SIANGTHO NI 4 NI - BY BISHOP LIAN KHEN THANG

SIANGTHO NI 4 Ni

A Nunung pen Topa’ Nitak An Nekkhawmna.Topa in a nungzuite kiang ah agen kammalte eite kiang ah hong gen kikhi: ‘Note tawh hih an i nekkhop ding ka ut mahmah hi’ (lk. 22:16).Tua a nunung an nekna in an mawkmawk hi loin, Pasian pawi an ahi hi.Judah mite aa ding in an siang thoahi hi. Eite in, hih an nek khawmpawi pen A nunung Jesu’ nitak nekkhawm bawlna i ci hi.
                          Siangtho Nilini pen, ‘Ki-itna Ni’ zong kici hi. Topa thuhilhna sung aha thupi thu nam nihte bulphuhpha pen hi. Tua te in: ki - itna lehkipumkhatna ahi hi. Jesu in “Note tung ah ka hong piak thak thu in;note ka hong it mah bang in note khat leh khat na ki-it un” (Jn.13:34) ci a hongvaikhak pen i veng ipamte leh thuzuite lakah a zawngzaw deuhte i itna i lahna ding ni ahi hi. “Pa aw, amaute khempeuh pumkhat a suah theihna ding un ka hong ngetsak hi. Nang leh kei pum khat ihih mah bang in, amaute zong pum khat a suah theih nading un keimatung ah na hong piak minthanna mah amaute tung ah ka pia hi” (Jn.17:21-22).
             Jesu in a nung zuite khat leh khat bang ci bang in ki-it ding cihalah na ding in, amau khe a silsakna tawh hong hilh hi. ‘Note’n kei Sia nong ci uh hi. Man hi. Ahih hang ke’n silate’ nasep ka sem hi. Tuamah bang in, note khat leh khat khe na ki sawp sak un’ hong ci ngiat
hi.
          Topa in sepna bawlna bek tawh hihlo in, a pumpi mahmah hong pia hi.Abeisa hun in, “Na pumpi na it bang in, na lawmte na it in” (Lev.19:18), cih ciang bek tawh thu hong hilh hang, tu ni-in, “Ke’n notekong it mah bang in note khat leh khat na ki-it un” (Jn. 13:43), ci-in thu hong hilh hi.
                        Eite khat leh khat i ki-it theihna ding in Jesu in ama pumpi SiangthoPumpi hong pia hi. A nungzuipite tung ah zong tua mah bang in a bawlnading un thu a pia hi. Jesu in eite hong itna hong lahna ding in amapumpi mahmah hong pia a, midangte i it thei nadingin zong, SiangthoPumpi in abulpi penpen ahi hi.Mi pawlkhatte in a pianna gam uh nusia in gam lapi pek a om gamte ah pai in a muh ngeiloh athei ngeiloh mite kiang ah Pasian thu va hilh in, va kem va khoi uh hi. Biakna asi pihte in a thatte mawhna maisak in lungnuam tak in si uh hi.   Nungak siangthote in zong anuntakna khempeuh uh cinate, miphakte leh mintaw,khelbai te kemin, amaute’ nu leh pate akep akhoi bang lian in kem in anuntakna na pia uh hi. Thupha bawl zawh nading ahi zong in, hong mawh
hong khialte i mai sak zawh nading ahi zong in, Siangtho Pumpi thatang
hong pia hi. Ciktui panin tui a phul khiat mah bang in, Siangtho Pumpisung pan in zong itna hong luang khia hi.

                 I Christian nuntakna sung ah, Siangtho Pumpi paai khia lehang, itna man taktak zong hong bei ding hi. Hih thu hang in Paul in Corinth khua thuzuite kiang ah hih bang in lai khak hi: “Tua bang mawhna hangin(ki-itna om lo in Siangtho Pumpi biakpiakna bawl, khat leh khat ki thu tuak lo, pawl tuamtuam in ki khen, thuzui azawng zaw deuh te huhnopna lungsimte neilo) note tampi tak cina in, na zawng khal uh a, pawl khat zong na si uh hi”. (si cih ciangin upna nei nawn lo lung kia, biakna nusia cihna ahi hi) (1Cor. 11:30).

                  

                     Christian thuzuite lakah alian penpen mawhna in kithutuah lohna ahi hi.Kitotna leh ki khen thaangnate in i mawhna pan hong piangkhia gahte ahi a Khasiangtho gate tawh kilekbul hi. Mawhna hang a hong piang kithutuak lohnate leh lungsim kilamdan nate hong damsak nading in Topa in a Pumpi (asi leh asa) hong pia hi. Eite lak ah, hoihlonate leh natnate khem peuh adam nang in Siangtho Pumpi sang a hoih zaw zatui omlo hi.
                                  Topa hong nget letsong: Khat leh khat i ki khasiatsahnate, i ki hehsaknate leh i ki lungnopmawhnate maw maina i kipiak ding, Pasian leh pawlpi mai ah lung kim tak a i mawnate i ki maisak na ding (itna leibaa simlo adang leiba i ki batsak lona ding).Suaktakna nam nih: Pharaoh kumpipa saltanna leh Dawimangpa saltanna pan.Siangtho Pumpi in thuzuite a ding in nuntakna phungpi hi a, SiangthoPumpi lo tawh Pawlpi om thei lohi. Tua ahih man in, eite in Siangtho Pumpi biakpiakna i bawl ding ciang in, Judah mite’ Pasian pawi bawl dan i ette thei ding ki sam hi. Na kawng uh gak un, na khedapte uh bulh in, na ciang khut uh tawi un (Pai 12:11). 

                              Tua ahih man in,Siangtho Pumpi biakpiakna i bawl ciangin, Topa hong kamciam Vantunggam lam azuan hihang cih kithei kawm in, hih Siangtho Pumpi lo tawhVangam ki lut thei lo ding cih thei ni. Tua ahih man in, SiangthoPumpi in ei Xtiante aa ding in: vantung gam painang khua vak ahi hi.Van gam zuan in i khualzinna ah i thahatna ahi hi. I khualzinna ahzong pum khat hong suak sak hi. Tua ahih man in, siangtho tak in,Siangtho Pumpi biakpiakna i bawl leh pawlpi khang in thakhau semsem hi. Ahih hang, Siangtho Pumpi biakpiakna i bawl kei a, i bawl sunsunciang zong khat leh khat ki-itna a om kei leh i pawlpi ki khen thaanghi.A tom in gen lehang, Siangtho Pumpi in thuzuite’ kipawlkhop theina ding in nuntakna phungpi ahi hi. Tua ahih man in, Siangtho Pumpi lo in
pawlpi nungta thei lo a, Siangtho Pumpi aom nak leh a ki sam nakhempeuh ki cing hi.

Siangtho Ningani

                        Jesu in ei hong gupkhiatna ding in a nuntakna bek tham lo in, a neih khempeuh hong pia hi. A puan nei sunsun nangawn galkapte’n lakkhiatsak uh hi. A nei lai khat bekbek a hi Maria pen eite hong pia lai hi. Nu Maria pen, i inn sung leh i lungtang sung ah kem siam in vai hawm sakleng bang zah in nuam huai ding hiam?

Paska Pansikni Zan

                     Vigil=Ngakna......Paisan pawi = halna (Israel inn kuante hal, Egypt bangkua sung a tapa upa pen that) or Israel mite in Pharaoh saltanna nusia in a paisanna.
                    Ei Christian te a ding in, Jesu in sihna paisan in a thawhkikna tawhnuntakna thak angah kikna phawkna leh ei thuzuite in mawhna sung ahsihna paisan in, Xtu sung ah nuntakna i ngahna zong i phawkna ahi hi.Kei in leitung khuavak ka hi hi. Kei hong zuite in khuavak nuntakna
nei ding a, khuamial gamtatna nei lo ding hi (Jn. 8:12). Mei in khuavaak leh alum hong pia hi. Jesu in, tuate ban ah anuntakna hongpia hi. Tuisawpna i ngah khit ciang in, Jesu in ama nuntakna leh ama Kha Siangtho sung pan in eite hong nungtasak hi. Amah in anuntakna hong hawm a hih man in, eite Pasian tate i suak hi.Paska khuaimei in, atho kik Xtu lim lak a, tua mei pan in i tawi khuaimei neute i vak ciang in, Jesu kiang pan nuntakna i ngahna i lak hi.
       

Alpha leh Omega =  leitung ki pat a ki pan leitung bei ciang dong, Xtuin na khempeuhte’, hun khempeuhte’ leh mi khempeuhte Topa aa a hihna honglak hi.
                       Pak namtui tang 5-nga in Topa liamma ngate hi a, tua meima pawnte in,Jesu in eite ading in gimna thuak in hong sihna hangin eite hong itna hong lak in, ong gup khiatna hong phawk sak hi.

                               Roman thuzuite kiang ah Paul in a gen in ah, ‘Tuisawpna ah Christian thuzuite in Xtu tawh si khawm in, nuntakna thak sung ah amah tawh a thokik khawm uh hi’ (Rm. 6:3-11). Rome thuzui pawlkhat te in,

Christian nuntakna sung ah hoihtak in nungta khin napi - in,   ahih hang tawm vei khit ciang in, mawhna sung ah nungtol kik zel uh hi. Paul in amaute kiang ah hibang in hilh hi. Xtu en un: amah in singlamtek tung ah si -in, hong tho kik a, si ngei nawn lo hi. Tua mah bang in  Christian thuzui khat in, tuisawpna angah khit ciang in, tua bang mah a nuntak ding hong han thawn hi. Pum lui, nuntakna lui te nusia in, pum tha leh khathak tawh nuntak ding geih hi. Mawhna taisan taktak ding pen bai losam hi. Ahih hang,

Christian nuntakna sung ah mantak a i nuntak nop leh naakpi - in gimna i thuak kul ding hi. Tua tawh kisai, Paul in  hibangin hong han thawn hi. “Mawhna bawlna - ah sihna in mitphiat kal sung nasep hilo in, nuntak sungteng khempeuh mawhna tawh kido hun ahi hi.Topa in guta hoihpa gupkhiatna a ngah thei nading in ahuh mah bang in,eite zong mawhna tawh i kidona - ah hong huh tawn tung hi.

Christian nuntakna buppi in zong, nuntakna thak sung ah Jesu tawh thawhkikna hi a, thuzui mi khat thawhkikna in ama nuntak sung in damdam a hong piang ding ahi hi.Tua ahih man in i nuntak sung in, Topa tawh mawhna lam ah asi khawm leh atho khawm

Christian picingte i hih nading in han ciam ni!


Paska Nipini

                              Paska pawipi pen pawi khempeuhte’ pawipi kici hi. I upna khempeuh leh
i lametna khempeuhte in Jesu’ thawhkikna tung ah kinga hi. Hih thu omlo hih leh i Christian biakna in bangmah man nawn lo ding hi, cih Paul in hih bang in hong hilh hi. ‘Christu thokik lo hih leh kote’ thuhilhna a mawkna hiding a, note’ upna zong a mawkna mah suak dinghi...na mawhna sung mah uh ah note a om lai na suak ding uh hi (1Cor.15:14-19).
                             Christu hong thokik hi, cih thuman thutak panin thu tampi hong pusuak
hi. Christu hong thokik hi, tua ahih manin amah in Pasian takpi hi;eite mawhna hong maisak zo hi; tua ahih man in amah tawh nuntakna thak ah i thokik khawm hi. Christu nuntakna in eite’ nuntakna hong suak in, eite Pasian’ tate i suak khin a, i vekpi in sanggam khat i suak khawmhi. 

                     Topa thawhkikna hang in, Dawi mangpa i kihtakna ding thu om nawn lo hi Christu in amah zogawp khin hi. Tua ahih man in i thuak hamsatnate panin lungdamna i ngah hi. Tua ban ah,i sih khit te, ithokik ding a, amah tawh minthana i ngah khawm tawn tung ding hi.Jesu a thawhkik khit ciangin, Maria Magdala thukohna hang in,nungzuite tawh hong kimu uh a, amaute’ upna zong hong khang semsem hi.Jesu amu, ahopih John, Emmaus khua nungzui nihte, nungzuipite leh midang tuamtuamte a ding in, nuntakna nakpi takin hong ki khel hi.

                  Nakhempeuh hong ki tel hi. Jesu’ thuhilhnate zong hong tel zaw uh a,leitung ah dahna, nuamnate in bang khiatna nei uh hiam cih thute lehmai lam a nuntakdan ding a kipan na khempeuh hong tel semsem uh hi.
Kuamah in amaute leh Jesu khen zo nawn lo uh hi.
                           Jesu tawh a kimuh uh ciang in bang ngah uh ahi hiam cih dong leng, hih bang in hong dawng kik ding uh hi: Jesu tawh ka kimuh uh ciang in amanuntakna mahmah ka ngah uh a; lung damna leh kilemna zong ka ngah uh hi. Athokik Jesu tawh a kimuh khit uh ciang in, a nuntakna uh nakpi takin hong ki lamdang a, a nuntakna uh pen khen nih in hong ki khen hi.  

    Tua in, athokik Jesu a muh ma uh leh a muh khit hun uh ahi hi. Eite in zong Paska pawi i bawl na ah, Topa Jesu in sihna pan hong tho kik hi cih bek um lo in, amah mah tawh a tho khawm kik te i hih ding ki sam hi. Jesu tawh athokik lo thuzuite in Jesu’ nuntakna ngah lo-in, Kha Siangtho nuntakna zong nei lo ahih man un, a thokik Topa hong puak kilemna na leh lungnopna zong ngah lo uh hi. Jesu hong lut nading i lung sim kawng khak hon in, khuamial sung ah om ding teel zaw kei ni. Ama thawk kik ding kuamah in a kham zaw lo hang in, i lung sim sung ah zawhthawh thu tawh hong lut lo ding hi.
                              Hih i kikhopna in bang khiatna nei hiam? Tu ni Paska pawi ni - in a
thokik Topa Jesu a dawn ding in akikhawm ihi hi. Numei siangthote’thuzaksakna tawh nungzuipite in Galilee gam ah athokik Topa tawh akimuh thei mah bang in, Jesu in eite kiang ah hong kilak nuam hi. Tua a hih leh eite lam pan i sep thei ding khat bek om hi. Kisikkikna tawh  i lungsim kong khakte hong in i lung sim khuazing a tang sak ding in ama khuavaak i tum sak ding hi. I dahnate hong beisak ding in ama lungnopna i sung ah i tumsak ding hi. I sung a om mawhna sungah sihna alaih ding in ama nuntakna i sang ding hi. Tua hi leh nungzuipite tungah a piang thute pen eite tungah zong hong piang ding hi. ‘Topa a muhna hang in nungzuite a nuam uh hi. Jesu in amaute kiang ah: Nopna na ngah ta un...Kha Siangtho na sang un...(Jn. 20:20-22) acih mah
bangin eite kiang ah zong hong ci ding hi.
                                 Christu in eite tungah hong kilah nopna pen tu ni Lai Siangtho masa in
hong  mu khia sak hi. Vantung mi thu hilhna tawh galkap bupa Cornelius in Peter a inn ah sam in, Jesu Christu tangthu a hilh laitakin Pentecost pawi a nungzuipite tungah Kha Siangtho hong kum mah bang in, Cornelius te innkuan tung ah zong hong kum hi. Thu dang hilh kul sa nawn peuh mah lo ahih man in, Peter in a innkuan un tuisawpna pia pah hi. Jesu in  hih innkuante tungah amah leh amah kilak nuam mahmah ahih man in Peter in a thuhilhna a man ma nangawn in amaute tung ah Kha Siangtho nuntakna pia hi.
                                 Christian thuzui man taktakte in Christu’ thawhkikna pen a nutakna uh
tawh teci pang uh hi. Tua ahih leh eite in zong Christu tawh i thokik khawm takpi hi cih koicibang in lah thei ding: Hi tawh kisai in, Paul  in Colossae thuzuite a laikhakna sung ah hih bang in, hong dawn sak hi: ‘Note Christu tawh athokik khinte na hih manun, Pasian’ tak lama kumpi tokhom tung ah Christu a tutna mun vantung thute ngaihsut in na nei un. Vantungah a om thute ngaihsutin nei un la, leitung ah a om thute ngaihsut in nei kei un’ (Col. 3:1-2). A khiatna in ei Christian thuzui mite in leitung nate thudon lo ding cihna hi lo hi. Ahi zong in, Christian thuzuite in Pasian a etdan uh, amau leh amau a ki-etdan uh, mi dangte leh a kim a pam a om nate a etdan uh pen Pasian thu umlo lawkite etdan tawh kibang thei lo ding cihnopna hi.Paul in amah uk sung thuzuite in thu nam nih a phawk ding uh deih hi:Nipi kikhop sial in, a thokik Jesu tawh ki muhkhopna a nei ahi uh hi,cih kithei-in, ama nuntakna sungah a kipawl theih semsem nading un,hehpihna ngetna ding hun ahi hi. Tua ban ah, ama kilemna amaute sungah a om theihna ding leh hong tung ding nipikal sung a, a nasepna uh ah lungnuam sinnuamin a sep theina ding un hehpihna ngetna ding hunzong ahi hi.
                   Christian thuzuite ading in dahna ding thu bang mah om lo hi. Gimna leh dahna i thuak ciang nangawnin zong lung dam ding ki sam hi. Tua tawh kisai Paul in, hih bang in hong han thawn hi. Nipi sial i kikhopna ah, a thokik Jesu tawh i kimuh khopna in, i sih ciang in amah tawh i kimuh khopna ding kiginkholna zong ahi hi. ‘Note’ nuntakna taktak Christu tawh a om ahih man in amah hong kilat ciang in note zong amah tawh hong kilang khawm in, amah tawh na minthang khawm ding uh hi’ (Col. 3:4). Christian thuzuite in ni khat ni ciang in kuamah suhkhiat theih lo lungdamna ngah ding hi, cih cian tak in theih ahih man un, amaute aa ding in hih lei tung gam ah bang mah dahna ding thu nei nawn lo uh hi.
                         Emmaus lam a zuan sawltak nihte kiang ah Jesu hong ki lat khit te,amaute in zong khuavak ngak zo lo in, azan azan in nungzuite kiang ah lungdamna thu gen ding in a pai pah uh hi. Nungzuipite’n zong, sawltak nihte’ thugen zong ngak man lo liang in Jesu thawhkikna thu na gen pah uh hi (lk. 24:35).

          Eite khempeuh in zong amaute mah bang in, Jesu’ thawhkikna thu pha nuntakna thak, a siangtho nuntakna leh mi dangte itna tawh teci pang in, a tangkote ihih ciat ding kisam hi. Paul in Jesu kilatnate a banban in Corinth thuzuite kiang ah a gen khit ciang in ama kiang ah a kilatna thu hih bang in gen hi: “A tawpna pen ah kei tung ah zong....hong ki lang hi” (1Cor. 15:8). Eite zong Paul mah bang in, Topa in lampi tuamtuam tawn in hong samna thu phawk in, i lungdam thei ding ki sam hi.

Source: Christian Catholic Faith
Share By: Zo Sangpy