sial pen kitom cih takin kitom sama ahi zongin a kitom zolo dingin hil huan uh hi. Tua banga sial gawh pen, kiminthang sak mahmaha, khuazangpi in ki en hi. Tua ahih manin, paunak ah,"sial gawh et a ki-en" kici pen tua sial gawh na kigen ahi hi. Zum leh hiam kizang thei lo-a, khut tangpi tawh kibuana kigo ahih manin, sial zong' thazawm pak lo hi. Taang lai-in, tangvalte hat kidemna lianpi khat a kingaihsun ahi hi. Pawl khatte kitha muangin a sial mei lem toin, a tungah tuanga sial kitomtom ta leh kia se lo hi. Sial pen a tung tuan hamsa mahmah hi. Sakolte bang lo hi. Ahi zongin a hatte belh tentan zo mawk hi.
Sa aih ziate;Sa a kimat ciangin sa khempeuh ki-ai thei sam loin sapi ahi Sai, Cingpi, Zangsial leh Sahang namkim a kimat ciangin ki-ai thei bek hi. Vompi, Ngaltang, Sazuk, Sanang, Saza cihte a pumpi a gol hangin ki-ai ngei lo hi. Tua a ki-ai khol lo Vompi leh Ngaltangte pen khuamualah kimualsuah thei hi. Ahi zongin, losial piak huna, sawnga kici sa bet ciangin a kiman peuhpeuh kimualsuahin ki-aih bawl thei zel hi. Tua pen sa min neite aih danin ki-ai loin, "sawngsa aih" kici in, khuazang buppi hi khol loin, a khawngkhawng in ki-ai na hi bek lel hi.
Sa a ki-aih ciangin Sai, Cingpi, Zangsialte a aih dan pen kibangin, Sahang tawh kisai a kimat ciangin, a tuam deuhin ki-ai thei hi. Tua pen bangin kilamdang hiam i cih leh sahang pen, a ki-aih ciangin, "kikhim" se mawk hi. Amat laitak a hanla sak zong a dangte tawh kibang loin hanla kisa se hi. Singnuai hanla kisakna a dangte tawh kibang lo se hi. Ahi zongin bangsa bangsa a kimat ciangin, a kiman pen sa tungah a manpa tu in hanla a sak tek uh pen ngeina na hi hi.
Sa a kimat ciangin tenna khua nai khawng a kiman ziauziau hi peuhmah loin, gam kikuanin khua gamlapipi a va kiman na hi hi. Gam sungah zan tampi giakin, kibenga, mi zong khat bek cih bang hi loin, mihon khat kipawl a kibeng na hi hi. Tua banga, a gamlapi a sa a kimat ciangin, aih ding sate ahih leh, sahang banga hih leh a luang pum in kipua hi. Tua a luang pum a kipua zo lote pen a vun kihawkin naang tawh kikhakin a luang mah kisunsak in tua tawh aih dingin, khua-ah kipua hi. Sai, Cingpi leh Zangsialte ahih leh, a masa pen in a lu puak dingin kigeel pah hi. A sa pen a lim ding teng kihangkeu-in akawnin kipua hi. Sai bang ahih leh a sinte kihangkeu-in kipua na hi hi. Tua a kimansa pen bakno khatta in khuazangin atan theih nadingin ki-at in inn lusi ah kihawm hi.
Khua khat panin, sabeng ding cih a ngaihsut uh ciangin, sa uk teng leh an huan ding kiseh kholin, inn pan khuazang theihin a kuankhia uh na hi hi.
Khawk - 7
Sa Sem Zia leh Sa Hawm Zia
Tu-a Zo Tat Zia i bawlna in, a diakdiakin sasem zia leh sa hawmzia a man i deihna hi masa pen hi. A dangte pen theih huai hi beka, tu-a sa semzia leh sahawm ziate pen zatpah leh zuihpah ahih manin a thupi pen khata kingaihsut ahi hi. I theih dingin Zo kampau sungah, sa semzia leh sa hawmziate pen taangtawnga kipanin tuni dongin them zong kikhelna leh kilamdanna om het lo a kizang suak ahihna leh aman pen i theih ding kisam ahih manin hong kigelh hi zaw-a, ihtheih masak ding hoih hi.
Hih sa-atna leh sa hawmnate ah, aman lopi-in ki-at in kipia leh kinolh ngam zah dongin kithupi lak hi. A diakdiakin mosa bang cileng, sungte in a man in pia a, makte in man mah hi ci-in sang teekteek uh hi. Tuhun lai bangin thop bawl gawpgawp cih bang om thei peuh mah lo hi. Aman kei leh zong tua kisam lai hi, ci kigen ngam na hi hi. Bang hang hiam cih leh sa in pai nading mun nei-a, a manin hi kei leh a ngah dingte kipia thei lo ta ding ahih manin, buai ding hita hi. Tua banga om loh nadingin aman a ki-at a, aman a kipia na hitek se hi.
Sasem na panin, sial leh bawng sem zia leh vok luang sem zia pena tuamtuak na hi hi. Sa kigote bangsa bangsa a kigo hita leh a at dan pen a tuam hi peuh mah loin kibang tek hi. Ahi zongin a man i cih in, a kigawhna thu tawh kizui-a, a kigote khat leh khat a atna kibang lo thei hi. Gentehna in, mo sa-at dan leh kawsah at dan kibang lo se hi. Tua banah u lian sagawh cihte, zin sagawh cihte pen sa hawmzia atuam ciat ahih manin a at dan kibang mah ta leh a kipiak dan atuam tek na hi hi.
Sa at zia:Vok
(1) A kithah khit ciangin, tuisa kibuakin amul teng kikiat siang masa hi.
(2) A mul a kiat khit ciangin, agil ah ki-at in, a sung teng a sin alung leh a kal teng kila-in a sii dongin kila khia siang hi. Tua khit ciangin a lap kihawk leuleu in, aman ciangin, sa pum mei-ah a at nop nadingin kihul kik hi.
(3) Mei-ah ahul khit ciangin, alu kikhenkhia masa phot hi. Tua a lu a kikhen khit ciang a lu pen pana, ngawngvial cih kila kik hi.
(4) Tua khit ciangin aliang tegel kilakhia leuleu hi.
(5) Tua khit ciangin, a dawisa kici a sungteng tawh kipawl ding a awm panin a taw dong ki-at suk leuleu hi.
(6) Tua aman ciangin, "sa cia" kici a tek kila khia leuleu hi.
(7) Tua aman ciangin, akawng kila in a phei tegel kikhenkhia leuleu hi.
(8) Tua zawh ciangin, at loh a, a om lai a pum pen khen nih kisuahin a nak nih hong hi hi.
(9) A nak lang khat pen khen nih kisuahin dawisa ding ci-in kikhen khia a tua a lang khat pen sa siang kici lakah kikoih hi.
(10) A nak dawn leh a liang dawnte a guh om loh nateng ki-at khia-a, tua sate a tawnin li hong pha in, tua pen kigawmin kihen khawm hi. Tua pen sanangkhil ahih kei leh sa lukhu kici hi.
SA GAWH CIANGA ZAT DAN
Vok: Taang lai-in vok a kigawh ciangin, dawisa leh sa siang kikhen masa hi. Sa agawh khit ciangin, ki-em ahih kei leh tuisa kibuakin a multeng kikiat khia masa phot hi. Tua aman ciangin a gil kikheh hi. A gil a kikheh ciangin a sung ahi alung atuap leh agilzang teng a kilak khiat khit ciangin, alap kihawk hi. Tua aman khit ciangin a vok a pumin mei-ah kihul leuleu hi.
Tua aman khit ciangin, sagil bawl pawl in sagil bawlin, a vok pen kisem hi. Vok pum a kisem ciangin, a masa pen in, a liang bul panin kikhenin a pum leh a lu kikhen khia masa hi. Tua a lu pen in a ngawng vial leh a lu kikhen kik leuleu hi. Tua a ngawngvial kici pen seh thum suah seh khat sa siang dingin kikoiha seh nih pen dawisa lakah kihei hi. A lu pen sasiang lakah kihel leuleu hi.
Tua khit ciangin aliang tegel kilakhia a, a liang leh a liang kikhen naah sa lukhu kici kikhenin kituam koih hi. Tua khit ciangin aliang dawn tegel ki eu lai-in kituam koih leuleu hi. Tua teng aman ciangin, a phuksa ahih kei leh a dawisa kici a awm lam teng kikhen khe leuleu hi. Tua aman ciangin, a iik (a cia) kici a naktang sagih na pan kikhen khia hi. Tua a iik a hih kei leh a cia kici pen, a bul teng pen, salawhta sa kici-in, a buppi in kiphelkhapin, sanggam leh tanusa in kikhen leuleu hi. Tua ahih kei leh dawisa sungah kihel cihna hi. Tua lo a awm leh a gil bualteng khempeuh dawisa ah kihel khin hi.
Tua khit ciangin anak kikhen khia leuleu-a, a nakdawn nihte ki-eu khia in, sa nang khil ahih kei leh sa lukhu kicite lakah a siang dingin kikhen hi. Tua banah taklam naksa pen, seh thum suah seh khat kikhen khia-in dawisa lakah kihel hi. Tua lo teng sasiangah kihel khin hi. A pheipi tegel kikhen leuleu-a, a taklam phei penah amei kibaangsak hi. Tua tegel zong sasiang mahah kikoih hi. Sa a ki-at ciangin, a liangte, a pheite tungah a phawhlawhsa ki-atin, a nakte tungah zong a phawhlawhsa ki-at khia in, sagil a thun dingin kikoih hi. A liang dawn tegel leh a nakdawn tegel teng kigawmin kihen tuama, salukhu kici hi. Tua teng pen innteek atunnate in a ut banga azat thei ahuan theih teekkhiat kici hi. Sa nangkhil kici ahi zongin, sa lukhu kici ahi zongin kici thei tuak hi.
Dawisa kici teng pen, kihuana, taanglai-in, atui lakah tangtang kikhah sukin kiha saka, tua leh asa bakkhat tek pen sasim tengin ne thei hi. Inntek a dingin, sa lawhta kici a cingsa (a ektuk) na bakpi khat, a iik (a cia) ii a awmbul eu, a tawngang kici a gilthalhna tumpi khat, a gilpi sehthum suah seh khat asin a u-tok ahih kei leh a sin kilawm khat, a nak mong khat teng kikoih liana, inntek apa pen leh nu pen in ne hi. Innluah ding pen pa kine sak loin, a gaih val leh a nau zawte kipia thei hi. (U zaw pen, innluah dinga "sadiah" kici sa lawhta pen ni khat ni a nu leh a pa a omlo ciangin a nek theih hun om dingin a thu omsa ahih manin, a nu leh a pa hin sungin kine sak lo hi. Khangsim na a kinei ahih manin khang kithuap thei lo cihna a kipia lo na hi hi.)
Sasiang peuhmah a puasa teng ahih banah, a ngawi kual khat, a gilpi seh thum suah seh khat, a sin a u-tok leh alap khat pai thei na hi hi. A lap pen a kisai mosa "tunsa" te bekah na paisak uh hi. Tua loteng pen inntekte tan na hi hi. Tua ciangin, dawisa pen sanggam leh tanu kici in kituam huana, dawisate sung pan kikhen hi. A cia (a iik) pen kiphel khapin kihawm hi. Salawhta a ding lo teng kikhenna hi hi. Tuhun ciangin salawhta pen, teek khiat kici ta hi. A iik (a cia) buppi bang na hithei hi.
Sial leh bawng sem zia
A kithah khit ciangin, a vun a hawk leh hawk masa hi. A hawk kei leh sempah hi.
(1) Agil kikhei masa a, a sung teng kila khia in a sii teng kila khia phot hi.
(2) A man ciangin, alu kitan masa hi.
(3) A ngawng kilakhia leuleu hi.
(4) A liang tegel kilakhia-a, aliang tuak lakna pan sadathop kilakhia hi.
(5) Sa cing tegel kilakhia leuleu hi.
(6) A sung tenga kilak khit ciangin a dawisa ki-at khia-a, a khuangzang kilakhia tuam hi.
(7) A pangsa teng a ngeina ciat bangin ki-at khia leuleu hi.
(8) A ngum kilakhia in, aphei tegel kikhenkhia leuleu hi.
(9) Tua khit ciangin, a hawm nading tawh kizui-in, aphei a liang bit lo dingte tenga tong kikhen khia hi.
(10) Sial leh bawng hita leh vok hita leh a sung panin a sin a lungte kituam koiha sagil pen a sii tawh kithalin a kawn in kibawl hi.
(11) Sapi hita leh vok hita leh "a phua" teng ahih keh a ik teng pen dawisa a kisim hi den hi. Ahi zongin Zo kampaute lote in, ta nu sa in zang thei uh hi.
Sa kipiak na zia
Tunsa piakna
(1) Tunsa ahih nak leh vok tal tukli nih ahih kei leh sial leh bawng ahih leh khat hi.
(2) A luang nih iilu leh kha tegel tuak
(3) A ngawngvial lang khat tuak
(4) A liang tegel tuak liang li
(5) A phei tegel tuak phei li
(6) A nak bit khat tuak leh dawisa mawk kici nak nih
(7) A sin khenkhat tuak
(8) A gilpi seh thum suah seh khat tuak
(9) Vok gol pen alap lang khat buppi
(10) A ngawi kual kual nih, a kal nih tuak kal li
(11) Sangnang khil ahih kei leh salukhu teng.
(12) A ngum ahih kei leh a kawng kici teng.
Ganpi ahih leh alap taangin a beu khat kipuasak hi. A dangteng kibang hi.
Mosa ahih nak leh, a gawhte inn ah sa kihawm lo a, atunnate inn bekah kihawm hi.
Tunsa a tunnate in anuai-a bangin hawm uh hi.
(1) Tulpipa = Vok gol pen nak dawisa mawk khat
(2) Sasempa = Vok gol pen nak siang buppi
(3) Zawpa = Vok gol pen kawng ahih kei leh ngum phel khat
(4) Sacing u zaw = Vok gol pen kawng ahih leh a ngum phel khat
(5) Sacing nau zaw = Vok neu zaw kawng khen li suah khen khat
(6) Sadathop u zaw = Vok neu zaw kawng phel khat
(7) Sadapthop nau zaw = Vok neu pen kawng sehli suah seh khat
(8) Tanu khatna = Vok gol pen pheibul leh a lu
(9) Tanu nihna = Vok gol pen pheitong leh vok neu zaw pheibup a hoih zawzaw.
(10) Tanu dangte = Vokphei tong leh vok liangtong abat zawh na ciang teng.
(11) Zawl tuah = Vok gol pen kha kipia hi.
(12) Tanu om lai teng = A phei tong leh a liang tong sung pan ki-at hi.
(13) Sanggamte = A phei tong leh a liang tong ki-at a sa val teng zong hi.
(14) Innteek sa in = Sa nang khil ahih kei leh sa lukhu kici teng a ngawnvial tegel leh alap om lai teng.
(Sanang khil ahih kei leh a lukhu kici pen a liangdawn li leh anak dawn li leh a ektuhna teng kipia na hi hi.)
Nidang lai-in tunsa a ganpi a kigawh leh a liangbup pen To saliang kici-a, apai hi-a, To saliang a bei ciangin sanggamsa in kihawm hi. A liangtong pen Zokam pau sungah tanute kibansaka, a liang bul pen sanggamsa a kihawm na hi hi.
Kawsah hawm zia
Kawsah pen, innteekte bek in na go loin, sanggam u leh nau in zong na go thei uh hi. Sanggam u leh nau gawhte pen, a sa pen amauinn ciatah go-in, a dawisa kici teng a gote in huanpah uha, a siang teng pen, kawsah dingin kipia na hi hi. Tua agawh sung panin, a liang khat a gote kikhai kik hi. Tua lo teng pen misite ki-ap ahi hi. Sa a hawm ciangin, a nuai-a bangin hawm uh hi.
(1) Tulpipa in = Innteek gawh sabeu gol khat ngah hi.
(2) Sasempa in = Innteekte gawh a sungkua seh thum suah seh nih ngah hi.
(3) Zawpa in = Innteekte gawh a khuang zang ngah hi.
(4) Sacing u zaw in = Innteekte gawh sacing hoih zaw pen ngah hi.
(5) Sacing nau zaw in = Innteekte gawh sacing omlai pen ngah hi.
(6) Sadathop u zaw in = Innteekte gawh a dathop hoih pen ngah hi.
(7) Sadathop nau zaw in = Innteekte gawh a dathop omlai pen ngah hi.
(8) Tanu khatna in = Innteekte gawh a pheibit leh sa dang ngah thuah thei lai hi.
(9) Tanu dangte in = A pheitong, a liangtong leh a naksate a cin na bangin ki-atin kingah sak hi.
(10) Pute in = Innteekte gawh a ngawng ngah uh hi.
(11) Sunghte in = Innteekte gawh a ngum ngah uh hi.
(12) Sanggamte in = To saliang pen leh a pheitong, a liang tong ki-atna abul sateng leh sa val lai teng a kilawm bangin kihawm sak hi.
Hih pen sial leh bawng gawhna sa hawmnate ahi hi. Tanu sa peuhmah a kihawm ciangin a khatna panin a tawpna dongah, a tamna kizop suk diudeu in kigul meisak hi. A banbanin sa kiluaksaka, ama nambat atuna, a om kei leh kihawi zawzenin, a banin kisam suksuk na hi hi.
Gautang sa ahih leh, a kikim dimdiamin ki-at a kipia hi. Zokam pau sungah sa pen kawsah ahih nak leh tanute a thupi pen in kikoih hi. Pute cih bang sa kitan khol lo hi. Ahi zongin, nidang lai-in, hi bangin kawsah kigo cih a kitheih ciangin tua inn a, tanu sangah dingte in tua i sangah pen tu tungin i tute kua pia ding i hiam cih kikupsa-in koih uha, tua baangkua lianah pu a hite pen tua baangkua a tanute tu peuh na hi ahih manin sa a golpipi a ngah lawh bang na om thei hi. Sahawm ngah hi lo hi. Tua bang sangahna pen a kineih ciangin sangahna dang om khol lo ahih manin, tu nei ta neite in, atu atate pia tangtang uh hi. Khatkhatte bang apiaksa pen na paipai in, a tawpna ah ama kiang bang atung kikna om phial hi. Hih pen tute sa kipia lua i cih nopna ahi hi.
KAWSAH VOK HAWM ZIA
(1) Tanu khatna in = A phei mei baang leh kawsah dang belapin ngah thei hi.
(2) Tanu dang teng in = A phei tong, a liang tong leh a naksa kihawm sak hi.
(3) Sanggam tengin Tulpipa dong = A phei bul a liang bul leh a naksa a val teng a kilawm bangin kihawm sak hi.
Pusa thoihna sahawmzia:
Sial Leh Bawng
(1) Tulpipa in = Daw man ciin a liang tong ngah hi.
(2) Sasempa in = A ngum (ahih kei leh akawng) ngah hi.
(3) Zawpa in = A phei bit khat ngah hi.
(4) Sacing tegel in = Sacing tegel mah kihawm sak hi.
(5) Sadathop tegel in = Sadathop tegel kihawm sak hi.
(6) Pu in = A ngawng ngah hi.
(7) Sanggam teng in = To saliang hawm uh hi.
(8) Tanute in = A awmsa, a gilngo, a sin lang khat, a gilpi seh khat kihawm sak hi.
(9) Dawisa a kihuan teng = A khuangzang, a liangbul, a sung alang khat, akal khat, a sin alang, a naksa, a si leh a beu phel.
(10) Tanu dawisa dingin = A lu, a tuap, a si lang khat, sa them nengneng teng kihuan sak hi.
Vok:
Vok ahih leh a tam zaw ah kine khin hi. Tua sung panin a kawng kila in, sasempa kipia hi. Tua akawng pen, pusa thoihna "leinuai ton" kici hunin, bikhalapah tua sakawng kikhai-in, leinuai ton aman mateng pai khia thei lo hi. Ganpi bang ahih leh a kihawm sate peuhmah "leinuai ton" man a sasempa sa ngum a pai khiat mateng sa dangte peuhmah paikhia thei nai lo hi.
Zin sagawh:
(1) Taangpi in sum kidonga u lian khat sa agawh leh a pheibit khat kikhai-a, a sung teng leh a sa a kilawm bang hausate inn ah kihuanin, u lianpa kinekpih hi. Sa dangte pen inn lusi in baakno khat ta kihawm hi.
(2) Sanggam sagawh ahih leh, a lu leh a sa phelkhat kihuana, phel khat kipia hi.
(3) Bil sagawh ahih leh, a sa phel khat leh a sung phel khat kipia a tua lo teng kihuanin kine hi.
Hih banga sa kigawhte pen a tuntunna ah ut bangbangin kizek thei hi. A sangahte siamna bangin kizek lel hi. Ne mai thei-in, a kilawmte ki-at thei hi.
SialKhup Sagawh:
Sialkhup sagawh ahih nak leh, asa a siang teng khempeuh a bupin kipia khin hi. A tunna munah, a hawm nuam ahi a, a ne nuam ahi zongin amau thuthu in zek thei hi. Sa min nei hi napi-in zeksak om lo hi. A sangte siamna bangin zek theih na hi hi.
Nau aitah sa:
Nau aitah sa kici pen vok tuk thum tukli sa hi thei-a, a siang teng kipia ahi hi. Sa min nei hi lo-a, a pute in a tute a itna lahna-a, agawh ahih manin, a ut bangin zek thei hi. Huan mai thei in, hawm thei hi. Midang zong a bupin pia sawn thei hi.
Midang tatzia:
I theih kak dingin midangte tatzia tawm tawh etkak ding anuai-a bangin hong kilak hi. Sa kipiak zia pen Zokam pau sung leh midangte pen kilamdang mahmah hi.
Saizang Tatzia:
By Pa Tun Nang- Kapteel
Tunsa:
(1) Vok luang khat bek kigawh hi. Gawh masak aitang phalbat ci-in a lang lian kipia.
(2) Gawh nihna ahih leh vok luang khat bekmah hi in kengthum leh a phel kipia hi.
(3) A lu kipia ngei lo hi.
Hawm zia: (Gawh masak)
(1) Aliang bit khat leh a sung teng innteeksa kici hi.
(2) A phei tong khat tak zawpa (baangkuapa Or Thallohpa) kipia hi.
(3) A pheibul khennih suahin Sunghpa leh Zinkhakpa kipia hi.
(4) A nakbul naktang nih baang Pupi kipia hi.
(5) A awmsa a ikkawi nawitang khat baang tanu takzaw (haitawi) kipia hi.
(6) A awmsa nawitang nihta baangin ki-at a, nugual teng kipia hi. A cin kei leh a liangbul dawn atnate tawh kibehlap thei hi.
(7) A nakbul khennih suahin, a bul lamte nih sanggam sa bawl leh sungh sabawl kipia.
(8) Sa kha pen zawltuahte kipia hi.
(Gawh nihna)
(1) A liang bit khat leh a sungteng innteekte a kici hi.
(2) A pheitong baangkuapa ahih kei leh takzawpa kici (Thallohpa) kipia hi.
(3) A pheibul nih kisuahin, sunghpa leh Pupi kihawm sak hi.
(4) A liang tong zin khakpa in ngah hi.
(5) Sa dang teng gawh masak a bangin kihawm hi.
Sa Ngawng Huan: Sangawng huan kici, a ngawng, a nak dawn gel, a ngoi kual khat, a sin seh thum suah seh khat, a cia ( a ik guh) kihuan teng sa ngawng huan kici hi. Sapi ahih leh a ngawngsa taangin saphei laisa kila-in, a ngawngsa kise khia kik hi.

A ne teng
(1) Kuan lam leh innteekte haitawi tuak (tanupi tuak)
(2) Takzawpa (Thalloh) pa
(3) Sunghpa tuak
(4) Mokha pa thusa tegel
(5) Anhuan sakte in ne thei uh hi. A kham val leh amau teng mah in a kilawm bangin hawm thei hi. (Sangawng a pheisa a kilak leh tua a kisekhia sangawng pen nugual sahawm in kinei hi.)

Kawsah hawm zia
(1) Tanu khatna in = A phei mei baang ngah hi.
(2) Tanu nihna in = A liangbup khat kingah sak hi.
(3) Takzaw (Thalloh) = A pheitong kipia hi.
(4) Zinkhak in = A liang tong ngah hi.
(5) Sungh sabawl leh
beh sa bawl in = A iikbul khennih kisuah khat tuak ngah hi.
(6) Nugual teng in = A phukkaa a awmsa teng kingah sak hi.
(7) Minman, kuangsap,
daksap, zamsap dingin = A pheibul leh a liangbul ki-atin kipia hi.
(8) Tuitak, Sawlapa, sunghpa,
baangkua, thuappa, zing
khakpa, sungh sabawl,
beh sabawl leh Pupi = A pangsa khengiat suahin kihawm sak hi.
(9) Sa sung teng a kilawm bangbangin kihawm lel hi.
Dim tatzia:
Tunsa:
(1) Vok khat hi in, a phel kipia a keng thum kipia suak hi.
(2) A sung panin, a sin a utok teng, a ngoi kual khat, akha, angawng lang kipia hi.
(3) Tua sagawh ni-in, sa taangciim a kihuan leh, akha angawng kihuan hi.
Sahawmzia(1) A ngawng Pu kipia hi.
(2) A pheitong baangkua pa kipia hi.
(3) A liangtong baangkua thuappa kipia hi.
(4) To saliang sangam thumna pa kipia hi.
(5) A nakbul sehnga kisuahin, tanu bul lam thum kipiain, seh nihte thusate geel kipia hi.
(6) A iikkawi nawitang baang tanu lina kipia a, a banteng nugualte kipia hi.
(7) A pheibul giat kisuaha, a bul lam nihte sasem tegel kipia a, tua ban Pu leh Sungh, Sanggam bul lamte kipia hi. Sa dang val teng sanggam om laite kipia hi.
(8) Sa kha zawltuahte kipia hi.
(9) Sa neng themteng Zubeel sa in kihawm hi.
Zo kampau sungah zununna peuh mahah sahawmna kibang mang khin hi. Sa hawmna peuhmahah kawsah ahih leh tanute kithupisaka, Nop bawlnate ah sanggamte kithupi sak hi.
Zunun sa hawm
Sapi (Ganpi)
(1) Tulpipa = Innteekte gawh a taklam liangtong kipia hi.
(2) Sasempa = Innteekte gawh a sungkua sehthum suah sehnih kipia hi.
(3) Zawpa = Innteekte gawh a phei veilam buppi kipia hi.
(4) Sacing tegel = Innteekte gawh sacing tegel kihawm sak hi.
(5) Sadathop tegel = Innteekte gawh sadathop tegel kihawm sak hi.
(6) Zunung innnuaipa = Innteekte gawh sathup teng kipia hi. (Nin dawl kici hi.)
(7) To saliang = Tote kipia hi. A kipiak nawn loh ciangin, a liangtong pen tanute in ngah in, a bul teng sanggam sa-in kihawm hi.
(8) Pute = Sangawng kipia hi.
(9) Sunghte = Sa ngum kipia hi.
(10) Sanggamsa = Sial citung kici Tulpipa, Sasempa, Zawpa, Sacing tegel, Sadathop tegel teng ii sangah sung pan bakno khat tek ki-eu khia-in sa val dangteng tawh kihawm sak hi.
(11) Tanu khatna = Innteekte gawh a phei leh sagual kigote tawh ngah khawm hi. Sagual sung pana naksa hoih khat kibehlap thei hi.
(12) Tanu nihna = Aphei tong leh anak banah sagual kigote tawh kipia hi.
(13) Tanu thumna = A liang tong sagual kigote sung pan kibehlap in kipia hi.
(14) Tanu dangte = Innteek gawh sa bak khat tek leh sagual kigote sung pan behlap in kipia hi.
(15) Innteekte = Salu khempeuh ngah hi. Baangkua tung kisuang lai hi.
(16) Dawi sa huan: = Innteek gawh sungkua seh thum suah seh khat, dawisa teng, kihuanin innteek phamawh kici sial citung teng leh a tanu kilawm teng in ne thei uh hi. (Tua an a kinek ma-in, innteek zununpa tukkhau kikhek sak masa in tua man loin tua an kine thei lo hi.) Tua pen tanute tavuan na hi hi.
Sial khupna leh sa gawhna
Zo kampau sunga "Sial khup" kici leh midangte ii "sial khup" acih pen kibang loin kilamdang mahmah hi. Midangte in, mo man pen sialkhup ci uha, mo sagawh pen sialkhup sagawh cithei uh hi. Ahi zongin, Zo kampau sungah, mo man pen mo man mah kici in, mo sagawh pen mo sagawh "tunsa" kici hi. Sialkhup pen atuam vilvelin kinei ngiat hi. Ni dangin, pu zawng khat tu cithei khat in a et nadingin a sialpi khat na pia-a, tua pen "Sialkhum" na kici na hi hi.
Nidang lai-in, sial a kikhup ciangin a nu a pi mah a no nei thei-a, a pung dingin na kikhum hi. Ki-itna lahna khat zong na hi hi. Sial hong hamsat ciangin, apu akhum nuam veve te in, sial taangin sumtang peuh na khum thei hi. Tua banga sum akhup ciangin tua huna sialpi khat man en a na khum thei uh hi.
Sial a kikhup ciangin, sial sangpa in voktukli gol khat go a, sialkhumte minin a om teng in ne mai uh hi. Tua a pi ni-in, voksa hi a, a ninih ni ciangin zu mah kilup thakin, a nitak ciangin kizan haka, tua zanhak teng pen, sialsang innteekpa in aksa taangciim huanin na vak hi. Sialkhumte a ciah ding ciangin voktukli siang aho kici a sungsa lo teng na puasak lai-a, zu ngau tawh na puasak lai hi.
Sialkhup pawi bawl a nungah vok tukli siang thumvei na puak lai hi. Tua thumvei a puak ciangin a tawpna hi cih theih nadingin, a voklap tawh puasak se hi. Zu beelpi khat zong puak lai thei hi.
Sialkhup pawipi ni-in, innteekte leh beh leh phung tengin zu limnono lup uha, tua a kilup zu beelte sungah a limpha diak bel li kiteng khia in, kitat or kikhaih hi. Tua zutak pen zu min nei ci-in, tuam hawm uh hi. Tua banah, zu a lim mahmah bel khat tengkhia sawnsawn lai uha, sialkhumte leh sial sangte phamawh teng bek in anek theih dingin kituam hawm hi. Hih zu kituam teel teng a kilawm tengin a ngah kim theih nadingin, amau Sasempa tuak in hawm uh hi.
Zu a kihawm ciangin, zu phutpa in hai nih ciang mi pia thei a, amah in hai khat ne-in aman ciangin, zu bawlte hai khat kipia phot hi. Tua aman ciangin, Sialsangpa ii Tulpipa in hai khat ne sak uh hi. Tua khit ciangin sialkhuppa Tulpipa in hai nih kinesak leuleu hi. Sial sangpa Sasempa in hai khat ne photin, tua aman ciangin sialkhuppa sasempa in hai nih kinesak hi. Tua khit ciang leuleu in Sialsangpa ii zawpa in hai khat ne in, sialkhuppa zawpa in hai nih ne leuleu hi. Tua zawh ciangin sialkhuppa tanu khatna hai nih kipia leuleu hi. Tua khit ciangin, sialkhuppa tute abul nih hai khat tuak kipiak khit ciangin sial sangpa hai khat kine sak hi. Amah a man ciangin, tua zu kitakte beel hoih bek khatah kikoihin, sialkhumpa kipia-a, a sialkhumpa in hong tonpih atu leh a tate teng a ngahkim dongin hawm sak hi.
Hih sialkhup pawi pen, nop thu a kibawl ahih manin nuam kisa-in, zu leh sa kine-in kilam hi. A diakin tute a laam ciangin, pu in letsong matin ahi zongin tua banga letsongte pen nikten puansilh ahi a, ak khawng ahi zongin na hi thei hi. Ki-it kingaihna bek la kisa in nuam kisa uh hi.

Khawk - 8
Kithoih Zia leh Aisan Ziate
Kum 1890 hun ma peuhmah Zogam sungah Pasian bia cih pen na om lo hi. Mi khempeuh ana asa in om leh, thungen ding, zato kah ding cih om loin, khutdawh dom ding, aisan ding leh kithoih ding bek longal bangmah thudang kigen thei vet lo hi. Ana khat siing kiphih ahi a, pusa thoih ahi zongin, lui dawi thoih leh gampi thoih ki-om saka, bum leh kithoihna cihte zong nazang uh hi. Dawi pen na hau mahmah uha, cikdawi, gundawi, mualdawi, luidawi, singsia suangsia dawi cihte na nei uh hi. Mikim in azat theih suang buahna zong kithoihna nam khat in na zang thei uh hi.
Pusa thoih zia:
Baangkua khat sungah cidam lo khat a om leh, a masa pen pusa hi dingin ki-ummawh ahih manin, dawisate khat kisamin khutdawh kidomsak masa hi. Dawisa (siampu) pa ina upmawh a leh, salem kuang kici kuang phel khat sungah tui kisungin, cinapa cinanu khut kisilsakin, tapkuang kici innsung pi tawngah zan khat zan nih bang ding kikoih phot hi. Tua pen Zo kamin "gui tamna" kici hi. Nong damsak leh ak ahi zongin, vok ahi zongin, sial ahi zongin bawng ahi zongin hong pia ning kici hi. Tua akoih ni khat ni nih sungin a cina hong noptuam leh pusa hingel e, ci-in, a gui tamna pen kigo pah lian hi.
Tulai siavuante in cina khat pen zatui a dau pen tawh a sin masak bangin, a kikhawi lakah aneu pen ak in kipana, noptuam na pi'n a hoih zaw kei leh vok cih bangin khanto uh hi. Tua ah nuamtuam tei-in, kisam asak lai uh leh bawng hiam sial hiam tawh thoih uh hi. Sial tawh a dam kei a leh, sial nungzui ci-in, vok khat tawh kithoih kika, tua pen sabil huan ci-in, kinei mai hi. a vok zui-in a gai khom ding mi kicial hi. Tua banga a dam kei lai leh, gampi kithoih lai hi. Tua a dam kei leh bum hiding hi ci-in um uh ahih manin, bumleh na a tuamtuam bawl lai uh hi. Tua khita a dam zo lote a cinate ahi zongin, a innkuan pihte ahi zongin lungkim mahmah ta uh hi. Tuhun lai a cina khat zatui namkim leh zatui minthang pente tawh sum tampi bei-a kibawl banah, Mandalay dong Yangon dong pai a dam zo lote a cina hita leh a innkuante hita leh a lungkim tawh kibang na hi hi.
Pusa thoihna ah, a kilim bawlte "Leinuai ton" na kibawl hi. Tua banga "leinuai ton" bawl theih nadingin, vok ahih kei leh sial leh bawng kigo na hi hi. Leinuai ton a kibawl ciangin, kithoihna sa a kinek khit ciangin, khuamui kuan khua lah vak lai nilah a tumkhin laitakin, a kigo sangum ahih kei leh sakawng pen, innteekte bikhalap i mailam inn limah zawl tungah kikhai hi. Tua nuai teekteekah cidam lo pen kitusak hi. Cina pen kiangah Tulpipa tupah hi. Cina pen mai lianah, zubel no (khaw-nei) a kici khat zu a dimtak tawh kitunga, zubel tungah tutang khat a tonglam cina lam ngasak in, a peeklam pen Tulpipa lam kingasak hi. Tulpipa in, cina tungah sasi tatin, zu phihin phuisam hi. Kithoihna sa mei pen kikhen khamin a lang khat pen, gawpi a dawnbawk nei khat tungah kikhai linglengin kongpi inntual lutna ah khuamka tungah khuangkhau gui kivial khat sungah kikhumin kiphutin, kipo sak hi. Tua pen "leinuai ton" ahih manin tonsawl dana kiphut na hi hi. Samei phelkhat kisem nen teng pen cina sial sung lut a salung si kinuh tengin ki-ok sak leuleu hi.
Leinuai ton bawlna a kipat ding ciangin, inntual innkaa tung neh lam tengah meiphual no khat kisepin, innteekpa a mai uh ah tu hi. Innteekpa pen mu veng kici mu vanlai kha khat kitot sakin, sasempa in khuang limin um khat tawi-a, tanupa khat in, buk limin mante (bohbual) kibawl khat tepin, sanggam khat in a mei zomin laampih hi. A kicih meiphual kimkotin lasa-in laam uh hi. Tua a lasak in;
(a) Phai khua mi'n do lel ta, a khuang kil in i la,
A khuangkil in i la, a hang khuai hang suan ing;
A hang khuai hang suan ing, phai khua a mi'n nel i sa,
Phai khua a mi'n nel i sa, thu a zawlin lau lo.
(b) Hau in keeltal a khawi a, amul pha lawmlawm,
Micinka bawlna, sacin ka bawlna;
Phual mul tawh thuahin et lawm sang e. ci-in laam uha, ala aman ciangin amei cih uh tuancil gawpin, mansak uh hi. Aman ciangin, alam teng leh muveng totpa in a zu kiluup kam khat ciat dawn uha, leinuai ton mansak uh hi.
Aman khit cianginm, sa kawng kikhai sasempa in la-in ciah thei hi. Tua nungah sa dangte zong pai khia thei pan na hi hi.
Sa Bilhuan;
Sa bilhuan kici pen pusa thoihna agol pen dong aman ciangin a tawpna dingin vok khat kigo a kihawm cihte om loin, inn sungah bilhuan kongpua kikalsak lo a kine mang ahi hi. A kigaih val phial leh zong, inn sung awngvangah kibua khia na hi hi. Zokam paute'n amin pen "bil suh" na ci uh hi. Sa lawnna khut nel na leeng inn mai ah kisil thei loin innsung mahah kisil hi. Hih pen "pusa" thoih a tawpna hi-a, a cina a dam kei leh dawi dang thoih kul ta ding cihna hita hi. Pusa pasa mat hi lo cih ding hita hi.
Bumleh na
Cina pawl khat a dam theih loh ciangin, bum hin teh ci-in bumleh theite kisamin bumleh thoihna na nei thei uh hi.

Tua bang bumlehna ah, ui khat kisam hi. Inn huang kiimkot in khau kikhungin, linggui kici hi. Tua linggui kikhung tungah ai tuamtuam kikhai kawikawi lai hi.
Dawisa pa in, ui pen gosak a, a ui si pen cina pen dawnsak hi. A si pen dawisapa in cina a taltang pan a pumpi dong tat hi. Tua khit ciangin ui lu pen, inntual lutna kongpi lutungah bilom ahih kei leh phai lom khat kilom henin, laizang santakah ui lu a kamka sa-in kisuang hi.
Tua khit ciangin, dawisapa in dawi dem ding ci-in, khuainun milim nih bawla, khat pen dawi hisakin, khat pen cina pen hisak hi. Phuisam masa in tua milim tegel innka mongah tung hi. A lang khat innka mong panin molhtum khat tawh tua innka susuk hi. Tua bang asuk ciangin, a milim koih tegel pen diang leklek uh hi. Tua milimte atuk mateng susuk uha, milim atuk ciangin, cina maw dawi cih en uh hi. Dawi a tuk leh cina dam ding ci-a, cina atuk leh dam zo lo ding cih um uh hi. Tua aman khit ciangin dawisapa in, milimte innka pek khat tunga, a kihal deuhin koih kik a inn khum tung pan thau tawh tua milim tegel kikal kap hi. Tua thau akap ma deuhin kitangko a, na kong uh na khak un, kici hi. Tua pen dawi in lel leh leengin mi khat peuh tung tu thei hi, cih um uh ahih manin kong na khak sak uh ahi hi. Kong khak cih bek hi loin inntual lutna kongpi ah nahsawl khai sak uh hi. Tua pen tua innah a dawite lut zo lo ding cihna na hi hi.
Tua milim nih kikal thau tawh a kap hangin milim khat zong atuk kei leh kap pha leuleu hi. Thum vui dong a tuk kei leh kap nawn lo uh hi. Thum vei donga atuk a om kei leh khawlbawl photin, hundang la kik uh hi. A lamdang khatah a tamzaw pen milim dawi pen mah tuk tek se hi. Tua banga tuk leh cina dam hi ci uh hi. Cina min a milim zong na tuk thei a, tua bangte cina dam zo lo takpi se hi.
Aisan Zia:
Nidanglai in, i pute i pate khualzin nading neite, sabeng dingte, galsim a kuan dingte leh ngimna neite a dingin a hoih lai ding hiam a hoih kei ding hiam cih ai nasan thei uh hi. Aisan in a phat kei leh a vaiteng uh na khawl kik thei uh hi. A phat leh aban na zom uh hi. Lo thak la dingte na leengin, hih logam kho leng a hoih ding hiam cih lo lai mahah singhal sanna na nei thei uh hi. Aisan na ah, aktui, tuta, akno cih bangin na san thei uh hi.
Tuhun pawl khat in tua aisan danin, Khritian mah hi napi-in, dawi vai lungsim tawh thunget na la-in, a zanin i thungetna ngah loh hong kihilh hi, ci-a, a vai akhawl sak kik peuh om thei hi. Tua thu in taanglaite dawi aisan dana, Pasian tung aisan dan kituat zong na om hi. Tua bang ding hi lo-a, Pasian biate in i hih nading peuhpeuhah i vai ding teng Pasian ap ding a Pasian in hong sepsak ding cih upna tawh nget ding hi zaw na pi'n kingaihsun khial zel thei hi.
Ak a san uh ciangin ak pen gol lua lo leh neu nawn lote hi-a, akgual note "sancing" i cih kammal pen tua pana hong pai hi-a, tudong a i zat thu khat na hi hi. Tu in aksan cih bang zong om nawn lo samin, tua kam pen ak golna tehna in kizang suak hi. A sandan panin: akno pen tawi-in phuisamin a theih nop a deih pen hilhin a tua cih ding leh hong tua ci-in gen a, a deih pen atup pen a taangtun ding leh na k he ziat lam hong taangin la a taantun kei ding a, ahoih kei ding leh na khe a vei lam hong tang in, ci-in phuisamna muam masa uh hi. Aman ciangin ak pen a khut in a gawl mek a, a khepi tawh a mei sikin a koih ciangin, tua akno pen a si dingin hong laitat ta-a, a khetat ki-en hi. Aman ciangin a sungah hu muamin tuam koih uh hi. A banin san kikin, ak no tam sim sawm bang san thei uha, a tam pen hihna na kipsak uh hi. A sia a pha pen tua tawh na khen uh hi.
Aktui zong na san thei uh hi. Aktui tang pen a dawn a phulh theih nadingin vutlet uh hi. Meihol tawh alang khat gitin ciamteh uh hi. Tua pen singkang hing thum lei-ah phutin lungthu bang sakin tua ah tua aktui suang uh hi. A nuai ah mei lah tawh a phulh dongin hal uh hi. Tua aktui pen hong phula, ama phuisamna lama phatna lamah a luan leh aisan kingah kici-in, a lang lamah a luan leh pha lo na ci uh hi.
Tua tham loin, dawisapa in buhtang phuisamin, puan tawh tunin zan khat luppih a, tua zan sungin, a hiding bang hong kilaak ci-in, zingsang ciangin, tua zan a ama mangsung a a kilak pen bang genin, tua ciding tua ciding ci-in gen thei uh hi. Tutang zong khau tawh khihin, a khut lang tuakah kangin phuisamin, a kilawhna enna san uh hi. Na tua cih leh cih tawh nasan uh hi. Tua bangin gamtang uh ahih manin, khua khat sungah dawisa om lohna phamawh sak uh hi.

Khawk - 9
Khuasak Ziate
Nidang lai pute pen lo khawh sing puak tawh, gan khawi tawh na nungta uh hi. Tua ahih manin, khua khat a sat ding uh ciangin, gam hoihna, tui hoihna, gal leh sa panna a nuam mun na teel masa uh hi. Khua khat sung panin, lo gam kicin lohna hang ahi zongin, vaihawm nopna hang ahi zongin, mi tei sim khat in pawl zawnin khua thak na sat thei uh hi. Tua khua a sat ciangin, tua a makaipa in tua khua na satin, khua min ama deih min vawh pah hi. Tua khua sungah a lalpih teng tungah makai sem pah hi. Tua banah, lo gam teng ama a hisak ahih manin, lo kho peuh in sing lu-lau ci-in lo khawh man in vaimim leh taang a kilawm khat na kipiasak hi. Amah a teek ciangin, a tapa upa pen in ama za luah sakin, pai toto uh hi.
Khuasatna dang khatah, inn mun lo gam hoih mahmah in, a khua ngakte gina khol lo a sakte uh, khat makai in pawl zawn zela va sim thei hi. Tua khua a sim ciangin a zawh leh suan khia in, pai khia sak ahih kei leh uk gawpin, tua a makaipa in tua munah hausa sem pah hi. Tua a teeng luite inn mun lo gam teng suan mang uh hi. Neihsa lamsa a nusiat teng uh luah uh hi.
Mi a tam pen in, lo kho a, tuhun lai bang loin, sangkahna cih bang om lo hi. Mikim lokuan singpuak bek nasep lian pen hi. Sa betna, thangsiahna pen naseppi a lian khat in nei uh hi. Tua banah, ganhing ahi sial, vok leh akte khawi uh hi. Tua a khawi uh ganhingte dawi biakna leh mosa gawh, unau sa kigawh na in zang uh hi. Tua banah, gal betna na nei thei uha, gaal na man thei uh in, na ai thei uh hi. sa zong, humpi, zangsial, sai leh cingpi cihte na manin na ai uh hi. Tua hun lai mahin, tonna, taang za mim za aih na na nei uh hi. Tua banga a sa-ai, taang ai, a om ciangin a khawisa na go-in nuam na sa uh hi.
Lo khawhna ah, vaimim, zo tang, buh, be namkim, gataam leh baal alu cihte na na ciing uh hi. Lo gol pipi na kho uh ahih manin, na hau thei uh hi. An pen khamin na la uh hi. A kham lote in, khua sungah a haute a, paalak cih bang ahi zongin, thatang in thalawh ahi zongin, na kihawm thei uh hi. Lo khawhna ah a kham lote in, anteh theipuam leh singpi kai pem tawh na nungta zo uh hi. Khalan ahi baalte, beete, anpi ahi lo kawlkaite na nei thei uh hi. Anpi in, vaimim, taang leh buh na hisak uh hi.
Pasian bia na om lo ahih manin, gan khawite vok bang ahih leh vokno khat teitei a khawina sungah a no limci penpen "ganlalawh" ci-in na go hamtang uh hi. Tua vok san khat khatvei ta nabawl hamtang thei uh hi. Gan pen a mawkna in kigo thei loin, pusa thoih hamtang kulse hi. Akno khat a go zongin, mawk gawh cih om thei loin phuisam kul se hi. Ahi zongin ak bang ahih a leh, luang khat (zo khat) val agawh leh zo khat lo teng kimawk gawh thei sam hi.
Lo khawhna na leeng kimawk khawh thei loin, ai kisan masa in a phat leh kikho thei pan na hi hi. Hawhna ciahna ding a om leh zong ai mah sanin aphat leh pai khia pan leh vai kuan pan uh hi. Hih na khempeuh a biak pen uh tungah dong masa teekteek uh hi. Tua lai bangin, ututin kizinin ututin vai kikuan khol lo hi. Ahi zongin, tua lam a hahkat mahmahte hong kikhel a Pasian thu hong up uh ciangin, a mi mawkmawk sangin hahkat zaw pah lian se hi.
Inn lamzia
Midangte bang loin Zomi khat ahih nak leh a masa pen in, inn kithupisak pen hi. Nek ding bangmah om ta kei leh, inn no khat teitei aneih loh phamawh in kingaihsun pen hi. Taang a mite hita leh, tuhun a mite hita leh, Zo ahih nak leh nate khempeuh sung panin inn mah a thupi in kingaihsun hi. Annek tuidawn leh nikten puansilh pen a nihna in kikoih zaw hi. Midangte in, a masa penin annek tuidawn thupi pen hita sak se leh Zomite a dingin na hi lo zaw hi.
Inn a kilam ciangin, taanglai in, gal leh sa tam ahih manin, a khauh theithei in, kilama, kiniamsak mahmah hi. Gal leh sa in a pheh zawh lo dingin, kong vang zong kitawm bawl mahmah hi. Tuhun bangin sik leh sikkhau cih bang om lo-a, gam khau leh guate tawh na lam uh hi. Sing tam mahmaha, a suih nading hiamte om nai lo ahih man leh theih nai lohna hangin, sing kitam zat lo hi. Piancit khit a kipan sing hong kilimzat hipan hi. A tung peuh mah bi kizang a, Piancit zawh ciangin, mun pawl khatah suang kizangin, galpi nihna khit ciangin, sikkang cihte na kizang pan hi. Kawm dingin, gawpi gil lemin pangpi in kiphan a kizang hi. Gamsa gi lote leh gaalte in luh haksa penpen hi. A vang ding a deihna mun pen to leta, "tawlet" kici tawhlet na vang pen na hi hi. A sual na leeng gawpi ciim lam sang kiphanin kiphaha, Piancit khit ciangin, sing lak a hoih "hual" sing leh "tak" singte kisui-in kiphah thei hi. Innsung leh inn lim teng tua bangin kiphana, innka teng pen innka peek kiphah hi. A henna a letnate khempeuh naangkhau na zang uh hi. Naang khau pen a pek in ahi zongin, hual pumin ahi zongin bawlin zang uh hi.
Inn pen a dung laam sawm leh a vai laam nga bangin lam uh hi. Inn buppi khenpi nih suah uha, Inn mai leh inn sungin na khen uh hi. Inn mai lam pen, khen thum mahin a vai lam khen uha, dawhdan (khu-no) inn liim (hlimphaa) cih leh sual kidawh vet lo, sumtawng (vaiphung) kici in kikhen hi. Vaiphung ahih kei leh sumtawng kici munah, an sing ding apang lamah kisia-in, tua loteng an sukna in kinei hi. Inn mai lamah hansuang to pai kici in kisangsak tuam hi. Ansukna vante kikoih thei hi. Inn lim pen a kiphah a peek pen golpipi kiphaha, gal leh sa in a leem zawh loh nadingin, sumtawng (vaiphung) lamah inn limpeek mong teng delh dingin sing
tawn a sik nei-a vai lam taanggiat sang a neu zaw lo a saupi khat kikhung hi. Dawhdan lam pen dawhdan zawlin kidelh sak hi. Tua bangin muanhuai mahmahin kiphah hi. Siktukilh cih kizang vet lo hi. Tua pen, zinte giah theihna, zu luupna in kizang thei hi. Dawhdan pen, lupna in lah kimangin, tutna in lah kimang mahmah hi. Zu a kilup ciangin, tua dungah kilupin tutna dang kul loin tua tungah kitu thei pah hi. Dawhdan sual pen a tawn saupipi kidawh na hi hi.
Innsung pen inn mai tawh a dei na dingin, sangkil kici sing peek pian a kibawl asah mahmah pasal li leh nga in a puak khop khat kikhung to-in kidei hi. Tua a kidei nadingin, a gei kikhuak komin, tua a sing peek kitungin, inn tung kibansak hi. Tua kikan to-in, mong khatah kitawpsak hi. Patau khat a om leh pusuah nadingin, tua khau a tawpna hiam khat tawh sattat leng a vekin tuk khia pah lian hi. Sik na kizang vet lo hi.
Innsung lut nading kong vang khat kibawl a patta cih kithuah loin, kongkhak nih kiphasak in, um kiguan in, kivutletin tua tawh sing khauh khat tawh golhin kikalh hi. A sung lam zong sing tum hoih khat tawh kisungkalh thei dingin kibawl hi.
Innsung lamteng pen khen tampi in na khen uh hi. A masa pen in, phaitam lamteng a tawn pi-in, kidei to-a, sungpi a ci omin, "tap kuang" a ci om hi. Tua sungah an neih khempeuh beemin kikoih thei hi. Pusa biak ciangin, phuisamna, vok gawhna in kizang ahih manin, "tap kuang" na kici hi. Tua sung pen kua mah lut mengmeng thei loin nupite bek lut thei-a, mim beem, taang beem leh vaimim beem a golpipi kitung thei hi. Tuate an a dim tawh omin, a hukna in, vaimim kungte tawh kihusuk hi. Tua kideihnate a pua lam hita leh a sung lam hita leh sangkil mah kizangin inn vai lam khamin kikhung zela, tuate tungah kawm kitung hi. Inn mai sangkil mah bangin a gei kikhuakin kitung hi. A tung lam pen zawl sau khat mah kikhung phei-a, tua-ah singpekte khau tawh kikaan hi. Kibang tek hi.
A om lai innsung teng pen, innsung dawhdan ahih kei leh innsung khuno kici oma, a lai teng pen tuang pek kici sing a sau mahmah pek lianpi kiphah hi. Tua pen giahna khawlna in a kizat banah, annek na munin zong kizang thei hi. Sungpi lutna kong kiang tuang tungah sih ciang misi kikoiha, si ngai mun ci-in min kipia hi Tua pen, tua tuangdung sungteng mah hilai hi.
A om lai a pang langkhat pen, inn mai lamg teng tap tung kici-in, tuang dung sangin pi lang bang sang zaw in kibawl hi. Tua tungah meipang lupna cih leh anhuanna thuk omna hi-a, tua pangah an kikoih thei in gaphel khawng kitung thei in kibawl hi. Sungpi leh taptung kici kikalah lupna pi kici kidawha, innteek pen lupna na hi hi. Innsung panin dawhdan lam a laizang mun khat kivang saka, "taw-let" kici hi. Tua vang a pua lamah tau no khat kidawh theih a tawlet tau kici pah hi.
Innsungpi tap tung tenga sang simah tau lianpi khat dawha, zokam in, "gap" kici hi. Ana kilak ciangin, an kikhai thei lo tengleh, a kikang thei lo teng atawngin kibawla, tua sungah akeu dong kisung hi. Innsung teng a tungah vaimim neih zahzah kikhai hi. A hau mahmahte in duap nih bangin khai thei lai hi.
Dawhdan, inn mai lamah, tui zatna om a tua tung a van sen theihna tau kidawh a tua pen mai khawng kikoih thei ahih manin, "mai zaal" kici hi. Sungpi ahi khan sungah dawhdan teng ek awng in zong kizang hi.
Inn in a net loh na mun teng, phaitam tual, innkun, leitual, suang cial leh innka leh khang tung ci in kinei lai hi. Inn nuai lam pen, gan khawi na in kinei a, innpi net inn pang lam laam nih bang na pan ki-um suaka, tua pen sing tawh ahi-a, suang tawh ahi zongin, a kikhum gante a tai theih loh nading ki-um hi. Sial kong pua dong ki-um suak hi. Inntual lutna kong a sak lam munteng pen a sangin phung kiciang tuamin tua pen phungbeem kici hi.
Innhuang khempeuh, sing tawh ahi-a, suang tawh ahi zongin, ki-um a tua banga um zo lote in dai suanin um uh hi. Tua huang sungah sial, bawng, sakolte lut thei lohna dingin ki-um hi.
Inn mai lam dei sungah, sum tawng ahih kei leh vaiphung kici inn sung lam kawm nekah lup theih nadingin, tau khat kidawha haam kici-in tuhun lai a thatkhu kicite hi-in, tua munah sawm neite a sawmte kilum sak hi.
Inntual teng pen sihna nopna ah zulupna leh lam kaihna in kizang thei hi. Tua inntual sungah, phunglam teng sih ciangin Vakzu kici sanggamte zu kilupna hi-a, suangcial dungteng pen taangzu lupnana hi hi. Hansuang paito pen pute zu kilupna mun na hi hi. Phungbem kici mun pen, thaukap zu ahih kei leh zutang tunna in kizang thei hi. Inntual laizang mun pen, a tong ahangte songphuhna mun hi.
Innka tung pen, sihna nopna ah mi khawlna hi-a, a kilim lamna munah lamnain zong kizang thei hi. Tua innka tung pen sih ciangin misi lapna in kinei hi. Kawsah a kihawm ciangin tua innka mongah kigualin kihawm hi.
Khangbem a kici innka pangah kidawh tauno sungah, khangtung zu kilup thei hi. A tong ahangte bek mah in khangbem ahih kei leh khangtung kici nei-a tua mun pen a tong a hangte zu lupna na hi-a, midangte tua sungah zu dawn thei loin a tong ngei a hang ngei teng bek tua sungah zuhai ngah thei bek hi.
Sial kongah a tongte in "ton sawl" phut thei uh hi. Tua pen a tong peuhpeuh nau zaw hita leh ton sawl pen a phut thei na hi hi. Song ahih leh tulpi leh u zawte in phut thei hi.
Inn lam pen galpi nihna khit ciangin atuamtuamin kilamin, patlee inn cih mah a tuamtuam that nih that thum cih bangin kilama, a tung zong sikkang khuh ding kidem ta hi. Zomite deih in sikkang inn leh zampi thau lawng na hi hi. Misi zong tua a kipan kikoih sawt nawn loin, ni thum hita banah, ki-em kihal cihte om loin a tam zaw kuang kibawlin kikoiha, tua tawh kivui khawm hi. Nidangin kuang aneih hangin kivui khawm loin, kitei khia kik tangtang hi.
Zo inn taang a te kilam dan pen, Israelte biak buk bangin kilam hi. Dawi biakna ahi puasa thoihna bang sungpi na omsak sese hi. Tua sungpi sung bekah dawibiakna a phuina kisam bekse hi. Kibang lian taktak sam lo napin' kivalak keei hi.
Inn zatzia panin, inn sungah an kihuan hi. An huanna taptung kici munah, a pangah lupna pi kici kidawh a innteek pi pen lum hi. Mei pangah lupna khat mah kidawh a innteek zom pen kilumsak hi. Nungakte innsung dawhdan ah kilumsak hi. Tangvalte ahih leh innmai dawhdanah kilum sak hi. Sawm neite a sawmte tawh haam kici tungah kilum sak hi. Vok pen inn nuai-ah kikhawi ahih manin a an piakna zong innpi huamna sung guah thuak lo nading munah an piak theih na kibawl hi. Bang hang hiam cih leh an piak hunin a piate hita leh a vokte in guah thuak lo ding cihna hi. A namsia ding kikhual lo zaw in, ahi thei pen ding bek ngaihsut in kinei hi.
Van zatna
Nidangin sik na om nai lo-a, lo khawhna ah saki na zang uh hi. Tua saki tawh lo akhawh banah lam sialna in zong saki leh molh hiamte na zang uh hi. Nikteen puan silh dingin puan a zuak na om loin, lei nading na om lo ahih manin, zan puan ahi zongin, silh ding puanza leh puan-ak dingin, pat na ciing uh hi. Pat kol na bawlin, pat na hek, na kap, na zomin, tua a zop khaute antui nuhin na phokeu in, siam na gan uh hi. Tua bang hong pian theih nadingin, patkung pana pakteng loin, ni-ah phokeu phot uh hi. Tua panin, a tak leh a tang a kikhen nading nelkhum na bawl uha, tua tawh hekin a tang teng tuam lak uh hi. Tua a takte a kizop kim nadingin, guaphel bawlin, tua patte kapin, kizelhkimsak uh hi. Tua banga, a kapsate lom bawlin lawksak uh hi. Tua a kheksa muitung pan a kawn suak thei dingin muiphei kici tawh zial leuleu uh hi. Tua panin, tua khaukawn a mul a belh loh nading deihna in vaimim ngiam huanin a sungah diahin khauhsak uh hi. Tua pena liimin zial leuleu in, siamin na gan uh hi. Tua siamte agat theih nadingun, kawngduap, tawnpi, ciam, ciang-at, vau ciang, nah khai leh ciangkolte tawh kibaangin siam kigan hi. Tua tawh puan-akte, nikte, puan laisante, khephiaute, puandumte, na kigan thei na hi hi. Tua banah thungpite, dialte a kipan a hoih nono na gan thei uh hi.
Gan Khawi Zia:
Inn simin ganhing a kitam khawi pen, vok leh ak hi-a, ui zong na khawi uh hi. Inn suang khat ahih nak leh ak a kilawm zah khawi loh pha mawhin koih uh hi. Tua hun lai-in ak pul vok pul cih om ngei se loin, nuam takin kikhawi thei na hi hi. Tua ciangin, inn bul ci thei zaw deuhin, sial tampipi ahi zongin, sakol ahi zongin na khawi thei uh hi. Gan pen a khawi uh ciangin, vok leh ak pen inn ah kikhawi in, sial pen, gamsungah kicingin sialcing na kiguan uh hi. Naupangte sangkah cihte na om vet loin, sialcin pen nasep lian khat in na ngaihsun uh hi.
Gankhawi loha, a phatmawhna ah, dawi biakna, liau leh paan a om ciangin, sum kinei lo ahih manin tua a gan khawi sung panin, liau sum leh dawi biakna na lim zat mahmah uh hi. Tua tham loin mo man in zong na zang thei uh hi. Mo man dingin, sialpi nuta, sialpi khat, zobo khat cih bangin numei man na seh uh hi. Tuhun bang loin, a man ding sialpi mah, sialpi nuta mah, sial zabo mah na kikaihin, man in na kipia uh hi. Tua manin, pawl khatte in sialkhup in sangpah uha, sial khup na ci uh hi. Mo man kikhiat ni-in, Zo kampau sungah "Tunsa" kici numei kung sian na kici a phamawh gawh lo theih loh voktal tukli nih na zang uh hi. Sum leh paai pen gen in kinei ngei loin, gan bekbek in thu kigen na hi hi. Tua ahih mana, gan a na khawi hamtang uh ahi hi. A kzong khawi loha a phat mawhna leuleu panin, kithoihna pen ak kinak zat hi. Tua banah, numei nung lam kawmte pen, akpum mah kipuasak hi. Kilei zo vet lo ahih manin khawisa tung ngen ah na kisem na hi hi. Ui na leeng khawi a kulna om hi. Kithoihna ah ui ngawng at kici na om a ui loin hi thei vet lo hi. Tua ahih manin, inn simah gan ahih theih zahin na khawi uh hi.
Taang aakte sum ngahna pen
Taang lai in kumpi nasep om lo, sum ngah nading om lo ahih manin, sum thalawhna a thupi pen Kawl gamah sum thalawhna khata a na neih uh, singpongsat leh dolsel na hi hi. Sing pong sat cih pen, tua lai-in Tembawte mei tawh pai hi-a, gun dungah tua mei dingin singpong kikoiha, tua pen, kicialin kisat kipong ahih manin singpongsat na ci uh hi. Dolsel i cih pen, dol kungte khaugui khawngin a vial gawp loh nadingin tua khauguite vatsat dingin kiciala nasep pen dol sel na ci uh hi. Tua banah, dol kung ahamte pen, a kiphuk theih nadingin, a bul lama hawngteng kisialh khia pen dolsel mah a ci uh na hi hi. Tua pen ni tha pen matkhat, muthum leh hamu ciang na ngah uh hi. Dol selh ciangin, mi tampi alut theihna gam thak (uGufopf) na kihong a kuli gawng kikoihin tuate in, mi nasem ding khua simah cial thei uha, gamthak, nasep nading thak a cih na (uGufopf) ding pen, "kuan cih kuan" kici pong mawkin, tua pen dolsel mah na hi lel mawk hi. Tua lo sum ngahna om lo, an haute a an zuak man leh vokno akno a zuakna a ngah cih loh sum ngahna a nei lo uh ahi hi.
Siamnate:Pute pate na zat khempeuh gua tung pan kingah na hi hi. Gua panin naang na lem uh a, lawh leh ciang, hai, seu, beng, bem, phek leh paisem na phan uh hi. Sin om nate ah a na te uh sin khau tawh bawlin, tutphah, phek, nam leh lawh leh haite na phanin na tampi na nei thei uh hi. Gal van dingin, gua mah na zang veve in, li, thal, thaltang, tuate taw gal leh sa na man thei uh hi. Thal zat pen na siam mahmah thei uh hi. Pawl khatte bang Mangkangte Cowboyte na asiam mah bangin a sial cin na uh ah thallot leh mui kap kisinin na siam thei uh hi.
Tua banah, gal nan nading ci-in, lum, tei, namsau cih bang na bawl lai uh hi. A nai lam ciangin, thau na leeng na bawl thei ta uh hi. Gal mat nadingin thal bek bana singpial na siah uha gaalte a lomlom pi-in na man thei uh hi. Tua banah, mi ahi-a sa ahi zongin a awk theih nadingin "hum" zong na siah thei lai uh hi.
Siam nading panin, sa mat nading thang a tuamtuam na siah thei uh hi. Sapi thang sa no thang, vasa thang cih bangin a namnamin na siah thei uh hi. "Hum thang" pen mi a ding leh sa a ding kibang sak het lo uh hi. Thang pen a tuamtuam a siah theih uh bangin, singthang, khauthang, pial cih leh thau thang na leng a na siah uh hi. Thang siahna pen pilna lian khat ahihna Sihzangte taangthu at na sungah, Zo in lai nei ngei-in savun lai hi-a, ui-in pehsak ahih manin lai nei nawn lo hi. A nau pen lai na nei-a, gawlum tungah kigelh ahih manin kuamah in susia thei lo hi ci hi. A u, i Pu Zo in anaupa kiangah lai hilh ding a sap leh anaupa zong na pai-a, a u lo-ah tung hi. A u na om loin,a thangsiahna teng na mu hi. Tua teng amuh ciangin, anau in ka u in hong ngaih mana hong cih hi in, lai thei kei leh hih zaha, a lamdangdang thangsiah thei ke'n teh ci-in, a thang siah teng amuh khit ciangin kileh vingvengin lai hilh nawn lo hi na ci hi. Thang a thupina tua munah na kilang hi.
Ki-ukna
Nidang lai-a sawt sim lai-in, ki-ukna pen, khua khat ki-ukna bekbek na hi hi. Tua sungah hausapa thu thu in kigamta na hi hi. Thu khenna a sang pen hausapa a na hi ahih manin hausate nakpi in kikihta hi. A that phial zongin, a thahte in aphu alak kik leh cih loh, zum dangah kigen theihna om lo hi. Tua banah, thu atam pen nupa thu leh lo gam thu longal bang mah na om lo hi. Tu lai-a, khawk, myonee, pyinee leh Baho cihte na om vet lo hi. Khuasung bek ahih manin, hausa upate thukhenna man loh phamawh na hi hi. A man ngap kei leh a lal kulta hi. Paunak a hausa thu manglo, "lal khua in lawh" a kici pen tua na hi hi. Hausa upate thu a man kei leh a liau sum dingin a inna neihsate kilawk mang hi. Tua banga a man kei lai leh khua sung panin kihawl khia in kiteengsak nawn lo hi.
Khuasung nasep ding leh vaihawm dingte hausa upate in gelin, taangpi in a zuih ding taangko uh hi. Tua pen thupiakna lian pen hita hi.
Liau Sum:Liau sum dingin i gensa bangin, sum tang kizang lo hi. Thong zong kikhia selo hi. Liau sum a sang pen luangman kici in lawi giat ahih keileh sial giat liau na ci uh hi. Tua nuai-ah vok tukli khat cih bang ahi zongin, vok tuk thum khat ahi zongin liauna kipia thei hi. Liau sum neu pen gual khat ci-in vokno khat minin na koih uh hi.
Hun hong paitoh ciangin, sialte hong hamsa ta ahih manin, man leh mual ding leh liau leh paan a dingin sum na seh uha, Ks. 30/- pen lawi khat ahih kei leh sial khat manin na seh uh hi. Lawi giat ahih kei leh sial giat ahih leh sumtangin, Ks. 240/- hisak uh hi. Vok tukli taangin, Ks. 12/- Vok tuk thum taangin Ks. 6/- vok gual khat taangin Ks. 1/- na zang uh hi.
Liau sum tawh kisai tuhun ciang leuleu in a tuampi khat in kitan hi. Taanga te in lawi giat pen lawi khat Ks. 30/- a tuat Ks. 240/- hisaka tua laitak in lawi khat in Ks. 30/- man takpi pah hi. Ahi zongin tuhun hih lai kibawl lian laitakin, lawi giat pen Ks. 960/- in kitan a lawi khat i man pen Ks. 120/- bek hi-a, ahih hangin lawi khat man taktak hi lo hi. Tam zaw pekpek hi. Bang hang a kitua ci tan hiam, a tan hunin lawi pi khat Ks. 120/- man hiam cih dot nading thu om hi. Tua pen a kitan hun zong man tham lo khin hi. Bang hangin kitua ci tan hiam cih leh, Kawl gam ii upadi sungah, hausate in luangthu ban thu ahi sungah, nupa kal thu lawigiat a khen theih nadingin, tul khat nuai-a, a khen theih ahih ciangin hausate thukhen ding beita ding ahihna muhna tawh first people council in a tanna hi hi. Tua ahih leh vokte e leh kici ding hi. Sial leh lawi cih loh pen vokte pen tan' in kinei lo-a, a kilawm bangin hausate septheih na dingin kihonna hi hi. Upadi lopipi a khat leh khat lungkim lohna hangin sum tampipi a kipia bang om thei hi. Gentehna in, zawlgai bang ngeina kizui hi leh lawi li, ahih kei leh lawi nih cih bang ding pen tulsawm peuh sumtang kipia om lel hi. Tua pen thu tawh kisai a cihna hi loin kilem nading, khat leh khat thu kineih loh nading cihna peuh hi lel hi. Upadi in nidang ciang a kikoih phial leh cih loh pen, upadi dan zuihna hi lo zaw hi. Sial giat lawi giat cihte zong kizang hi vet lo hi.
Mawhna dan
Luangthu ahi-a, mi thatte, zi sutte, lawi giat in kitan hi. (Tua tawh a kibang mawhna neite zong huam pah hi.)
Zawlgaite, tuate tawh kikim mawhna ah lawi li kiliausak hi.
Guta lata leh hausa thu mang lote vok tukli khat liau hi.
Hausa thu mang lo mawkmawkte pen,vok tuk thum khat kiliau sak hi.
Thu mang lo ahi, akgu peuhahih leh gual khat kiliau sak hi.
Liau Sum piak zia:
Thu khat peuhpeuh a kikhen ciangin, a liau sum pan a inn sian leh sasat kisehpah oma, aliau su kha lo a innsian leh sasat a kiseh om hi. A kiseh ciangin,
(1) Lawigiat liauna ahih leh inn sian lawi khat, sasat lawi nih kihi sak hi.
(2) Lawi li liaunate ah, innsian lawi khat, sasat lawi khat kine hi.
(3) Vok tukli khat, liauna ah innsian leh sasat tukthum khat kihi sak hi.
Hih liau sumte pen inn sian pen Hausapa ngah hi-a, sasat pen upa teng hawm hi. Hih pen tuhuna, zum a zum sian kicite na hi hi.

Khawk - 10
Gamngai Sang Thu
Nidangin Tedim leh Tonzang pen gam khat hi-in, 1965 ciangin Tonzang in Myonee hong ngah ciangin Tedim gam pen gam nih hong kisuah ahi hi. Hih lai i gelh ciangin Tedim leh Tonzang a kikhen ma gam khata a om lai hun a tamzaw hiding hi.
Tedim gam sungah, 1905 a kipan pilna sin theihna biakna lamte in sang hong honga, kumpi sang taktak pen kihong zo nai lo hi. Kumpi zolai sang (Primary School) taktak pen anuai-a bangin kihong zo thei hi.
1909 kumin Govt. Primary School Tedim leh Lennakot khua-ah kihong hi.
1921 kumin Govt. Primary School Tonzang leh Dolluang khua-ah kihong hi.
1924 kumin Govt. Primary School Suangphei khua-ah kihong hi.
1925 kumin Govt. Primary School Khuasak leh Tuimui khua-ah kihong hi.
1927 kumin Govt. Primary School Voklak leh Phunom khua-ah kihong hi.
1928 kumin Govt. Primary School Mualbem khua-ah kihong hi.
1929 kumin Govt. Primary School Thuklai khua-ah kihong hi.
1933 kumin Govt. Primary School Haiciin khua-ah kihong hi.
1936 kumin Govt. Primary School Vangteh khua-ah kihong hi.
1937 kumin Govt. Primary School Kaptel khua-ah kihong hi.
1939 kumin Govt. Primary School Zimte khua-ah kihong hi.
1941 kumin Govt. Primary School Gamngai khua, Heilei, Tuithang, Laitui, Saizang, Theizang, Mualnuam (a), Mualpi, Haiciin, Hiangzang, Sialthaw, Zampi - (12)
1942 kumin Govt. Primary School Keltal khua-ah kihong hi.
1948 kumin Govt. Primary School Darkhai khua, Khuangkhan, Khumnuai, Malsuang zang, Pangzang, Tonciin - (6)

Tedim gambuppi in 1909 kum pan 1948 Suahtak ngah kum dong sang min kumpi sang pen, Govt. Primary School kici sang 33 kinei hi.
1948 kum zawh sang tampi kingaha, State Primary Shool kici ta hi. Tedim No.1 BEHS Golden Jubilee Magazine sungah 1998 ciang Tonzang leh Tedim kigawm Zolai sang 190 kinei-a, Tedim gamah 114 leh Tonzang gamah 76 pha hi kici hi. Tua pen a kipat pan 1998 kum ciangin sazian hi kici hi. Tua ahih manin, Suahtak ngah ma in sang 33 leh Suahtak ngah zawh 157 kingah suak hi.
Middle School
1) 1925 kumin Govt. A/V Middle Shool kici Tedim khua-ah kihong hi.
2) 1952 kumin State Middle School kici Kaptel khua-ah kihong hi.
3) 1.8.1953 kumin State Middle School kici Gamngai khua-ah
4) 1.9.1953 kumin State Middle School kici Tonzang khua-ah
5) 1954 kumin State Middle School kici Tuithang khua-ah
6) 1.6.1956 kumin State Middle School kici Vangteh khua-ah
7) 26.10.1959 kumin State Middle School kici Tuimui khua-ah
8) 5.4.1966 kumin Kumpi sang kisuaksak Dolluang, Cingpikot, Laitui, Mualbem, Phunom khuate ahi hi.
9) 3.6.1968 kumin State Middle School kici Hanken khua-ah
10) 1.10.1968 kumin State Middle School kici Tedim khua Lawibual vengah
11) 22.6.1973 kumin State Middle School kici Mualpi khua-ah
12) 1.6.1977 kumin State Middle School kici Saizang khua-ah
13) 1.6.1980 kumin State Middle School kici Heilei leh Cikha khua-ah
14) 1.6.1981 kumin State Middle School kici Zimpi, Tuimang, Darkhai khua-ah
15) 1.9.1983 kumin State Middle School kici Limkhai, Haiciin, khuate
16) 11.12.1985 kumin State Middle School kici Khumnuai khua hi-a, Tedim leh Tonzang kigawm sang 25 pha a, tua sungah Tan (10) sang ngah to 3 pha in Thuklai khua tawh 4 pha ta hi.
Hi bang teng i at diudeuna pen thu dang hi loin Gamngai khua pen gina tase kei leh sangngah a masa pawl mahmah hi cih i tel nadinga i at ahi hi. Sang ngahna pen a lamdang khatah ei ma-a ngahte ei nungah omin, ei nunga ngahte i mai-ah om zel kawikawi hi. Tua pen hih laisimte in a thu gen kul lo-a, i theih pahpah ding cih nopna ahi hi.
Gamngai Govt.Primary School
Gamngai khua in, sang angah ma-in, khua 15 bangin na ngah khin hi. Sang ngah nadingin, a thupi penah Vuandokpa thu na hi hi. Hausapa Khup Za Mang in sang a va nget ciangin, sang inn na lam masa in. Na zawh ciangin pel loin kong pia ding hi, ci ahih manin sanginn laam 8, laam 4 leh sia inn khat leh bawda ding kilam pah hi. Gamngai khua bek hi loin akiim apaam a sang hong kah thei ding teng tawh ki pawlin, tua huna inn lam siam pen ahi Tonzang khua mi Sia Thawng Khaw Nang in kilamsak hi. Inn pen sual leh kawm pen taaksing hi-a, a tung pen suangsan kigan ahi hi. A sanna zong tua hunin a sang pawl hi-a, pi kua bang na sang sak pah hi . Mi a theite gen i zaksawnna ah, tua banga kikham khua 20 bang hi-a, a taktak ciangin khua 12 bek in inn zo ahih manin 1941 ciangin a kipia na hi hi.
Hamphatna
Sang a kihon ciangin sia thupi mahmah Tonzang khua mi Sia Thang Cin Kham in, sang kum 1941/42 na hilh thei ahih manin, tua hun a sangkahte tudongin dot leh suante na hi suak thei uh hi. Sangkum 1942/43 ciangin, Sia Thang Cin Kham ii naupa, lai siam cihtaka, asiam, Manglai bang asiam pha mahmah Sia Kam Cin Hau kingaha, lai bek hilo, mehgah mehteh suan dan, bawl dan leh singno suan dan zong na hilh ahih manin tua huna a sangnaupangte tudongina khuasuak teng na hi pah uh hi. A kum kik sang kum ciangin, Leitung galpi nihna om ahih manin sang kikah thei nawn loin galpi nihna abei ciangin kihong kik zo pan hi.
Private Middle Shool Kihong
Gamngai sang panin tan IV ongte a ban zop nadingin, Tedim khua pek hong suak ahih manin tan IV a zawh hangin zom zo nawn lo uh hi. Tua ahih manin, Suahtakna ngah zawh kitelna angah upate in nakpi hong ngaihsunin, sia ding va cial kawikawi uha, a muh uh 1949/50 kumin Gamngai Private Middle School na hong uh hi. Tua sungah sia asem dingin, Thuklai khua mi Sia Suang Cin Pau tan X ong sa Pu Let Kham in va ngah ahih manin sang kihong thei hong suak hi. Ahi zongin,amah pen tan X ong sa ahih manin kumpi nasem ding kisam a, tua lai angah ciangin upate kiangah, kei ka ciah loh phamawh incin, kei taang ding keimah in hong vaihawm ning ci-in ciaha, ama taang dingin, Pyinee Cianmagiyhmu tawh hong nusia Dr. Ngin Thawng, tan X phi sawma om pen hong sawla kum khat sung sia hong sem hi. Tua kumin amah pen tan X ong paha, College kah nuam ahih manin a kum kik hong pai zo nawn lo hi. Upate hanciam sama, Lusheite khat va ngah uha, annek ne zo loin, ciah ahih manin, 1950/51 sang kihong zo nawn lo hong suak hi. Tua banah sang sum kisam teng khuasung taangpi tung a kidong hi-a, kilel mahmah zong na hi hi.
Upmawh lopi a lamdang mahmah in Middle School kingah:
Gamngai khua-ah Private sang a kihon zawh loh 1953/54 kumin, Tedim sanga kah Gamngai khua mi 13 bang kipha in, khua kiim khua paam panin zong a gawm 20 bang kipha hi. Tuate sungah khat leh nih pen tan VIII leh tan X sim hi-a, tua lo teng tan VII nuaisiah kah nahi uh hi.
Kawlgam bup Suahtakna ngah zawh kiteelpi a kineih khit ciangin khamtung gamah zong Zo Vuanzi ding kiteelna oma, tua sungah Vuanzi U Sing Thang hong hi hi. Amah in Vuanzi a ngah ciangin, a cing dingin, ama lawm ngei Bo Lian Khaw Gin na teel hi. Ulian hon khat tawh Khamtung khuapi tengah hong vak kawikawi-in, thu gennananei kawikawi uh hi. 1953 kum July ni 7 ni-in Tedim khua hong tung uh hi. Galkap tualpi ah nainganzi thu genna 8.7.1953 in na nei-a mi tam mahmah hi.
Tua hun laitakin Vuanzipa in hong puak Tedim gam a dingin Manglai tan VII sang khat na hi hi. Tua pen kua khuate pia ding kikupna nei dingin, 9.7.1953 ni-in Tedim Manglai sangpi ah kikhopna om ding ci-in zaksakna om hi. Tua ni pen Sani ni na hi hi. Vuanzipa hong pai ma-in, Meeting kah thei dingin, mi pawl khat kisam khol hi. Tuate sungah, hausa a sem laitak teng, Tedim gamah gam khen Block II oma tuate sungah Domain leh member khat ciat leh Party makai teng kisam khol hi. Tua thu kikum dingin, Tedim Manglai sangpi-ah zingsang nai 11:00 in kitungkim hi. Tua hun laitakin, Gamngai Block pen No.2 Block kici in Chairman U Mang Cin Khup hi-a, amah leh member U Kai Za Ginte kah uh hi. A thu thei nuamin, Gamngai khua Zolai Siapipa Khup Khan Pau leh Bawda Sangnaupang Tg. Kham Khan Mung, Khuadai pan bawda Sangnaupa mah ahi Tg.Thang Suan Hang leh Thangzang khua mi Pa Let Lang kihel thei hi.
Kikupna a kipat ding ciangin, Vuanzipa in Ukpi semin, Bo Khai Za Kham in hun zekna hong nei hi. Vuanzi pa in Tedim gamin tan VII sang khat a ngah pen kua kilawm pen ding hiam, kusale teng in hong gen un. A kilawm pen i piak ding hiding hi, ci-in thu kong hong masa hi. Tua hun laitakin Private Middle School a hongte sungah, Tonzang, Vangteh leh Dolluangte in ngah nuam pha diak uh hi. Tua khua thumte sung pan a makai in, Tonzang pan Pu Vuang Za Kham hi-a, thu gen siam leh mi muan khat ahih banah, Vuanzipa tawh a kithei mahmah pa khat na hi hi. Vangteh khua panin, Bo Gim Do Thang makai-a, amah pen, Tedim gamah Phasahpahlah party makai pi ahih banah thu gen siamin mi up mi muan mahmah khat na hi leuleu hi. Dolluang panin a makaipi in U Thang Suak hi-a, amah pen thu gen siamin, mi up leh muan khat mah na hi leuleu hi. Amaute in thu agen uh ciangin athukimpih ding mihon khat nei pahpah uh hi. Sang ngah dinga a kilawmna a gen uh ciangin, a thum un kibang ciatin, a thukimpih lah kusale thukimna kibang ciat uh hi. Vuanzipa in a thu a ngaih hangin kibang sa ciata, kusale te in lah tua kilawm pen cih khensatna nei zolo uh hi. Kigen ciatin hun hong sawt ta a Vuanzipa in zong a khensat theih nading thei pak lo ahih manin, niangtui ne dingin hun no khat sung khawl sakin, nitak nai 1:00 lian a kipan kik ding vaikhak hi.
A kikhawl sungin, a body guardpa Bo Khaw Gin zong Vuanzipa va nai-in, Vuanzipa aw, hih sang kituh thumte pen khua thupi vive hi-a, sum leh paai zong anei ciatte ahi uh hi. Tu-inna pia kei zongin a sawt loin angah veve dingte uh hilel hi. Khat pia lecin nihte nuak dinga gaal hau nasuak lel ding hi. Amau teng a ki-en loh nadingin thu khat kong gen nuam hi, ci-in vahuau sim hi.
Kikhop a kipat kik ciangin, Vuanzipa in no khensat zolo na hih uh leh ke'n hoih kasak khat hong cileng, na thukim zo ding uh hiam? a cih ciangin thukim zo ding citekin, aw khat in kiging hi. Thum vei tak dong thuah lai hi. Thu kim ding mah kici tek hi. Tua pen bang dang hi loin kimuang tek ahih na hang hizaw hi. Tonzang in ei, Vangteh ei, Dolluangin ei, hong pia buang inteh cih lungsim sungah upna nasia neih uh hi. Ahang pen hih kikupna a om ma-in a khua thum mah panin Vuanzipa tawh kisim muh khin tek uh hi. A gennate uh Vuanzipa in hoih sa-in, ahih hangin hong pia ning cih kamkhap na nei loin, hong pia kei ning cih zong na ci tuan sam lo hang hipen hi.
Tu-in, mipi thukimna tawh Vuanzipa a kikhensat ding hong hita hi. Mipi in Vuanzipa in kua khua hong pia zen tam cih lungngai sa-in a kamhawm en in dai khipkhep uh hi. Mi a kikhawm 600/700 bang ding pena pau a ham loin, bangzah takin dai hiam cih leh kikhopna sual tungah meigit tang khat kia leh a kiza zah dongin kidai khikhe hi. Tu-in, Vuanzipa in, i ngah sang pen khat bek hi. A kilawm mahmah piak ding thum om uh teh, no teng pen khat hong pia leng nih khasia dinga, lungkim lohna a om sangin ci-in, Gamngaikhua ka pia hi, ci-in agen khiat ciangin, lamdang kisa lua kisa-in khut kibeng ziahziah ding pen ka kha ka tam ci loin ki-om tek hi. Gen beh ding lah ama piak bang thukim ding cih sa hita ahih manin man loh phamawh hong suakta hi. Tua ahih manin, July 9,1953 kum nitak nai khat hunin Gamngai in, Pasian vaihawmna tawh U Bo Lian Khaw Gin hang leh Vuanzipa U Sing Thang hangin, Gamngai ah Manglai tai VII sang a lamdang takin vantung pan ahong kikhia bangin kingah ahi hi.
Vuanzi U Sing Thang in, mipi lungkim zo taktak lo cih amuh ciangin, Gamngaite in tukum August ni khat ni-a, ahon zawh kei leh mundangah kipia ding hi. Gamngai khua hausate ahi a Gamngai khua mi khat peuh na om uh leh hong genun acih ciangin, tua hun laitaka Zolai siapi a sem laitak U Khup Khan Pau hong dingto in, akhut taklam hong lamto in ka hong zo ding uh hi, ci-in na dawng hi. Tua kam penin Vuanzipa lungkimsak ahih manin, thu kikup kikhop kimansak in kiciah ta hi. A kiciah khit kikhopna inn a pua lam a kitun ciangin, hoih hi a ci khat ta zong om loin, a kilawm pen thum sungah khat hong piak ding hilel hi ci-in, Tonzang pawlte bang, khasia lua kisa-in Yangon pai ding, U Nu kiangah ngen ding ci-in kihanthawn keei uh hi. A cih mah bangun, Tonzang te in Yangonah va phu-in, backday tawh September 1,1953 a hon ding order hong ngah takpi pah uh hi.
Sang ngahna tawh kisai-in khua sungah a kizak ciangin, Hausa upa leh mipi kilungdam mahmaha, hausapa U Go Za Thang sia cial dingin kiseh pah hi. Tua banah sang naupang zong dingin Pa Let Kham kiseh a, tu pilna sin kum sung a hong kah teng omna khawlna vaihawm sakin, an vak dingin khensatna kinei hi. Tua ciangin, tua laitaka, Tedim Sangpi a Siapi sem Sia Gin Khaw Thang tungah thumna kinei-a, Gamngai khawk mi peuhmah hong piatsak nading leh, a ut peuhpeuh hong phal nading kingena, amah in zong huh thei bangin hong huh ahih manin, 1st August 1953 ni-in, Phunom khua mi Sia Kang Za Thang tavuankhan in sang kihong thei hong suak hi.
Sang ngah zawh pen tu-in kum 50 cing ta a, mihing hi leh a khan a beikuan a hatna a bei tading hi a, leitungah sep dinga, a ngimte a zo khin ding hita hi. Tua ahih manin sang kingah mana, picinna kinei hun ding hita hi. Lai deih semsemna kimuh hun ding hita hi. Ahi zongin, lai deihna nidang sangin kiam zaw semsem zawsopin kimu mawk hi. Tua pen tuhun a khangnote tavuan ahih lam theih huai mahmah hi.

Khawk - 11
Zo Hamnah (Zo Paunak)
A
1. A hang bei leh a hang om, a that bei leh a that om. (Lutang ding leh makai ding bei ci om lo cina hi)
2. A mawn a liim hil. (Mipil pente zong hil kulna om thei)
3. A nuao leh awh hamsia. (Mi bawl loha amah leh amah kibawlte cih na hi.)
4. A si leh a kimu hamsia. (Nehna ah a om lote kikhen lo cih na hi.)
5. A si baang sisi, min cim bang cimcim. (Siatna tuah lei kizomzom cihna hi.)
6. A si masa puantuam tang (Inn sung puan nei pen asi masa pen kikengsak ahi na in Zomite'n misi ken thupisah cihna hi.)
7. A tong ngai tong, a hau ngai hau (A piangte thakhat thu om lo cihna hi)
8. A zawng antui thei lo. (Ne ngai lo, a tui tuami ci thei lo cihna hi.(Na hoi thei lo)
9. A zawng in a nei sialsa (Mi zawng ten a tha sial cihna hi.)
10. A zawng teehbuang pha.(Mi zawngte kimanna tawm cihna hi.)
11. A vuai a khang kibang. (Sina in a vuai a khang teel lo cihna hi.)
12. Ahbulo kan zomang law.(Thusia meng khat thu lianpi suah thei cihna hi.)
13. Ah bang a mutawm ne. (Nuntahna kician nei lote kicihna hi.)
14. Ah ge puhsi bangta. (Cidam lote kigenna hi.)
15. Ah gia kawi bang. (Lungsim hoi lo-a a kawite gente na hi.)
16. Ah gilgap bang. (Innkuanpite thei lo-a, sawm giahte kicihna hi.)
17. Ah kimu bang (Cinate kilim mut thei lote kimu napi khanglo paite cihna hi.)
18. A kiho bang.(Ah a kihote kilu tua a, mini kilutua a kiho a awging lote cihna)
19. Ah phese bang (Cina gim bangma phawh zo lote cihna hi.)
20. Ah op eh bang (Bangma hi lo thu sau leh kimang lo na a tamte genna hi.)
21. Ah tangtu bang (Na khat popo lom bawl lote, neng nasepte genna hi.)
22. Ah tawphun bang (Teng mel nei lo a hamhamte genna hi.)
23. Ahtui sunga a vom ding a kang ding kithei lo. (Mu lote kithei khol zolo cihna)
24. Ahpi khuang leh zawlgai kawh. (Numei(nupite) hamna thusia hlan cihna hi.)
25. Ahpi khuan hang khuava lo. (Nupi te hangin thu tha piang lo cihna hi.)
26. Ahpi leisai zong nuam tuam. (Lo hlote naupang hlaw zong nuamtuam cihna hi.)
27. Aktui mong leh zang ketot. (Na a kitel khe thei lote genna hi.)
28. Ai kawkan (Sawlna a mang lote kigenna hi.)
29. Aimit de bang. (Thu khat nial zo nawn lo a omtate genna)
30. Aisa longeh a zol (A nop theithei nading a an tawh zolte kigenna)
31. Ankhing satsah sadeu, thu satsua siadeu. (Thu lui phot nasia thei cihna)
32. An ngaalah phamaw lo, thu ngaa-laah sia thei (Thusia khat diaphot hoina gen)
33. Am te kigen sia (Gensiat vannuai sia lo cihna hi.)
B
34. Baah bungbu kai ta. (Lo a vam lahha bungbu kai genna hi.)
35. Baah tawh kibang (Baah pen zu lah hi,va lah hi-a, kop leh kai thuate kikona)
36. Baah vat bang. (Baah vat ciang kikha thei pah loin, kihi ngeingai in, kigamlum thei-a, kihi ngeingai a manlah pen genna hi.)
37. Baah vat kia bang. (Baah kivat leh tualah kia liana, za lian kiate genna hi.)
38. Baaltee tung tui tal bang. (Thu kihil ngai nuam lote genna hi.)
39. Bawmta gaal suah (Zawltua ding pan 'aman' heeh thei-a, i muante gaal suah cihna)
40. Bawng zawng tho in bawh. (Cidam lo a thutuah lailaite genna hi.)
41. Bawng nuo bang. (Nuo a kizol zo lote kigenna hi.)
42. Beel hawm a gin ngai (Bangma nei vet lote kiphasah thei cina hi.)
43. Beel kheng in beel ta. (Neisa zua mang hoilo genna hi.)
44. Beel to leh khuai sawh. (Zu hawm leh khuai sawh in ne a, a naite in ne cina hi.)
45. Bi tang phe bang. (Bi a po ciangin lei awng loin po a, na a tam genna hi.)
46. Bua in ka mei tung heh a ci leh tong semsem. (Cih thei sawmte kiam semsem cina)
47. Bui aphah kuan a tawp. (Ngimna khat tawh na sem a a zo lote genna hi.) (kim khawlte)
48. Buipi lei kei zong khua ngai, nupi veisan zong nuo hei. (Ngaisun a nasep ding cina)
49. Buipi suangzol tuah bang. (Maban khat zop zaw lona genna. Kikhahna om cina)
50. Bui taw hol a hol. (A dei khat a nga masang ngengen in khawl thei lote cina)
51. Bul kiloh lo dawn kiloh. (Vaihawmpite geel lo a, anei a te hawmte genna hi)
52. Bul leh baal nei lo. (Thu cian lo a gente kigenna hi.)
53. Bul le kap thua.(Sa ngim lopi a kap bangin, tel kan lo mawsahna genna hi.)
54. Bung le beng a ta. (Kinawthawi a khualzinte genna hi.)
c.
55. Cinat thithe si hu tawn, vei suah thithe eh hu tawn. (A sia pieng ding mawh pian loin kihil khol cina hi.)
56. Ciammui gaal suah. (Khat leh khat kiciammui khial cina hi.)
57. Cia lam kanla lamlai-ah si. (Sepna zaw lo kisipi cina hi.)
58. Ciimnuai a sa kibah, Geeltui ah kithuh. (Siamna kimang ngillo, a sawt hang cina)
d.
59. Dapa tawm nei. (A nei vannuai a met a bawl nuamte genna hi.)
60. Dai-paam vutkhu. (Giinta in mei awi den cina hi.)
61. Dim gual zaw. (Lelna pin kamtung nung nuamte kicina hi.)
62. Dawi bawlin kimang zolo, ei leh ei kibawlin kimang. (Kidop ding kihilhna hi.)
63. Dei suang lua khial thei. (Huaiham luate kigenna hi.)
64. Dinsa thu gen nawsa thu kimang lo. (Thupi genna ah dinsan genlo ding cina hi.)
65. Din sang to nuam zaw, to sang lup nuam zaw. (Mite nop sah pen genna hi.)
66. Du omna leh ngai omna. (Lawm ngaite gamla ta leh kitung zo cina hi.)
67. Dungdung dangdang sa. (Mi kinaw luate genna hi.)
68. Doptawn leh zawl thol luangin sawng. (Inn lam inntuante kidop ding genna hi.)
69. Dei teel val. (Tangval ahi-a, nungah a hi zongin, deiteel val thei cina hi.)
E.
70. Eh tam lua voh in khawnglo, thu sau lua kingai zolo. (A lua kici hoi lo cina hi.)
71. Ei leh ei kibawlin kimang a, dawi bawlin kimang lo. (Kidop ding genna hi.)
72. En sawn bei. (Na a tawm khat kitang kimlote kipaai mang, a dang khat kipia in, amau pawl teng ki-en nading omlo a bawlnate genna hi.)
73. Etet hang mu lo. (A lungsim sungah lung-gul lo lua cihna hi.
G
74. Gaal a hang gal a loa, sa a hang sa in loa. (I siamna pen mah tawh kisi cihna)
75. Gaallu kita gaallu tuah. (Thu khat pelh sawm tuak teiteite genna hi.)
76. Ganno leh anteh. (Kisia baih thu genna in kizang thei hi.)
77. Gaal giinte bai thei. (Thu khat i giinte na bai thei cina hi.)
78. Gaal simmaw ha thei. (Thu khat pieng a simmaw bawlte na hamsa thei cina hi.)
79. Gaha buah bangta. (Nui gin luatna genna hi.)
80. Gan a lei ha lo a nuo zui ha. (Gan kilei zo a kikem zo lo cina hi.)
81. Gang kimuang a gang in ei buan. (Dol puahna-ah, gam sungah kigiah a, numei khat beh kihelin zan a luppi ding a gang muang pen kungah luma, a gang in na buan veve genna hi a, i muante ma kilel thei cina hi.)
82. Gen siatte tawh kiteeng thei. (Mi gensiat lo ding kihilna hi.)
83. Gilpi leh sakhau. (An nene ta leh ta a, sakhau ah zong a kiguangzah ta thei pen, gilpi lah meng, sakhau lah meng thu pen, anne a kitawn khat ka gilva cici napi a neh veve ciangin a hamnasa kisuangin "Gilpi leh sakhau" ci hi.)
84. Gitta tua tun. (Gita ten tualai in an nei in khol loin, ne mang thu ahi manin nupi pawl khat an a nei ciangin, ciangtee neh loin, a sii a hulin tungkal pai thei uha, tuate pen gita tua tun na ci uh hi. Ciil thei lote cina hi.)
85. Gip sui leh khuai sui kizawl. (Dei leh tup kibang lopi a kizawl theite cina hi.)
86. Gul hih cil khei. (Ciltang ah gulhih om thei a, a khei ciangin selphual om thei loin khei kul ahih manin, thei nop khat a bul kan luate na gulhik cil khei, kici na hi hi.)
87. Gul a tum si, mi a tum si lo. (Inn sungah gul a tum nah leh kithat hamtang a, thusia nei khat in a lut leh mai hamtang genna na hi hi.)
88. Guahnuo bangta. (Misi khat a om ciangin, mi kihaw in kigaal a, innteehte in a dana mangngil thei hi. Ahi zongin a kivui nua singluang pei zaw ciangin, innteehah koima khawl nawn loin, innteeh teng beh leh abul tahtah a tai maw khat leh ni beh omin, hawmvat, dai keei in nuam lo ahi manin, mi om lona hi lo a dai keeite nuam loin guanuo bang e kici na hi hi.)
89. Gual in teeng su ci a man zong teengsu. (Min' a theina tawh asep khat aman' thei lopi a, a semte pen tunga kizang paunah hamnah hi.)
90. Gulhlan a val la val a cingah pawh.(Ei tawh kituah lopi i tup a i sep leh kisi pi ci nopna hi.)
91. Gulhlan ka mei ei tuan in tu pai leng ci. (Thu du mamate kigenna hi.)
92. Gu-sia lei nuam lo a, hing lei nuam. (Numei kilei nai lote a si zaw in lei lo pha
maw a nuamlo a, ahin lai a kileite nuam zaw cina hi.)
93. Gautang kilia bang. (Gautang ci pen zo lah zamit pumte hi-a, tua pen kilia leh leng valval luumkeei bangin, na sep hat mamate kitom keei in, na a tampi a zote nasep pen "gautang kilia bang" keei kici na hi hi.)
94. Gun gal a mei khu zong nuamtuam. (Gammang khat gamla ta leh mei khu mu leh a mi a mu lo hangin, mang nawn lo ding kithei bangin, patau zaunate, ah i gei-ah naupang khat om leh zong nuamtuam cina hi.)
95. Gumgaw sai lungtang hual. (Tui om loin sailungtang kihual thei lo a, cilphi a hual ahi manin kihual thei lo bangin nek le dawn zeh khat lo tawh kigual nuam thei lo kikhawl thei lo genna hi.)
96. Guta del lo a tai. (Guta khat popo a guh zaw nah leh tai hamtang a, mi khat koima mulo koima thei loin khial leh ama kisuang cina hi.)
97. Gua leh sing kigawi laitah. (Huilan laitah a gua leh sing poton kigawi thei a, tua laitah kineh gam lo mabangin, mi ki-el kido va neh lo ding cina)
98. Guasia khin leng khawng. (Phalbi guasia pen lo-ah kituah leh khuadam lua in kipusuah ngam lo-a, buh sungah ki-om cipin meivah ding om lo, khin zawl na leng kivangtum genna, thusia nei te'n a neisa teng khawng cina hi.)
H
99. Hai kie ngah a ngah. (Neh ding om lo hai lawna, a kungtung ka zo loin a nei ah ngahte pen, na sem lo-a, a baisa loa lo zawzena, a nei a ngahte kicina, kiko na leh thumna kigawm hi. Mun khat beh a ngana sum lut ngahna ah zong kizang thei hi.)
100. Hai kung khat in khua khat va zo. (Na sem lei kava zo, singkung khat in zong khua khat va zo ci-a, kihatthotna hi.)
101. Hamnah kalah. (Pilna tawh kihilna kam a kizang hi.)
102. Han in phata ci ngai lo, tuipi dimlet ngai lo. (Si hun bei ci om ngai lo mihing anne nawn lo ci om lo cina hi.)
103. Hawm siam nungta, ne bil in si law. (A siam a nehtang hawmte kithuh kie a, tama ngai lo, a ne cipte a kial ciang kiphawh loin si law cina hi.)
104. Hakai pahtah bang. (Hakai a kung hoi a, a tah om keei lo thei pen, mikhat a kam nuamin a sung gilote genna hi.)
105. Hausa sialkhau tuh. (Hausa ten khual sial leina ah a zui hangin, sialmei tu mem in pei-a, tahtah hi lote tatna hausa sialkhau tuh kici hi.)
106. Hausa leh naupang pahtah ngai. (Mi vannuai in pahtah ngai cina hi.)
107. Hausa thu leh naupang thu kinang zolo. (A dei khat uh gengen uh a man lo in phamaw ahi manin a ci uh taangtung hi, cina hi.)
108. Hausa thu nial lalkhuo'n law. (hausa thu nialte teng ngim thei lo in lal cina)
109. Hausa zieh in tuikuang ban. (Inn khat peuhmah tuikuang pen huangsung lutna kongpi gei-ah kikoih a, zu a kilup ciengin, inn liim mong pan kipan sialkong lam manawh kilup hi-in, hausa te sih leh man ciengin zubeel in tuikuang dong ban pen, a Hausat man ahih manin, "Hausa zieh in tuikuang ban na kici hi" a dangte in ban lo hi.)
110. Hausa khual zin bang. (Hausate khual azin ciengin, zu leh sa na kigawh a nene dawndawn keei ahih manin, mi khat peuh a zin a vakna ah tuahpha in om leh hausa khualzin bang ing e, a cih na hi hi.)
111. Hau in a gui zui, that in a gui zui. (A that ngei, a hau ngeite bek hau thei ahih manin taang a te in la na phuah in, (a) Hau ning hau ning ka ci zongin, hau lun lai-ah kibual zongin, hau in hau gui a zuan e; (b) That ning that ning ka ci zongin, lai-ah ka pang zongin that in that gui a zuan ee. na ci uh a hauhna sungah bualta leh hauzo tuan lo, sataangh lenna ah taangpha penah a pang zongin sa suah lo man tuan lo ahih manin tu a hamnah a zang na hi hi.)
112. Henta kolbul tuah bang. (Bang ma na sem thei vet lo, henhen aia aia bangte ma pei thei vet lote kam zah hamnah na hi hi.)
113. Hiang gamla sang, inn veng kimang zaw. (Veeng thupina genna hi a, sina nopna ah i vengte thupi cina a kizang hamnah hi a, i si i da ei phawhbai cina na hi hi.)
114. Hihpi cii zong nuamtuam. (Kial laitahin neh ding om lo kam sung keu, lei keu cil mal khat zong a om lo laitah in numeite hihpi khat manin cip leh cil om tuamin nuam tuam cina, kial thumna a kizang hi.)
115. Hil lo taga bilbing. (Taga te a kem a cing om loin, kihil ngai loahi manin, sawl mang lo, khua za lo ahih manin, hil lo taga bilbing na kici pen thu mang lo naupangte tung a kizang hi.)
116. Hoh lim su khe. (Mi thupi gen laitah a thu dang va gente cina hi a, nopbawl ni a thusia khat a piangte "Hohlim su khe" kici hi.)
117. Hoimaw bawl maw, lungsim bawl thei. (Pianpi i mel kikhel thei lo a, i lungsim pen kibawl thei, kipuaphat ding kisam cina hi.)
118. Hui laang cin in inn phet sam lo. (A sia khat siasia lo, a sia vannuai sia lo khat vei ta khialte ta khial suah lo cina hi.)
119. Huimut bang. (Cina gim ahi leh tawm nuamtuam cina leh, an neh a beimang zong huimut bangta kici thei hi.)
120. Hum ham ta bo. (Thu nasia gen, da gen, kin gen nate cina hi.)
121. Humpi gilkiel in a ta domin a gih pen ne. (Kiel cieng thu kikhual zo nawn lo)
122. Humpi giel kiel pieuneel ba. (Gilkiel cieng gilpi ding beh kingaisun cina)
123. Humpi laang leh sangah laang. (Kumpi in thupi khat vaihawm leh upate in a khatna geel pongte cina hi.)
124. Hin leh si kibang. (Bangma kimang lo a omna leh omte cina hi.)
125. Hanzang leeng vawt. (Zau mamana munte hang kizang hamnah hi.
126. Huimut ding phal lo. (Ta hawm thawh luat genna hi.)
I
127. I aamte kigensie. (Gensiet tapo a sia hi lo cina hi.)
128. I gensiette tawh kiteeng thei. (Mi gensiet mawhmawh lo ding kihilna hi.)
129. I lungsim bang kigen khie. (Kam pen lungsim ngaisutna cina hi.)
130. I lungtom leh kimaw thei. (Lung tomte khut khial thei cina hi.)
131. Inngua leh gamgua om. (A tahtah leh a tahtah lo om cina hi.)
132. Inngua ha lo gamgua ha. (Hiang leh san paii a midang a panpite kigenna)
133. Inn veng lawi laam. (Vengte innah kibul cina hi.)
134. It luatna in that thei. (It lua in, it lo na khat om leh that ngam cina hi.)
135. Iaa ah zong nam zo lo. (Na tawm lua nehna genna hi.)
136. Innlui phel lam leh zi kia nei. (A masa bang zolo cina hi.)
K
138. Kaa zong kihu. (Khat le khat kihu ding kul cina hi.)
139. Ka hiang khat zaa nan ka gaal sawm tan ing. (Thukhual luatna in supna cina)
140. Ka kha ka tam ci lo. (Kimu hangin bangma gen lote cina)
141. Kaipi'n pahtah ma. (I pahtat mi khat gina lo thei cina)
142. Kam in khawnla nei lo. (Thang al masah pen hut thei cina, kiphat masa lo ding)
143. Kam kei meituh bang. (Kam kei mei tu lei, hla lei ei pet dinga, la kiman zolo ahi dan bangin ei thuh kia ding zuau huai pi kipatnate cina)
144. Kamsie leh lei ngam kituah. (I tuah dingte kipel thei tuan lo cina hi.)
145. Kamsiem sialllei sang, kamsia sial liau. (Kam siam ding thupina genna hi.) Maisah.
146. Kamsiem ngai da om lo, lamphei tawnda om lo. (Mikim in a nuam thei cina hi.)
147. Ka thei tang ngiat. (Thei i neh ciengin a tang behbeh na hi a, nasep khat zong hamsapi a sepna pen theitang ngiat kici hi.)
148. Kawmin zong bil nei. (Thu mawh gen lo ding, kiza bai lua, kiza zo lua cina)
149. Kawl zawng naiphuan in kizem. (Zo sangin Kawlte pil zaw, Zomte'n puan aman tawmte lei in sia paipai-a, Kawl in a to pen naipuan lei in sia bai lo ahih manin, vanman pha a lei khat tung kigentena hi.)
150. Kawlgit (Vato) suluh. (Na khat popo hal loin kizomin hi thithete genna)
151. Kawl mang thu ah pi'n phiat. (Thu khel mun luate genna hi.)
152. Kawl zong namto tui tawh kiho. (Kawlte a kilenglat leh thambeel no sungah niangphan ahi sih leh tuilum koi in lengna do uha, tua ma bangin leengnate zu leh niangtui ki awm cienga thusiamna a kizang hi.)
153. Kau nei kisungsia. (Koi ma ei thei lo i hina ei kithei in kisungsie cina hi.)
154. Keellu phum kilang. (Keel gu in, keel go a kithei kha leh ci-a, a lu huan ngam loin a lu a phum leh kimu zaw in thu a bang bangma in zaua i sel nop hangin kilang veve cina kizang hi.)
155. Keelpi a vaikuan nin taw'n ne. (Keel pen inn a kikhum cip hi a, ni khat sun a kigam hla leh tawnna ne lian sih sanin, sep ngai lo khat, bawl ngei lo khat bawl kha in thusia tuah lei Keelpi a vaikuan ni a taw neh tawh kigentena hi hi)
156. Khanin gual nei. (Zi ding ta ding ahi zongin, kikholpi ding ahi zongin mi zosie kibang loin, i khanpi na om ahi manin khan in gual nei kici na hi hi.)
157. Khangual bawl in kimang lo, ei leh ei kibawl in kimang. (Ei leh ei kidop ding cina)
158. Khat ii zunte sawm tang puah. (Sawm khatah zunte khat om leh a teepa min kiloa loin, a sawm min kilo ahi manin, a sawm bup puah suah cina hi.)
159. Khatvei sim sing pah, khat vei zo sing pah. (Mihau mi ci thei khat hau suah lo, a zawng khat zong zawng suak loin, a zawng khat zong hau hun nei zel thei cina hi.)
160. Khat lah ka tem, khat lah ka paai. (Gup tuam paai tuam nei lo cina hi.)
161. Khualal munte hau thei lo. (Kikhual ding genna hi, a lalmunte kikhual lo)
162. Ki an ne bang. (Anne leng khateh hau deute kicina hi.)
163. Ki-ah gual khen. (Bangma kivai hlahna omlo khawl ton kikhen ziaute genna hi)
164. Kikausi phum. (Kausi pen meitang khat a om leh delin mei sungah kiphum lumpen ama tawh kisai lo a thu a awhte kigenna hi.)
165. Ki sakhi be. (Bee tahtah hilo be a kibawlte cina)
166. Ki uitui. (Kilem, kiho thei cina hi.)
167. Kigulluh. (Gul kilu pen a kilu bang lo a kihual ton bang lel bangin, mi nih mi thei lo a thu khat vaihawm simna nei zaw ciengin a nei lo banga omin, a thu a
pieng ciengin kipawlte gente na hi.) (Gul kilu kimu lo)
168. Kiel kum zampi'n an a um dim man. (Zomite vannei a manpha khat kituat pen kiel kumin an hamsa in zampi-in an a umdim beh manin kilei ci thu a om bangin cimaw ciengin i van kiniam pai cina hi.)
169. Khakhamvei bang. (Lungzuang an ne zo lote a da lua a thumthumte bangin om a gawng keei ahi manin khakhamvei bang na kici hi.)
170. Khausau lua kikai awh, thu sau lua kitukal. (Na a lua khempeuh hoih lo cina)
171. Kibuan nai lo kal sung khaw. (Mi pawl khat kitawh kihau leh kibuan nai loin akeng tawh kalkhaw in kumkal pai-a, a gualpa kiging man loin pua thei genna hi a, a thu kigen nai lo a lungthah paite genna hi.)
172. Ki tui ne bang. (Ki pen tuilam sial nuam lo a ka ne sih ding ci-in kiciam ahih manin a neh leh si hi. Tua manin, ciam sawngte kitui ne bang ahi zong pasan sial neh bang ahi zong kici na hi hi.)
173. Ki-sihla mu. (Kimu na pi kiho man lo a kikhen paite genna hi.)
174. Kikeel ki. (Keel kipen lee pei tuah a, thu kituah lo a kilebulte kikeel ki kici na hi hi.)
175. Khuavei an ngah bangta. (An nei loin a tate tungah khuavei cieng an ne ding cici a, a taten a hun thei loin ngah la pen khuavei an ngah kici hi.)
176. Khuasia meide bang. (Khuasia mei de tang zelin a mun kimu zolo pen genna)
177. Khua-ul kai lo an kine lo. (Pua sui munte kikhia na hi. Na sem un cina)
178. Khuai gip meh a meh. (Khuai gip pen a kimeh phot loin kikoi thei lo a, thu khat po a phuah paupaute kigenna hi. Man lo cina hi.)
179. Khut khat khai, khe khat khai bang. (Ki thu tuah liente cina hi.)
180. Kum leh kumkilutua a zin. (Zin ngai lo kum khat a khatvei pau zinte cina)
181. Khut tung lum le bang. (Thu kip nei lo mite kikona, thu khel munte cina)
182. Kumpi kumpi kung haw, nautang nautang kung haw. (Kimpi beh kimaingap cina)
183. Kom kim zong ta pasal sagi neisa zong pei. (Nupa kikhenna hun nei lo cina)
184. Khaupi'n duap kua nei, thupi'n kawi kua nei. (Thu pheng gen lo ding genna hi.)
185. Khuapi guo leh nauno sua. (Khuapi gua pen zu lotlot thei a, tua ma bangin zong nau suah ding zong hi lotlot thei hi. Ahun kigin den ding genna hi.)
186. Khuapi guo zu sataang hal. (Khuapi guo pen zu pah in nisa kia pai-a, satang kahal thei hi. Nuam sa paha cimaw kiate genna hi. Zauna tawp bai cihna zong)
L
187. Lam gei sial sep vaitaang law. (Nidangin vai a kikuan ciangin lo kinai teng kuan khat in kuanin, pei khatin pei uh a zawhton ngiam uh hi. Tua sungah khat in lam gei a sial khat sep khial kha in liam leh a zawh teng buppi ki ngawh lien hi. Mawhna hi loin thu kituah thei cina hi.)
188. Lamka lai a ding bang. (Lungsim khentat thei lo na gen hi.)
189. La i ci thu, thu i ci la hi. (Thu pen la in kigen cina hi.)
190. Lamlai nih sie sawp. (Om zia khawl zia thei lo numeite kona hi.)
191. Laamlaam pan an ngawl. (Thada zu nenete zawng cina hi.)
192. Lamnai sing khuapal. (I lawp luatnate kikhial thei cina hi.)
193. Lamnai tawn nuam kumkua a tung lo. (Na a bailam deihna in nga zo nawn lo cina)
194. Lamgei tuan khial ding leh mit sawh ding kima thei lo. (Tuah ding kima thei lo)
195. Langbawm a eh a awh. (Eima gamtatna ma kithuah law)
196. Lamphei leh thupha.(Mite nopsah pen thu cina hi.)
197. Lamphei zuida om lo, thupha ngaida om lo. (Mikim lungsim dei genna hi.)
198. Lawiki zam bangta. (Lawiki zamin sau napi kimanna nei lo, mi a kawikawi hang a hu zo omlo cina hi.)
199. Lawi ngam bangta. (Lawi vuai lua pen kimanna nei ta lo, a hat nawn lote genna)
200. Lit dawh bang. (Mi khat thu kitheisah a kidong leh a tonkiate cina hi.)
201. Lingtang khei bang. (Lungsim vut velvalte a dam ciengin nuam cina hi.)
202. Leiba mangmaw thaba mangmaw. (Na a mawh mai thei om lo cina hi.)
203. Leidu mi leh ui mi pet nuam. (Mi mawna suisuite genna hi.)
204. Lei leh ha zong kipet. (Innkuan khat, lawmta khat kitawng thei cina hi.)
205. Leitang taai maw, neisa tai thei. (Nei gil pen leitang kipa, sum leh vandang dangte sia thei in bei thei ahi manin leitang dei un cina hi.)
206. Lonai nei leh zi nem nei. (Innkuan sungah pasal nopsahna genna hi.)
207. Lo gampha leh zi hoih nei. (Lo gampha neite zawng ngei loin an kham a, zi hoih neite ankhing tama ngei lo cina hi.)
208. Lusel leh taw dawh, taw sel leh lu dawh. (Puanza meng sil pen i pumpi tang zo loin, i taw lam tang sah lei i lu dawh in, i lulam tangsah lei i taw a daw ma bangin, zuau thu ah i kilep nop hangin kidawh veve cina)
209. Luai a vei khut in gam uh. (Nupite luai a a vei naupang kumpi suah thei in gam
lianpi pi uh thei a genna hi.)
210. Lusum zong biitawng in kipee. (Gal in a lu a tante a kivui ciangin a lu ding um tawh kipee a, mi a kisut sah ma bangin thusia khat a hoi in kibawl thei hi cina hi.)
211. Lum leh tei pasal a, mui leh khau numei a. (Inn sungah pasal nasep leh numei nasep ding om tuak cina)
212. Lumlum in taa, semsem in law. (Tha nuamte hau in thadate zawng cina hi.)
213. Lu leh taw mel thei lo. (Zu khamte kikona hi.)
214. Lungsim bawl thei, mel sie bawl maw. (Lungsim hoi ding hanthotna hi.)
215. Lui luangin a niamna zui, gunpi in tuipi sung zuan. (Thupha in kiniamkhiat mite tung tung cina hi.)
216. Lamsah leh pu kineh zolo. (Pute kidem zolo cina hi.)
217. Lungme hawm bang. (lungme kilii thei-a a tah kisa in hawm ma bangin bangma nei lo ciengin gente nan lungme hawm bang ung kici hi.)
M.
218. Maitang sing hawng belh. (Taang ate puan na nei loin a zum uh ciengin a maitang singhawng belhin om uh hi. Tua mah bangin, thuthum na ding munah zumpipi a va peina ciengin maitang singhawl bel a ang pei hing kici hi.)
219. Maimuat see bang. (Kikhen thang, kithe thangte genna hi.)
220. Mahtha si leh zingguo zu. (Veng bai, ngil bai cina hi.)
221. Man nai lo tulsui. (Pawng lawp mite kigenna hi.)
222. Mang kawm bang. (Thu khat a khen thei lote kamzat hi.)
223. Mangtaa luang. (Nga ding za nga zolo a nganate cina)
224. Mang tui neh bang. (I mangin tui dawn lei kikham theilo, na a vanglahte genna)
225. Man leh mual in kihau lo. (Mo man uang lah lo ding kihilna hi.)
226. Meigong zi zon. (Teel tuan lo a ahi thei pen meigong ten zi nei bangin, na khat naw sui a nga pah pen meigong zisui tawh na gente hi.)
227. Meigong lung leh sa zanta. (Hangsan in khual zolo, a piang ding khual lo)
228. Mei kuang pei suahta. (An huan ding omlo a, bel kisuang lo cina hi.)
229. Meipua sang han nem zaw. (Mei pua leh tan thei a, hangsan leh nga thei zawte cina)
230. Misi luangzawn bang. (Vangin khat mi tampi zawnte genna hi.)
231. Mihing le papo. (Mihing khan to lo na genna hi.)
232. Milut si lo gul lut si. (Thu lienpi zong kilut po leh kilungdam thei cina hi.)
233. Mi muannan' taw tawh. (A hang lopi kihangsahin mi phin cina hi.)
234. Mi maw'n thu tang gen. (Ip ding zia thei lo a tang gente kigenna hi.)
235. Mimkhau a sial kai. (Na a ol no tah a ngate kigenna hi.)
236. Mimtang tung mimtang. tangtang tung tangtang tuang. (Cil ding kihanthotna hi.)
237. Mi khut tunga gul hing man nuam. (Sem lopi a min deite kicina hi.)
238. Misi vaihlah bang. (Misi tena siding ciengin, a kawsah ding a deina leh a kivui dan ding a deina vaihlah a, kimang tuan lo leh, misi khat a kivui ciengin ang tua ci tan ci a vaihlahnate dawnkia na omlo cina)
239. Mit a na tang lah bang. (Mit ah nin them khat ang tu leh na in hlitui kikai keei ahi zong kila khia lien leh phapai ziau ma bangin, thuahna khat a phat ziau ciengin mit a nin lah bang kici na hi hi.)
240. Motha zummaw khatei dawn lieh. (Motha gongsate kona kizang hi.)
241. Mu lo su kilei. (Van lei ciengin ngentel ding cina hi.)
242. Mual a khawl masa leh tuinah ngah masa. (Nga masa, hampha masa cina kizang hi.)
243. Mual mong et bang. (Nga ding lamet a nei lote gen hi.)
244. Mut leh va thua. (Na sem hakat lua mamate kigenna hi.)
245. Mei khu loin mei kuang lo. (Thu tawpha om loin thu pieng lo.)
246. Meima lo tho tu lo. (Thu khat loin thu mawh pien lo.)
N
247. Na kam ai gai bang ta. (Ai gai pen ai kung ding a kilawm in a phungah san lileh in a om bangin kampha khat tuahpha khat pen kiphual thei ki-im thei lote cina hi.)
248. Na keel luphum kilangta. (Keel gu a go sim khat a kithei lo nadingin a keellu lei sung phum na pen ui-in khuat khe in kilang ta veve bang thusia kiseel zolo cina kizang hi.) (zuau tatna kiseelsim zolo cina)
249. Nakia kawi in naakia mam hla. (Numei ahi a pasal ahi zongin, a nute sang' leh zaw thupi zaw a a omte kigenna hi.)
250. Na mei tung suan. (Nidangin thuh khat beh kinei a, an kici khempeuh thuh khat tung beh kisuang hi a, tua ma bangin na nei khat beh pen na cin tengah ka tua ka tua a ci pha diehte pen, khat beh suanglua ahi manin a awi lona na meitung suan kici leh, na khat beh ahi a mi khat beh na tengah a muangte pen na meitung suan kici na hi hi.)
251. Namto hau leh tuita khan. (Tuita te gua a tam ciangin khangpahin gua theu leh kiam pai lel a, namto hau zong picing zo loin kiampai ahi manin kici hi.)
252. Na paamah thamdam (Sikha) ci bang. (Kisol na a kimulopi, aman zong a mu lopi mi sol nan neina kamzat ahi manin, khemna solna up loding genna hi.)
253. Naupang thu leh hausa thu tung. (A deina atun mateng gen in kitungsah cina hi.)
254. Nau-zaw aw-na kici bo. (U zaw in nau zawte sawl zaw deu cina hi.)
255. Naupang silpaah dei. (Naupang ahi nah leh paah deipha dieh a, kimanna om ci thu hilo a golpipi na dei khat gente genna hi.)
256. Neh lo buan law. (An ne loin kuangsil vet ci leh hamphatna om lopi in minsiat lawte kigenna hi.)
257. Nehsa tahlaw. (Tha cialna ah khuasia in kikuan thei kei leh an kine veve a, tha kinua kuante cina-in, cialna kingasa nuo sepnate genna hi.)
258. Nene puhsi omlo. (Cidampi an ngawl leh si thei a, an aneh nah leh si lo hi.)
259. Ngal hapaasa tum kia lo. (Pasal thu gen buang khawl lo cina hi.)
260. Ngalkhaat bang a tang tat. (Mi tawh kithua thei lote genna)
261. Ngalta pawn lo om lo, ta khat si lo om lo. (Mikim tuah peel mawh thu genna)
262. Ngal thal do a do. (Ngal pen thal a, a kikap ciengin si zo loin, a thaltang la khia thei loin a dam dong a thuah ma bangin, a dam nading a bawl zo lo a, a pum thuahte genna hi.)
263. Ngeu eh phum a phum. (Ngeu in a eh phum tehteh napi thuhphum ngai lo hi.)
264. Ngeupi ta nei bang. (Ngeupi'n ta a nei ciangin ki-et pieh leh tua kawikawi a, a neisa khat a tua kawikawite kigenna hi.)
265. Ngeu meilah bangta. (Ngeu in mei du lua in meila a kisawl pen tung kia nawn lo thei genna in a kisawl na zekai luate genna hi. A tungkia lote zong hi.)
266. Noi lung han. (A sia apha tel nei nai lo kitah nei lote kigenna hi.)
267. Nop si taang, daa si taang. (Nuamlua lei kisi thei in, da lua leizong kisi thei ahi manin, i hi na genna a kizang hi.)
268. Nop leh da kibang. (Baangkua sung khatah, a nop bawl ni leh a da ni hunin, hiang leh san a kisapna kibang cina hi.)
269. Nu hil lo, pa hil lo taga bilbing. (Naupang thumang lote kigenna hi.)
270. Nop bawl ni guah ciin leh numei ta sang kiziing. (Buai huaina thu genna hi.)
271. Numei in ama khuat, sumkuang in a lii khuat. (Numeite tatzia ding genna hi.)
272. Numei khua leh sakhi khua. (Numeite a beh ding kithei khol lo cina hi.)
273. Numei thu leh sialpi kii in kilaam lo. (Numeite thu picing zo sam lo cina)
274. Numei khat leh lo gam khat. (Pasal in zi ngah teeiteei cina hi)
275. Numei thu leh ahpi khuan. (Numei in vaihawm leh a sia hi lel cina hi.)
276. Numei pei nuam paulap sui. (Numei pen e pei nop leh hamlap khat teitei sui)
277. Nuo leh a awh hamsie. (Ama leh ama kibawlte koiman' phawh tuan lo cina hi.)
278. Nuo lam mit nei bang taang. (A inn lam lung himaw luate kamzah hi.)
279. Numei naupaai teizum kua, namzum kua. (Nausuona hang kisi thei cina hi.)
280. Nupi gaal gen. (Thu uang genna gen na hi.)
281. Nupi kihauna va leng lai. (Nupa kitotna thupi lo thei cina hi.)
282. Nupi vetkawi in a bup in nil. (Pia nuam lo a pia siang kineite genna)
283. Nupi vahhat thusie sui. (Nupi ten thu thei leh mot gen in thu tuah thei cina)
284. Nupi veisan zong nuo hei, bupi lei kei zong khua ngai.(Gamtat kidop ding genna)
285. Nupi phawibu kat. (Phawi bu a siat ciangin kikum kalin a kikhui thei behma bangin, nupite thu khat khui tawmtawm thei, upmaw thu hi lelte genna hi.)
286. Nusia sawl sang. (Numei pen pasal bang loin, sawl mang a, a sawl mangte genna)
287. Nu thu manglo, pa thu manglo a nahlaw beeh lo. (Nu leh pa thumang lote thupha nga lo cina hi.)
288. Nupa kilung tuah in khua khat zo, khua khat kilung tuah in gam khat zo. (Kithu tuahna a thupi na genna hi, kithu tuah lei koi man ei siasah zolo cina)
289. Nualam tuhtum zong gaal suah. (Pasalte a tuhah awh thei a, tua ma bangin i hiang i san zong gaal suah thei cina hi.)
290. Nialhat zaw nop. (Mi aham daidaite kizo bai zaw in a ham lote kizo lo zaw hi.)
O
291. Om mun thu thei. (Mi thu thei lo-a, a om mun a sawl mang lo a omte genna)
292. Om muang gaal tuah. (Khialna nei lopi a om kim lai kikhialsah khate)
P
293. Papaah po tuah bang. (Papaah po tuahte pen, a mu phetin min a tu ding bangin bot saisai hi. Tua bangin koima tu loding a am bawlte kicina hi.)
294. Pa that topha guan. (Mawhna ciing lo cina hi.) (Zau in ama a tha ding zau in bia)
295. Pangli a kikoisa zong thu kidong. (Innkuan sung thu kidoh ding thupina genna)
296. Pasan sial neh bang. (Kiciamna a tangtung liante genna)
297. Peikuan baal em bang. (Min zolo thu min lote genna hi.)
298. Peng Lam ciphual bang. (Peng lam in ci phual in aman a phualna thei in, min zong a thei ding sa-in a mun lailai bangin, a lungsim kip thei lote genna)
299. Peng Lam nau-op bang. (Peng lam in nau omin, a nau a ka ciangin, a luzang gu kitua nai lo mun pen phu va ket pen nam tawh kui-in, si a kapta lo pen a siamin kituat bangin, thei lo mana bawl khialpi a siam kisahna na cina hi.)
300. Pengpaleu tungnung kitu vanlai ah lam. (Kisia a kikhia a, a zu khankhante a ni un zawn law in baa ngiingeite ki cina hi. Met lo bei mang cina hi.)
301. Phalbi leh kei zuau ngai lo. (Phalbi vot thu gente na hi.)
302. Phalbi leh naupang kizawl. (Naupangte'n phalbi vot thuah zo zaw cina hi.)
303. Phun hat leh guaciin kibang. (Nuam loin, a sia lua lah hi sam lo cina hi.)
304. Phelum phul bang. (Tam lua cina hi.)
305. Phelum phul nading leikhan petlet. (A pan khia khat kisam den)
306. Puansia phop leh teehsia kep. (Kingawh bawl thei lo, lungduai kul cina)
307. Puan sil lai thei, sanggam lai thei lo. (Sanggam thupina genna hi.)
308. Pu leh lamsah kineh zolo. (Pute thupisah ding kihilna hi.)
309. Phula gaal bawl tang lo. (Thusia ah a pan hi ngei lo ding genna hi.)
S
310. Sacia khuaisawh bang. (Sacia in khuai a sawh ciangin, a sungah tumin a nuo lam a om a zi hlahhlah a, min' a zi delmangin ama sawhsa khuazu teng na kisangsang a thei tuan lo bangin, mi pawl khatin a pieh ding pie kha lo in a pia kisasa te ahi te tung genna hi.)
311. Sacia nupa bang. (Sacia nupa pen kikhen ngei loin, a suh a to ah kizui den ahi ma bangin, nupa kizui hualhualte kigente na hi.)
312. Sagil kitat loin, thukimna kip zolo. (Thu kilepna ah sasi taah loin picing loin, polo kia cina hi.)
313. Saipi'n keel mawlpi leh keel in thuah zolo.(AAna neite a nei lote'n zo ngai lo cina hi.)
314. Saipi lampei leh uipi tai. (A thahatte tatngei pen a hatlote thatawp a hanciam tawh kibang zolo lai a cina)
315. Sai sa bang. (Kinam hel keei cina hi.)
316. Sangkil nuosia bawlta. (Mi nuotaite kicina hi.)
317. Sasi tuah bang. (Gam lah a sasi kituah leh koima it loin kihampha cina hi.)
318. Siakhengte zin bangta. (Khualzin pawl khat siakhengte inn ah tunga, zan an huan liangin lol ding a ci leh khangma a nisua tho nailo ahi manin, a khangmate kicina hi.)
319. Sakhi gilna bang. (Kin lua, nganuam lua a tau keeite cina)
320. Sakhi a pi san leh a ta san. (Nute kisun cina hi.)
321. Sakhi tuineh a pat. (Bul pat a thu gennate hi.)
322. Sakhi hing mat bang. (Zau lua kiloh thei lo keeite, cina hi.)
323. Sakhi'n a tat nading kuamkua huom. (Thu sau muh ding genna hi.)
324. Sakhi that lo ngaltang tum. (Bangma lopi hi napi a thupi beh a nuamte cina)
325. Sakuu in a veng thei. (Inn vengte tawh kilem ding cina hi.)
326. Samkhau phel liang a lei. (Nei zosia tawh lei cina hi.)
327. Saman tung ta. (Saman pen leitung dawi, sanu pen vantung dawi a kingai sun hi a, inn sungah Saman lut leh an minsa om teng gai mang hi ziehin, ankhing neilo ciengin Saman tungta ung kici hi.)
328. Sa nan sa dam khawng. (Cina kemte si thei zawsop a, sa na zong a lawmte'n ompi-in sana kiman loin a cing a dam pen kiman thei hi.)
329. Sa zang kap leh thutang gen val. (Sa zangkap khial thei-a, sa taisuah thei le thu tang gen a kinei. mittawte mittaw, khelbaite khelbaipa, mi hoih lo khat hoih kei teh a cite min' ngai loin val hi.)
330. Saphawlawl neh nuam, thuphawlaw gen buai. (Saphawlaw pen a tel (a tah) teng hia thuphawlaw pen a kiseelsim kikhawi ahi hang a kigen hi.)
331. Seeneel tung tui sun bang. (Kham thei lo dawndawnte genna)
332. Sazuh kipuah a puo. (Sazuh kii pen sau in hoih napi, gal nannan nei thei loin, a tai ciang a kii aa, a awh ding da in vandah in akia liangko tung pua-in kimanna neisah lo bangin, panmun khat kipiate asep thei sih leh tuate sazuh kipuoh kici hi.)
333. Sial gualnuam taw'ne. (Gual nuom luate kitawng theite genna hi.)
334. Sial nga nuom sial pie, tha nga nuom tha pia. (Deina nga nadingin sup phot bei phot kul cina hi.)
335. Sial tat nuo a sial dai kei. (A siat zaw ciang a kidal pante genna)
336. Sial eh denkeh bang. (Kithe thang gawp cina hi.)
337. Sial dop si. (Sial cina pen khoikhoi leh si zaw sop bangin, thu genna khat po a kidawm lua, lau gen lua, hi kuangkuang khat te sia thei zaw cina)
338. Sialpi vaikuan bang. (Sialpi a vaikuankuan hang ni khat beh an kham ding a nga bangin, bangma tah lo nisim lokuante genna hi. Taah lo cina)
339. Sial kop go sa zong kikhen thei. (Nupa nuamsa a tong a hang a sialkopna
ngawn a go sa zong kikhen thei pen, nupi kikhen thei cina hi)
340. Sial vom leh sial vom sial kang leh sial kang kingai. (Mel leh sa kibangte kingai theipha diah cina hi. Apeengte bang mel kisun a kikhen thei lo zawzen a, kinga pha deu hi. Sanggam dangte sangin kingai zaw hi.)

Khawk - 12
Taangaate Thuciin Pawl Khat
1. Aah kaa hun a ah a khuan leh sapi kaw kici-in, samual sua na om thei hi.
2. Ahhlui lup huna a khuan leh mo kaw kici in khua sungah motha om thei hi.
3. Ahlui hun lo a zanpi a aah a khuan leh sia hil ci-in thusia piang thei hi.
4. Aahpi a khuan leh zawlgai kaw ci-in khua sungah zawlgai om thei hi.
5. Aahlui nitah lam a a khuan a, khuasia ni kimu lo ahi leh nitah anhuan hun na hi hi.
6. Aahpi'n ama tui a neh leh a mang nuam kici hi.
7. Aahta te a kituhtuh leh a mang nuam kici hi.
8. Aahpi nokai thei i khawi leh vohpi kikhawi thei kici hi.
9. Ankuang nem leh hau kipan kici hi.
10. Ankuang liau leh zawn kipan kici hi.
11. Bah innsung lut leh namsia ei puah kici hi.
12. Cia zan a (CING) ci-a, a ham leh sihla kaw ci-in, 'THUTHU' ci-a aham leh tuikia ding khawci uh hi.
13. Cia a hon a laamkai a om i mu leh sial hil na ci uh hi.
14. Cingpi si dawnte khanto ci uh hi.
15. Cin dawn kang a tun leh vohsa ne thei ci uh hi.
16. Cingpi tha zaw lote dawi khawi ci uh hi.
17. Dawi kithoi zia kilawn leh dam zolo ci uh hi.
18. Damkang po leh si thei ci uh hi.
19. Gamsa khuasung lut sia hil kici hi.
20. Gua a pah leh phung man kici hi.
21. Gulsum mute si thei ci uh hi.
22. Gul gol that lei huisia laang thei ci uh hi.
23. Gul kilu mu khate kamsia thei ci uh hi.
24. Gul khuang mu lei a sia hil ci uh hi.
25. Gul suang nei mute kampha ci uh hi.
26. Gua taang bih sung a gul om mute hau thei ci uh hi.
27. Gul vanka mute a lungzuang thei ci uh hi.
28. Hui lan sia kial bawl ci uh hi.
29. Humpi lan' sia a si nuam ci uh hi.
30. Hanla leeng leh upa si ci uh hi.
31. Inn nuotawn leh hlangtawn luangin sawng ci uh hi.
32. Inntuante tangkham nei tuan lo ding tuan leh luangin sawng ci uh hi.
33. Inn huang keehte luangin sawng ci uh hi.
34. Inn nuo pemte tuahsia thei ci uh hi.
35. Kaika tah lua a sia hil kici hi.
36. Kaika kengpha tawh khah leh luang bei thei ci uh hi.
37. Khualzinna-ah gul tuah leh lamsau thei ci uh hi.
38. Khuazinna ah zulei lamsuh kan tuah leh tuahpha thei ci uh hi.
39. Khualzinna-ah zulei lamto kan tuah leh tuahsia thei ci uh hi.
40. Khuai kuatah lua sawh leh a se hil ci uh hi.
41. Khancing sa zunte leh sia hil ci uh hi.
42. Keensang ngaw sang daw in beel, biah lo phamaw ci uh hi.
43. Lo tawtawn luangin sawng thei ci uh hi.
44. Lo kingan suan hlote dam maw thei ci uh hi.
45. Lam pei kim tahlam khepi sui leh tuahpha thei ci hi.
46. Lam pei kim veilam khepi a sui leh tuahsia thei ci uh hi.
47. Lui kicing tua ii cin ci-in voh eh khia lei pha ci uh hi.
48. Lui suang kitaw ging, sumbuhpi pei suh ci uh hi.
49. Lo a mai ga lua a sia hil ci uh hi.
50. Mang a sing tom sum muna om ci uh hi.
51. Mang a suang tawh ei kisep leh sum kinga thei ci uh hi.
52. Mang a suang se sum paina om thei ci uh hi.
53. Mei kuang pawt leh zin kinei thei ci uh hi.
54. Mit khu tung lam kisat leh i itte tawh kimu thei ci uh hi.
55. Mitkhu nei lam kisat leh dana om thei ci uh hi.
56. Nephu kisat leh mitawh kihauna om thei ci uh hi.
57. Ngeu khawi theite sakol zong khawi thei ci uh hi.
58. Nui luatna om leh da nan zui thei ci uh hi.
59. Nop luatna om leh ka na om thei ci uh hi.
60. Nuam lua lei kisi thei ci uh hi.
61. Pengpeleu ham leh gua zu thei ci uh hi.
62. Puan gawl lai zu'n tu leh mel thei si thei ci uh hi.
63. Sataang hlen ban kisat leh sa kiman thei ci uh hi.
64. Sial guamnuam leh taw'n ne thei ci uh hi.
65. Sing huite ahi a, a bate ahi zongin kiphan leh singsia mi man thei ci uh hi.
66. Silit inn ah lutin khuang leh si ko ci uh hi.
67. Saihapa eng sau dawi ahi ci-in kap ngam lo uh hi. (Kap leh kisi ciin um uh hi.)
68. Suangtum golte dawi inn ci-in beel lo ding ci uh hi. Beel leh dawi in man thei ci)
69. Sialpaleeng abu a niam bawl leh khua niam, a sang bawl leh khua sang ci uh hi.
70. Tahlam khut sung thah leh sum kinga thei ci uh hi.
71. Tui thalpo dawn lei nambat i simzaza khangin kihau ci uh hi.
72. Tumde innsung lut leh lengla kinei thei ci uh hi.
73. Tawkhimul gawp leh thadam in ei zui ci uh hi.
74. Tuithu ham leh a sia hil ci uh hi.
75. Ui a hua lopi a, a ham leh sisiah kaw ci uh hi.
76. Ui lut taw bo ah om leh taang kihau thei ci uh hi.
77. Ui i khawi thei leh sial zong kikhawi thei ci uh hi.
78. Um gui pha lua leh ga lo ci uh hi.
79. Umga gol seng leh sia hil ci uh hi.
80. Va-ah sinkha nete khanto ci uh hi.
81. Vansial tam kum an kihau thei ci uh hi.
82. Veilam khut peeh sung tha leh sum kipaai thei ci uh hi.
83. Vei lam khepi sui lei kituah sia thei ci uh hi. (Annek lam sang beh hi.)
84. Vei lam mit kisat leh sia hil, tahlam mit kisat leh tuah phatna om ci uh hi.
85. Voh pi gai lai vohbuh bawl lei tol thei ci uh hi.
86. Vohpi khawi thei vohnu get leh khawi thei nawn lo, ci uh hi.
87. Voh nunto leh a khang nuam ahi sih leh a si nuam hi ci uh hi.
88. Vohpi gai lai thualu pia lei tol thei ci uh hi.
89. Vomsa a gai te'n ne leh a ta a sam kil thei ci uh hi.
90. Voh sin mimai bang leh baangkua ah sina pal thei ci uh hi. Sia hil ci uh hi.
91. Vohpi ciingsa motha piah leh ciing thei ci uh hi.
92. Zan lai van-ah ham leh ta khat si om thei ci uh hi.
93. Zulei lamto kan sia hil ci uh hi.
94. Zulei lam suh kan kampha hil ci uh hi.
95. Zulei sa mi gaite'n ne leh a ta singka hang ci uh hi.
96. Zu in zan in khepi pet leh sia hil ci uh hi. Dam lo ding cina ci uh hi.
97. Zu in zan in kheme pet leh nasem a sawl ci uh hi. Sem leh hau ding cina hi ci uh hi.
98. Zu innsungah gual nuamin husia keei leh a sia hil ci uh hi.
99. Zunte khate innsung kamsiatna piang thei ci uh hi.
100. Zialawn khate'n thum sih leh natna a tungah le tun thei ci uh hi. (Kithei lo-a zia lawn leh cina dam zo lo ci uh hi.)

Khawk - 13
Pau Ziate
Thu Genna ah kammal cingsah kammal gawm pawl khat
1. An leh Tui
2. Bee le Phung
3. Bung le Beng
4. Beel le Kuang
5. Ciang le Law
6. Ciin le Tuai
7. Da le Kaa
8. Dawi leh Kau
9. Din le Pia
10. Dot le Paai
11. Dot le Muan
12. Du le Dei
13. Dung le Vai
14. Ga le Tee
15. Gam le Lei
16. Gaal le Sa
17. Gen le Hawm
18. Gen le Sah
19. Gim le Tawl
20. Ham le Pau
21. Hai le Mot
22. Hau le Zawn
23. Hin le Si
24. Hoi le Phat
25. Hun le Ni
26. Inn le Lo
27. It le Ngai
28. Khawi le Vul
29. Khua le Tui
30. Khual le Tual
31. Khut le Keng
32. Kial le Taa
33. Kiim le Paam
34. Kham le Ngun
35. Kuang le Keu
36. Kum le Kha
37. Laam le Tawn
38. Law le Ciang
39. Lia le Taang
40. Liau le Paan
41. Lui le Tha
42. Lum le Tei
43. Man le Mual
44. Maw le Khel
45. Mel le Puam
46. Mel le Thaang
47. Mim le Taang
48. Min le Puam
49. Muan le Suan
50. Mun le Gam
51. Mut le Va
52. Nat le Dam
53. Nat le Sat
54. Nei le Lam
55. Neh le Dawn
56. Ni leh Hla
57. Nih le Puan
58. Nu le Pa
59. Nuu le Paa
60. Nuo le Ma
61. Pu le Pa
62. Pi le Pu
63. Pau le Ham
64. Pian le Heh
65. Pum le Tah
66. San le Gial
67. Sial le Bawng
68. Sin le Lung
69. Sii le Baal
70. Si le Hing
71. Sing le Suang
72. Sun le Zan
73. Sung le Lai
74. Sungh le Pu
75. Sum le Paai
76. Sum le Sial
77. Ta le Nau
78. Taang le Vam
79. Ten le Gia
80. Thu le La
81. Tu le Hei
82. Tu le Ta
83. Tui le Mei
84. Tun le Kuan
85. Tup le Geel
86. Tup leh Vuah
87. Tut le Tawi
88. U le Nau
89. Ui le Keel
90. Um le Beel
91. Vaan le Lei
92. Vam le Ga
93. Veng le Paam
94. Voh le aah
95. Vom le Kang
96. Vui le Tang
97. Vul le Kau
98. Zam le Tawm
99. Zawn le Ngau
100. Zi le Ta
101. Ziat le Vei
102. Zin le Leeng
103. Zing le Zan
104. Zu le Sa
105. Zu le Va
106. Zuau le Tah
107. Zun le Eh
108. Zum le Dai
109. Zual le Zol
110. Zum le Hiam
111. Zung le Bul
112. Zia le Tong
Kam Kicing Sah Kammal Gawm Pawl Khat (Kammal Li Thukhat) 1. Ah ta Voh ta
2. Ahtui Ahtah
3. Akhing Asa
4. Ankhing Tuibuh
5. Ante Theipuam
6. Bawngnawi Khuaizu
7. Bilbing Hamawh
8. Buanciim Leiciim
9. Buanniah Leiniah
10. Buhsi Ahsa
11. Bumtawi Aitawi
12. Ci-al Zatep
13. Cinat Lunat
14. Dana Kana
15. Dingna Piana
16. Dinsuh Dinto
17. Duna Deina
18. Duthei Deithei
19. Enna Huatna
20. Elna Gawina
21. Gaalhang Sahang
22. Gamsa Innsa
23. Gimna Tawlna
24. Gimpi Tawlpi
25. Gilkial Dangtah
26. Gilnat Lainat
27. Gilsung Laisung
28. Guta Lata
29. Hauna Phatna
30. Hawna Geina
31. Heita Tuta
32. Henta Kolbul
33. Hoina Phatna
34. Huatna Enna
35. Huipi Guapi
36. Hunhoi Hunpha
37. Huumsia Thangsia
38. Innmun Logam
39. Innpi Lopi
40. Innsah Innhlang
41. Innsung Losung
42. Innveng Loveng
43. Itteng Ngaiteng
44. Kana Dana
45. Kam pau Mua Pau
46. Mangmei Patau
47. Khutkhial Bankhial
48. Khankhat Hinsung
49. Khuttung Bantung
50. Lam gei Lampaam
51. Laamna Tawnna
52. Lamsah Lamhlang
53. Lamsuh Lamto
54. Leiba Thangba
55. Lenna Vahna
56. Lunghin Suangpo
57. Lunglen Khuangai
58. Lungsung Sinsung
59. Maanna Awlna
60. Menna Punna
61. Meigong Taga
62. Mimsi Taangsi
63. Mimza Taangza
64. Mittaw Khelbai
65. Motthu Haithu
66. Mulo Thei lo
67. Muncin Gamcin
68. Munnuam Gamnuam
69. Nampi Namta
70. Natna Satna
71. Nehna Dawnna
72. Nehthei Dawnthei
73. Nehthei Taahthei
74. Neisa Lamsa
75. Neisia Tungsia
76. Ni-sa Hla-sa
77. Niangtui Niangha
78. Nihsia Puansia
79. Nihten Puansil
80. Nopna Dana
81. Nuina Kaana
82. Nunglam mailam
83. Omna Khawlna
84. Ommun Khawlmun
85. Omton Khawlton
86. Ommuan Khawlmuan
87. Ommuang (Khawlmuang)
88. Papi Nupi
89. Pianna Suana
90. Pilna Siamna
91. Pualam Sunglam
92. Pumpi Lungsim
93. Sasin Salung
94. Sanggam Unau
95. Sina Manna
96. Siatna Poina
97. Sinkham Lungkham
98. Sinsung Lungsung
99. Singga Theipuam
100. Sungta Putu
101. Tanu Tapa
102. Tauna Mauna
103. Tenna Giana
104. Theipuam Haipuam
105. Thuthei Lathei
106. Thumna Tauna
107. Tona Khawlna
108. Tonna Hanna
109. Tuilu Tuitaw
110. Tui um Beelsuan
111. Tumthei Satthei
112. U sung Nau sung
113. Unau Pata
114. Uisi Ngeusi
115. Umsung Beelsung
116. Vamgau Tangmai
117. Vamsi Taangsi
118. Vantung Leitung
119. Veitee Ehtee
120. Vohta Ahta
121. Vompi Ngaltang
122. Vuitawh Tangtawh
123. Zintun Paikhai
124. Zingkhat Zankhat
125. Zune Anne
126. Zuauna Nalna
127. Zuneh Saneh
128. Zumna Daina

· A ai a tong
· A baal a niah
· A bee a phung
· A bei a mang
· A bul a baal
· A cian a taai
· A cin a keng
· A ci a sa
· A ding a to
· A dung a vai
· A eng a san
· A gim a tawl
· A go a luup
· A gol a meng
· A gu a la
· A hawm a gen
· A hai a mawl
· A ham a zu
· A khum a al
· A hau a zawng
· A heng a vang
· A inn a lo
· A it a ngaih
· A sim a langh
· A kam a mua
· A kan a vaal
· A kawi a mam
· A ken a guam
· A keng a khut
· A khing a sa
· A khel a vet
· A kiam a thung
· A khual a tual
· A khawi a vulh
· A kop a thuah
· A laam a tawn
· A la a nai
· A lel a zo
· A lim a al
· A lui a thaa
· A lum a vot
· A maw a khial
· A mawl a hai
· A mam a zol
· A mel a thang
· A nei a lian
· A mu a thei
· A min a puam
· A mut a vah
· A na a sa
· A nat a sat
· A neh a dawn
· A nei a lam
· A nu a pa
· A nen a si
· A niam a sang
· A nop a da
· A pa a nu
· A pawl a gual
· A pau a ham
· A pi a pu
· A pum a tah
· A sang a suai
· A sau a tom
· A sang a niam
· A san a gial
· A si a hing
· A si a mang
· A sia a pha
· A sung a pua
· A sem a bawl
· A sing a tual
· A taw a lu
· A tawm a tam
· A tom a sau
· A tong a hang
· A tui a ha
· A tu a ta
· A tut a tawi
· A ui a than
· A ui a si
· A vuai a khang
· A vum a val
· A vom a kang
· A zawng a hau
· A zawng a ngau
· A zu a ham
· I ci I sa
· I hawm I gen
· I it I ngai
· I khua I tui
· A kiim a pam
· I lawm I gual
· I min I puam
· I mit I ha
· I mun I gam
· I neh I dawn
· I nung I ma
· I nu I pa
· I pu I pi
· I pum I tah
· I sin I lung
· I suan I ten
· I sung I pua
· I ta I nau
· I thu I la
· I tu I ta
· I ui I ai
· I veng I paam
· I zi I ta
· I zu I sa
· I zin I leeng
· I zung I bul
· I zuau I naal

Tampi tak om lai-a, kam I pau ciangin hih bang kamte tawh i zop theih leh kam kicing kici hi.


Khawk – 14
Ki-hut Tawmnate 1. Ak a pulh loh nadingin zing simin buhkan aisan hel pia den ding hi.
2. Akno khat na den khaka a tuk leh manlangin na khut tui tawh sil in.
3. An khat peuh na halh leh tui tampi dawn pah in.
4. Bawng na kaih a anuaka alup leh akhau kikhih teng sut mang inla, mai khe dawnah khau khihin mai hawl in.
5. Ciiling, mom-ai in hong peh a leh, nungak khat ii na mul nuh leh dampah hi.
6. Gilsan avei zatui nei lote in, nunun tehngek emvulin a tui suk dawn ding.
7. Ganhingte a khe a kitan leh zatui om lohna ah huihu hui tawh tuam ding.
8. Kiheh khakna na neih leh, zatui a om kei leh huihu zung tawh tuam in.
9. Kitawh khakna nei a si tampi a luan leh, na na mul botin nuh in. Tua ahih kei leh ama-ah haza nuh in.
10. Lakhai lo laka na pai leh hong bit loh nadingin, na kamah suaklutang muam in.
11. Mawtaw vanleng na tuan a na beng a ngon leh na nak hu in nit in.
12. Mit sungah nin a tan a a kilak theih kei leh sipi tang khat koih in.
13. Na mit sungah zasan a tan leh tak lam ahih leh veilam khepi, veilam ahih leh taklam khepi tui tawh sawp pah in.
14. Na mit a nat a zatui na neih kei leh na zing zun tawh na mit sawp den in.
15. Na ha a nat loh nadingin, zingsang na thawh simin maiphiat khit teh ha nawt in.
16. Na lutang na a aphat theih kei leh sabuai tung khatah thal lup inla, na lu kaisak in tuisa phelkhai khat tawh buak in.
17. Na ganhing a gil puak a zatui na neih kei leh zuhang tulh in.
18. Na sung puaka zatui na neih kei leh huih votah om in.
19. Na si khanga, zatui na neih kei leh gatamtui thuk haipi khat dawn in.
20. Na sung pai a zatui na neih kei leh nahtang puam gap emin ne in.
21. Na gante liamma nei a than a om leh puan-apza leh datsi helin pat tawh khum in.
22. Na vokpi suak a, a nawi a om kei leh singpi teh pia in.
23. Na vok cina a a om leh sahang ngaltak guh tawh a taltang thumvei sat sak in.
24. Na vok khoi cina a ngap phalo an duh lo a a om leh suang muat leh lei pia in.
25. Na vok note in hut a vei leh, mehol leh nunun min tang pia in.
26. Na ganhing khawite a sung a pai leh suang thuk tui pawi-in pia in.
27. Na lo na pawi ciangin zusa vasa nek theih loh dingin DDT tawh hel sa-in pawi in.
28. Pu-hawng na vei a lam na bah leh, a khum theithei cikhum ahi a, chutian ahi zongin tawm khat ne pak lecin pha pah hi. An ne ding hi pen hi.
29. Ui a ci nat ciangin, thangkhuai pum nesak ding hi.
30. Uite gahlakah na pai khak leh hong bit loh nadingin saikang khat muam in.
31. Ui hai na neih leh thakhat in thatpah in.
32. Ui a hai tuak leh khau khih in, ni sagih ciang kithei ding hi.
33. Pateh na huan ciangin, guih loh nadingin kawlkaiteh tawh huan in.
34. Ngasa na tuihuan ciangin a zan loh nadingin a thuk khat khah in.
35. Na tungah kaumap hong om leh, zatui a om kei leh akmul halvui tawh zut in.
36. Gul in hong tuk leh ama kuigawp in a si sal khia in, zato delhpah in.
37. Tuisa in hong buah leh haza nuh gawp in.
38. Vok cil na geh leh ama teng haza nuh gawp in, dampah ding hi.
39. Saguh na awk leh an khal khat nawmvalh in.

Khawk - 15

Chronology of Zo

Zomite Theih Huai Kum Zui A Thu Piangte
1775 pan 2002
1775 kum in Gamngai khua Pu Tawng Ngam in na sat a hausa na sem hi.
1866 Mangkangte in Yangon ah Education Department khat na hong hi.
28.5.1872 Yangon ah Judson College (Rangoon Baptist College) kihong zo hi.
1884 in Rangon College kihong zo hi.
1886 in Gamngai khua mi Pu Tuang Laang Endaigyi Phungyi sangah kah hi.
1889 in Pu Tuang Laang Kawllai thei sa-in Gamngai hong tung kik hi.
1896 in Zogambup Mangkangte in la hi.
- Chin Hills Regulations Act kibawl zo hi.
15.3.1899 in Haka khua-ah Rev. Arthur E. Carson leh a zi hong tung hi.
1901 in Pu Hau Cin Khup ukpi suak hi.
26.1.1902 in Haka khua ah Missionary Dr. East le a zi hong tung hi.
- Tedim ah Baptist Mission School kihong hi.
1904 in Zogamah Kawllai sang kihong hi.
- Khuasakte Pu Thuam Hang leh Pu Pau Suan kituiphum hi.
1905 in Tonzangah Baptist Mission School kihong hi.
21.12.1908 in Dr. Cope leh a zi Haka khua hong tung hi.
1909 in Tedim khua-ah Goverment Primary School kihong hi.
10.4.1910 in Dr. Cope leh a zi Tedim khua hong tung hi.
- Dr. Woodin te nupa Haka khua hong tung hi.
- Gamngai khua gamgi thak, Captain Rundall kipsakna kingah hi.
1912 in Rangon College ah sangnaupang 324 pha ta hi.
1915 in Lai Siangtho Mate Tedim kamin kikhen zo hi.
1916 in Rangon College sang naupang 567 pha hi.
27.5.1917 in Tedim mi Piancit gamah mihing 1000 kipai hi.
1918 in Kawlgam buppi ah B.A ong mi 400 pha hi.
1918 in Piancit paite hong ciah kik uh a, October kha in hong tung uh hi.
1920 in Haka kam tawh Lai Siangtho lungdamna bu leh Sawltak kikhen zo hi.
1.12.1920 in Rangon University Act kikipsak hi. Mipi in deih loin nial uh hi.
1925 in Haka khua ah Dr. Straite leh a zi hong tung uh hi.
- Khamtungah Kawllai sang kiphiatin Zo lai sang kihong hi.
2.3.1925 in Sang Mang Dr. Cope kumpi in I.S pia uh hi.
1932 in Lai Siangtho thak Tedim kamin kikhen zo hi.
1933 in Falam kam tawh lungdamna bu teng kikhen zo hi.
- Falamah High School kihong hi.
1937 in Pau Cin Hau lai tawh Mualtung thu hilhna teng kitei khia zo hi.
(Pau Cin Hau lai pen kum 1900 in piangin, mal 1050 pha hi.)
- Pu Lam Za Hang in Mawtaw nei ta hi. A nei masa pen ahi hi.
- Za Nei Suum in, Chin Young men Uplift Society hong hi.
- Tedim ah Pawlpi thu kizakna kihawm khia zo hi.
11.6.1938 in Sang Mang (I.S) Rev. J. H. Cope in Jesu kiangah hong zotsan hi.
- Siah Luai in B.A ong hi. Khamtungah a masa pen hi.
1940 in Rev. F.O. Nelsonte nupa Tedim khua hong tung hi.
- Haka kam tawh Lai Siangtho thak kikhen zo hi.
1.4.1941 in Gamngai khua leh a dang khua 11 in Primary School kumpi'n pia hi.
14.41.1941 Siah Luai Kumpi in I.S pia hi.
Dec. 1941 in Japan te'n Zangkong khua bomb khiat hi.
1942 in Kawl gamah Japante hong lut uh hi.
- Khamtung gam khanglam teng Japante'n la hi.
- October kha pan Tedim - Cikha mawtaw lamtawh kipan hi.
19.3.1944 in Tedim khua Japan te'n la hi.
- Tua kha sung mah in Khamtung Saklam teng Japante'n la hi.
- August in India lelin Japante Tedim hong tung hi.
- October 18 in India No 5 te'n Tedim khua la kik zo uh hi.
- November 13 in India No. 5 te'n Kalemyo leh Kenydy Peak la uh a, Japan gal a beina hita hi.
1945 in R. Tuang Hmung in Chin Rural and Educational Uplift Rangon ah hong hi.
1.3.1946 Pinlong Conferance om a, Tedim pan Pu Pum Za Mang ukpi, Falam pan Pu Hlun Hmung, Haka pan Kio Mang leh kamphen ding Van Thang Taih Kual (VVT) Shan, Kachin leh Mualtung ukpite kihelin Suahtak ngah nang kipum khat nading thukimna nei uh hi.
2.2.1947 in Pinlone Conferance om kik a, Tedim pan Pu Thawng Za Khup, Falam pan Pu Hlun Hmung, Haka pan Pu Kio Mang leh kamphen Pu Vum Khaw Hau (Mangpi lai-at) leh a ngeina teng kihelin thukimna va nei kik uh hi.
- 12.2.1947 ni'n Bochoh Aung San leh Kusale tengin thukimna letmat thuhna nei thei uh hi.
- May kha sungin Gam vaihawm ding kusale kiteel hi. Tedim pan Captain Mang Tung Nung, Falam pan Pu Sa Vut, Haka pan Pu Ngun To, Mindat pan Pu Vuan Thu Muang, Paletwa pan Pu That Hlai, te kitel a, Matupite taang dingin Pu Vum Khaw Hau koih hi.
- July 19 ni'n Bochoh Aung San leh Gam makai mi 6 kisuam lum hi.
- Rev. John Sonte nupa Haka hong tung hi.
- Tedim ah Zo Education Board kiphut zo hi.
1.6.1947 Thuklai ah Kumpi in High School sang hong hi.
- Thukituahna Tadensa kihawm khia zo hi.
- Khamtung Suahtak Vaihawm pawl (KSVP) kiphuan khia hi.
- R. Tuang Hmung in mangpi (DC) ngah hi.
- Rangon ah Hill Chin Student Union (HCSU) kiphut thei hi.
4.1.1948 in Kawl gam in suahtakna ngah hi.
1.6.1948 in Tedim in 1.6.1947 a a ngah High School sang kihong hi.
- Zo Vuanzi (Chin Minister) Vuan Thu Maung in ngah hi.
- Rangon ah Zo zumpi (Chin Affairs Council) kihong hi.
- Khamtungah Tuiphum Pawlpi sungah TBA, FBA, HBA piangkhia hi.
1950 in Rev. S.T hau Go B.A. (Hons) in USA pan M.R.E ngah hi.
1951 in Falam kam tawh Lai Siangtho thak kikhen zo hi.
1952 in Zomi Baptist Convention piang hi. (ZBC)
- Hill Chin Student te'n magazine hawm khia zo uh hi.
- Lungvak magazine Tedim kam in kihawm khia zo hi.
- Gamngai Tuiphum Pawlpi in Vialcian leh Zalui kikal khawk ngah hi.
- Laitui TBA Sivuai-ah Kawlgambup Mission Secretary Soword pai hi.
1953 in Tedim S.H.S pan Pu Vung Cin Thang in tan X ong a a masa pen hi.
1.8.1953 in Gamngai khua in State Middle School ngah hi.
1956 in tan VII laivuanna kihel khempeuh U Nu in ong khinsak hi.
2.3.1962 in Kawlgamah Revolution Council kahin Parliament kiphiat hi.
- U Nu kiman hi.
- Chin Affair Council kici pen Chin Supreme Council in kilaih hi.
- Zo Tuiphum Pawlpi in Association ngah hi.
- The Consitution of Union of Burma kiphiat hi.
13.7.1963 in Myanmar Socialist Party (t]rLwnf) kiphut hi.
- Chin U Sii zum Kawlpi ah kituah hi.
- Thongkia khempeuh a vekpi in a cian om loin kikhak khia hi.
- Falamah Taikhuai No. 3 kiphut hi.
1964 in Kawlgambup ah sumbuk nam khempeuh kiteng hi.
1965 in Dangka lai zalai leh sawmnga lai kiphiat hi.
1965 in Rangon ah Zomi Siamsin kipawlna taangsum kinei ta hi.
1966 in Kumpi in vanzuak theihna 36 hong kik hi.
12.12.1966 in Zomi nam puan kinei zo hi.
1967 Zote kam in Lai Siangtho thak kihawm khia zo hi.
1968 in Lusei gal in Khamtung khuapi teng luha, Tedim zong luh zo hi.
Bank sum teng la-in Godawn inn hal hi.
July 1969 in Apolo-11 khapi tung tung hi.
1970 in Rangon University Golden Jubilee kibawl hi.
- BBC in ZBA kipsakna pia hi.
4.7.1971 in Kawlgam buppi Socialist Party kikhop kinei thei a, People Socialist Party kisuaksak hi.
1972 in Pa Zam Khen Thang in France panin, Ph.D ngah khia hi.
- Chin U Sii bei in Tahlahkah kiphuan hi.
1973 in Kawlgambup Consitution bawl kipan hi.
3.1.1974 in Kawlgam Consitution kipsakna me tawh kinei hi.
- Jan 27 ni'n Kawl gambup People Council kiteelna kinei hi.
- Chin Special Division pan in State (Pyinee) kingah hi.
9.3.1975 in Kawl gam buppi pan Tedim khua-ah Piangthak Pawlpi kici Evangilical Pawlpi thak khat piang hi. EBC kici hi.
1976 in Sapan pan Zozang dong mawtaw lam kihong zo hi.
1977 in Tedim lai tawh Holy Bible kikhen zo hi.
1978 in Tedim khua-ah Bawlung Tualpi picing khat kinei zo hi.
1979 in Tedim khua-ah Hydro Electric Power bawl kipan ta hi.
1980 in Zomi Bo Tuang Za Khai in Brigadier ngah hi.
17.10.1982 in Tedim kam Holy Bible apna pawipi kibawl hi.
1.1.1983 in Zote kam tawh Holy Bible leh Apocrypha kithuah kihawm zo hi.
(Joseph Mitta Thang D.D. Bishop of Imphal bawl hi.)
1.9.1986 in Tedim ah Faith Baptist Bible College and Seminary kihong hi.
8.8.1988 in Kawlgambup sandahpiah (qóN]y) na om hi.
18.9.1988 in Kawl gamah Galkap kumpi (Nahwatah) kah hi.
19.9.1988 in Kawl gambup Party leh Council kiphiat hi.
1990 in - Chin College ding tai 8 ah lam kipan hi.
- Yangon University Diamond Jubilee kibawl hi.
- May 27th ni'n Kawl gambup multiparty kiteelna kinei thei hi.
- Party 93 pha hi.
- Candidates mi 2209 pha a, Independent candidate 87 pha hi.
- Me pia mihing 20,619,580 pha hi.
- NLD party candidates 485 pha in 392 ong hi.
23.6.1992 in Amiauta kikhop (trsKd:om: nDvmcH) neih dingin kikhensat hi.
1993 in Amiauta kikhop (trsKd:om: nDvmcH) kipan hi.
- Chin min pan in Kale min College kihong zo hi.
22.4.1997 in Nahwatah pen Nahzahkah in kilaih hi.
12.4.2000 in Gamngai ah Jubilee pawi pi khat Fr. Felix in bawlsak hi.
- Mawtaw lam honna, tui ngahna honna leh sang inn thak honna mazahkah panin na neihsak thei hi.
- Gamngai khua Mini Hydro Electric Power geelna kinei hi.
11.9.2001 in - USA te' World Trade Center leh Pentagon Innpi te vanleng in su paai in cim gawpa, mi 3000 val thakhat in si hi. White Hause kap ding vanleng kia in kap man lo hi.
2002 in - Gamngai te Hydro Electric Power kipanin, Engine pi 65KW khat, Turbinepi khat, Penstookline pipepi teng, Canalline a zat ding PVC pipe 10" nga leh 8" sagih, leisek kisam teng, sehnel kisam teng, cement ip 100, limestone ip 100 kilei zo in canalline tawh pen a hampi teng kizo-in, August ciang guah tam lua-in kitawlnga phot hi.
31.7.2004 - Kizo ta-a hon ding bek kisam ta a, mei taang leh taang lo kisin zo leh mei a tan leh kihong ta ding hi.

Khawk - 16
Theihsakna

Pa Mang Meng
Sa-No. 27/40
Sakollam, Tedim

1. Hih laibu sunga thute in, laibu tuamtuam simna, mi muanhuaite dotna, kan tawm leh pate ciamtehnate leh zontawm a theih teng kigawm a kigelh ahi hi.
2. Laibu a hong pianna dingin, a bei khempeuh Zo Hei Sa in hong vaihawm hong thoh khia ahi hi.
3. Mi a tampi sim theih ding deihna in, taangkam (common) ahi Tedim lai-in kigelh hi. Pawl khat in, Zo Tatzia kici buanga Zo kampau tawh a kigelh loh a ci kha zong om kha thei ding hi. Mi theih kim leh mi zat kim lai tawh hi leh mi tam in sim thei zaw ding cihna tawh Tedim lai a hong kigelh hi cih kong theihsak nuam hi.
4. Hih laibu a sim peuh in, siam lohna, khialhna leh theih khialhna a om leh Pasian min tawh hong maisak a, a maanzaw nong gen dingun kong thum khol hi.
Mite Lakah Kihelna
Mite laka kihelna i cih kammal in, mihau, mipil, innhoih lohoih a nei a kidawk a mi luhin suangpo a bante cihna ahi hi. Tedim gam leh Tonzanggam gam khat a a omlai 1960 kum pawlin mi sazian ciamtehna a na omna ah Zo kampau 21,000 kipha in kum 18 cingsa me khia thei 7,000 val bang na pha ta hi. Mi nam 11 a kiphakna sungah Zo kampaute a tam pen i hi hi. Tua zah a tam i hih hangin mite kiban zo lo-in, pilna leh hauhna ah, mite beh khat na ngawn i ban zo kei hi. Tua pen i et ciangin i tam hangin kisial-ek tam hi a, tuni dongin mi i ban zo kei hi. Bang hang hi ding hiam i cih leh, hanciamna, kuhkalna, thumaanna leh khat leh khat kidom tohna leh kithu khatna kisam hi ding hi, kici thei hi.
Tua banah, kipawl theihna zong kisam lai ding hi. Ei Zote pen, Zo kampaute bek Zo hi lo-in, Zo kampau lo-in Tedim kampau, Sihzang kampau, Thahdo kampau, Saizang kampaute sungah tampi i om hi. Tuate kampau kibang lo peuh ci-in Zo ahih lam i thei kei hi. Thu patna lam-a minam thu i genna a omsa bangin, kampau in minam pawl khat ahih tei hangin, Tedim mite sungah kampau hi lo zaw in, sisan hi zaw hi. Zo i cih pen kua teng i kihel hiam cih leh, Man Lun/Man Tuang, Tai Thul, Dop Mul, Suan Tak, Ak Gal, Mi Lun, Lian Zaw, Mal Neu, Phiam Phu cih sunga om teng kigawm Zo hi a, i omna zui-in kampau kizang hi bek a, i si i sa leh i beh i phung in thu hong khen hizaw hi, cih i theih ding kisam hi.
Mite lakah i kihel masakna, tua hun laitakin gual lelhna khat a kingaihsun zawhthawhna a i ngaihsut ahi, Piancit tumna ahi hi. Kam Hau uk sungah mi 1000 lakah Zote 19 i kihel thei hi. Tu hun hileh a pai ding kituh keei a vaihawmte aktui aktak kipuak keei ding hi napi-in tua hun in kidahpih mahmah hi. Hong tung kik nawn lo dingin kingaihsun hi. I pute i pate Gunkhawm nuaisiah a kheng na om lo-in Gunkhawm pen lei beina in na ngaihsun uh a, "Tuitaw bing" na ci hiau uh hi. Tua sung a paite hong tun'kik uh ciangin, mite lakah a kihel theite, Mangkang gam a va mute hong suak uh ahih manin, mi gina suakin, mi mawkmawkte sangin tei zaw, thu theizaw uh ahih manin khua sung tui sung vaihawmnate ah dotte hong suak uh hi.
A min uh a nuai bang teng na hi hi.
(1) Pu Let Kham Hawl Hang beh
(2) Pu Hang Za Hau Hawl Hang beh
(3) Pu Laang Za Kai Hawl Hang beh
(4) Pu Do Za Cin Kun Hen beh
(5) Pu Aih Vum Kun Hen beh
(6) Pu Awn Cin Kham Let beh
(7) Pu Kop Vum Kham Let beh
(8) Pu Khan Cin Hang Tai Thul beh
(9) Pu Sel Za Thang Tai Thul beh
(10) Pu Mang Za Kham Tai Thul beh
(11) Pu Thang Zam Tai Thul beh
(12) Pu Let Za Thawng Tai Thul beh
(13) Pu Cin Thawng Vul Suan beh
(14) Pu Khaam Cin Vul Suan beh
(15) Pu Vum Hau Phiam Phu beh
(16) Pu Tut Langh Phiam Phu beh
(17) Pu Thang Za Tun Thang Siah beh
(18) Pu Gen Za Kham Mul Pi beh
(19) Pu Pau Cin Lian Sukte beh


Piancit tum pawlkhatte
Hih teng pen, May 27, 1917 ni-in Tedim pan ding khia in, mi 1000 pha hi. Tua teng pen August 15, 1917 in France gam Masel khuapi tung uh hi. Kum khat leh a lang taang ding a om khit uh 1918 July in hong ciah kik uh a, mi 21 hong tham ta a, tua lo teng 1918 October in Tedim hong tung kik uh hi. 19 lakah khat hong tham in, 18 bek hong tung kik hi. Amau pen Mangkangte in Labour Corp ci uh a, en Piancit tumte i ci hi. Tua hun eite tawh kibangin Mangkangte, Indiate, Negarote leh Tangkunte kihel in a gawm 5000 va pha uh hi.
Mi lakah kihelna ahi Independent i ngah khit ciangin, Kawl gam bupah taangpi deih teel theihna me khiat theihna hong om ciangin, Khamtung in Parliament Member (MP) mun 14 kingah a, Tedim in 3 a ngahna sungah Zote khat kihel thei hi. Tua pen Pu Mang Cin Khup hi a, 1958 kiteel a ngah ahi hi. Amah in Khamtung mp te lakah Vice Chairman ciang hong ngah hi. Gam vaihawmna ah i kihelna a thupi pen ahi hi.




MP Mang Cin Khup

Amah pen Yangon khuapi sungah police kum 10 sung sem a, Indenpendent a kingah kuanin hong ciah to hi. Independent a kingah ciangin No. 2 Block Domain hong sem a, tua khit ciangin Circle Chairman a hong kilaih teh sem suak lai a, a sep kim in, MP hong suak ahi hi.
Khua hun hong kilaih toh ciangin, Parliament bei-in Tawlanzi kumpi hong kah hi. Tawlanzi in 1962 panin 1973 ciang uk a, tua khit 1974 a kipan Lansin Party leh People's Council hong khang a, Zote sungah Pu Dal Za Khup

in Chin State People's Council ah 1974 Justice sem a, 1977 April a kipan Chin State People's Council EC na ngahin hoih tak na sem thei hi.
Myone ciangah zong gam vaihawm lamah kihel zong tawm na om a, tuate a nuai-a bang ahi hi.
Party Unit ah:
(1) Pa Go Cin Laang Tonzang Township Chairman
(2) Pa Tawng Za Kham Tonzang Township Secretary
(3) Pa Ai Khan Pau Tamu Township Secretary
(4) Pa Kham Khan Mang Tedim Township Secretary
(5) Pa Let Khan Hang Tedim Township EC member

Tua banah Myone ciang a kihel People's Council zong tawm na om hi. A kimangngilh khat leh nih om kha in cin i phawk teng:
(1) Tonzang Myone - Pa Go Cin Laang Chairman
- Pa Vial Za Khen Secretary
- Pa (B) Laang Cin Pau EC member
(2) Tedim Myone - Pa Khan Min Thang EC member
- Pa Thang Do Mung EC member
- Pa Thawng Khan Hau Inspection member
- Pa Thawng Khan Mang Justice member
(3) Kale Myone - Capt. Lian Za Khai Justice member
(4) Tamu Myone - Pa Go Cin Pau (Win Naing) EC member & Insepec-tion member
- Pa Hang Gin Suan EC member
Galkap Maang [Amaan teuh ongdawkzo lo hi]
Captain Thang Gin Hang Captian Kam Cin Hang Captain Lian Za Khai
Myone Council Justice

Captain Khup Suan Pau Captain Pum Suan Kham Lt. Thang Cin



Police Mang
Bo Mang Cin Pau Bo Mang Khen Thang Bo Vum Khen Mang
Bawk thum, Myone Hmu Bawk thum Myone Hmu Bawk nih sakhan Hmu


Bo Let Suan Pau (Bawk khat),
Bo Kham Go Mang (Bawk khat),
Bo Kam Khan Thang

Pa Dal Za Khup Pa Go Cin Laang Pa Kham Khan Mang
Middle Head Council/Party Unit - Secretary
Pyine Council - EC Chariman

Pa Tawng Za Kham Pa Thang Khen Kap Pa Vial Za Khen
Unit - Secretary Chairman - Mahzahkah Council - Secretary

Pa Ai Khan Pau Pa Khan Min Thang Pa Let Khan Hang
Unit - Secretary Council - EC Unit - EC

Pa Thawng Khan Hau Pa Go Cin Pau Pa Hang Gin Suan
Council - Inspection Council - EC & Inspection Council - EC

Custom Forest
Bo Cin Lian Hang Pa Nang Gin Kham
Bawknih Bawknih

Immigration
1. Bo Thang Khan Pau Bawk thum
2. Bo Sian Khan Thang Bawk thum
Medical
1. Dr. Suan Za Dong MBBS, Eye Specialist
2. Siavuan Kham Khan Thang Distric Medical Officer
Civil Officer
1. Pa Thang Khen Kap Mayahkah, Chairman
2. Pa Kham Go Pau Myone hmu, Township Co-operative
3. Pa Hau Khan Mang Myone hmu, Township Co-operative
4. Pa Hau Suan Mang Myone hmu, Myone Land Record
5. Pa Dal Za Khup Head Master, State Middle School
6. Pa Let Cin Khup Head Master, Basic Education High School

I theih khak loh khat leh nih zong om thei kha ding hi taleh, hih teng bek i thei zo hi. A kitawm mahmah ahihna kilang hi. Mai lamah zong hong pai ding i lamet om lo lai hi.
Thu khat leuleu ah a lungdam huai mahmah khat om hi. Tua in biakna lam a i kihelnate ahi hi. I mi zah tawh kituakin Pasian nasem i tam mawh kei hi. Mai lamah zong a khang lai ding i lamet om lai hi.
Biakna Lam A Kihelte
Dr Lian Khen Thang Dr Go Za Kham Dr S. Pau Khan En
BA(Psy) Myanmar DTh- Tedim BTh, Myanmar
Father, Myanmar BTh- India BD-India
MCL, DCL- Italy DD MA, MTh- England
Secretary (Monsignor) EBC Founder PhD- USA
Rabat, Morocco Mission Director MBC Secretary
Dr Lian Khan Hang Dr Kham Go Mang Dr Mang Do Thang
BA(Hist) Q1 Myanmar BSc, BRE Myanmar BSc, BD Myanmar
MMis, DMis Korea MA-S'pore, DMin-USA DMin USA
Hebron Bible Institute Founder, Myanmar School ZBA Yangon Pastor
Principal, Yangon of Theology and Mission,
Full Gospel Centre, Yangon
Rev Khup Lian Mang Rev Kham Suan Mung Rev Kap Cin Thang
BTh, BD-India BA-Myanmar BABS-Myanmar
MDiv-USA BTh, MDiv-Philippines MDiv-USA
Founder, Shalom Church Founder, YCF Founder, SEABC, Ygn
and Canan Gospel Chapel, Pastor
Rev Khup Lian Pau Rev Kham Suan Hau Rev Mang Kaih Thang
BA(Bible) Myanmar BA-Myanmar BA(Hist) Q1-Myanmar
MDiv-Korea MDiv-Korea AAIE, MAIE- S'pore
DMin (Candidate) Founder, AC & S-Ygn Founder & Pastor of
Founder, MFC-Ygn CCC, Ygn

Rev Hen Za Kap Sia Huat Cin Thang Rev Philip Cin Suan Nang
BA Myanmar BA, BTh -Myanmar BABS -Myanmar
MDiv-Korea Founder & Principal Special Course of ARCI-Korea
FGCC-Yangon BMMBS-Kalemyo Founder & Pastor
DCF-Yangon
Founder leh Sep mun
1. Rev Kham Za Mang DTh, Tedim, Founder, Zo Baptist Association
2. Dr Go Za Kham DD, Founder, Evangelical Baptist Conferance (EBC), Mission Director
3. Dr Kenneth Kham Go Mang BSc, BRE, MA, DMin, Founder, Myanmar School of Theology and Mission, Full Gospel Centre Church, Yangon and World Evangelism.
4. Dr Lian Khan Hang BA(Hist) Q1, MMis, DMis, Principal, Hebron Bible Insititute,Yangon
5. Rev Khup Lian Mang BTh, BD, MDiv, Founder, Shalom Church, Yangon
6. Rev Khup Lian Pau BA(Bible)-Myanmar, MDiv-Korea, DMin(cand), Founder, Mission Fellowship Church, Yangon.
7. Rev Kham Suan Mung BA-Myanmar, MDiv-Philippines, Founder, Yangon Christian Fellowship, Yangon

8. Sia Mang Kaih Thang BA(Hist) Q1-Myanmar, AAIE, MAIE-Singapore, Founder and Pastor, Grace Community Church, Yangon
9. Rev Kham Suan Hau BA-Myanmar, MDiv-Korea, Founder, Antioch College and Seminary, Yangon
10. Rev Kap Cin Thang BABS, MA (Theology), Myanmar, MDiv (USA),
Founder, South East Asia Bible College, Canan Gospel Chaphal Church Yangon, Pastor.
11. Sia Huat Cin Thang BA, BTh Kalamyo Gideon Myanmar Mission Bible School, Founder & Principel
12. Rev Hen Za Kap BA (Myanmar), MDiv (Korea)
Founder & Pastor, FGCC, Yangon
13. Rev Cin Suan Nang BABS, Founder & Pastor, DCF, Yangon
14. Rev Mang Lian Pau BTh, Founder & Pastor NCC, Yangon
15. Rev Khai Khen Thang BA(Bible), Founder, Pyin Oo Lwin Emanuel Church, and Pyin Oo Lwin Bible College, Pyin Oo Lwin
16. Sia Kam Lian Khup BSc, MMin,
Founder, Reform Presbyterian Bible Church, Yangon
17. Sia Kam Khan Hau BD (India), MTh (Korea),
Founder, Yangon Mokyone Church
18. Sia Let Suan Pau BA, Founder, Mount Olive Brethern Church, Lawikaw
19. Sia Laang Suan Founder, Christian Frest Church, N-Dagon, Yangon
Tu a teng bangah, tu laitaka biakna lam nasemte leh Lai Siangtho Sang kah laitakte i thei teng a nuai-a bangin Pawlpi zui-in lakni ci leng;
Tuiphum sungah:
(1) Dr S. Pau Khan En, PhD, Secretary MBC
(2) Rev Thawng Khan Sing, BA(Bur), BD, Secretary E/M, MBC
(3) Rev Khup Khen Pau BTh, CMBC, Senior Pastor, Tedim
(4) Rev Suan Khen Mung BTh, ZCLS Secretary, Kalaymyo
(5) Rev Kham Suan Mung BTh, Kalaymyo Pastor, Kalaymyo
(6) Siama Man Khan Niang BTh, BABS, BD, Pastor
(7) Siama Cing Lam Ciin BTh, Pastor
(8) Siama Niang Suan Dim BTh, Nursery
(9) Sia Suan Sawm Thang BABS, Asst. Pastor, Lawibual
(10) Rev Thawng Khan Cin BTh, BD(USA)
RCM
(1) Fr Felix Lian Khen Thang BA(Psy), MCL, DCL, Secretary, Morocco
(2) Fr Cin Go Lian BA
NAC
Rev Hau Cin Khai Pastor, Kalaymyo
Zo Baptist Association
(1) Dr Mang Do Thang BSc, BD(Myanmar), DMin(USA), Pastor YZBA
(2) Rev Thomas Thawng Lian Khup BA, BD(Myanmar), MTh(Korea, USA)
(3) Rev Kam Suan Mang BSc, BD (Myanmar), MTh(Thesis) ZBA Secretary
(4) Sia Thang Do Mung MSc (Zoo), MDiv, Tedim ZBA Assistant Pastor
(5) Rev Kham Lian Mang BA, MDiv, Tamu ZBA Pastor
(6) Rev Kham Za Nang BSc, BD(USA)
(7) Rev Mang Kap BABS(Myanmar), BD(India), Tedim ZBA Pastor
(8) Sia Hang Do Lian BTh(Myanmar), MDiv(Phillipine), ThM(student) Australia
(9) Rev Zam Lian Khup BABS, MDiv, Bumzang ZBA Pastor
(10) Sia Cin Lian Thang BABS, MDiv, Khampat, ZBA Pastor
(11) Rev Mang Khaw Lian BTh, MDiv(India), Pastor
(12) Sia Kham Do Mung BABS, MDiv(USA)
(13) Rev Kham Mang Do BTh, BD(India), ZBA Pastor
(14) Rev Laang Lian Mang BTh, BD(India), MA(USA) Principel ZTS-Ygn
(15) Rev Thang Khan Khai BTh, MDiv, Secretary, ZBA E/M Kalaymyo
(16) Rev Cin En Thang BSc, MDiv (USA)
(17) Rev Hau Suan Mang BABS, Gamngai ZBA Pastor
(18) Rev Mang Hau Thang BTh, ZBA Assistant Secretary Kalaymyo
(19) Rev Kai Khan Lian BTh, Pastor
(20) Rev Go Cin Laang BTh, KZBA Pastor leh ZBA Chairman
(21) Sia Dai Cin Thang BABS, Bumzang ZBA Pastor
(22) Sia Kam Lian Pau BABS, Tonzang ZBA, Asst Pastor
(23) Rev Lian Khen Mung BTh, ZBA Pastor
(24) Rev Pau Suan Thang (A) BTh, ZBA Pastor
(25) Siama Cing Lian Niang BTh
(26) Siama Niang Hau Cing BTh
(27) Siama Niang En Lian BTh
(28) Rev Thang Khen Mang BTh(USA)
(29) Rev J. Lian Khen Thang BA(Bible), USA
(30) Siama Don Khaw Hau Cing BRE
(31) Rev Kham Za Mang DipTh, ZBA Founder (hong nusia zo)
(32) Rev Mang Kyin DTh, ZBA Secretary sau vei a sem pen, Tonzang Pastor
(33) Rev Pau Do Nang DipTh, Khampat Pastor
(34) Rev Nang Khan Hau DipTh, Pastor
(35) Siama Mang Khen Niang DipTh, Women Secretary ZBA
(36) Siama Man Gin Niang DipTh, Pastor
(37) Rev Pau Suan Thang GTh, Pastor
(38) Sia Do Hen Kap GTh, Asst Pastor, Gamngai
(39) Sia Kai Lian Kham CTh, Kan-Oo Pastor
(40) Sia Lian Hau Khup CTh, Pastor
(41) Sia Tawng Za Suan CTh, Pastor
(42) Sia Kham Suan Mung CTh, Pastor
(43) Lia Nuam Cian Cing BRE
(44) SP Kham Do Nang LL.B, BRE, MRE(Yangon), DMin (Candidate)
(45) Lia Nuam Suan Niang BTh(Myanmar), MDiv, DMin (Manila)
(46) Tg. Thawng En Pau BTh (student) MIT and LLB (student)
(47) Man Zam No BA(Bur), MDiv
(48) Tg. Pau Kap Thang BABS
EBC (Evangelical Baptist Conference)
(1) Dr Go Za Kham DD,Director of Mission, EBC
(2) Rev Khup Lian Mang BTh, BD(India), MDiv(USA), Pastor-Shalom Church
(3) Sia Mang Khan Sut BSc, MABS-FBBC&S, Sia, Tedim Youth Pastor
(4) Sia Lian Khan Hau CTh, Khampat No 1, Pastor
(5) Sia Pau Cin Khai BA, BTh, BD(India), MA(UK), DMin(Can.-USA)
(6) Sia Thawn Za Tuang BA, BTh, BD(India)
(7) Sia Zen Lian BA, BABS, England
(8) Sia Kham Suan Pau BABS, MDiv student-India
(9) Daw Ciin Lun Vung BRE
(10) Daw Kai Lam Ciin BABS
(11) Lia Cing Khen Man BABS
(12) Tg. Thang Vel Kam BTh, MDiv(Manila)
(13) Lia Don Khawm Huai BTh (student-Manila)
(14) Tg. Hang Tung Mung BTh (student-Manila)
Sanggam Pawlpi
(1) Dr Lian Khan Hang BA(Hist) Q1, MMis, DMis (hong nusia zo)
(2) Rev Kap Cin Thang BABS(Myanmar) leh MDiv(USA) Founder & Pastor, SABC leh Canon Gospel Chapel
(3) Rev Kap Khan Khup BABS, Pastor Yangon
(4) Sia Cin Za Lian BABS, Pastor
(5) Huat Cin Thang BTh, Found Gideon Myanmar Mission Bible School, Kalay
(6) Rev Cin Suan Nang BABS, Pastor Founder DCF, Yangon
(7) Rev Kham Khen Pau Pastor
(8) Rev Khup Suan Pau Pastor
(9) Rev Cin Khan Lian Pastor
SDA
(1) Rev Khai Lian Mang BA(R), MMin(student), Tedim Pastor
(2) Rev Kham Khen Pau BA(R), MMin(student), Yangon Pastor
(3) Rev Thang Siangh Liangh BTh(USA)
(4) Sia Kham Min Thang
(5) Sia Cin Lian Hau
Presbyterian
(1) Sia Go Khan Suan BTh, BD(India), MTh(student-Manila)
(2) Rev Cin Za Lian BTh, Secretary Zo Synoh Kalemyo
(3) Rev Pau Lam Mung BTh, Pastor
(4) Sia On Sian Mung BTh, MDiv(student)
(5) Sia Zam Khan Lam CTh, Evan.
(6) Sia Cin Suan Mung DTh, BTh (India) Evan
(7) Ai Lian Mang MDiv(student-MIT)
(8) Sia Kam Lian Khup BSc, MMin, Founder, Reform Presbyterian Church, Yangon

AG (Assemblies of God)
(1) Rev Kham Khen Mang BA(Myanmar), MA(Philippines), MDiv (Philippines), Asst Pastor, Tedim BAG Church
(2) Rev Mary Hau Lun Cing BSc(Myanmar), MDiv, EdD(Candidate-Manila), Principal EBC, Yangon
(3) Sia Khup Lian Sum BSc(Myanmar), MDiv(India), Lai Siangtho Sang sia
(4) Rev Kham Lian Khup BTh(India), MDiv(Ygn)
(5) Sia Thang Lian Pau BTh(India), MA(USA),Lai Siangtho Sang sia
(6) Sia En Khan Mang BTh, BAG Pastor
(7) Rev Lian Za Tuang BTh, Gamngai Pastor
(8) Sia Thang Khen Mang BTh, Khampat Pastor
(9) Rev Khai Khen Thang BA(Bible), Pyin Oo Lwin Pastor
(10) Sia Khai Hen Thang BA(Bible), Khampat Pastor
(11) Rev Hung Suan Thang Lomzang Pastor
(12) Sia Cin Khen Mang Evan.
(13) Sia Khup Suan Mang Evan
(14) Sia Thang Khan Sing Evan
(15) Sia Pau Khan Thawn Evan
(16) Sia Thang Suan Mang Evan
(17) Rev Mang Cin Thang CTh, Kalemyo AG Pastor (hong nusia zo)
(18) Siama Niang Dim Cing BTh, BAG Naucing siama
(19) Pa Thang Tul Mung BA, USA ah om
(20) Tg. Kam Hau Pau BA(Hon), MABS, Korea ah om
(21) Rev Lian Sian Thang MDiv(India)
(22) David Mang Lam Piang BTh
(23) Mark Sel Khan Lian BAME(Bachalor of Art Missionlogy & Evan)
(24) Sia Kam Khan Lian BSc,BD(India), MTh(Korea), Founder-Yangon Mokyone Church, Yangon
(25) Tg. Pau Khan Piang B.A.B.S, USA ah om
CJC
(1) Rev Thawng Khan Hau BABS, Bumzang CJC Pastor
(2) Sia Kam Sian Mung Evan
NAC
Rev Hau Cin Khai Kalaw Pastor
UPC
Rev Kai Za Niang Kalemyo


Rev Thomas Thawng Lian Khup Rev Kam Suan Mang Rev Thawng Khan Sing
BA, BD(Myanmar) BSc, BD(Myanmar) BA, BD(Myanmar)
MTh(Korea) MTh(Can-USA) MBC E/M Secretary
ZBA Secretary
Sia Thang Do Mung Rev Mang Lian Pau Sia Mang Khan Sut
BSc, MSc(Zoo), MDiv(MIT) BTh, Pastor BSc(Math), MABS,
ZBA-Pastor Founder, NCC, Yangon (FBBC&S Faculty
Myone Council EC and Youth Pastor)
Fr Cin Go Lian Rev Mang Kap Rev Kham Lian Mang
BA, Father, Myanmar BABS, BD(India) BA, MDiv, Pastor
ZBA- Tedim Pastor

Zo Association leh ZCDC Thu
1960 hun lai-in Zote sungah Tuiphum Pawlpi sim loh, Pawlpi dang om lo, RCM Pawlpi cih khat omin tua zong khua sim hi nai lo hi. A tam pen in Tuiphum na hi hi. Tuiphum sungah TBA sungah na omin, tua panin 1962 ZBC kumthum cin khawmpi Khuasak khua-ah Tuiphum Zo a ut teng kipawlna dingin Association na kingah in na kipia a, ZBA cih hong piang khia hi. ZBA hong pian ciangin, Tedim gam, Tonzang gam, Kawlpi gam leh Tamu gam a om Zo Tuiphum teng kipawl bawlin ZBA sungah a tamzaw na om hi. A makaipi President dingin Rev Kham Za Mang, Secretary dingin Sia Cin Khaw Mang kiseh a, kum 10 sung ding phualpi zum cih mel nei lo-in, President Rev Kham Za Mang omna peuh zum na hi lel a, kum 1972 ciangin, Yangon Insein Kawllai Sang pan a DipTh zo Sia Mang Kyin, Khampat ZBA khawmpi pan Secretary dingin na kiteel hi.
Sia Mang Kyin in hong sep ciangin, ZBA pen sumtha kihat lo lua-in na a kisep theih loh ciangin ZBA ahi lote tungah mimal ahi a, kipawlna min tawh ahi zongin, khuapi khua neu a omte kiangah huhna ngenin ZBA na dingsak a, haksatna tampi thuakin, kha sum cih zong sang lo-in, a khasum ding a kiciangtan zah kumcinteh a lang bek kipia zo tawh kum tampi na na sem hi. Amah in tua bangin a kisep suak theihna dingin khuapite ah zin in, ZBA huhna ding Zo Christian Donghu Committee na phuan khia hi. Tuate, Tedim-ZCDC, Kawlpi-ZCDC, Tamu-ZCDC leh Yangon-ZCDC ci'n ZBA tha pia dingin na phuan a, ahi zongin, Tedim sim loh kum nih kum thum sungin ZBA Pawlpi piang a, ZCDC kipawlna bei pahpah hi. Tedim ah zong ZBA Pawlpi piang a, tu ni dongin ZCDC kiphiat lo hi. Ahi zongin Tedim ZCDC pen 1978 kum a kiphuan khia pen, 1998 ciang hat mawh lo-in, ZBA hong picing in, sia ginapipi leh sumtha zong a tulza tampi hong kizeek ciangin Tedim-ZCDC pen kul nawn lo kisa in kipawlna a bei loh hangin tha hat nawn loin om kik ta hi. A kisapna zui ahi hi.
Tedim ZCDC in, Rev Thawng Lian Khup, Rev Dr Mang Do Thang leh tulaitak a MBC E/M a sem Rev Thawng Khan Sing te Insein MIT ah BD ciang kha sak tekin, amaute zong BD a zawh phet un, ZBA sungah amasa kum khat ciat ZBA-E/M Secretary semin, tua zawh ciangin ZBA Secretary sem ciat uh hi. Tua banah, Tedim ZCDC min tawh ZBA gam sung vakkawn sia leh khua khat ngak sia kum tampi sung kicialsak ngei hi.


Tedim ZCDC member te

Zo Tuiphum Pawlpi Biakinn hon pawi, Tedim , 1998

1984 kum ZBA Khawmpi

1985 kum ZBA Khawmpi


A tam het lo leitung degree ngah teng leh a zo kuan i theih tengin:
Gamngai khua 1. Pa Thang Do Mung MSc(Zoo)
2. Dr Lian Khen Thang BA(Psy)
3. Pa Thawng Lian Khup BA(Hist)
4. Sia Thawng Khan Sing BA(Bur)
5. Sia Mang Kaih Thang BA(Hist) Q1
6. Lia Mang Lun Cing BA(Hist)
7. Nu Lun Lam Vung BA(Hist)
8. Pa Thang Tul Mung BA(Hist)
9. Sia Mang Khan Sut BSc (Math)
10. Tg. Kam Hau Pau BA(Hon)
11. Nu Man Lun Vung BA(Hist)
12. Nu Cing Khen Vung BA(Bur)
13. Pa Hang Do Lian LLB
14. Pa Kham Suan Hang BA(Hist)
15. Nu Nian Za Lian BA(Hist)
16. Lia Cing San Nuam BSc (Math)
17. Lia Luan Ngaih Don BA(Hist)
18. Nu Niang Suan Dim BA(Hist)
19. Pa Thawng Khen Piang BA(Hist)
20. Tg. Cin Hau Lian BLA
21. Tg. Lian Za Dong BA(R)
22. Nu Kai Lam Ciin BA(Hist)
23. Lia Cing Khen Man BA(Psy)
24. Tg. Thang Muan Kim BA(Psy)
25. Daw Vung Deih Lian BA(Geo)
26. Tg. Thawng Hen Pau LLB-final
27. Ms Niang Khawm Cing Nursing(Haka)
28. Lia Niang Dim Cing BA(Hist)
30. Tg.Pau Khan Piang B.Sc(Math)
Tualmu
1. Pa Cin Khan Suan MA
2. Pa Thawng Gin Kham BA
3. Pa Cin Za Mung BA
Khuadai
1. Lia Ciin Lam Lun BA
2. Nu Cing Lam Niang BA
3. Pa Kham Do Nang LLB
4. Dr Kham Go Mang BSc
5. Kham Khen Kap BA
6. Rev Kham Suan Mung BA
7. Pa Langh Za Khai BA
8. Pa Lian Za Kam LLB
9. Cing Lam Lun BA
10. Pa Cin Hau Piang BVS
Bumzang
1. Cin Lian Mang BSc (Zoo)
2. Rev Kam Suan Mang BSc (Math)
3. Rev Kham Lian Mang BA (Hist)
4. Kam Lian Mang BA
5. Thang Man Lian BA (Hist)
6. Mang Lam Nuam BA(Hist)
7. Van Khaw Zam BA(Hist)
8. Vung Lun Cing BA(Hist)
9. Pa Laang Khan Thang AGTI
10. Hang Bawi Lian YIT
Zozang
1. Mang Khen Thang BSc
Thangzang
1. Hau Lun Cing BSc
2. Kham Khen Mang BA
3. Lun Go Ciin BSc
4. Khup Lian Sum BSc
5. Hang Sian Mung BA
6. Khup Khan Zam BSc
7. Niang Lian Cing BA
8. Kham Khan Mang BA
9. Khup Khan Thang BE(Civil)
10. Kham Go Pau BSc
11. Hang Khan Lian MSc
12. Khup Khen Kap BSc
13. Dim Ngaih Lun BA
14. Niing Khen Cing MA
15. Niang Lun Cing BA
16. Man Lam Ciin BA
17. Khup Lian Sing BEco
18. Khup Sian Lian BA
19. Cing San Dim BSc
Lomzang
1. Mang Lian Pau BSc(Math)
2. Kham Suan Hau BA(Bur)
3. Thang Suan Hau BSc(Math)
4. Vum Suan Thang BA
Salzang
1. Hau Suan Mang BA
2. Thawng Khen Tuang BA
Phaitu
1. Ai Lian Mang BA
2. Cin En Thang BSc(Chem)
3. Cin Go Lian BA
4. Cin Lian Hang BEco
5. Gin Suan Thang BA, BEd
6. Hau Khan Mang LLB
7. Kam Khan Thang BA
8. Kham Do Dal BA(Geo)
9. Lian Khan Hang BA(Hist)
10. Let Suan Pau Ba(Hist)
11. Ngai Hau Cing BA
12. Pau Lun BA (Hist)
13. Vum Khen Mang BA(Geo)
14. Lun Za Pum BA



Lungtak
1. Zam Suan Dal BA
2. Zam Suan Thang BA
Khuamun
1. Hau Lian Mung BA
2. Hau Lian Khup BA
3. Kam Khen Mang BSc
4. Kham Do Mung BA
5. Kham Za Nang BSc
6. Laang Hau Lian BSc
7. Pau Kap Thang BA
Anlun (Phultuan)
1. Cing Lam Niang BA,BEd
2. Hau Za En BA
3. Kam Cin Pau BSc
4. Kham Do Mang BA
5. Kham Suan Thang BA
6. Khup Khan Thang BA
7. Laang Khen Mang BA
8. Let Cin Khup BA, DipEd
9. Lian Cin Pau BA
10. Lian Za Nang BSc
11. Man Ngaih Cing BSc
12. Mang Do Thang BSc
13. Mang Lian Pau BA
14. Pau Lian Cing BA
15. Nian Lam Lun BA
16. Khup Kop Thang BSc
17. Thang Khan Pau BSc
18. Tawng Khan Lang BA
19. Vung Lam Lun BSc
20. Nian Lam Vung BA(Geo)Q
21. Hau Lam Thang BA(Hist)
22. Ciin Za Niang BA(Hist)



Kapteel
1. Dr Suan Za Dong MBBS, Eye Specialist
2. Pa Nang Gin Dal BA
3. Cing Khawm Lian BA
4. Dim Sian Muang BA
5. Thual Sian Sang BA
6. Nu Sian Khaw Zam Sister
Leilum
1. Kham Lian Khup BA(Hist)
2. Zam Khaw Pau BSc(Chem)
3. Pau Cin Khai BA
4. Thawn Za Tuang BA
5. Zen Lian Thang BA
Khua Tuamtuam
1. Dr S. Pau Khan En PhD Taklam
2. Hen Za Kap BA Tuithang
3. Kam Lian Khup BSc Tuikhal
4. Kham Khan Thang LLB Gampum
5. Man Lian Cing BA Buangmual
6. Kam Khan Hau BSc Tamu

Phuntong
1. Nu Don Ngaih Hau B.Sc(Phy), BABS, M.Div(Candidate)
2. Hang Pian Suum B.Sc(Phy)
3. Lian Nuam Ziau B.Sc(Phy)
4. Khup Suan Lian B.Sc(Geo)


Sia Mang Khan Sut MABS lak (1999 Feb- Yangon)

MIT Signboard mai-ah (2001 Nov 24)


Zo Seminary Students (MIT & MICT-Insein, Yangon)
2001 Nov 23


Rev Hau Suan Mang SP Kham Do Nang Pa Kham Lian Khup Pa Zam Khaw Pau
BABS, ZBA LLB, BRE, MRE, BA BA
Pastor DMin(Cand)

Rev Mary Hau Lun Cing Rev Kham Khen Mang Rev Laang Lian Mang
BSc, MDic, EdD(Cand) BA, MA, MDiv BTh, BD, MA
Senior Pastor GAG, Ygn Asst. Pastor BAG, Tdm Principel, Minister Tranining
College, Ygn


Sia Hang Do Lian Siapi Let Cin Khup Ms Kai Lam Ciin Ms Cing Khen Man
BTh, MDiv, ThM (Cand) Head Master BABS, BA(Hist) BABS, BA(Psy)
BEHS

Pa Tawng Khan Lang Lia Nian Lam Vung Pa Hau Lam Thang Ms Ciin Zam Niang
BA, BRE, BACED BA(Geo)Q BA(Hist) BA(Hist)

Miss Mang Lun Cing Tg Thang Muan Kim
BA (Hist), BA(Psy), Monywa
UDC

Miss Luan Ngaih Don Miss Cing San Nuam
BA(Hist) BSc (Math)
JAT LDC
Thukhupna
Hih laibu sunga ki-at Zo ngeina leh Zo tatziate paih ding om lo a hoih pen hi, zuih pelmawh ding hi, cihna a hong ki-gelh hi lo hi. Ngeina leh tatzia a hoih lote nusia a, hun tawh kituaka a hoih zaw ngeina leh tatzia a hoih a thakte i zuun toh ding hi zaw hi.
Ahi zongin, ngeina leh tatzia a kinusia thei lo pawl khat om a, tuate i zat ciangin "tatzia" maan a i zat ding hong kisam mahmah zel hi. Tuate in Gentehna: (1) Zutang tun' bang taangtawn-a pute pate in a na zat tu ciang dong hi napi-in kizang mengmeng sam lo ahih manin, i zat ciangin kizang khial thei hi. Eite sang a hamzaw pipi na ngawn in thei leh kilawm napi-in thei lo-in sih sial a zutang kitung a sa bang na om lai mawk hi. Zutang tun i cih pen a si-pa' nungah tua innkuan pan pu thak hong piang ta ding ahihna hun hi a, pu kilaih ta ding, a si-pa ngawng bei ta-in ngawn pua ding dang om kik ta ahih hang hi. A si-pa' nungah ama pute taangin pu thak om ta a, a si-pa pute tawh kizopna bei in, kahlei kia kici-in ngawn beina zutang kitung a melmuh kipia ahi hi. A si-pa luang tungah a pute'n zutang tungin, a tute in kimangngilh lo nadingin melmuh a na pia hi hi.
(2) Tua dang khatah, mo man piak leh tunsa gawh dan ahi hi. I kiim i paam tatzia in hong lawh mangin, mo man pen sialkhup ci-in, tunsa i piak pen sialkhupsa a ci peuh om mawkmawk hi. Zo tatzia sungah mo man pen man kici pah in, tunsa pen numei vai teng siansakna, a beh min laihna in kizang ahih manin thupi mahmah a, tunsa lo tawh vai kihawm thei lo hi.
(3) Sialkhup i cih pen pu zawng khat tu in a huhna in sial khumin, sialzu sialsa kine-in tuate bek sialkhup kici ahi hi.
Hih laibu Zo Tatzia kici napi, thu dang tuamtuam hong kihel hi. Bang hang hiam cih leh, Zote in i hihna i tel theih nading deihna a hong kihel hi. Pawl khatte'n ei a khangto mahmah kisa-in Pasian in hong lamsang ta hi, ci ngakngak uh hi. Tua bang i hih nai lohna i thu i late leh i omdan theih nading leh mi tawh i ki-etkak theih nading deihna a hong kihel hi.
I Zo sungah i muan i belh ding mi lian, za nei min nei, a hau a pil i om kei hi. Zo buppi in mi innkuan khat, beh khat na ngawn i ban kei hi. Tuate banah mailamah hong pai dingte zong i mitkha-in i mu thei a tua bang a ki-uappih ding kuamah khangno sung panin zong i om kei hi.
Ahi zongin leitung lamah belh ding suan ding i neih loh laitakin Topa ii hong thupha piakna hangin, biakna lamah, Lai Siangtho sangkah, Pawlpi thak a phut zo leh

Pasian nasem tampi i om a, i kiim i paam a minam khat peuh sangin i hatzaw a kipah huai mahmah hi. Tua na ngawn ei hatna hi lo-in Topa Pasian hong sep ahi hi. Lai Siangtho sinna ah sangpipi zong i om a, mailamah zong lamet huai i om lai hi. Tuate mihing tha hi lo-a, Topa tha hi. Lamet ngam lohpi in leitung bup a kidawk zo bang i om thei hi.
Tu laitak a i dinmun pen khiam lo-in, kiniam khiatna takpi tawh mai ngawt a, khat leh khat kidom sangin, ki-it kilemna nei in, Lai Siangtho sangkah a tam zaw zem, Pawlpi phut a tamzaw sem leh Pasian nasem gina a tamzaw sem i om theihna dingin, Pasian itna, kiniamkhiatna, gualhuaina, thumaanna leh cihtakna, hanciamna leh kuhkalna tawh ma i nawt ding mi khempeuh in, i thubul a i koih ding deihna hi, ci-in hih a kigelh laite sang siam ciat ni.
* * * * * * *

Thukhupna
Hih laibu sunga ki-at Zo ngeina leh Zo tatziate paih ding om lo a hoih pen hi, zuih pelmawh ding hi, cihna a hong ki-gelh hi lo hi. Ngeina leh tatzia a hoih lote nusia a, hun tawh kituaka a hoih zaw ngeina leh tatzia a hoih a thakte i zuun toh ding hi zaw hi.
Ahi zongin, ngeina leh tatzia a kinusia thei lo pawl khat om a, tuate i zat ciangin "tatzia" maan a i zat ding hong kisam mahmah zel hi. Tuate in Gentehna: (1) Zutang tun' bang taangtawn-a pute pate in a na zat tu ciang dong hi napi-in kizang mengmeng sam lo ahih manin, i zat ciangin kizang khial thei hi. Eite sang a hamzaw pipi na ngawn in thei leh kilawm napi-in thei lo-in sih sial a zutang kitung a sa bang na om lai mawk hi. Zutang tun i cih pen a si-pa' nungah tua innkuan pan pu thak hong piang ta ding ahihna hun hi a, pu kilaih ta ding, a si-pa ngawng bei ta-in ngawn pua ding dang om kik ta ahih hang hi. A si-pa' nungah ama pute taangin pu thak om ta a, a si-pa pute tawh kizopna bei in, kahlei kia kici-in ngawn beina zutang kitung a melmuh kipia ahi hi. A si-pa luang tungah a pute'n zutang tungin, a tute in kimangngilh lo nadingin melmuh a na pia hi hi.
(2) Tua dang khatah, mo man piak leh tunsa gawh dan ahi hi. I kiim i paam tatzia in hong lawh mangin, mo man pen sialkhup ci-in, tunsa i piak pen sialkhupsa a ci peuh om mawkmawk hi. Zo tatzia sungah mo man pen man kici pah in, tunsa pen numei vai teng siansakna, a beh min laihna in kizang ahih manin thupi mahmah a, tunsa lo tawh vai kihawm thei lo hi.
(3) Sialkhup i cih pen pu zawng khat tu in a huhna in sial khumin, sialzu sialsa kine-in tuate bek sialkhup kici ahi hi.
Hih laibu Zo Tatzia kici napi, thu dang tuamtuam hong kihel hi. Bang hang hiam cih leh, Zote in i hihna i tel theih nading deihna a hong kihel hi. Pawl khatte'n ei a khangto mahmah kisa-in Pasian in hong lamsang ta hi, ci ngakngak uh hi. Tua bang i hih nai lohna i thu i late leh i omdan theih nading leh mi tawh i ki-etkak theih nading deihna a hong kihel hi.
I Zo sungah i muan i belh ding mi lian, za nei min nei, a hau a pil i om kei hi. Zo buppi in mi innkuan khat, beh khat na ngawn i ban kei hi. Tuate banah mailamah hong pai dingte zong i mitkha-in i mu thei a tua bang a ki-uappih ding kuamah khangno sung panin zong i om kei hi.
Ahi zongin leitung lamah belh ding suan ding i neih loh laitakin Topa ii hong thupha piakna hangin, biakna lamah, Lai Siangtho sangkah, Pawlpi thak a phut zo leh

Pasian nasem tampi i om a, i kiim i paam a minam khat peuh sangin i hatzaw a kipah huai mahmah hi. Tua na ngawn ei hatna hi lo-in Topa Pasian hong sep ahi hi. Lai Siangtho sinna ah sangpipi zong i om a, mailamah zong lamet huai i om lai hi. Tuate mihing tha hi lo-a, Topa tha hi. Lamet ngam lohpi in leitung bup a kidawk zo bang i om thei hi.
Tu laitak a i dinmun pen khiam lo-in, kiniam khiatna takpi tawh mai ngawt a, khat leh khat kidom sangin, ki-it kilemna nei in, Lai Siangtho sangkah a tam zaw zem, Pawlpi phut a tamzaw sem leh Pasian nasem gina a tamzaw sem i om theihna dingin, Pasian itna, kiniamkhiatna, gualhuaina, thumaanna leh cihtakna, hanciamna leh kuhkalna tawh ma i nawt ding mi khempeuh in, i thubul a i koih ding deihna hi, ci-in hih a kigelh laite sang siam ciat ni.

A sung a thu omte

Thu Masa
Thu Mapi
Khawk - 1 Minam
Khawk - 2 Pau bul
Khawk - 3 Kipi Kiten Ziate
Khawk - 4 Inn Suan Zia
Khawk - 5 Sih leh Man Zia
Khawk - 6 Pawi Bawlzia
Khawk - 7 Sa Sem Zia leh Sa Hawm Zia
Khawk - 8 Kithoih Zia leh Aisan Ziate
Khawk - 9 Khuasak Ziate
Khawk - 10 Gamngai Sang Thu
Khawk - 11 Zo Hamnah (Zo Paunak)
Khawk - 12 Taangaate Thuciin Pawl Khat
Khawk - 13 Pau Ziate
Khawk – 14 Ki-hut Tawmnate
Khawk - 15 Zomite Theih Huai Kum Zui A Thu Piangte
Khawk - 16 Zo Association leh ZCDC Thu
Thukhupna