MOTHER’S DAY PIEN KHIET NA THU

Leitung ah mihing leh ganhingte in “Nu” kinei chiet hi. Nute itna pen lien mahmah a, leitung ahtehpih ding om lou hi. Biekna zousieh phiel-in NUTE NI (MOTHER’S DAY) kinei chiet a, nithupi khat in kichiem teh hi. A hizongin i bawl zieh leh a ni a lhate kibang kim lou hi. Ei Chritsian a tamzawte in kumsim in May lha Nipi nihna sung kizang den hi. Tukum zong May 11, ni tawh kituah hi. Nute Ni (MOTHER’S DAY) I bawl zieh leh a Nite thupi hilou zaw-in, nute thupi na itheih nading deihna tawh Nute Ni hing pieng khieh ahihi.

Tua ahijieh-in Nute Ni hing pienkhiet zieh leh a deihna tawmkim in ikikum ding uh hi. Abeisa 1868 kumin America gam sungah tuolgal (Civil War) kinah dou mahmah a, nute tungtawn in kilem kia na ding ngimna leh tup natawh Nute Nasep Ni
(Mothers’ Work Day) kipan khieh hi. Laigelh siam England gammi Ms.Julia Ward Howe in 1872 kumin Nute tawh kisai laigelh khieh a, tua laibu tung tawn-in nute ni bawl ding ngaihsut na na kinei hi.

Nute pen inn sungah tate leh nu le pate tawh kikal beh thamlou in khuo sung gamsung a kilemsahte

ahi man in, nute tungtawn in US gambup Tuolgal kilem kia na ding gelna nei uhhi. Tua bang kawmkal sung panin America gam Webster, Taylor Country, West Virginia a teng Mr.Granville Jarvis leh Mrs.Ann Marie Reeves te’ sung pan May 1,1864 in a suah numei pilsan Ms. Ann Jarvis tungpan hing piengkhie ahihi. Unau 11 sung pan 9 na hi-in, kumkhat a chin chiengin Grafton khuo ah lal uh hi. 1881 kumin Augusta Female Academy (Mary Baldwin College), Staunton, Virginia ah sang kah-in, a sang man chiengin a tenna Grafton khua ah kum 7 sung sangsie sem hi.



A neu lai a kipan a nu it mahmah in, a nu nasepte huh den hi. A nu in pah-huon te bawl-in pah kang (carnation) namte deih phadiah hi. Ms.Ann Jarvis in kum 12 a phah a kipan a lungsim tawng ah, Nute Ni bawl ding ngaihsutna nei zou hi. Hun hing peitou zel in, a nu in May 5, 1905 kum in sihsan hi. A nu sih zou chiengin Company Industry ah na a sepkawm in nute itna laihawm (Pamphlets) gelhin hawmkhia denhi. May 5, 1907 kum Nipi ni- in a nu sihzawh kum nih chin, phawhna pen ama pawlpi ahi St. Andrews Methodist Episcopal Church, Philadelphia ah bawl-in, pawlpi upate tungah Nute tawh kisai thugenna neih theihna ding ngen hi.

A sisa nute phawhna in pahkang ( White carnation ) leh a damlai nute phawh na pahsan (Red carnation) mipi 500 tungah hawmkhia hi. 1909 kum in US gam State 45 leh Canada, Mexico, Hawaii, Puerto Ricate ah kizel hi. 1910 chiengin US gambup ah zahtheih ding Congress ah lai tawh ngen hi. 1912 kum in picing semsem ahih zieh in US gambup Nute Ni (National Mothers’ Day) in kichiem teh pai hi. US kumpi tungah a ngetna kisang ahih ziehin, 1914 May 8, ni- in US President Woodrow Wilson in kipsah na nei hi.

Nute Ni in US gambup zum khah-ni (National Holiday in USA) in kizang a, kumpi zumte leh inn zousieh ah US Lan (Flag) kikhai hi. Nute Ni -in a sisa nute hanah zahtatna lim Pahkang (White Carnation) kipie hi. Pahkang deihna pen lungsim siangtho, itna, chihtah na, lungsau-na limlah na ahi hi.

A damlai nute tungah anneh tuidawn leh letsong tuomtuom kipieh in nute kipahtawi chiet hi. Nute ni-in nute itna leh pahtawi na late kisa in, nute in bang zah thupi a, bang teng hing sepsah chih thute ngaihsut kia huoi hi. Nute ni pen tulaitah a tate (naupangte) in nu leh pa zahtat a it theih ding lamlahna zong ahi hi. Nute thupi kisa lua mahmah ahih ziehin, Nute Ni (Mother’s day) a pankhia Ms. Anna Jarvis pen “Nute Ni ii Nu” (Mother of Mothers’ Day) pahtawina minpha na sangpen kipia hi.

( Written by, Sie John Pauno Zo)