UZO A 8 VEINA KHAWMPI THUPI

Thuma pui

President, Secretary, Advisors, Executive member, lawmlehguol, itlehngaih Pu Zo suonte aw,

A masapen in Mangpa Jesu minin cibai! Tu tung lamkaite gel siemna jieh a UZO khawmpi a thugen a nei se man un lungdam huoi ka sa hi, lamkai vaihawm upa zosie Pasien in damsawt hamphatna leh vaihawm siemna hing guon semsem ta hen. Pu Zo suonte Amerika ah mi 100 a phah masang laia na ding a hi tabo a, tawmluo i hi man un sini manni ding khuolna toh nana kiding veuvo a hia, tuni ciengin a tul a sim om ta i hi banah sini manni cienga ding Khristian hattuom bel khat ciet nei leh kivui zo ding i hi tah man un lungdam huoi ta sawn sawn, Pasien min phat in om hen. Tuajiehin i ngaituona uh sini manni a dinga kinga den loin kalsang suon hun ta a hi manin kipumkhat semin na sem va ui ci i kingen u hi. Tuni Pu Zo suonte laia ka hing tahlat nuom thu pen thuteng thum, kipumkhat, Zo, leh Pawlpi tam teng a hi hi.

(1)  A Kipumkhat

Mang Kam a United ci pen A Kipumkhat ci na a hi. UZO min phuo laitah in kipawlkhawmna min ding a tuom tuom ana kilunggul a, hinanleh UZO sang a thupi jaw om lo ciin UZO ah i kikhai khawm sieng u hi. Tam pen India ah na kipan in 1964 in ana ding pan ta a, tam pen minam kisuikhawmna leh kithukhatna pawlpi in ana kizang a tuni tanin kumpi a kitelna lama zong Manipur kumpi in a jatat leh muon ngam pawlpi khat a hi hi. A banah America ah kum 2005 kumin ana kiphut a, tu nai no khat in Kawl Gam a zong a ding panta hi. Tam kipumkhatna pawlpi penin ma sawn jel van, Zo ta omna kumpi gam, tuomtuom a zong hing ding jel ding a hi ci a kimuthei hi.

Harvard Classics kici Harvard University, kum 1909-1914 hun laia thugosie na om khat en va ui. Tehsepu khat a cinat luot nalam in a kingamla a, a tapate omdan a et ciengin lah da huoi a sa a, tuajiehin a silapa sawl in singkang lom khat va la ta in a ci hi. Tuaciengin tehsepu in a tapa te han khawmin, a u pen apat a tumpen dongin khat khat in a han a, tami singkang lom pen na thaneina ja u toh hiehtawng un a cia. A u pa apat a tum pen dongin a hieh ua, a hiehtawng zo a om sih u hi. Tua zo ciengin tehsepu in a silapa sawl in ciengkang lom khu phel inlen, ka tapate khat ciet pie in a ci hi. A silapa in tua bangin a ban pieh a tehsepu in a tapa tapen kungah na ciengkang tawi hieh tawng vawi le a cia, tuanah a tapa in a hiehtawng pai a, aban banin a hiehtawng sieng u hi. A thujawnaah tehsepu in a gen a, “Na thei ciet tah uh mabangin kikhenna in puana a hia, kipumkhat in dindohna leh hatna a hi hi” a ci hi. UZO tup leh ngiim pen nampi dinkipna ding a kipumkhatna a hi hi.

Nasep silbawl, pilna siemna leh khantona lamah miten Zo te pen mi nukhia te ei ci u hi. Mi ei ci na pen a dih danin koi taleih, masat theina ding lampi khat a om hi. Bang a hiei guoi?

Mathiu Laisiengtho 19: 16-30 sung i et ciengin Zo te a dinga Lungdamna Thupha “Good News” khat a om hi. “Hinanlezong  a masapen te a nukhia penin pang va un, a nukhia pente khu a masapen in a pang ding u hi,” Tam pen koi kamteng a hiei? Nukhia nua a masat theina thu ei pie Pasien min phat in om hen. Amabo nukhia napia masat theina thu pen Pasien nambat khat a koi te ci na a hi hi. Jilehta, nulehpa, innlehlo, teng sanga Keima ei khawhsah tapo in aza za khat mu belap va un, kumtawn hinna nei va uh.

(2)  Zo Minam Khat

Jesu pien masang kum zadan 11 sungin Zhou minam khu leng nam thahattah ana hi ua, tu a Shaanxi leh Gansu kici China (Sen) gamsung ah thahat silbawltheina ana nei u hi. Khum hun laiin Shang minam khu Zhou minam khut sungah ana om hi. Tualeh Zhou minam vaihawm thunei hun sung pen hun ni in a kiisekhen a: (a) Tumlam Zhou lenggam khu kum zadan 11 apat B.C. 771 tan a hia, (b) Suolam Zhou lenggam pen B.C. 771 apat 221 tan a hi hi  Tam Zhou minam ten khantona a puohdoh uh a hileh biehna lam thu ah Chinese philosopher pa Confucius thuhil leh pilnate ana peipi ua, sumlehpai lamna lama zong khantona ana podoh ua, ki uhna lama zong Europe gama kizang Feudal system kici zong amauh na puohdoh a hi hi. Eite pen tam Zhou lenggam vaihawmna sung pana na taikhie in Tibet ina tung ua, Tibet panin Malaysia, tuaciengin Kawl Gam, India dong ina jeel suoh u hi.

India leh Burma kumpi minam simna laibu ah Zo a om hi. Minam khat hiina toh kisaiin huna panpina a nga banah kumpi nasem, Pasien nasem leitung pilna nam tuom tuom, Masters, Doctors, doctorates (biehna lam), Engineers zong a kitam ta a, tam bang pilna siemna nei kitangkhai India gam Kawl gam a om te UZO sazien a i nei uh a hun ta hi. Kawl Gam Galkap Kumpi sung ah suotatna leh khantona a om thei sih a, i mite zong mawsiet thei a hi sih ua,  hinanleh a ning kawm kawm ah mipil misiem silbawlthei a dim a ha in a om a, tuate UZO in thapieh dan ding kikup hun a hi hi.

Pasien lungsietna leh democracy vaihawmna gam India a i mite pen a khangto ua, mi zong a pung semsem u hi. Manipur gamsung a ei khamtung mite ten khawmna khopi pen Lamka a hia, khunah Zo pen tam lamah a thumna i hi u hi. District Hospital (zato) kumpi zato omsun a a lienpen Dr. M. Lachinkhai, MBBS,MS a hi. Aman huop lien jaw a a lah in M pen Mantuong a ci na a hia, Lungtah gam mi Thangman a hi hi. Tualeh India lama Zo ten khantona a puohdoh pen lumuhzi lamah UZO kum 1964 in ana kiphut a, tua toh din khat Zo Sangpang Pawlpi zong ana kiphut in, batazi lamah minam kisuikhawmna masapen Presbyterian a hi hi. Tualeh kumpi sang a Zo ham sinna ding zong ana kibawl a, Manipur kumpi hing theipi, Federal ci pen Central government in zong huna ei pieh laitan 12 tan Zo ham a sim ding laibu zong a kinei ta hi. Tuajiehin i minam khantona dinga na kibawl sunsun te eiten kizumpi lo a, i tawisang ding a hi lamtah phawh ciet va ui. Tua mabangin Laisiengtho lam zong India lama hing suoh masapen a hi hi. Sim hamsa i sah leh i sin ding tuacieng a hing sim nop ding a hi hi, guoi, hanciem ciet vai.

(3)  Organization:Pawlpi

Hamzahdan thu ah pawlpi i ci pen lumuhzi lam a hia, batazi lam a hi ciengin “Hattuom” ci pen, Jesu in a sinsah hindan ding dihtah nei dinga a tuom hatte a hi jieh ua, “hattuom” na kici a hi u hi. Lumuhzi leh batazi hamzah dan a zong i khensat lo ciengin buoina a pieng thei jel hi. Tunia i dei pen batazi hilo in lumuhzi lam a hia, batazi leh lumuhzi bang tan kigamla a hei ci pen i khomutheina leh i khojahtheina kikal gamlat dan toh kibang a hi hi. Bangja in kinai nanlezong bil pen bil a hia, mit pen mit a hi hi, khentel siem vai.

February 20, 1961 in John F. Kennedy in President a hina toh kisaia a thugen masapen ah,  “And so, my fellow Americans; ask not what your country can do for you- ask what you can do for your country.”  Amerika ka mipite aw, ka gam in bang ei bawl pieh thei diei ci hilo in; keiman ka gam a ding bang e ka bawl theih? i ci ding u hi, ana ci hi.Tua mabangin eite thukan dan ding a hileh, Ka minam apat bang metna ka nga thei ei ci hilo in, ka minam a ding bang e ka bawl theih? i ci ding u hi.

Tuin Amerika mi hiina tang i tam ta a, Pasien in gamtha ei satsah pen Amerika a hia, Amerika pilna siemna leh hausatna kitaidemna mun ah Ameerika te ki tuitap dan a ei zong i kituitap a ngai ta hi. Kawl gam a I om laiin Kawl gam mite omdan in i om a, Malaysia i om sungin Malaysia omdan in I om ua, tua mabangin Amerika a om I hi tah manin Amerika te kithuhilna banga i gamtat uh a ngai ta hi. Lapite 34:11-14 sumng i et ciengin, ei kithuhilna a hileh,

Ka lawm tangvalte aw, hing pei un, hing ngaikhie un! Mangpa jatat dan ding keiman hing hil mawng mawng vawng! Hinkho nuom na mang nuom uh a ma? Dam sawt hamphatna na nei nuom uh a hei? Tua a hilewh thuse gen lamah ki kemcing unlen, juouthu gen vawt sih un. Thusie el ngatsan in silhoi bawl un, na lungsim zosie un kilemna del un.

Thujawna

Tuajiehin tam thu thum te kipumkhatna, Zo minam, leh Pawlpi cite sungah nampi dinkipna dingin kipumkhatna a ngai a, i minam kizumpi lo ding, tawisang ding, tuaciengin pawlpi khat a din khawmna munah eima metna ding beh en lo a, minam bangcileh a khangto thei diei, bang a hei ka bawl theih i ci ding a  kisam hi.

Miten a nukhiate ei ci na thu zong nahpi tah a lungngai a hun a, a nukhiate masat theina ding thu pen A masa tan thei na thuguh khat hing gen vang.  Mi masate, mi khangto te in a bawl hoi nalam un, bawl kalval a nei ua, Khrist min suong cietciet pawlpi pen patung mom a bang den hi. Ei hawmthaw minam in thanghuoina, thangtatna, milim biehna, bumna, kimudana, kihauna, engsietna, lungthahna, huoihamna, kilangkhenna, zukham hat bang zu nunnop bang, tua bang tahsa deidan te taisan in, ki itna, kilemna, kipana, lungduoina, hoina, ginomna, nunnemna leh kidehtheina toh vai i hawm cieng un, a masapen te i hi ding u hi.

Tumsing banga khanpha in mawng sing bangin liimbel thei a i om i manaw uh a hi hi. Tam bang thupha ngana ding pen i Zo lui hindan zosie pai in Zo tha i hiina i hinpi ciet dingin i kingen u hi. Zo tha i cite koi te e? “Koizong Khrist toh kizop zosie hinna tha nei a hita ua, sil lui zosie bei sieng in en in, a hing tha ta hi. (2 Kor.5:17).

Mangpan a thunun a a thupieh sang te mi hampha a hi u hi. Na nasep in na tahsap awng hing hu van, hampha va cin, nuomsa va teh. Na ji inn sungah lenggui gapha mama hing bang van; na sabuoi kimkot in na tate khu Oliv singtuoi hing bang va uh. Mangpa thunun a om koizong tam banga guoljawl in om ta va. Mangpan (na tenna khuo/state) gen unlen, etsahna Fort Wayne, Atlanta, Charlotte, Tulsa,  apat in hing guoljawl ta henlen, na damsung nite ah Amerika nopsahna khu hing mu tei va cin, sawn mu tei dingin na ci na lu dam ta hen. Zo te tungah lungmuonna om ta hen, halleluijah, Amen. (Lapite 128 na thu pansan).

Upate thugosie khat gen vai, Zo minam pen nampi nam thupi ana hi ua, hinanlezong hunk hat sung Pasien gawtna an a thuoh ua, a kisia cieng un nampi a hina uh a tang kia ding u hi. Tam pen Bohkan a mawngpi kung nelkai in tuol a phah ciengin Zo te ang khanglo ta ding u hi. Bohkan (Zomun) khuo a mawngpi kung nel kaiin tuol ban zo, Zo te, kipumkhat in khanglo ta va ui. Pasien min phat in om hen, Amen.

By:  Rev. Dr. L. Taithul