KHUODO PAWI TOM KIM

KHUODO PAWI

Khuodo pawi ih cii pen Zo suan vehpi-aa ding in a angtang kipakpi tak mama Zo Ngaina thupi gol penpen khat ahihi. Nidanglai ih pu ih pa hun masa lai kum sawt² pi pan in ih Zo suan ten ana bawlzing uh  ahihi. Hun masa lai aa pat Khuodo akibawl cieng in jongh, tulai dan mabang in - ih khuaciet ih ten² na-ciet-ah Khuo hausa te INN ah ahisih leh Bea pipa tulpi pa te iNN cibang te ah kumsial in  a kibawl ahihi.

Zo suan ten kumkhat in 2vei Khuodo kibawl hi. A masa pen in lopawi khuodo ahi aa, tua Khuodo pen in mimza , taangza, ann kham/hau nading-aa pusa pasa biekpiek na Khuodo pawi kici hi. A 2na KHUODO pen October hla sung in a kibawl ahi aa, ei Zo suan te aa ding in ih kumtha uh jongh ahihi. Tam KHUODO cieng leuleu in ih pu/pa ten khuo sung iNN cin teng dawi leh kau nowtmang sieng na in jongh ananei uh hi. Tam KHUODO pen ann lak jaw aa kibawl ahi mabang in Lungdam ko pawi thupa nget pawi jongh ki ci thei hi. Tam mun ah mangkangte tawh ih kibat sim nakhat om aa tua pen mangten' THANKGIVING anaci uh aa ama haw ang gen dan leh ei haw bawl dan akhiet na adeih na pen kibang hi.


KHUODO masang in Zo zu te ki bilh ziiziah aa, nungak tangval te bang Zo zu bawlton kawm kimu ton kowmkowm in, KHUODO  cieng aa nekding Khuaite kila-kiha phot in KHUODO masang deu ahun nai mama cieng in , Khuo jangbup in gamvak ton in, tua hun pen hlapi bem kipat kimpawl hita ahi man-in a khuai ha te uh  jong kihal/kila ta aa ,  kaneu lai kanun ei gen dan bang pen kamit hla ah ka omsak cieng nop tuak mama in tulai ham in kawlte water festival gual nop dan bang ding in ka ngaisut cieng kei jongh amahaw lah ah ka kihal nuam tuak pong mowk hi.

Ei Zo suan te pen mi maimai/ mi mawk² ki-hi dehtah suoi lo hi, ngaina (culture) kip akicien aa anei Minam te ih hi uh hi. Hun masa lai aa pan in Zo suan citciet Zo te ci-in ei kisimmaw bawl sese in , mipawl khat bang in ih Minam hi-na min te nangawn a tuam abai in nakhel sawm² zanzan mawk uh hi. Zo ih hi na pen ihkep cing bembom ding uh apoi maw mama khat ahihi. Pu Kam Khen Mang ham hi leh zukham annkham misim maw pa khat ih hi jongh in, ih gawngtaamtaam aa tem powng khat tawh Zo tah kapa tapa ih ci lenlon ding uh atupi mama ahihi.

Zo suante pen amimal in ihtawm mama lai sam uh vang in hei-sung² ih tung jongh un , khat leh khat gual tawh te leih aki-it a kisathei mama minam te ih hi uh dungjui in ih omom na uh ah tam KHUODO pen ih bawl zing ding uh ih zop suoksuok ding uh ahi bo hi.

Tua cieng Zo zia/dan/culture/ယာဥ္ေက်းမွု. kathei na tawm khat angsut bea taleng bang aheai ih ci leh ih, a ki ang-tan sah pi mama ding uh, ih Zo zia leh tongh(culture) hoih mama khat ahi , mi min pen amin pi-in ki lo/han jepjep lo hi.  Gentena|: nupa ta nei-nai-lo te akihat cieng "nangnu nangpa" ci-in awdam kam hum no-in ana kihan sese uh hi, tanei nupa te pen' atapa taa pen pa ahisih leh atanu tapen nu min tawh ana ki han se uh hi. Gentena||: in KHUODO zu dawn ding bang aa akihat uh cieng in, Thangpi pa Thangpi nu ci bang dan in ana kihan dimdiem uh aa, tam pen Zo zia/dan/culture/ယာဥ္ေက်းမွု. hoi mama khat ana hi khinkhian hi.

Tam KHUODO hi taleh Zo Naaina ci te pen tu leh tu aa ih son phuo tawm hi panpan lo ahilam jongh ih thei uh akul ahihi. Zo suan ten' Ngaina ih gen cieng Zo lapi pen athupi mama khat ahi dungzui in, Zo la dawng zani 200 val bang kinei aa tuate sung aa la tungh, la phei, la pi cibang in kinei dimdiam hi. Zo la jongh pasal tingteng sahton Zo la ana om aa, nupi papi sahton cibang in ana om nalai hi. Zo te iham phat mama na pi pen ihngaina te ih ham ih van ten' Zo ih hi na ei na (proved)kip sah hi. Zo KHUODO te Zo ngaina te in gen cieng, bang ten ei na proved aheai leh, Gentena:| Zo thau(gun), Zo zu(,wine) Zo bel, Zo Inn, Zo lapi, Zo Ngaina van zah tuam tampi tah ten' ei ki cien sah mama hi.

Tam KHUODO thu tawh kisai pen khat leh khat gendan jongh ki banglo kha thei ding hi. A diakdiak in tam ka artical pen kei thei na kei zak na tan ciengcieng hi bep aa, KHUODO thu tawh kisai taangthu tam pi tah ih nei uh hi. Lai-at siemlo kihi jiak in ka-at khiel akithuh kalh nia nua tampi tah om ding in ka um aa tua ka at dihlo tampi te comment pan in tam hi jaw , ahi sih leh ta dan hijaw bo ve aa ahin ei gen bee ta un ci-in kang cial hi.

Lungdam
Lai-at: Zo Sangpy